18
1 ꞌBá ru icílépi ꞌbá abe ku ị́jọ́ ũrãlépi ru drị̃ gá áꞌdụ̂sĩ rĩ la;
ị́jọ́ ꞌbá pírí ꞌbã kí nị̃lé cé ĩꞌdi pịrị rĩ gã úmgbé.
2 ꞌBá azalépi aza-azâ rĩ ꞌbã ásị́ ị́jọ́ vãŋá drị̃ gá ku;
wó ị́jọ́ ĩꞌdiní lẽlé idélé rĩ sĩ iꞌdajó la ínị̃ ị́jọ́ cé.
3 Ị́jọ́ ũnzí kí drị̃nzá be acị́ ãngũ ãlu gá,
ãzíla drị̃nzá la ãrútáŋá ãkõ fẽ.
4 Ị́jọ́ jọlé ũndũwã sĩ rĩ ĩꞌdi cécé ị̃yị́ mgbi rĩ áni;
ãzíla ũndũwã ĩꞌdi cécé ị̃yị́ kídí ru dịlépi dị̃-dị̃ rĩ áni.
5 Fijó ꞌbá ũnzí rĩ ní rĩ adru múké ku;
ãzíla ị́jọ́ lịjó ꞌbá ị́jọ́ kóru rĩ drị̃ gá mũlũmbẽ sĩ rĩ adru múké ku.
6 Ị́jọ́ ꞌbá azalépi aza-azâ rĩ ꞌbã jọlé rĩ la ãwãŋá ají;
ị́jọ́ ĩꞌdi ꞌbã jọlé rĩ la ãcóŋá umve ĩꞌdi ụrụ ꞌbá gá.
7 Ị́jọ́ ꞌbá azalépi aza-azâ rĩ ꞌbã jọlé rĩ la ĩꞌdiní lị́kị̃ ají;
ãzíla ị́jọ́ ãfũlépi ĩꞌdi tị gá rĩ ímbá ĩꞌdidrị̂ ꞌi.
8 Ị́jọ́ jọlé káláŋá ru rĩ la fi íná ãjị́-ambamba rĩ áni;
ĩꞌdi fi ꞌbá ãrí gá.
9 Ũvúꞌbá ají kí ru
ꞌbá ãko izalépi rĩ be.
10 Rụ́ Úpí drị̂ ĩꞌdi cécé Bõrõ ũkpó rĩ áni,
ꞌbá ãlá rĩ kí sĩ apá ru pajó ala gá.
11 ꞌBá kápa trũ rĩ la ru ũgõró ãtị̃ ĩꞌdi ꞌbã málĩ kî sĩ;
ĩꞌdi ũrã la kápa ĩꞌdidrị̂ kí ĩꞌdi andre tẽ cécé táwụ̃nị̃ andre celé Bõrõ sĩ trộkị́lịrị cí rĩ áni.
12 Ásị́ ãfó ru rĩ la ꞌbá agụ lị́kị̃ gá;
wó míní ími irijó vụ̃rụ́ rĩ la ãrútáŋá ají.
13 Mí are ị́jọ́ ꞌbã ífí ráká mí umvi ị́jọ́ ĩndõ, jõ íni ku;
ĩꞌdi míní drị̃nzá ají ãzíla ĩꞌdi ími aza iꞌda.
14 ꞌBá ꞌbã ásị́ la icó ãyánĩ ụrụꞌbá gá rĩ tị talé rá;
wó ꞌbá ãzí ásị́ drĩ nũ rá ĩꞌdi dó icó ãyánĩ tị talé íngoní ru?
15 ꞌBá ũndũwã trũ rĩ kí sáwã pírí sĩ bábá ị́jọ́ ụ̃nị̃jó;
kí bị́lẹ́ mgbọ rú sĩ ị́jọ́ lẽlé ụ̃nị̃lé rĩ arejó.
16 Fẽtáŋá la ꞌbá ãko fẽlépi rĩ ní gẹ̃rị̃ nzị̃ rá;
ãzíla ĩꞌdi ĩꞌdi agụ ꞌbá ãmbogo rĩ kí drị̃lẹ́ gá.
17 ꞌBá ị́jọ́ ị̃ndụ́ nzelépi kẹ́sị̃ gá drị̃drị̃ rĩ la iꞌdá jọ ꞌbãrĩ ị́jọ́ pịrị rĩ áni;
kpere ꞌbá ị́jọ́ ị̃ndụ́ nzelépi námbã ị̃rị̃ sĩ rĩ ꞌbã amụ́ agá ĩꞌdi ụzị agá zịtáŋá sĩ.
18 Ála jẽgê ꞌbe sĩ ị́jọ́ ꞌbá ị̃rị̃ kí drĩdríŋĩ gá rĩ awajó;
ĩꞌdi ị́jọ́ lị ꞌbá ũkpó ãwãlépi rĩ kí drĩdríŋĩ gá.
19 Ádrị́pị sĩ ị́jọ́ izajó ụrụꞌbá la gá rá rĩ la ru ásị́ ꞌbã ũkpó ru ndẽ táwụ̃nị̃ andre celé Bõrõ ũkpó sĩ rĩ rá
ãzíla ídrĩ ãwã ĩꞌdi be, ĩꞌdi míní ĩꞌdi ꞌbã kẹ̃jị́ tị ụ̃pị̃ cí.
20 ꞌBá la ãko múké rĩ ịsụ́ nalé ị́jọ́ múké ãfũlépi ĩꞌdi ꞌbã tị gá rĩ sĩ,
ị́jọ́ míní jọlé pịrị rĩ la ími ídri uja rá.
21 Drã kí ídri be ũkpó la kí ĩdra drị́;
wó ꞌbá ị́jọ́ jọlépi ambamba rĩ la ũyá la ịsụ́ rá.
22 ꞌBá ũkú múké rĩ ịsụ́lépi rĩ ịsụ́ ãko mgbã la;
ãzíla ĩꞌdi ásị́ ị̃gbẹ̃ ịsụ́ Úpí drị́ rá.
23 ꞌBá lẽmẽrí rĩ la mãmálá ꞌbã sĩ ásị́ ị̃gbẹ̃ ịsụ́jó;
wó ꞌbá kụ́rẹ́nị́ rĩ la ị́jọ́ umvi drị̃ ũnzĩ sĩ.
24 ꞌBá wọ̃rị́ trũ ũꞌbí rĩ la icó ị̃lị̃kị̃lé rá;
wó wọ̃rị́ mgbã rĩ la ru ĩbĩ ꞌbá ụrụꞌbá gá ndẽ ádrị́pị rá.