27
1 Mí ịpị́ mi ụ́ꞌdụ́ drụ̃sị̃ rĩ sĩ ku,
ãꞌdusĩku míní nị̃jọ́ la ãꞌdu la mụ ru idélé ụ́ꞌdụ́ drụ̃sị̃ rĩ gá nĩ yã ku rĩ sĩ.
2 Mí ịpị́ mi ími tị sĩ cénĩ ku, ꞌbá ãzí ndú la ꞌbã ịpị́ mi nĩ,
mí ịpị́ mi cénĩ-cénĩ rú ku.
3 Írã kí cínákí be pírí ãnzị rú,
wó ꞌbá azalépi aza-azâ rĩ la ásị́ ãzá fẽ ndẽ ãko ị̃rị̃ ꞌdĩ kí ãnzị sĩ pírí rá.
4 Ũmbã ĩꞌdi ũnzí ãzíla ásị́ ãcĩ ĩꞌdi lị́kị̃,
wó ãjã ndẽ ãko ꞌdĩ kí ũnzĩkãnã sĩ pírí rá.
5 ꞌBá ãzí ꞌbã ị́jọ́ ũnzí aꞌdájó tọndọlọ rĩ ĩꞌdi múké
ndẽ lẽtáŋá zị̃jó ĩꞌdiní cí rĩ rá.
6 ꞌÉbí mî wọ̃rị̂ ꞌbã ꞌbãlé ími ụrụꞌbá gá rĩ ĩꞌdi múké ndẽ
mẹ́rọ́ꞌbá ꞌbã ími amvujó nĩ rĩ rá.
7 ꞌBá agalépi ãkónã sĩ tré rĩ la gã ãkónã ãjị́-ambamba ãnụ́ áni rĩ nalé úmgbé,
wó ꞌbá ãbị́rị́ ꞌbã ndẽlé rá rĩ ní ãkónã ụ̃jị́kị́rị́lị́ rĩ la ru ꞌbị̃ ị̃lị́-ị̃lị́ ru.
8 ꞌBá fũlépi lị́cọ́ ĩꞌdidrị̂ agá ꞌdâ sĩ mụjó abá trũ mị́rị̃ rú rĩ ĩꞌdi cécé
ãríŋá ĩꞌdi ꞌbã jõrõvũ aꞌbelépi rá mụlépi abá trũ rĩ áni.
9 Ãdu ngụ̃lépi ãjị́ trũ vĩrĩ rĩ kí lũbánĩ be ãyĩkõ fẽ ásị́ ní,
wọ̃rị́ ígátáŋá pịrị rĩ fẽlépi rĩ la ãyĩkõ fẽ gẹ̃rị̃ ãlu ꞌdĩ sĩ.
10 Mí aꞌbe jõ mî wọ̃rị̂ jõku mí átẹ́pị ꞌbã wọ̃rị̂ ku,
ị́jọ́ ũnzí drĩ sĩ ími ịsụ́ ímụ rû sĩ mî ádrị́pị zịlé ãzãkoma ịsụ́jó ku.
Ĩꞌdi múké mụjó ãzãkoma gá mî jĩránĩ rụ́ ndẽ míní mụjó mî ádrị́pị uꞌálépi mị́rụ́ ꞌdãá álị́ rĩ rụ́ rĩ rá.
11 Mâ ngọ́pị, mí adru jõ ũndũwã rú, áma ásị́ la dó sĩ uꞌá ãyĩkõ sĩ,
ma dó sĩ ꞌbá ị́jọ́ jọlépi áma ụrụꞌbá gá rĩ kí umvi múké.
12 ꞌBá ũndũwá ru rĩ la ị́jọ́ ũnzí ndre ãzíla ĩꞌdi sĩ apá rá,
wó ꞌbá ị́jọ́ ũrãlépi ku rĩ lã fi alagá ãzíla ĩꞌdi ĩꞌdi drị̃ gá ũcõgõ ají.
13 Lẽ íꞌdụ bõngó ꞌbá sãdínĩ rú gúrã ꞌbãlépi ꞌbá ĩꞌdi ꞌbã nị̃lé ku rĩ ní rĩ rá,
írụ ĩꞌdi dẹ́nọ̃ tị gá drĩ idé la ũkú acị́lépi mị́rị̃ rú rĩ ní rĩ gá.
14 ꞌBá ĩꞌdi ꞌbã jĩránĩ zịlépi ụ̃ꞌbụ́tị nị́nị́ ụ́ꞌdụ́kọ́ re sĩ rĩ ála ĩꞌdi lã ꞌbá ꞌbá wãlépi la rú.
15 Ũkú ãwãlépi ambamba rĩ ĩꞌdi cécé uzogó ralépi jó gá sáwã pírí sĩ rĩ áni,
16 ĩꞌdi drị̃ ụtrị́jó rĩ ĩꞌdi cécé ãlụ́kụ́kụ̃ atrịjó rĩ áni jõku ãdu rụjó drị́ ãndá sĩ rĩ áni.
17 ꞌBá la ị́jọ́ ụ̃nị̃ ꞌbá drị́,
cécé aya ꞌbã aya sị́ jĩjó rĩ áni.
18 ꞌBá úlúgó ife tãmbalépi rĩ la ãka la na rá,
ãzíla ãtíꞌbó ãmbógó ĩꞌdidrị̂ tãmbalépi rĩ la ãrútáŋá ịsụ́ rá.
19 ꞌBá ꞌbã ásị́ la ĩꞌdi ãꞌdi ꞌi yã rĩ iꞌda
cécé ị̃yị́ ꞌbã ꞌbá mẹ́lẹ́tị iꞌdajó rĩ áni.
20 Ãngũ ꞌbá drãlépi rá rĩ ꞌbadrị̂ kí Ãbãdónĩ be aga kí ku
cécé ãko ꞌbã cajó ꞌbá ꞌbá ru rĩ mịfị́ gá ku rĩ áni.
21 Ála gólũdĩ kí ụ̃ꞌbị̃ sílĩvã be ãcí sĩ
wó ála ꞌbá ụ̃ꞌbị̃ ịcụ́ŋá sĩ ĩꞌdi ịcụ́jó rĩ sĩ.
22 Ídrĩ táni ꞌbá azalépi aza-azâ rĩ sị̃ jị́kị̃ ife sĩ
jị́kị̃ agá cécé ãná sị̃lé rĩ áni,
mí icó aza drị̃ la gá rĩ ũfũlé ku.
23 Ímba ãnãkpá mídrị̂ kí tã múké-múké,
ífẽ ími ásị́ pírí sĩ kí tãmbajó,
24 ãꞌdusĩku málĩ adru kí jã ꞌdâ ku ãzíla sụ́rụ́ adru kí vâ jã ꞌdâ ku.
25 Ídrĩ ásé lị ꞌbo ꞌdã ꞌbã ũngúkú gá
ásé úꞌdí ꞌbé pá gá rĩ la dó ãrũ zolé nĩ,
26 mí icó kãbĩlõ ꞌbíko sĩ bõngó idélé rá,
ãzíla ị̃ndrị́ sĩ mí icó ámvụ́ ĩgbãlé rá.
27 Mi dó sĩ adru lẹ́sụ́ ị̃ndrị́ drị̂ trũ ĩyõ rú
sĩ ími izójó ꞌbá mídrị́ lị́cọ́ gá
ãzíla izonzi mídrị́ ãtíꞌbó ru rĩ kí abe.