11
Yicu na Yuwana Almamadan
(Luka 7.18–35)
1 Anni ma Yicu medaji olang ngwoꞌra ngwüngün ngwoo ngwuru ꞌdï (12) na rom, ngwüꞌdïꞌrï ngwugatani ngwaalinga ngwoo ngwele ndi enggaci ngwüjü gïyündär yidi Jälïlïng.
2 Anni ma Yuwana ꞌdingini gwuju korkon yiꞌral ye yanni yärrä je nginde gwanni Gwubrutaar yelenya, ngwükäjï ngwoꞌra ngwüngün
3 aar otacalu ndi ari, “Nga gwuru gwanni gwadi ila Gwubrutaar yelenya gwalla nyii dünïcï ngindeng gwuꞌter?”
4 A je Yicu ci, “Ïndär aang ondaci Yuwanang yiꞌral ye yanni yänggädä je ngaa je ꞌdingini
5 ndi ari ngwüjï ngwanni ngwürïmü ngwäy ngwuma ombajidalu, na ngwurga ngwuma ele, na ngwaamu ngwuma uꞌri nono, na ngwanni ngwürïmü ngwänï ngwuma ꞌdingini, na ngwanni ngwayu ngwuma ꞌdïꞌrälü ngwumidu, na ngwujaꞌri ngwanni ngwujaw ngwuma aar je ondaci ngwüjü ngwanni ngwuru ngwuwayi.
6 Gwa aar onjaci gwanni gwaꞌti gwa obalu ndi ämnï ꞌdünggüny.”
7 Anni ma ngwooꞌra ngwudi Yuwana ji ndi ele, a Yicu ondaci ngwüjü ngwonyadu gwani Yuwana ngwuje ci, “Giru ange ganni gïꞌtüdädä gu ndi ombaji poor gïtäny? Ngaa lïꞌtüdädï ndi ombaji gipuru gapu dirune?
8 Manari gäꞌtüdï, ngaa lïꞌtüdädï ndi ombaji dïjü digenna ngwureda ngwudi yelenye? Ngwüjï ngwanni ngwati genne ngwureda ngwudi yeleny ngwati ji ngwuꞌdun ngwudi yeleny.
9 A be ngaa lïꞌtüdädï ndi ombaji ange? Ndi ombaji dïjïra? Yäy, nggwa je ci na yipana gïdïjïr.
10 Nginde gwuru nggwee gwanni gwaru gwe ngwujaꞌri ngwanni ngwüllïnä ndi ari,
‘Äny gwadi ükäjä dïnädä düny ngwumadinana gwerre gwerre ꞌdunggunga,
aar ang jaꞌrimaci gay.’
11 Nggwa je ondaci ꞌdidanu ndi ari, gïyïjänü ꞌdar yanni yïlïngïtï je ngwaw, gere gaꞌti gïꞌdïꞌrälü gipana guꞌru ndi Yuwana Almamadan. A be gwanni gwokana giyelenyanu yidi gerala, gwuru gwanni gwupana ꞌdünggüngün.
12 ꞌTuꞌtu gaji ganni gapu ge Yuwana Almamadan yiiru yüngün, yeleny yidi gerala giyo yïmïnä je ngwüjï ndi aar je ape.
13 Ndi ari ngwïjïr ꞌdar na yobo, yondajaar je ꞌdi a gaji ila ganni gima ge Yuwana ila.
14 A manari ngaa lïjädï nda je ämnï, Yuwana nggwee gwuru gwani Ïlïyä gwanni gwüdünïcäär ndi ila.
15 Gwanni gwätï ngwänï, ngwuꞌdingini.”
16 A Yicu ari, “Gimaad nggee gadi nyi übïdänü ange gwe? Giru nono yïjü yanni yooko yiju ndi aku ngwuꞌdera ngwaalu ngwudi ngwiliny ati aar be urnidi ngwenggen aar je ci,
17 ‘Lïmïꞌrïcä je dümbärä ngaa
be ꞌdonya ndi riti,
ara je elngaci delnga yiwaya
ngaa ꞌti runu.’
18 Ndi ari Yuwana gwïndï ngwuꞌti ïtï ngwuꞌti ïyü, araar, gwätïnä dijegoꞌranu.
19 A Gïjï gidi Dïjï dümnä ila ating eny ating ïyï, araar, ‘Änggädär nggwee gwupa ngwamanu gwati ïyï ngwürlälï, aar ru ngwumaad ngwudulba ngwe na ngwüjï ngwanni ngwati aar je ci ngwuki.’ A be bebere gwati linginni ndi ätï ngwäyänü yiiru ye yüngün.”
Wäj bi gïyündär yanni yaꞌti joꞌrenyana
(Luka 10.13–15)
20 A Yicu girinya yündärä yanni yapung gu yiima yüngün yonyadana aaꞌti be ngwüjï ngwegen joꞌrenyana ngwuje ci,
21 “Wäj bi gwani Kürüjïn, na gwani Bid Jäyïdä! Adinari a yiima giyee yäpïnä ꞌdunggunga yäpïnä gïyündär yidi Jür na Jäyïdä, ngwüjï ngwegen ngwadi joꞌrenyana ꞌtuꞌtu gwerre ngwadi genne gïmärä ngwadi jalu ngwaaranu.
22 A be nggwa je ci ndi ari gomon gidi pï yelenya, ngwüjï ngwudi Jürïngä Jäyïdä gwe, ngwa ïnädänï Ngwaalinga ꞌdanggalu.
23 Na nga gwani Kaprnawum, nga gwa ji nga gwallu ꞌdi ang obani kere? Bärï, nga gwïꞌdä a gwüllï gidel didi yiꞌrany. Adinari yiima giyee yäpïnä ꞌdunggunga, yäpïnä ndi Jadum, yaadi jalu ꞌdi gomon gidi gweneng.
24 A be nggwa je, ci gomon gidi pï yelenya, ngwüjï ngwudi Jaduming, ngwa ïnädänï Ngwaalinga ꞌdanggalu.”
Ngwaalu ngwenggaca ngwüjü yujimida yüngün
(Luka 10.21–22)
25 Kaji nggoo a Yicu ari, “Nggwa ang ortada gwani Papa Deleny didi gerala na dïyäng, ndi ari nga gwänïjä yujimidalu yunga nda je ngwüjï lenge ngwanni ngwubebera nga je be enggaci yïjü yunga yanni yooko.
26 Yäy gwani Papa, yunga yiru giyee yanni yïjädängänü.
27 Yiꞌral ꞌdar yima aar nje Papa gwüny ätädä. Gwere gwaꞌti gwanni gwülïngïdï Gïjü a be Papa ru ꞌdogo na gwere gwaꞌti gwülïngïdï Papang a be Gïjï ru ꞌdogo na lanni lima je Gïjï utanu ngwuje enggaci Papang.”
28 Ngwuje ci, “Iladar ꞌdünggüny ꞌdar lanni gilo lüpïnä gwünï ligakidu nggwa je gataji düwä.
29 Üpïnär yunggu yüny, nga je enggaci nga lenge ndi ari äny gwüjïlänü nyi okeye ligor lüny ngaa la be gatu düwä gwani lingeno lalu.
30 Ndi ari yunggu yüny yijalu ürgäny na üpïnï gwüny gwängränü.”