Waraga na Paulo öcöö both
Pilemon
Köp na tye ï waraga ka Paulo both Pilemon
Pilemon onwongo obedo Akiricito n'oywek rwök, nen calö ën onwongo obedo ngat acël ï kin jö n'oye Kiricito na tye ï Kolocai ëka obedo ngat n'onwongo tye k'opii mërë na nyïngë Onecimo. Opii ni onwongo öngwëcö ökö kï both adwong mërë ëka ën obino örwatërë kï Paulo, n'onwongo tye ï buc. Paulo obino ömïö Onecimo ödökö Akiricito.
Waraga ka Paulo both Pilemon obedo kwac both Pilemon më rïbö watgï gïn k'opii mërë, na Paulo tye ka oro cen yo bothe ëka öjöl ën pathï na calö opii n'ëtïmö kïca këkën ëntö na calö omego n'obedo Akiricito.
1
Moth n'öya kï both Paulo
1 Waraga ni öya kï both Paulo, n'obedo amabuc ka Kiricito Yecu, ëka Timoteo ömïn onu,
Both Pilemon okone onu më amara ëka atic awodh onu,
2 kï jö n'oye Kiricito na cökërë ï odi gïn k'amïn onu Apia, ëka both Arikipo acikari awodh onu:
3 Obanga Apap onu ëka Rwoth onu Yecu Kiricito ömïïwu gum ëka kuc.
Mar ka Pilemon ëka yee mërë
4 An apwöyö Obangana ï karë kïbëc kite na an apo piri ï lëgana,
5 pïën an atye ka winyo köp ï kom marni pï jö k'Obanga na leng kïbëc ëka yeeni ï kom Rwoth Yecu.
6 Kite na in itye ka nywakö yeeni kï jö nökënë ï gürë kanya acël, an alëgö nï ëk ïnïang na thuth ï kom gin na bër kïbëc na onu etye ködë ï Kiricito.
7 Marni ömïa yom cwiny na thwönë rwök ëka thon öcükö cwinya, pïën in, ömëra, ikweo cwiny jö k'Obanga na leng.
Kwac ka Paulo pï Onecimo
8 Pï manön, kadï bed nï an atye kï tëk cwiny ï Kiricito na mïö an aciki më tio gin mörö na mïtërë,
9 ëntö pï mar, an anënö nï bër akwai. An Paulo, na bedo ngat n'otii ëka kobedini thon abedo amabuc pï Kiricito Yecu,
10 an akwai pï athïn-na Onecimo, na an adökö apap mërë nakun onwongo an atye ï buc kany.
11 Ï karë n'opoth ën onwongo ba tye kï köny mörö bothi, ëntö kobedini ën dong tye kï köny na thwönë rwök bothi ëka botha.
12 An atye ka oro ën cen yo bothi—na ën obedo dhö cwinya kikome.
13 An onwongo amïtö nï agwök ën botha kany, ëk ömïa köny na kakari nakun pod atye ï buc pï tïtö köp më Emuth na Bër.
14 Ëntö an onwongo ba amïtö nï atïm gin mörö nakun in ba iyeo, ëk bërni kür obed na calö gin mörö n'edii adïa ïë, ëntö obed kite na in iyeo ködë.
15 Gwök onyo gin n'ömïö ën opokere kodi pï karë na nönök onwongo obedo nï ëk ïgam ën yo bothi dong na twal—
16 pathï dökï na calö opii, ëntö na löö opii ökö, na calö omego më amara. Ën pïrë tëk botha ëntö pïrë tëk bothi rwök na calö dhanö na konyi ëka na calö omeru ï Rwoth.
17 Pï manön, ka in ingeo nï an abedo atic awodhi, jöl ën kite na in onwongo ïtwërö jölöna ködë.
18 Ka cë ën ötïmö gin mörö na rac bothi, onyo tye kï banyani mörö, kwan-gï ï wia.
19 An, Paulo, ënë acöö waraga ni kï cïnga. An abino cülöni—nakun an ba akobo nï in thon itye kï banyana, ën kwöni kikome.
20 Eyo, ömëra, an amïtö köny mörö kï bothi ï Rwoth. Kwe cwinya ï Kiricito.
21 An atye kï gen na tëk ï komi nï in ibino winyo dhöga, ënë ömïö an acöö nini köp ni nakun angeo nï ibino tïmö na löö gin na an akwaö.
22 Gin acël nökënë: Yüb nïna kabedo mörö na an abino bedo ïë, pïën an atye kï gen nï lëgawu bino mïö ëgönya më dwogo yo bothwu.
23 Epapira, amabuc awodha ï Kiricito Yecu, omothowu.
24 Marako, Aricitako, Dema ëka Luka etic ewodha thon omothowu.
25 Kïca ka Rwoth Yecu Kiricito obed kodwu.