14
Lokruok kuom richo kelo gweth
1 Dwoguru ir Jehova Nyasaye ma Nyasachu, yaye Israel.
Richou ema osemiyo upodho.
2 Kaw wechegi
kendo uduog ir Jehova Nyasaye!
Wachne kama:
“Wenwa richowa duto,
kendo yie irwakwa gi ngʼwono,
mi wanapaki gi dhowa.
3 Asuria ok nyal resowa,
bende ok wana idhi faresegi mag lweny.
Ok wanachak wawach kendo ni,
‘Nyisechewa’ ne gik mwaloso gi lwetwa wawegi,
nimar kuomi, ema, nyithi kiye yude kech.”
4 “Anachang-gi kuom baro margi mane gibarogo,
kendo anahergi maonge achuna,
nimar mirimba osewuok kuomgi.
5 Anachal mana ka thoo mar okinyi ne Israel;
kendo nolodhi mana ka ondanyo,
kendo tiende nokar
mana ka yiend Lebanon;
6 bade nolodhi makee.
Enobed maber ka yiend zeituni,
kendo nodungʼ mangʼwe ngʼar ka yiend Lebanon.
7 Ji nochak odag e tipone.
Nonyaa maber mana ka cham,
kendo nonyag maber ka mzabibu
mi nobed gi huma ka divai moa Lebanon.
8 Yaye Efraim en angʼo ma datim gi nyiseche manonogi kendo?
Anadwoke kendo rite,
achalo gi obudo mangʼich,
nyak mari aa kuoma.”
9 En ngʼat mane mariek?
Obiro fwenyo tiend gigi.
En ngʼat mane manyalo fwenyo tiend wechegi?
Obiro ngʼeyogi.
Yore mag Jehova Nyasaye nikare,
joma nikare ema wuothoe,
to joma jendeke to chwanyore.