9
A Bulij rünïjï ngwüjü ngwudi Yïjïräyïl
1 Äny gwondaja ꞌdidanu ndi Kirictu nggwaꞌti gwüꞌrïdï yiꞌduru a ligor lüny lenggaciny gu aar nyi gu Lïgïꞌrïm lanni Lijuꞌru enggaci ndi ari nggwondaja ꞌdiꞌdidanu.
2 Ndi ari nggwukanu gwulleny gwani ngwüjï ngwüny ngwuru Ngwüyäwüd a ligor lüny ätï dämmä dati nyi gwüꞌrïꞌtä yomon reny gwani ngindenga.
3 Ndi ari nyi jada ndi ari adinari nyi ru ligoꞌro lüny gwüꞌtäjäär gu ngwünyü nyi ꞌdünyïnï ndi Kirictu gwani ngwänggärï, ngindenga liru gilinge güny,
4 ngwüjï ngwudi Yïjïräyïl. Ndi ari liru lanni lanija je Ngwaalu yïjï yüngün, ngwuje ꞌtäcä näjïng gwüngün gwudi Ngwaalu, aar le ätï gekajiding yomonanu yonyadu. Aar ape yobo, aar je enggaci awa ndi äpïjï Ngwaalinga yobo, aar ätï ngwujaꞌri ngwaru ngwe Ngwaalu.
5 Ngindenga liru ngwügüürnä ngwudi Äbräyïm, Ijaag na Yagub. A gu dïꞌrïny didi Kirictu oꞌrada gilingeno. Gwanni gwuru Ngwaalu giyiꞌralalu pipiꞌriꞌti a ngwünäjïnï gwurꞌtal! Yiru gu.
Bupi gwudi Ngwaalu gwüdünälü
6 Äny gwaꞌti aru ndi ari ngwujaꞌri ngwudi Ngwaalu ngwïꞌdü gïdïyängälü. Ndi ari läꞌtüdï ꞌdar lanni liru gilinge gidi Yïjïräyïl, liru lidi Yïjïräyïl.
7 Ya ndi ari anni raar ngwügüürnä ngwudi Äbräyïm, liru ꞌdar yïjï yidi Äbräyïm. Aar be manni üllïnï ndi ari, “Gilinge gidi Ijaag giru ga aar urnidi.”
8 Yäꞌtüdï ndi ari yïjï ꞌdar yanni yïlïngïnä ndi Äbräyïm, yiru yïjï yidi Ngwaalu, aar be ru yïjï yanni yaru ye Ngwaalu, yanni yadi ru gilinge gidi Äbräyïm.
9 Yiru giyee yanni yaru ye Ngwaalu ndi ari, “Kaji ganni gïgïꞌtïnä nggwadi oꞌra nggwa mbuji Jarrang gïjï ge.”
10 Gïjï nggee, Ijaag gwuru gwanni gwuma agu Ribikang aar lengeta ngwänggïlä, mbumbu gwegen gwuru gweꞌte pu gwani Ijaag gwuru dïgüürnä dege.
11 A be gaji ganni gica ge Ngwaalu Ribikang ngwujaꞌri ngwee, yïjï giyee yaꞌti gu na lïngïnä aar gu ꞌti apu yiꞌral yanni yijaw na yanni yiki nunnu a ngwujaꞌri ngwee ngwanni ngwuca ngwe Ngwaalu Ribikang aar ani bupi gwudi Ngwaalu gwani äbrï gwüngün.
12 Yaꞌti ani apepe gwe aar be ani nginde gwe gwanni gwati urnidi. Lica Ribikang, “Gïjï ganni gipana ga ru dïnäd didi gwenggen gwanni gwokana.”
13 Anaku üllïnäär gu ndi ari, “Yagub gwujayiny ngwäy a nyi be Yiju ke ngwäy.”
14 A ladi be araa? Ngwaalu ngwaꞌti dünälo? Bärï yaꞌti gu rüdï aꞌtur!
15 A lïlïngïdï ndi ari ngwuca Müjäng,
“Dïjï diny ïnä danni diny ïnä
a dinyi gataji düwä danni dinyi gataji düwä!”
16 Yäy no yäꞌtüdï ndi ari yiꞌral giyee äpïnä bupi gwe na yiiru ye yidi dïjï dümnä, aar be äpïnï ïnä gwe gwudi Ngwaalu ꞌdogo.
