6
Osiem jo-Israel ne kum mabiro
1 “Mano kaka unune malit un joma odak maber e Sayun,
kod un joma nigi geno ni gode mag Samaria nyalo resogi,
kaachiel gi un joma omi luor mag oganda maduongʼ,
ma jo-Israel dhi irgi
mondo oyud konyruok!
2 Dhiuru uneye Kalne, mi uchop nyaka Hamath,
eka bangʼe ulor udhi nyaka Gath manie piny jo-Filistia.
Uparo ni pinjego ber moloyo pinjeu?
Koso uparo ni nitiere piny maduongʼ moloyo pinyu?
3 Un joma ok odewo odiechieng bura mabiro,
to kata kamano timbeu medo mana kelonu chandruok!
4 Un joma nindo e kitendini mokedi gi lak liech,
kendo utaroru e kombeu madongo,
kuchamo nyirombe mayom ma jambu onywolo,
kod nyirwethu machwe mopidh maber.
5 Un joma goyo thum kaka Daudi nogoyo
kendo uchuogo wende mag nyatiti.
6 Un joma madho divai mangʼeny gi agwetni madongo,
kendo uwiroru gi modhi mangʼwe ngʼar ma nengogi tek,
to ok ane ka un gi lit kata ka joka Josef rumo kamano.
7 Kuom mano, un e joma ibiro kuongo daro kitero e twech,
kendo mano ema biro bedo giko mar dhialruoku.”
Nyasaye osin gi sunga mar jo-Israel
8 Jehova Nyasaye Manyalo Gik Moko Duto, ma en Jehova Nyasaye Maratego, osekwongʼore kosingore owuon niya,
“Asin gi sunga mar joka Jakobo,
kendo asin nyaka gi ohinga mag-gi moger motegno;
omiyo abiro chiwo dalagi kod gik moko
manie iye e lwet wasigu.”
9 Ka ji apar odongʼ kata e ot achiel, to gin bende gibiro tho.
10 To ka achiel kuom wede joma othogo obiro mondo okaw wadgi mondo owangʼ, to nopenj ngʼat motonyno niya, “Bende ngʼato ni kodi kanyo?” Ngʼatno nodwoke niya, “ooyo,” kendo nowachne niya, “Lingʼ thi nikech ok onego waluong nying Jehova Nyasaye ka.”
11 Jehova Nyasaye osegolo chik,
kendo obiro muko udi madongo malokre pidhe,
to udi matindo obiro toyo matindo tindo.
12 Bende farese nyalo ringo e kite,
koso ngʼato nyalo puro wi kitego gi dhok?
Kata kamano, un to uloko bura makare bedo gima kech,
bende tim makare uloko gima rach.
13 Umor ka umonjo jo-Lo Debir ka upakoru niya,
“Donge ne waloyo jo-Karnaim gi tekowa wawegi?”
14 Omiyo Jehova Nyasaye ma en Nyasaye Maratego wacho niya,
“Yaye jo-Israel, abiro kelo oganda moro mondo omonju,
ka gisandou chakre Lebo Hamath nyaka
e holo mar Araba.”