25
Yuꞌtaar ꞌdï (10)
1 Ngwuje ci, “Gaji nggäꞌdï, yeleny yidi Ngwaalu yadi ru nono yuꞌtaara yiru ꞌdï yapana ngwamba aar gwomada damalanu dadi agu.
2 Yuꞌtaar tudini yibebera na tudini yiru ngweꞌrr.
3 Yuꞌtaar giyoo yiru ngweꞌrr, yapana ngwamba aar ꞌti be apana yila yere.
4 A be giyoo yibebera, aar be apani yila yijaja yanu.
5 A damal dadi agu jana gwurꞌtal ꞌdi aar ïrꞌdätälä ꞌdar aar ndri.
6 Diligeny danu, a ngwüjï urra, ‘Damal dima obana ꞌtüdär ngaa gwomanu.’
7 A yuꞌtaar ꞌdïꞌrälü ꞌdar aar onjaji ngwambala ngwengen.
8 A be yuꞌtaar giyoo yiru ngweꞌrr ci yuꞌtaara giyoo yibebera, ‘Gätïjï nje yila yoko yalu nje bäläjï ngwambanu ngwärï ngwamba ngwärï ngwuma ayi.’
9 A je yuꞌtaar giyoo yibebera ci, ‘Bärï yaꞌti nje mbütïjï, ïndär ngwüjï ngwanni ngwati je ellang ngaa je illa yalu.’
10 A be anni ma aar ele giyoo yiru ngweꞌrr ndi illa yila, a damal obana aar änï yuꞌtaarnga le giyoo yibebera yijalu mama aar le änï gïyïꞌrïnyïnänü yidi gaga aar längïtä dïmbürä.
11 Anni ma yuꞌtaar giyoo yiru ngweꞌrr oꞌra, aar urnidi aar ari, ‘Gwani Doorta! Gwani Doorta! Ïgïtäcï nje dïmbürälü!’
12 A je doorta ca, ‘Nggwa je ci ꞌdidanu, nggwaꞌta je lïngïdï.’
13 Yäy gu no, jar balu ngwäy ngwe ngaa arngani ndi ari ngaa laꞌti lïngïdï gomon na gaji.”
Mïꞌrï ngwujaꞌri ngwani ngwïnäd täꞌrïl (3)
(Luka 19.11–27)
14 Ngwuje ci, “Mana yeleny yidi Ngwaalu yaji ya ru nono guru gïꞌdïꞌrü ngwele ngwaalu ngwolanu ngwube urnidi ngwïnädä ngwüngün ngwuje gätïjänïjï yuꞌrina yüngün ꞌdar.
15 Deꞌte ngwügätïjänïjï bartad gwuru tudini na deꞌte mana ngwügätïjänïjï bartad gwuru rom, na deꞌte mana ngwügätïjänïjï bartad gweꞌte pu, ating ätädä dïjï gwani yiima yüngün ngwüꞌdïꞌrï ngwele.
16 A gur nggoo gima ape bartad tudini, gwodan ngwape gwüngün ngwugeꞌte giyiiru ngwubile ngwänïjï tudini ngwugendajala.
17 Na gur nggoo gätädäär bartad rom, ngwubile ngwänïjä rom ngwugendajala.
18 A be gur nggoo ätädäär bartad gweꞌte pu ngwube ape bartad gwudi doorta düngün ngwele ngwügwürï gïdïyäng.
19 Anni ma doorta degen onja yomon ngwoꞌra ngwuje urnida ngwuje otacalu yuꞌrin ye.
20 A gur nggoo gapu tudini ngwapana tudini gwanni gwuming bile gwodan ngwuci, ‘Doorta düny, nga gwätädïny bartad tudini, nggwee gwuminy bileda tudini.’
21 A doorta düngün ci, ‘Yijaw yanni yärrä je, nga gwuru dïnäd dijaw diru ligor leꞌte pu! Nga gwuru ligor leꞌte pu ngwong ngwooko, nggwa ang ruji giꞌra gidi ngwong ngwonyadu. Ändï ngaa jayanu doorta de dunga!’
22 Gur nggoo gapu rom ngwila ꞌto ngwuci, ‘Gwani doorta düny, nga gwätädïny bartad rom, nggwee gwuminy bileda rom.’
23 A doorta düngün ci, ‘Yijaw yanni yärrä je, nga gwuru dïnäd dijaw diru ligor leꞌte pu! Nga gwuru ligor leꞌte pu ngwong ngwooko nggwa ang ruji giꞌra gidi ngwong ngwonyadu. Ändï ngaa jayanu doorta de dunga.’
24 A be gur ila ꞌto nggoo gapu gweꞌte pu ngwuci, ‘Gwani doorta düny, nggwülïngïdï ndi ari nga gwuru dïjï dojema yiꞌral nga gwati uni giruny gaꞌti ang kwüdï nga gwäꞌräjï giꞌdu ngwaalu ngwaꞌta gu gïdädï yona.
