7
A laꞌti ba be giyobo a gilo Gïlïgïꞌrïm
1 Lani ngwänggärï ngaa lïlïngïdï ndi ari nggwondaca a je liru ngwüjï ngwülïngïdï yobo ye yorto ye ngwaalinga. Ndi ari yobo yätï yiima gïdïjï ꞌdogo manari ndona dijalu dimidu.
2 Nono gwele dayu dägïnä dati yobo gekaji gidur düngün danni dagu manari ndona dimidu. Ma be ari dur düngün dayu, da be gätïnï linginalu ngwaalu ngwudi yobo giyo yani dur.
3 Yäy no, manari dima ägïnï gidur diꞌter, dur düngün ndona ngwäyälü dimidu, da aar ci dïmïꞌrïdï ngwäyänü. A be manari dur düngün dayu, nginde dïgätïnä linginalu giyobo giyoo daꞌti dïmïꞌrïdï ngwäyänü, ꞌdi manari dima ägïnï gidur diꞌter.
4 Yäy gu no, lani ngwänggärï, yiru gu no ꞌto ꞌdanggalu ngaa layu ngwaalu ngwani yobo anni ma aang ayi Kirictunga le, nunnu ngaa ru lidi nginde gwuꞌter, lidi nginde gwanni gwüꞌdïꞌrü giyiꞌranyanu nunnu ngaa ꞌriꞌrada giyiꞌral yani Ngwaalu.
5 Ndi ari gwerre anni elellar drü de danni diki, amiꞌra gwanni gwuki gwati yobo gwogaji ngwape yiiru ꞌdengganu ꞌdar ar ꞌriꞌrada giyiꞌrany.
6 A be gweneno a lima gwäꞌdänälü ngwaalu ngwani yobo ndi ari a lima ayi giyobo yanni yati nje giki gwele. Nunnu ar ru ngwïnäd ngwudi äpïjï Ngwaalinga yiiru gay ge giyang gidi Lïgïꞌrïm, yaꞌti a be äpïnä gay ge gele guꞌrin gani yobo ye yanni yüllïnä.
Yobo yati nje enggaci yiru ange yani ke
7 A ladi be araa? Yobo yiru yanni yike? Yaꞌti gu rüdï aꞌtur! ꞌDidanu nggwaꞌti gwadi lenge keng yorto ye ngwaalinga adinari aaꞌti yobo rüdï. Äny gwaꞌti gwadi lenge ngwujaꞌri ngwee ngwani aranu adinari aaꞌti yobo aru, “Aaꞌti gong ga ang aranu.”
8 A be ke, mbojaji gay ngwujaꞌri ngwee ngwube ꞌriꞌriyi aringanu gwudi amiꞌra nggwee ꞌdar ꞌdünggünyänü. Ndi ari adinari a yobo erne, ke gwaꞌti gwadi ätï yiima.
9 Gwele gwerre nggwuju gwelellalu gwaꞌti lïngïdï yobo ye yorto ye ngwaalinga, a be anni ma ngwujaꞌri ngwani aranu ila, ke gwuma ꞌrita gwumidu äny gwuma be ayi.
10 Äny gwuma mbuji ndi ari ngwujaꞌri ngwe ngweꞌte ngweꞌte ngwaraar ngwe ngwadi apa miding, ngwuma ru gay gidi yiꞌrany.
11 Ndi ari ke mbojaja gay ngwujaꞌri ngwe gwuminy ïdäjänü a ngwuma aar nyi ngwe ꞌrinye.
12 Yäy no, yobo yijuꞌru a ngwujaꞌri ngwujuꞌru ngwüdünälü na ngwujaw.
13 A be yobo yanni yijaw yima be gwurli yima ru yiꞌrany ꞌdünggünye? Bärï yaꞌti gu rüdï aꞌtur! A be nunnu a ke linginni ndi ari gwuru yiꞌral yiki, gwüꞌtïyä yiꞌrany ꞌdünggüny yiꞌral ye yanni yani jayi, nunnu ngwujaꞌri ngwe, a ke, aar enggani ndi ari yiru yanni yiki gwulleny.
Kwudi ke gwe
14 A lïlïngïdï ndi ari yobo yiru yidi lïgïꞌrïm a be äny gwäꞌtüdï gwudi lïgïꞌrïm nggwuru dïnäd didi ke.
15 Nggwaꞌti lïngïdï apepeng gwüny. Ndi ari yanni yijaw yati nje nani ndi ärrï, yati nje ꞌti ärrü, nje be ärrï yanni yatiny ke ngwäy.
16 Ma be ari yati nje ärrï yanni yatiny ke ngwäy, nyii la be amatanu yobo ye ndi ari yiru yobo yijaw.
17 A be yanni yiru gu, yäꞌtüdï ba be ndi ari äny gwuru ligoꞌro lüny gwanni gwärrä je yanni yiki, a be ke ru gwanni gwati ji ꞌdünggünyänü.
18 Äny gwülïngïdï ndi ari yere yaꞌti yanni yijaw yati ji ꞌdünggüny, nggwondijaja gïdrü düny danni diki. Ndi ari äny gwüjädï ndi ärrï yiꞌral yanni yijaw, nyi ꞌti be burna ndi nje ärrï.
19 Äny gwunana ndi nje ärrï yanni yijaw, nje ꞌti ärrü. Äny gwaꞌti nana ndi nje ärrï yanni yiki, ati nje mbuji yiminje ärrï.
20 A be gwenene manari nggwati ärrï yiꞌral yanni yaꞌti nje nanu ndi ärrï, yaꞌti a be rüdï yani äny gwanni gwärrä je, a be ke ru gwanni gwati ji ꞌdünggünyänü gwärrä je.
21 No nyi be mbuji drü ndee dapu yiiru, manari äny gwuma ru gwadi ärrï yiꞌral yanni yijaw, yanni yiki yatiny jici nje ärrï.
22 Ndi ari äny giligoranu lüny, nggwati jayanu yobo ye yidi Ngwaalu.
23 Nyi be oꞌre nyi engga drü diꞌter ndoo dapu yiiru giyerel yidi ngwanginu ngwüny, aar kwudi drü de didi yaꞌrany yüny aar nyi gäbïcï nyi gïkïnï drü de didi ke dapu yiiru giyerel ngwanginu ngwüny.
24 Äjï be ne yïrïgïnä yanni yijiny gu! Yärü gwuru gwanni gwuny ꞌtüyä ngwanginu ngwee ngwudi yiꞌrany?
25 Nggwuca Ngwaalinga yäy ꞌtu Yicu Kirictu gwe Deleny dege! Yäy gu no, äny ligoꞌro lüny giyaꞌranyanu yüny, äny gwuru dïnäd didi yobo yidi Ngwaalu, a be gïdrü danni diki, äny gwuru dïnäd didi gay gidi ke.