20
1 Íwá mvụŋá la ꞌbá fẽ idemará idelé, ĩꞌdi ꞌbá fẽ uzálé
ãzíla ĩmẽrãjó íwá sĩ rĩ la fẽ mi adru ũndũwã kóru.
2 Úpí ꞌbã ũmbã ĩꞌdi cécé kẹ̃mị̃ ꞌbã awájó rĩ áni,
ꞌbá ĩꞌdiní adrã fẽlépi rĩ la drã ndrụ̃.
3 Ĩꞌdi ị̃nzị̃táŋá ru ꞌbá ãwãŋá gãlépi úmgbé rĩ nî,
wó ꞌbá azalépi aza-azâ rĩ la ãwãŋá iꞌdó gbõrú-gbõrú.
4 Ũvúꞌbá sõ ámvụ́ áyi múké rĩ sĩ ku;
ị́jọ́ ꞌdĩ sĩ sáwã ãkónã ũkũnãjó rĩ gá icó ãkónã ịsụ́lé ku.
5 Ị́jọ́ ꞌbá ꞌbã ásị́ gá rĩ ĩꞌdi ị̃yị́ kị́rị́ rĩ áni,
wó ꞌbá vãtáŋá trũ rĩ la ị́jọ́ la uvá rá rĩ gá nĩ.
6 ꞌBá ũꞌbí kí jọ la kí lẽtáŋá ukólépi ku rĩ trũ,
wó ãꞌdi la ꞌbá ãꞌị̃táŋá trũ rĩ ịsụ́ nĩ yã?
7 ꞌBá ãlá acị́lépi ị́jọ́ pịrị rĩ agá rĩ;
ꞌbã anzị kí adru drị̃lẹ́ba rú ĩꞌdi vúlé gá ꞌdâ!
8 Úpí drĩ ri úmvúke ĩꞌdidrị̂ drị̃ gá ị́jọ́ lịlẹ́,
ĩꞌdi ị́jọ́ ũnzí ꞌa uya mịfị́ ĩꞌdidrị̂ sĩ.
9 Ãꞌdi icó jọlé la, “Ámba áma ásị́ tã ãlá ru;
ma dó ꞌbãngá sĩ ãlá ru ị́jọ́ ũnzí kóru rĩ gá nĩ yã”?
10 Kị́lọ̃ sĩ ãko ụ̃ꞌbị̃jó úmgbó ndú ndú ãzíla ãkójó sĩ ãko ụ̃ꞌbị̃jó úmgbó ndú ndú ĩnzõ rú ꞌdĩ kí,
Úpí ngụ̃ kí ị̃rị̃ trá ũnzí.
11 Átã ála ngọ́tị́ŋá nị̃ ị́jọ́ ĩꞌdi ꞌbã idélé rĩ kí sĩ,
ị́jọ́ ĩꞌdi ꞌbã idélé rĩ kí pịrị ãzíla múké yã rĩ kí sĩ.
12 Bị́lẹ́ sĩ ị́jọ́ arejó rĩ kí mịfị́ sĩ ãngũ ndrejó rĩ abe;
Úpí ũꞌbã kí pírí nĩ.
13 Ídrĩ ụ́ꞌdụ́ koŋá lẽ ambamba mi acá lẽmẽrí;
mí ángá ụ́ꞌdụ́ gá rĩ sĩ sĩ ãzị́ ngajó ãzíla mi dó sĩ adru ãkónã trũ wẽwẽ rú.
14 ꞌBá ãko ĩgbãlépi rĩ la jọ la, “Ãjẹ̃ adru múké ku! Má icó ụ̃rọ̃drị́ ịsụ́lé ku!”
ꞌDã ꞌbã ũngúkú gá drĩ dó trũ mụ ꞌbo, ĩꞌdi dó ãfó ají ãko ĩꞌdi ꞌbã ĩgbãlé ꞌdã sĩ.
15 Ị́jọ́ jọlé nị̃táŋá sĩ rĩ ãjẹ̃ rú ndẽ
gólũdĩ ãzíla ŋálí ãjẹ̃ rú rĩ kí rá.
