18
Cjanengui nandya Babilonia
1 Hya xi cavatju vihi ne, cahvë nga ngu ángel xi nduvajne tsëhë ngahnga xi jemu tjin rë ngahñu cjua rë. Hane nangui ne, casahasen rë cojo hasen rë ngahñu jan.
2 Hane ángel jan ne, cojo ngu xta hñu cajindaya cuitjin:
―¡Cjanengui! ¡Cafë ngahñu rë Babilonia jyë! Quihndë suva machji rë tsëhë xitsehen. Ngajan tsujyihiya hasen tsehen, ngajan vangui yëjë chu nisë xi jinë chu ngu xcusun chocun, chu xi chohovëë xuta chu.
3 Cuatjin camá rë ta tsëhë xi xuta ngasunhndë ne, cavincha sca rë me cojo xan rë cjuatsehen ran. Cojo na vëhë ne, me xi vitexa me ne, casahmi me cjuatsehen. Hacuanitjin tsëhë xuta xi sahmi me negocio ta, camanchina me ngatsë rë cjuatsehen ran. ―Cuatjin cachja ángel.
4 Sehe cahndë nga ngu xta tsëhë ngahnga xi cachja cuitjin:
―Ngayun xi xuta naha ne, tetjun tsëhë nandya vihi. Tangunxun cojo sa xi cuajiin yun cuatjunxcun jyë́ rë, hane satiin nuju cjuañihi xi satë rë xuta vëhë.
5 Jyë́ rë na xi hacui nandya vëhë ne, casexohnga rë hisca cavechu ngahnga. Hane Nina ne, cjuaha cuenda me tsëhë cjuatsehen ran.
6 Nicuyun tsëhë na chuva xi casahmi na. Jo cuatjin vechutaha castigu xi cumá ran. Tisecjun rë copa ran jo cuatjin sa sehe hitsë sa cumá cjan xi cuma rë copa xi cavincha na tsëhë xuta.
7 Ngojo rë cjuaxta rë na xi jercu sahmi na mé xi fehya cjuatacun tsehen rë na ne, ndaja tuhun ran cjuañihi cjuachoho. Cuatjin cumá ran ta, cuitjin catsingatahacacun na cachja na: “Tejña cahndë́ rcun ta matitjun ngahan. Hacuiin cahan ngahan, satiin ná cjuachoho.” Cuatjin tsingatahacacun na.
8 Vëhë xi xcun ngu ni nixtin, cuechutaha ran yëjë ni, ta cuechutaha ran cjuachoho, cuechutaha ran jindya. Hacuaha tsicjëya ran ndihi. Cuatjin cumá ta, tsëhë xi Nina, me xi sahmi cuenda rë jyë́ ran ne, ma sahmi me yëjë ni.
9 Ngajan xi xuta xi rcun xi casahmi cjuatsehen ngajan hacuaha casua cjuasua xahasen rë ngajan ne, scuëë me nihndi rë, hane squihnda me hacuaha cuiyuju va me.
10 Hane cjuercun rë me ngatsë rë chircun xi tivatju ngajan, sehe squindaya me cuichja me cuitjin:
―¡Ay! Jercu choho cavatju ciudad ndajyihi, ciudad rcun. Tu ñahñu ni ne casatë rë yëjë ni cjuacjintacun xi cuma castigu rë.
11 Hacuaha xuta xi sahmi me negocio ne, squihnda me hacuaha choho cumá rë me tsëhë xi quihndë ne, tsajin yo cuatsë chaha xi viteña me,
12 chaha xi camá tsëhë oro, tsëhë quicha tyava, cojo ndyojo ndacun, cojo tu seti, cojo tsjian ndacun sa lino sa seda, sa xcusun hani sa moradu. Chaha rë ya xi ndaja jne, chaha xi camá tsëhë nehñu elefante, o tsëhë ya xi hnga chjí rë o tsëhë quicha sine, quicha hinda o tsëhë ndyojo seti.
