4
Äbräyïm gwüdünïyäärälü ämnï gwe Ngwaalu gwüngün
1 A la be araa ndi Äbräyïm, gwuru dïgüürnä dege, yiru ange yanni yimbujing je ngwujaꞌri ngwee?
2 Manari, yäy ꞌdidanu, Äbräyïm gwüdünïyäärälü yiiru ye yüngün, gwa be ïrïngïnï giligoꞌro lüngün gwaꞌti gwa ïrïngïnï ngwäyänü Ngwaalu.
3 Gitab garaa? Garu, “Äbräyïm gwämnä Ngwaalu a gu be Ngwaalu ïꞌräcï ndi ari gwüdünälü.”
4 Gwenene ma dïjï ape yiiru, dati aar ꞌti ïꞌräcä guꞌru güngün nono ma angidaji ru. Gati aar ätädä gïdämjü.
5 A be gwanni gwaꞌti apu yiiru ngwube ämnäcï Ngwaalinga ngwanni ngwati dünïyï dïjälü danni diki ämnï gwe Ngwaalu gwüngün, da aar ïꞌräcï ndi ari dïdünälü.
6 Däwüd gwuru deleny gwaru gu yiꞌral giyee yeꞌte yeꞌte anni ondajing onjaci gwe gwani dïjï danni dati Ngwaalu ïꞌräcï ndi ari dïdünälü, yaꞌti ani yiiru yere. Ngwari,
7 “Lonjacaar je
lanni lima aar je düdänïjänü ndi nyurtanu gwegen,
lanni lima aar je gwüꞌrübäcï kengalu gwegen.
8 Onjaci gïdïjï
danni daꞌti da Deleny diru Ngwaalu ïꞌräcï yiꞌral yanni yiki.”
9 Onjaci nggwee gwuru gwudi ngwüjï ngwanni ngwüꞌrïdänä ꞌdogo, na gwuru ꞌto gwudi ngwüjï ngwanni ngwaꞌti üꞌrïdäna? A lima ji ndi ari ämnï Ngwaalu gwudi Äbräyïm gwïꞌräcäär ngwüdünälü.
10 Kaji giru ange ganni gima aar ïꞌräcï? Yiju kaji ganni gima aar ge üꞌrïdä gwalla yiju gwerre gwerre? Yaꞌti ju anni mung üꞌrïdänï, aar be ji gwerre gwerre!
11 A Äbräyïm gwapu giꞌremna giru üꞌrïdänï, dilge didi dünälü gwanni gwätïng ämnï gwe Ngwaalu ꞌtuꞌtu gwaꞌtina üꞌrïdänä. A no, gwuru dïgüürnä didi ngwüjälü ꞌdar ngwanni ngwaꞌti üꞌrïdänä aar be ämnï Ngwaalu nunnu aar je ïꞌräcï ꞌto ndi dünälü.
12 Nginde gwuru ꞌto dïgüürnä didi ngwüjï ngwanni ngwüꞌrïdänä ngwanni ngwaꞌti üꞌrïdänä ꞌdogo aar be ru ngwanni ngwugwuju gora gidi ämnï Ngwaalu gidi dïgüürnä dege dani Äbräyïm gwanni gwätïng ꞌtuꞌtu gwaꞌtina üꞌrïdänä.
13 Ngwaalu ngwuca Äbräyïmïng je gilinge ge güngün ndi ari ladi ape yuꞌrina yani ngwüjï ꞌdar gïdïdlä, yäꞌtüdï yobo ye. Aar be ru dünälü gwe gwanni gwïndï ndi ämnï Ngwaalu.
14 Ndi ari adinari ngwüjï ngwuru ngwanni ngwelella yobo ye ngwuru ngwanni ngwapu yuꞌrina, ämnï Ngwaalu gwaꞌti ba be gwadi ätï guꞌru na yanni yaru ye Ngwaalu yaadi be ru ꞌtur.
15 Ndi ari yobo yati apa güündä gidi Ngwaalu. A ngwaalu ngwaꞌti gu yobo, nyurtanu gwaꞌti gu gwani yobo.
16 Yäy gu no, yanni yaru ye Ngwaalu yati ila ämnï gwe Ngwaalu, nunnu aar ru yïmïꞌrü yidi Ngwaalu nunnu aar ani änïjälü gwudi gilinge ꞌdar gidi Äbräyïm nunnu yaꞌti ani ngindenga ꞌdogo lanni lelella yobo ye, aar be ani ꞌto ngindenga ꞌdar lanni lelella ämnï gwe Ngwaalu gwudi Äbräyïm. Gwuru dïgüürnä dege ꞌdar.
17 Anaku üllïnäär gu ndi ari Ngwaalu ngwuca Äbräyïmïng nu, “Äny gwurujanga papa gwudi ngwüjï giyen yonyadu.” Nginde gwuru papa gwege gwanni gwämnäcä Ngwaalinga ngwanni gwati midiyi ngwüjü ngwanni ngwayu aar urnidi ngwony ngwanni ngwaꞌti ju aar ji.
18 Äbräyïm gwaꞌti geꞌtaja ndi ätï gilinge ngwube geꞌtaji ndi ämnï Ngwaalu no ngwuru papa gwudi ngwüjï giyen yonyadu, anaku caar gu, “Gilinge gunga gadi gu ru no.”
19 Gwaꞌti amiꞌratu ndi ämnï Ngwaalu gwüngün ngwuꞌti gätïjä lingina lüngün ngwäy a nginde gwuju dimomo gïlänï. Gaji nggoo gwuma ru ngwüdläyü küüꞌrï tudini (100) a ndi ari daw düngün dani Jarra, düꞌrïnä be ꞌto.
20 A be nginde gwaꞌti ümïmänü ngwujaꞌri ngwanni ngwuca ngwe Ngwaalu a be ämnï Ngwaalu gwüngün ojeme nono ngwügäꞌräcï Ngwaalinga näjïng.
21 A nginde ngwämnï ligor le ku ndi ari yanni yica ye Ngwaalu gwätï yiima nding je ärrï ꞌto.
22 Yiru yïgäbïcä, “Aar gu be ïꞌräcï dünïngälü.”
23 A be yaꞌti üllïnä yani nginde gwïꞌräcäär jücü,
24 aar be ani alanga ꞌto, lanni ladi aar je ïꞌräcï dünïngälü lanni lämnï nginde gwe gwanni gwuma ꞌdïꞌrïyï Delenyalu dege dani Yicu giyiꞌranyanu.
25 Aar gwe gwurlanu aar ꞌrinye gwani yiꞌral yege yanni yiki na ngwüꞌdïꞌrä gwumidu nunnu aar nje dünïyälü ngwäyänü Ngwaalu.