46
Ote kuom Misri
1 Ma e wach Jehova Nyasaye mane obirone janabi Jeremia kuom ogendini:
2 Kuom Misri:
Ma e ote ne jolwenj Farao Neko ruodh Misri, mane oloo Karkemish e Aora mar Yufrate gi Nebukadneza ruodh Babulon e higa mar angʼwen mar Jehoyakim wuod Josia ruodh Juda:
3 “Ikuru okumba magu,
madongo kod matindo,
kendo uwuog udhi e kedo!
4 Gauru farese, idhuru farese!
Kawuru kereu kurwako oguteu mag lweny!
Piaguru tongeu, rwakuru okumba mau!
5 En angʼo ma aneno?
Kihondko ogoyogi,
kendo giringo ka gia kar lweny
nikech thuondi mag-gi mag lweny oselo.
Giringo ka luoro omakogi ma ok gingʼi ngʼegi,
kendo gin-gi luoro malich koni gi koni,”
Jehova Nyasaye wacho.
6 “Joma yot ok nyal ringo
kata joma otegno ok nyal tony.
E yo nyandwat but Aora Yufrate
gichwanyore kendo gipodho.
7 “Ma en ngʼa magingore ka aora Nael
kendo mana ka aore ma pigegi bubni?
8 Misri bubni ka aora Nael
kendo mana ka aore ma pigegi bubni.
Owacho ni, ‘Abiro gingora kendo anapongʼ piny;
anaketh mier madongo kod ji modakie.’
9 Wuoguru, yaye farese!
Yaye, un joriemb geche, riembgiuru matek!
Dhiuru nyime,
yaye un jolweny machwo moa Kush,
gi Put motingʼo okumbini,
kaachiel gi chwo Lidia maywayo atungʼ.
10 To odiechiengno en mar Ruoth,
Jehova Nyasaye Maratego ma en odiechiengʼ,
ma ochuloe kuor ni wasike.
Ligangla noneki nyaka owinj ni orome,
kendo nyaka otiek riyo mare gi remo.
Nimar Ruoth, Jehova Nyasaye Maratego,
nochiw misango e piny mantie yo
nyandwat but Aora Yufrate.
11 “Dhiyo nyaka Gilead
kendo imany yath, yaye Nyar Misri Mangili.
To kata obedo ni imedo manyo yedhe
to imenyo kayiem kendo ok inichangi.
12 Ogendini nowinj wichkuot momaki;
ywakni nopongʼ piny.
Jolweny nochwanyre kuom moro ka moro;
giduto ginipodhi kanyakla.”
13 Ma e ote mane Jehova Nyasaye owachone Jeremia janabi kuom biro Nebukadneza ruodh Babulon mondo omonj Misri:
14 “Land wachni e piny Misri,
kendo igo milome e Migdol;
Memfis gi Tapanhes ni:
‘Kawuru kereu kendo ikreuru,
nimar ligangla nego jogo molwori.’
15 En angʼo momiyo
jolweny magu opie piny?
Ok ginyal chungʼ,
nimar Jehova Nyasaye nolwargi piny.
16 Ginichwanyre moluwore oluwore;
giniluowre kuom jowetegi.
Giniwachi ni, ‘Aa malo,
wadog ir jowa wawegi;
kendo e pinywa owuon,
mabor gi ligangla mar joma thiro ji.’
17 E kanyono giniwach ni,
‘Farao ruodh Misri en mana jakoko matek,
nikech thuolo mane en-go nobaye.’ ”
18 Ruoth wacho niya,
“Akwongʼora gi nyinga awuon,
ma en Jehova Nyasaye Maratego,
ngʼato achiel nobi machalo gi Tabor e dier gode,
kata ka Got Karmel mantie but nam.
19 Pang gigi mar dhiyoe twech,
un joma odak Misri,
nimar Memfis nowe gunda,
kendo tieke chuth maonge ngʼama nodagie.”
20 “Misri en nyaroya maber neno,
to kalabugo birone koa yo nyandwat.
21 Jolweny mondiki chal gi nyiroye machwe.
Gin bende ginilokre kendo giring kanyakla,
ok giniriti,
nimar odiechiengʼ mar masira biro kuomgi,
kinde margi mar kum.
22 Misri nokudhi ka thuol maringo
ka jasigu masudo machiegni gi teko;
giniked kode gi ledhi,
mana ka chwo matongʼo yiende.”
23 Jehova Nyasaye wacho niya,
“Ginibet bungu mare,
kata obedo ni oyugno kamano.
Gingʼeny moloyo dede, ok nyal kwan-gi.
24 Nyar Misri nomi wichkuot,
kendo nochiwe ne jogo moa yo nyandwat.”
25 Jehova Nyasaye Maratego, ma Nyasach Israel, wacho niya, “Achiegni kelo kum kuom Amon ma nyasach Thebes, kuom Farao, kuom Misri gi nyisechene kod ruodhi mage, kod jogo mogeno kuom Farao.
26 Anachiwgi ne jogo madwaro ngimagi, ne Nebukadneza ruodh Babulon gi jotende. To kata kamano ji nodhi nyime dak Misri kaka chon,” Jehova Nyasaye owacho.
27 “Kik iluor; yaye jatichna Jakobo;
bende kik ibwogi, yaye Israel.
Adiera abiro resi e piny mabor,
kaachiel gi nyikwayi
e piny mane otergie twech.
Jakobo nodhi nyime ka nigi
kwe gi dak maonge luoro,
kendo onge ngʼama nobwoge.
28 Kik iluor, yaye Jakobo jatichna, nimar an kodi.
Kata obedo ni atieko ogendini
duto ma asekeyou e diergi,
ok anatieku chuth.
Anakumu to mana gi bura makare;
ok anaweu ngangʼ ma ok akumou,”
Jehova Nyasaye owacho.