16 Lẽ íꞌdụ bõngó ꞌbá pá tulépi sãdínĩ rú ꞌbá ĩꞌdi ꞌbã nị̃lé ku rĩ ní gúrã rú rĩ rá.
írụ ĩꞌdi dẹ́nọ̃ tị gá drĩ idé la ũkú acị́lépi mị́rị̃ rú rĩ ní rĩ gá.
17 Íná ulélé ulê ꞌbá ãzí drị́ rĩ la ru na ãjị́-ambamba rú,
wó vúvúlé ru ĩꞌdi ru uja ími tị gâlé cụ̃rụ̃mụ̃ áni.
18 Mí itú ị́jọ́ kí ị́jọ́ amáŋá sĩ,
mí ịsụ́ ímbátáŋá pịrị rĩ rá ka ímụ ãꞌdị́ gá ĩndõ.
19 ꞌBá káláŋá ujílépi rĩ la ị́jọ́ sírĩ rú ri kí iyá ãmvé
ị́jọ́ ꞌdĩ sĩ mí uꞌá ꞌbá tị ãcí rĩ be ku.
20 ꞌBá ãzí drĩ átẹ́pị̃ kí wã ãndrẽ be,
ídri ĩꞌdidrị̂ la ãsị̃ ụ̃trụ́ ru cécé tárã ꞌbã anụ́jó ị́nị́ sĩ rĩ áni.
21 ꞌBá ãwítã ịsụ́lépi mbẽlẽ iꞌdóŋá gá rĩ,
icó adrulé drị̃lẹ́ba rú ãsị̃ŋá gá ku.
22 Lẽ íjọ, “Ma ị́jọ́ ũnzí míní idélé ꞌdĩ ꞌbã ãrígó tị ũfẽ rá la ku!”
Ítẽ Úpí ꞌi ãzíla ĩꞌdi ími pa rá.
23 Úpí ngụ̃ kị́lọ̃ sĩ ãko ụ̃ꞌbị̃jó ĩnzõ rú rĩ kí ũnzí
ãzíla uꞌá ãyĩkõ sĩ ãko ụ̃ꞌbị̃lé ĩnzõ rú rĩ kí sĩ ku.
24 Acị́ŋá ꞌbádrị̂ Úpí la drị̃ la ce nĩ,
ꞌbá la dó icó gẹ̃rị̃ ĩꞌdiní acị́jó rĩ nị̃lé íngoní ru?
25 Míní ũyõ najó Ãdróŋá ní ĩnzõ rú rĩ ĩꞌdi cécé ãnãkpá ní ꞌdejó ímbá gá rĩ áni,
ídrĩ dó ũyõ ꞌdã na ꞌbo, ĩꞌdi dó adru míní ũkpó-ũkpó sĩ ị́jọ́ la ru idélépi rĩ ũrãjó.
26 Úpí ũndũwá ru rĩ la ꞌbá ũnzí rĩ kí uya ãmvé;
ĩꞌdi kí ụꞌdị́ ásị́ ị̃gbẹ̃ kóru.
27 Dị̃zã Úpí drị̂ la úríndí ꞌbádrị̂ ꞌa ndrụ̃ nĩ,
ĩꞌdi ị́jọ́ ími ásị́ agá rĩ kí ndrụ̃ iyálé pírí ãmvé.
28 Lẽtáŋá kí ãꞌị̃táŋá be úpî tã mba nĩ;
lẽtáŋá sĩ ũpĩ ĩꞌdidrị̂ la pá tu rá.
29 Kãrị́lẹ̃ kí ꞌbã dị̃zã ĩꞌdi ũkpõ ĩꞌbadrị̂,
Drị̃ꞌbị́ imve ĩꞌdi ũnĩ ꞌbá ãmbá rĩ ꞌbadrị̂.
30 ꞌBá ị̃ndụ́ cojó põcõ ãkõzá trũ rĩ la ị́jọ́ ũnzí dro rá
ãzíla ꞌbá ị̃ndụ́ cojó rĩ la ị́jọ́ ꞌbá ásị́ agá rĩ kí anzé ãmvé.