3
Puohny Joon Ngad Luogwahy
(Mat 3:1-12; Mak 1:1-8; Jon 1:19-28)
1 Yihdh nihn nu, e ngaa me nyinge Tiberio e naa anahg Jaah gihr Roama gihn duohng naa amag paajo keehd kar run apaar wonge abiihj. Yihdh run nu thiow e Poantya Pilaato anaa anahg muudiihr gihr muudiihrya mar Judea. Kedea Eroade e anaa anahg ruohdh naa amag Gaalili ke kare maa Pihlihb umen e naa amag Yiturea kedea piny Tracoanitij. E thiow Licanaj e naa amag piny Abilen.
2 Yi wong nu thiow e naa anahg Anaj kedea Kaaypaj jo doohng yaa lam. Yihdh run nu e naa abeehn Juoge unyoadhe luube yihr Joon waahd Jakarya, maano e Joon anaa yi ukang dom.
3 Batiene arumo e Joon ake aay e kaahn yihdh miehy dhe naam Joohrdoan e puohny nyoge kejea maan gene anyoohne giih ayug gene kedea umuoj wudh gen ke luogwahy beere anyoohne giih gen wii piny yihr gen.
4 Gihn nu apahdh kare wa kaa anaa agweede yi kitaab mar Yicaaya agamloohngjuog naa,
“Nud ke duol me kwaag yi ukang,
‘Gwiiru yooh yihr Ruohdh,
gwiir yooh me ne cohg cohg yihre.
5 Yoadu kwaad kuohn beehda aluungo ni,
dhiilu yihdh gen ke paahngo une wudh gene yiiw yiiw.
Maa kuohn thoohny ni,
kedea kuohn beehda goode ni,
laahyu wudh gen piny cang.
E thiow dahng yoadu dhog yiehdhe
giih ne ngool ngool ni,
tienyu gen udoohng gene ne cad cad.
E kwaad yiehdhe muu yihdh gen ne cony cony ni,
ge dhiilu kaa puuyo udoohng gene nong mee.
6 Lwaag cang ke bang upiny,
dhe yoohn ka ubeehn Juog ne boadh nyoge kii ngo
udhiil gene ke niido ke nying gen.’ ”
7 Kaano arumo e naa abeehn amahr nyoge me thoohdh uwaahd gene oogo ubeehn gene bang Joon beere wudh gen ke muojo keehd luogwahy. Noono e Joon ake rubo keehd gen kobe, “Wu nyoge me reje me neehn thoohne maa wu beehda yaa waal. Gihn daahdu ngahj! Wu daahd ukoolu rahny cwihny Juog ge beehn ni, abea cwihnyu kuu arahnyo rog anyoohne giihu!
8 A teed lubo maa athiir yihru: thubu kaa awaahn kan ke tiihy giih me beeye beere ngo ke ngeyo rogu kejea anyoohne giihu ge alogu ngahdhu. Kaano e kare nud umuoja wudhu ke luogwahy. Yaage wudhu keá paru kejea ne nahgu nyethen Abraahm e Juog wu buu ukihme. Wu kihm Juoge kihmo keehd maa akwanye wun ne joe. Kare nud yihr Juog ukaabe wey leele giih ni uloge gen udoohng gene ne kwaay Abraahm.
9 Ukihm mar Juog muu uroomo wa ley maa apaage me ngod yen piny keehd biey gen agwiire ke nyingu. E kwaad yaadh gihn nyuol keehd nyethen me be cam dhiil kaa ngod piny cang uthoohre yi maaj ne waang.”
10 Batiene arumo e nyoge Joon apeehny gene peehnyo kob gene, “Abea yug wane gihn arumo?”
11 E ngo abeehr Joone kobe, “Ngaa yihre ne waare ariow, dhiile acielo ke cubo yihr ngaa yihre tooro waahro. E ngaa yihre ne gihn me cam, nywaage cam nu keehd ngaa yihre tooro cam.”
12 Yaa gwaay cuol thiow, ge abeehn bang Joon beere wudh gen ke muojo keehd luogwahy. Maa apeehy gene kob gene, “Ngad puohny, yug wane gihn?”
13 Kob Joone yihr gen kea, “Jwaaru ajweehr gihn daahd akuume cog.”
14 Kaano thiow e acaakere mooge ge ake peehyo yihre kob gene, “Yug wane gihn?”
Kob Joone kea, “Ngiihny nyoge keá peeju ke bad. Gihn maa toohd thiow, keá tahru piny yi kuohm dhaano ke dhieny. Rom dhaane kaa koohg mare cog ne kooge ke ngo.”
15 Amahr nyoge me thoohdh thiow ge anaa ake kuro kejea Juog ka oohre Ngad Boadh nyoge yihr nyoge adoohng cahng. Gihn nu arumo e nyoge cang cwihny gen aroam gene roamo kejea ka moogo e buu unahg Joon e nuu unahg Ngad Boadh nyoge keree?
16 Maa abeehr Joone ngo yihr gen cang, “Yaage luogwahy mara ge cuba yihru kan ni, beehda luogwahy mar piih now. Ngaa me teege akaal wiih teeg mara muu ulog beehno ke batiena nud. Ngaan nu e naa ngaan duohng riha, gihn me a be rom goony thool giih wuoy tiene. Wahy Juog ke ngude e nuu uwuoje wudh nyoge ne muoj gen ke luogwahy beere nyoge cwihny gen ungahmo kedea uteehng yiiho gihr gene wa ngiihnyo e thaahdh ke maaj.