17 Ndi ari kitabanu, Ngwaalu ngwuca Brawuning, “Nggwallijangala gwani yiꞌral giyee, nunnu nyi inggidi yiima yüny ꞌdunggunga a nunnu ngwürïny ngwüny aar ngwe urnidi ngwaalu ꞌdar gïdïyängälü.”
18 Yäy gu no, Ngwaalu ngwati je dïjï ïnä danni dïnä na ngwundiyi liguri danni ding undiyi liguri.
19 Gwere ꞌdanggalanu gwuny otacalu ndi ari, “A be ange gwuru ati nje be Ngwaalu gatada yiꞌral nono? Ndi ari yärü gwanni gwati äbïngïnï bupinganu gwüngün?”
20 A be nga gwani yärü gwuru dïjï dümnä ndi gwäꞌräcï Ngwaalinganu? “Gong ganni gigeꞌtaar gati otaci dïjälü danni digeꞌta ngwuci, ‘Nga gwarra miny gu gegeꞌte no?’ ”
21 A be yaꞌti manni rüdï ndi ari dïjï danni dati gaꞌriji yimuya, dätï gu yiima ndi ape gilu geꞌte geꞌte ngge gaꞌriji yimuya yidi ngwong ngwanni ngwujaw na yimuya yidi ngwong ngwanni ngwuke?
22 Yiru yeꞌte yeꞌte yanni yärrä je Ngwaalu, anni ätïng yiima ndi inggidi gündä güngün ngwinggidi yiima yüngün, ngwube orꞌtemaja ꞌdar gwani ngwüjï ngwanni ngwapiya gündä güngün ngwanni ngwujalu ngwani dudi.
23 Yärrüng je giyee nunnu ngwenggaci ngwüjü ngwanni ngwïnädïng je näjïng gwüngün gwanni gwïrälü ngwanni ngwuming je mädïnïyï ngwuje jaꞌrima gwani näjï.
24 ꞌDi alanga ꞌto lanni liming je urnidi, läꞌtüdï Ngwüyäwüd jücü, aar je be urnidi ꞌto lanni liru Garany.
25 Anaku aru gu Ngwaalu kitabanu gidi Uja,
“Lanni läꞌtüdï ngwüjï ngwüny, linje urnidi ‘ngwüjï ngwüny’
na lanni laꞌti aar je ämnä, linje urnidi ‘lüny lanni lämnï nje.’ ”
26 Na,
“Ya ji ngwaalu ngweꞌte ngweꞌte anaku caar je gu,
‘Ngaa läꞌtüdï ngwüjï ngwüny,’
la aar je urnidi, ‘yïjï yidi Ngwaalu ngwanni ngwumidu.’ ”
27 Ajaya gwuru dïjïr, gwondaju ngwujaꞌri ngwe ngwani ngwüjï ngwudi Yïjïräyïl ndi ari,
“Anni ngwüjï ngwudi Yïjïräyïl onyadi aar ru nono dïjïcïrä didi dibirta,
ngwa gïlängïdïnï ꞌdogo guuwa gooko.
28 Ndi ari Deleny dadi pï yelenya yüngün puprang ngwuje mbüdïyï gïdïyängälü.”
29 Anaku aru gu dïjïr dani Ajaya gwerre ndi ari, “Adinari Deleny diru yiima diminje ꞌti gätïjänä gilingalu,
alanga laadi ru nono Jaduming, laadi oꞌranni Gamurang.”
Ngwüjï ngwudi Yïjïräyïl ngwaꞌti ämnä Ngwaalu
30 A ladi be araa? Ndi ari lanni liru Garany lanni laꞌti linya dünïngälü, gwuma aar gu olati, dünälü gwanni gwïndï ämnï gwe Ngwaalu.
31 A be ngwüjï ngwudi Yïjïräyïl ngwanni ngwulinya yobo yidi dünälü, gwuma aar gu ꞌti olatu.
32 Ange gwuru? Nunnu gwaꞌti aar linynya ämnï gwe Ngwaalu, aar be linynyi nono ma aar ani yiiru ye. Lima obalu “kimle gidi obalu.”
33 Anaku üllïnäär gu gwani Kirictu ndi ari,
“Arnganar, äny gwugeꞌta gimle ndi Jäyün ganni gati gäbïcï ngwüjü aar obalu,
äny gwugeꞌta ngwurꞌda ngwanni ngwadi gäbïcï ngwüjü aar apalu piꞌrijur aar ïꞌdï,
na nginde gwanni gwa ämnäcï ngindeng, gwaꞌti gwa yaaru ape aꞌtur.”