25 Aar nyi be yedeny eny nyi be ape bartad gwunga nyi gwürï gïdïyäng gwuru nggwee gwunga apa.’
26 A be doorta düngün ci, ‘Nga gwuru dïnäd diki diru damiꞌri, ii nga gwülïngïdï ndi ari äny gwati uni ngwaalu gwati nyi gu kwüdï na nyi gwäꞌräjï giꞌdu ngwaalu ngwaꞌti nyi gu gïdädï?
27 Nga mine arra ma ang ꞌti geꞌta bartad gwüny giyerel? Nunnu miny oꞌra nje mbuji gwuma lingadi.’
28 Ngwuci ngwïnädä ngwüngün, ‘Äpädär gwüngün nggwoo gwuru gweꞌte pu ngaa ätädä ngindeng nggwoo gwätï ꞌdï. (10)
29 Ndi ari gwere gwanni gwätï gwonyadu, gwa aar gendaci gwonje na gwere gwanni gwaꞌti ätï, gwere gwanni gwätïng gwooko gwa aar apada.
30 A apar dïnädä ndoo diru damiꞌri aang gatu poor gïdïrïmänü, ngwaalu ngwa gu yal na ïyïnï ngwad ji.’ ”
Yicu gwadi obalu ngwüjü ngwe ꞌdar
(Luka 19.11–27)
31 A je Yicu ci, “Ma ji manari Gïjï gidi Dïjï dümnä gima oꞌra näjï gwe gwüngün yïꞌrr ye yüngün, nginde gwa jalu gididuꞌralu didi näjï gwüngün gwudi gerala.
32 Ngwüjï giyen ꞌdar ngwa aar je gwäꞌräjälü ꞌdünggüngün, ngwuje be ngedanu anaku gwele ati gu dooꞌra ngeda ngwangala giyooꞌranu.
33 Gwa geꞌtaji ngwangala kaama na yooꞌra kängïr.
34 Deleny da be ci ngwüjü ngwanni ngwüjädï kaama güngün, ‘Ilar nga nga lanni lonjaca je Papa gwüny ang ape yuꞌrina yalu yanni yïgïꞌtïjärä je ꞌtuꞌtu anaku geꞌtaar gu dïdläyü.
35 Ndi ari nggwïndï gwïtï ngwamanu, nyii ätä nyi eny, aar nyi ngwäädä eny, nyii ätä nyi ïyï, nyi ila gwuru dïrnü, nyii gwäꞌrï gïdrü ꞌdanggalu.
36 Nyi mïnï ngwureda, nyii giki, nyi ümï, nyii ombaji, nyi ji korkon nyii ilada ndi ombaji.’
37 Gwa be ngwüjï ngwoo ngwüdünälü gwäꞌräcänü gwa aar ci, ‘Jadu gwani Deleny, länggädängä gwïtï ngwamanu ar ang be ätä ang eny, a jadu ngwäädä ngwïtängä ar ang be ätä ang ïyï?
38 Jadu länggädängä gwïndï gwuru dïrnü ar ang be gwäꞌrï gïdrü ꞌdänggärï na jadu nga gwümïnü ngwureda ar ang be giki?
39 Na jadu länggädängä gwümä nga ji korkon ar ang be ilada ndi ombaji?’
40 La je be Deleny ci, ‘Nggwa je ci ꞌdidanu yere yanni yärrïjä je gwere ngweengganu ngwüny ngwee ngwooko, lïngïdär ndi ari yärrïjï nje nyänyïng.’
41 Ngwuje be ci giloo lïjädï kängïr, ‘ꞌTüdäränü ꞌdünggüny gilee lïꞌtäjäär je gu ngwünyü ladi ele gïlïgä lidi gwurꞌtaling lanni lïgïꞌtïjäär dijegoꞌrro na yïꞌrr yüngün.
42 Ndi ari nggwïndï gwïtï ngwamanu nyii ꞌti ätädï nyi eny, a nyi ngwäädä eny, nyii ꞌti ätädï nyi ïyï.
43 Nyi ila gwuru dïrnü, nyii ꞌti gwäꞌrü gïdrü ꞌdanggalu. Nyi mïnï ngwureda, nyii ꞌti gika. Nyi ümï nyi ji korkon, nyii ꞌti ïndädï ndi ombaji.’
44 Gwa aar be gwäꞌräcänü ꞌto aar ci, ‘Jadu gwani Deleny, länggädängä gwïtï ngwamanu aar ang ngwäädä eny, ang ila gwuru dïrnü, nga mïnï ngwureda, ang ümï nga ji korkon, ara gu be ꞌti geꞌtaja ngwäyänü?’
45 La je be Deleny ci, ‘Nggwa je ci ꞌdidanu, yere yanni yaꞌta je ärrïjä ngwengga ngwüny ngwee ngwooko, lïngïdär ndi ari yaꞌta je ärrïjä änyïng.’ ”
46 No, ngwuje be ci, “La aar je be dinga la ele ndi rerani gwudi gwurꞌtaling a be ngwüjï ngwoo ngwüdünälü, ngwa aar je be dinga ngwa ele ngwaalu ngwudi midi gwudi gwurꞌtaling.”