13
1 Ngọ́tị́ŋá ũndũwã trũ rĩ la átẹ́pị̃ ꞌbã ímbátáŋá are rá.
Wó ngọ́tị́ŋá drị̃ ũnzí rĩ are ị́jọ́ sĩ uzájó ĩꞌdi drị̃ gá rĩ ku.
2 ꞌBá la ãko múké rĩ ịsụ́ nalé ị́jọ́ múké ãfũlépi ĩꞌdi ꞌbã tị gá rĩ sĩ,
wó ꞌbá mũlũmbẽ rú rĩ kí ásị́ gá ị́jọ́ ũmbã rú rĩ la uvá gbũlá-gbũlá nĩ.
3 ꞌBá ru tị tã mbalépi rá rĩ la ru ídri tãmba,
wó ꞌbá ị́jọ́ jọlépi pépé rĩ la ru drị̃ gá lị́kị̃ ají.
4 Ũvúꞌbá drĩ táni ásị́ ꞌbã sĩ ãko ịsụ́jó íngõpí rá tí icó ku,
wó ꞌbá ãzị́ ngalépi ũkpó sĩ rĩ la ãko pírí ĩꞌdi ꞌbã lẽlé rĩ kí ịsụ́ rá.
5 ꞌBá ãlá rĩ ngụ̃ kí ĩnzõ ũnzí,
wó ꞌbá ũnzí rĩ kí drị̃nzá ají.
6 Ị́jọ́ mgbã rĩ la ꞌbá múké rĩ ꞌbã tãmba nĩ,
wó ũnzĩkãnã la ꞌbá ị́jọ́ ũnzí ngalépi rĩ gũ mgbũ vũ gá.
7 ꞌBá ãzí kí ru ꞌbã kí málĩ trũ wó íni ꞌdĩ kí lẽmẽrí kpọ̃wọ́-kpọ̃wọ́,
Ãzí rĩ kí ru ꞌbã ĩyi lẽmẽrí, wó íni ꞌdĩ kí kụ́rẹ́nị́.
8 ꞌBá málĩ trũ rĩ kí séndẽ ayú sĩ ru ídri pajó,
wó ꞌbá ãzí ịgbẹ́ ꞌbá lẽmẽrí rĩ ꞌbã ásị́ ku.
9 ꞌBá ãlá rĩ la dị̃ cécé dị̃zã ãngũ imvépi tárá-tárá rĩ áni,
wó ꞌbá ũnzí rĩ kí cécé tárã anụ́lépi rá rĩ ꞌbã áni.
10 Ãfó la ãlí ají,
wó ꞌbá ímbátáŋá ãꞌị̃lépi rá rĩ kí adru ũndũwã rú.
11 Málĩ ịsụ́lé gẹ̃rị̃ ũnzí sĩ rĩ la ãvĩ gbõrú,
wó ꞌbá málĩ ĩꞌdidrị̂ kí ụ̃tị̃lépi were-were rĩ ꞌbã málĩ kí zo zõ.
12 Ị́jọ́ míní ásị́ tị̃jó rĩ drĩ ru idé ku ĩꞌdi ími ásị́ fẽ acálé ãyánĩ rú,
wó ị́jọ́ míní ásị́ tị̃jó rĩ drĩ ru idé rá ĩꞌdi ími ásị́ fẽ acálé ãyĩkõ sĩ.
13 Ídrĩ ímbátáŋá ide idê mi ị́jọ́ ndrụ̃,
wó ꞌbá ãzị́táŋá tãmbalépi rĩ la ụ̃rọ̃drị́ la ịsụ́ rá.
14 Ímbátáŋá ꞌbá ũndũwã rú rĩ ꞌbã fẽlé rĩ ĩꞌdi kídí ídri drị̂ ꞌi,
ĩꞌdi ꞌbá pa ímbá drã drị̂ agá.
15 ꞌBá ũndũwã rú rĩ la ị̃nzị̃táŋá ịsụ́ rá,
wó ꞌbá ũndũwã kóru rĩ la ị̃lị̃kị̃ rá.
16 ꞌBá ũndũwá rú rĩ la ị́jọ́ ꞌa ũrã ráká ĩꞌdi idé la ĩndõ,
wó ꞌbá azalépi aza-azâ rĩ la ĩꞌdi ꞌbã aza iꞌda.
17 ꞌBá ị́jọ́ ũnzí ujílépi rĩ la aꞌdé ị́jọ́ ũcõgõ rú rĩ agá rá,
wó ꞌbá ị́jọ́ pịrị rĩ ujílépi rĩ la ꞌbá adrí.
18 ꞌBá ímbátáŋá lẽlépi ku rĩ la adru lẽmẽrí ãzíla ĩꞌdi drị̃nzá ịsụ́,
wó ꞌbá ímbátáŋá sĩ ĩꞌdi itújó rĩ ãꞌị̃lépi rá rĩ la ãrútáŋá ịsụ́ rá.
19 Ị́jọ́ ími ásị́ ꞌbã lẽlé rĩ ịsụ́jó rá rĩ la ãyĩkõ fẽ ími úríndí ní,
wó ꞌbá azalépi aza-azâ rĩ lẽ kí ị́jọ́ ũnzí aꞌbelé ku.
20 ꞌBá acị́lépi ꞌbá ũndũwã rú rĩ be rĩ la adru ũndũwã rú,
wó ꞌbá wọ̃rị̃ rụlépi ꞌbá azalépi aza-azâ rĩ be rĩ la ị́jọ́ ũnzí ají ĩꞌdi drị̃ gá rá.
21 Drị̃lẹ́ ũnzĩ la ꞌbá ũnzí rĩ vú adro,
wó ꞌbá ãlá rĩ la ụ̃rọ̃drị́ ru málĩ ịsụ́.
22 ꞌBá múké rĩ la anzị ĩꞌdidrị̂ ꞌbã anzị ꞌbaní ãwítã aꞌbe,
wó ꞌbá ũnzí rĩ ꞌbã málĩ kí ála kí tãmba ꞌbá ãlá rĩ ꞌbanî.
23 ꞌBá lẽmẽrí rĩ drị́ ámvụ́ gá ãkónã la ka rõnzõ,
wó ị́jọ́ lịlẹ́ pịrị ku rĩ sĩ ꞌbá ũnzí rĩ la ãkónã ꞌdĩ kí ꞌdụ rá.
24 ꞌBá ngọ́tị́ŋá ĩꞌdidrị̂ ị̃ndụ́ colépi kẹ̃lị́ká sĩ ku rĩ lẽ ĩꞌdi ku,
wó ꞌbá ngọ́tị́ŋá ĩꞌdidrị̂ lẽlépi rá rĩ la ĩꞌdi co ímbátáŋá ru rá.
25 ꞌBá ãlá rĩ ꞌbaní ãkónã la ca rá,
wó ꞌbá ũnzí rĩ ꞌbã ꞌa la adru ãbị́rị́ ru.