7
1 e kinde ka kinde madwaro changoe Israel,
to richo mag Efraim elore
kendo timbe mahundu mag Samaria fwenyore.
Gihero wacho miriambo,
jokwoge turo udi,
jonjore mayo ji e yore;
2 to ok gisefwenyo
ni aparo timbegi duto maricho.
Richogi oduodogi,
kendo ni e wangʼa ndalo duto.
3 “Gimoro ruoth gi timbegi marichogo,
yawuot ruoth bende gimiyo mor gi miriambo.
4 Giduto gin joma terore,
giore ka kendo,
ma jated makati oweyo chwaloe mach
nyaka otiek dwelo mi makati kuodi moromo tedo.
5 E odiechiengʼ mar nyasi ruodhwa
yawuot ruoth madho divai mamer,
mi riw lwetgi gi jo-ajara.
6 Chunygi chalo gi kendo,
gidhi ire ka gisechano timo timbe mochido.
Gombogi liet ka maa otieno,
kochopo okinyi to omuoch ka mach maliel.
7 Giduto giliet ka kendo,
gikidho jotendgi.
Ruodhigi bende gitieko,
to onge ngʼato kuomgi maluonga.
8 “Efraim riwore gi ogendini,
kendo ochalo gi makati ma ok okuot.
9 Ogendini tieko tekone,
to ok ofweny.
Lwar okuorore e yie wiye,
to ok ongʼeyo.
10 Tok teko mar jo-Israel bedonegi janeno ka ngʼadonegi bura,
to kata magi duto timorene,
to ok oduogi ir Jehova Nyasaye ma Nyasache,
kata mana manye.
11 “Efraim chalo kaka akuch odugla
mawuondo yot kendo mofuwo,
giluongo Misri
to gilokore gidhi Asuria.
12 Ka gidhi, to abiro bolo goka kuomgi;
analwargi piny ka winy mafuyo malo.
Ka anenogi ka gichokore kanyakla,
to anamakgi duto.
13 Okwongʼ-gi,
nikech gisebedo mabor koda!
Kethruok ne gin,
nikech gisekweda!
Asedwaro mondo aduog-gi ira
to giriambo kuoma.
14 Ok giywagna koa e chunygi
makmana gidengo e kitendinigi.
Gichokore kanyakla ne cham kod divai manyien
to giringo gijwangʼa.
15 Ne atiegogi ma amiyo gibedo motegno
to gichano gik maricho kuoma.
16 Gitamore duogo ir Nyasaye Man Malo Moloyo;
gichalo atungʼ ma ok nyal tigo.
Jotendgi noneg gi ligangla
nikech wechegi mag nyadhi.
Kuom mano nojargi
e piny Misri.”