17 Ataaj me wa gihr kuor beel nii cinge, noono e nyoge ge kuore kuoro wa beel ukedhe liil yi gala. Abea coang ge ucwinye keehd deeh maaj me waang e ngo be gug.”
18 Joon nyoge anaa puohnye keehd Ciig Beer keehd dhog yiehdhe me thoohdh keter uwiide wiih lume piny yihr gen thiow kejea dhiil gene dhe yoohn kar kuowo mar gen ke waaro.
19 Eroade, ge anahg maamuur, abeehn Joone ne cayo ke nying Eroadaj ciih umen, bang gihn ngo akedh Eroade wod ne dhaago yihre. Ngo acay Joone ke nying kwaad giih me reje mooge maa atiihye cang.
20 Maa abeehn Eroade uyuge deeh awuohj moogo me duohng umage Joon udiile ngo wod yi karkoohn.
Luogwahy Acub Yihr Jeacuu
(Mat 3:13-17; Mak 1:9-11)
21 Nye kaano amuoj Joone wudh nyoge muojo, e Jeacuu wiihe ake muojo thiow keehd luogwahy. Abea nye kaa anaa apoohde e Jeacuu anaa ake kwahyo, e maalo yea ree ayabe yabo,
22 ubeehn Wahy Juoge wa kihd akuur upiihe wiih Jeacuu. Kaano e duol ake lihngo kii maalo kobe, “Yih naa waahda maa anhyaara kedea cwihnya med rihi.”
Ka Kwaan Batien Jeacuu
(Mat 1:1-17)
23 Ge anaa athub Jeacuue ke tiihy mare ni, e rune ge anahg kar dhaano aduuno wonge apaar. Ngo anaa acuohn kejea ngo beehda waahd Jocebe now. Jocebe ge waahd Ehli ni.
24 Abea wur Ehli anahg Mathahd.
Mathahd wahn anahg Leabi,
wur Leabi anahg Malagi.
Malagi wahn anahg Janaa,
e wur Janaa anahg Jocebe moogo.
25 Jocebe gihn anahg waahd Mathiiatyaj.
Amoj ge anahg wur Mathiiatyaj.
Wur Amoj anahg Nahum,
e Nahum wahn anahg Ejli.
Nagai wur Ejli.
26 E Nagai waahd Maadh.
Maadh waahd Mathiiatyaj moogo,
wur Mathiiatyaj gihn ni naa Cemean.
Cemean wahn anahg Joceg.
Joda wur Joceg.
27 E Joda wahn anahg Joanan.
Rehja naa wur Joanan.
Jerubaabel wur Rehja.
Cealtiel wur Jerubaabel,
e wur Cealtiel beehda Neari.
28 Neari waahd Malagi moogo keehdo.
E Malagi gihn wahn beehda Adi.
Adi waahd Kojam,
e Kojam waahd Elmadam.
Elmadam waahd Er.
29 E Jocwa moogo e naa wur Er.
Eliejer wur Jocwa.
Jorim wur Eliejer.
Mathahd moogo keehdo e naa wur Jorim,
e Leabi moogo e naa wur Mathahd gihn ni.
30 Leabi gihn wahn anahg Cimon.
E Cimon wahn anahg Juuda.
Juuda wahn anahg Jocebe moogo keehdo.
Jonam e naa anahg wur Jocebe gihn ni.
Elyakihm anahg wur Jonam.
31 Ubeehn Melea unahge wur Elyakihm.
Melea keehdo wahn anahg Mena.
Wur Mena Mathaadha moogo dahng.
E Mathaadha gihn ni wahn anahg Nathan.
Nathan wahn anahg Deabid Ruohdh.
32 Deabid wahn anahg Jeci.
E Obed e naa anahg wur Jeci.
Buoj wur Obed.
Calmon wur Buoj.
Naacohn wur Calmon.
33 Aminadaab wur Naacohn.
Admin wur Aminadaab.
Wur Aminadaab e naa Arini.
Ejron wur Arini.
Perej wur Ejron.
Perej wahn Juuda moogo.
34 Juuda gihn wahn anahg Jeakob.
Jeakob waahd Yijaag.
Yijaag waahd Abraahm.
Abraahm waahd Tearah.
Tearah waahd Noohr.
35 Wur Noohr e naa Cerug.
E Cerug wahn anahg Rio.
Peleg wur Rio.
Peleg keehdo wahn anahg Eber.
Wur Eber anahg Ceala.
36 Ngad batien Kaayn wur Ceala.
Arpagjad wahn anahg ngad batien Kaayn.
Ceam e naa wur Arpagjad.
Nooh wur Ceam.
Lamej wur Nooh.
37 Methucala wur Lamej.
Enog wur Methucala.
Enog wahn anahg Jared.
Maahlaalel wur Jared.
Kaayn moogo e naa wur Maahlaalel.
38 Enoj e naa wur Keanan gihn ni.
Cedh naa wur Enoj.
Adam e naa wur Cedh.
Abea Adam, e naa waahd Juog.