13 Tsajin yo cuatsë rë chaha rë canela cojo yahnga xcusun xi sahmi xi ndaja chinë comida o sa tyjungunsa, sa balsamo xi hmí rë muro, sa vinu, sa aceite, sa ndyaja, sa chu tsánga, sa naxin o sa carreta, sa mosu cachaha rë xi hacui cjuahñu rë xuta. Tsajin yo cuatsë tsëhë me.
14 Cuitjin chja tsëhë nandya jan:
―Xcusun ndacun xi jercu cafehya xahasen riji ne, quijixin tsijin. Yëjë ni cjuanchina riji xi ndajyihi ne, cafëya, hane tsajin nu tsajin nixtin cuya sacu ri.
15 Ngajan xi me xi caviteña ngajan hane cojo vëhë cama nchina me ne, cjuercun rë me ngatsë rë chircun xi tivatju ngajan, xinchacun me cjin tsëhë, hane squihnda me hacuaha choho cumá rë me.
16 Cuitjin cuichja me tsëhë:
―¡Jemu va jyihi nandya! Camá ngu nandya jyë, jemu ndacun tsjian catsicaja rë xuta rë. Tsjian ndaja xcusun hani moradu. Tsjian xi cavaqui rë nachjun oro cojo ndyojo ndacun cojo tu seti.
17 Peru xcun xi ngu hora ne, cafë cavetsunya cjuanchina vë.
Hane yëjë me xi matitjun xi vitexa tsëhë barcu cojo xuta xi hincha me cahntsua, cojo cha xi sahmi xa xcun barcu o sa xuta xi sahmi negocio cojo, cumamijí sahmi tiña me tsëhë.
18 Squindayava me hya xi scuëë me nihndi rë xi seti hane cuichja me cuitjin:
―Hatuxa tsajin sa ngu ciudad xi cuanitjin ndajyihi sacuaha camá ciudad jyë vi.
19 Hane cuitejnu me scuan rcu me ta jemu choho má rë me hacuaha squihndava me cuichja me cuitjin:
―¡Cojo cjuatsehen rë xuta nandya vi! Ngatsë rë cjuanchina rë me ne, tu yo ni me xi tjin rë ngu barcu rë chaha ne, cama nchina me. Peru ngu ñahñu ne, cavetsunya.
20 Catamasua nuju tsëhë na, ngahnga. Catamasua nuju ngayun xi tyjahi cjuatacun nuju, ngayun xi má apóstol cojo ngayun xi má profeta. Catamasua nuju ta hindë casahmi Nina castigu na, casahmi cuenda me tsëhë na chuva xi casahmi na cojo nuju.
21 Ngajan xi ngu ángel xi jercu tjin rë ngahñu ne, cafaha me ngu ndyojo jyë chuva rë natsi rë molinu, hane catsingatjeya rë ngajñi ndachacun. Sehe cachja cuitjin:
―Chuva ngahñu vihi, cuanitjin ngahñu xi cjuinengui cojo nandya jyë xi hmí rë Babilonia. Hane tsajin nixtin xi cuya cumá.
22 Tsajin nixtin xi cuinuhya rë xi tsijane cha chjine arpa ngajan, o sa ngu sun, o sa fane chiruvi o sa fane tyjo. Hisca ngu cha chjine tsëhë tu mé ni xcusun ne, cuyaain sahmi xa ngajan. Hacuaha cuyaain nuhya rë ndyojo rë molinu xi sahmi scuan rë pan.
23 Ndihi rë ngu lámpara ne, cuyaain tsejen hasen rë ngajan. Tsajin nu tsajin nixtin xi ngajan cuma cjuavixan. Cuatjin cumá cojo ta, xuta xi casahmi me negocio ngajan ne, jemu hñu cjua rë me cojo yëjë ni xuta ngasunhndë. Hane cavincha sca me xuta ne, cavindacha me cojo xcusun rë me.
24 Hacuaha ngajan cavanga jni rë profeta cojo tsëhë xuta xi tyjahi cjuatacun rë me xcun Nina cojo jni rë yëjë ni xicjin me xi camá catsiquehen me nguehe ngasunhndë.