7
Ämnï gwudi gur giru gwuꞌtulu
(Mätä 8.5–13)
1 Anni mung medaji ondacing ngwüjü ngwujaꞌri ngwee ꞌdar, ngwüꞌdïꞌrï ngwele Kaprnawum.
2 Ngenone gur geꞌte giju gu giru Diruman, giru kumndan gidi gwuꞌtulunga giꞌdu küüꞌrï tudini (100). Gätï dïnädä düngün dating ämnï gwulleny dümä ngwuru dadi ayi.
3 Anni ma kumndan nggoo ꞌdingina Yicu gwe, ngwükäjä mbumbung je loko lidi Ngwüyäwüd ndi ondaca Yicung ngwila ngwuꞌriyi dïnädä nono düngün.
4 Aar obana ndi Yicu aar päcälü gwulleny aar ci, “Guru nggee, yijaw gu nga üꞌrïjï dïnädä nono düngün.
5 Gati ämnï ngwüjü ngwege ꞌdi aar nje odaci ngwämrä ngwudi Ngwaalu.”
6 No, a Yicu ꞌdïꞌrï aar le ele. Anni mung ji gito gito ngwuꞌdun, a kumndan nggoo ükäjä ngwumaada ngwüngün ndi ci, “Gwani Deleny, aaꞌti angiꞌru ngwäy äny gwaꞌti ädï ngwäyänü ngwunga ndi ang üllälü ngwuꞌdunanu ngwüny,
7 yiru yïgäbïcïny nyi ꞌti ädï ꞌto ndi ang ïlïjä ligoꞌro le lüny. Ara ngwujaꞌri ngwulem ngwe ꞌdogo, dïnäd düny da be uꞌri nono.
8 Äny ꞌto gwuru dïjï degeꞌtaar ating ruyi ngwujaꞌri ngwudi ngweleny ngwüngün ngwanni ngwupana ꞌdünggüny. Nyi ätï ꞌto gwuꞌtulung je gwati ꞌdingini ngwujaꞌri ngwüny. Miny ci nggwee, ‘Ïndï!’ ngwele. Miny ci nggwoone, ‘Ila!’ ngwila. Na miny ci dïnädä düny, ‘Ärrü je no!’ ngwuje ärrï.”
9 A Yicu dibi ꞌdünggün, anni mung ꞌdingini ngwujaꞌri ngwee, ngwugwurlu ngwuci ngwüjü ngwanni ngwugwujana ngwonyadu, “Nggwa je ci nu äny gwaꞌti mbuja ämnïng Ngwaalu gwere aꞌtur ngwüjï ngwudi Yïjïräyïl gwuru nono nggwee.”
10 A ngwüjï ngwanni ngwükäjäär je aar oꞌraci kumndan nggoo ꞌdunu ꞌdünggüngün aar mbuji dïnädä düngün dima uꞌri nono.
A Yicu ꞌdïꞌrïyä gïjälü gidi dedel gayu
11 A bïgänü nggwoo, a Yicunga ngwooꞌra ngwe ngwüngün a je ngwüjï gwujani ngwonyadu aar ele kündär gani Nayin.
12 Anni ma aar obani gito gito gïlängïr lidi gündär nggoo gani Nayin, aar mbudi ngwüjï ngwe ngwapu dïjü dayu aar ji ndi ꞌtüdä ngwadi ele ndi gatidi. Ndoo dayu, gïjï giralu geꞌte pu gidi daw diru dedel. Aar ji ngwüjï ngwe ngwonyadu ngwudi gündär nggoo.
13 Anni ma Deleny engga ngindeng ngwïndä giligoranu lüngün gwulleny ngwuci nu, “Nga ꞌti aru.”
14 Ngwube dambu ngwudinga guy ngwakani dïmbürä nono danni dapaar de gïjü, a määtä a ngwüjï ngwoo ngwapu dünï. A Yicu ondaci ngwuci, “Damal ndee ꞌdïꞌrälü nggwuca gu!”
15 A gïjï nggoo gayu ꞌdïꞌrälü ngwujalu ngwondaji. A Yicu ape nggwäꞌräcï nanning gwüngün.
16 A yedeny eny ngwüjü ꞌdar aar ortada Ngwaalinga aar ari, “Dïjïr didi Ngwaalu dipa dima ar le ji! Ngwaalu ngwuma ila ndi gataji ngwüjü ngwüngün düwä!”
17 A yiꞌral giyee yidi Yicu badalu ꞌdar Yäwüdïyä na ngwaalu ngwujacidaar ngwe.
Yicu na Yuwana
(Mätä 11.2–19)
18 Anni ma ngwooꞌra ngwudi Yuwana ꞌdingini, aar ele aar ondaci Yuwanang ngwujaꞌri ngwee ꞌdar. A Yuwana urnida ngwoꞌra ngwüngün rom
19 ngwuje ükäjï Gideleny dani Yicu ndi aar otacalu ndi ari, “Nga gwuru gwanni gwadi ila, gwalla ndi ari nyii dünïcï gwuꞌter?”
20 Anni ma aar obani ndi Yicu aar ci, “Yuwana Almamadan gwükäjï nje ndi ar ang otacalu ndi ari nga gwuru gwanni gwadi ila gwalla nyii dünïcï gwuꞌter?”
21 Kaji nggoo geꞌte geꞌte, a Yicu uꞌriyi ngwüjü nono ngwonyadu gïdümdï donyadanu, ngwüꞌtüyï ngwüꞌrïllä, ngwuꞌriyi ngwüjü ngwäy ngwanni ngwürïmü ngwäy.
22 Ngwuci ngwoꞌra ngwoo ngwükäjä je Yuwana nu, “Oꞌrar ngaa ondaci Yuwanang yiꞌral ye yanni yima je engga nga je ꞌdingini. Ngwüjï ngwanni ngwürïmü ngwäy ngwuma ombajidalu, ngwanni ngwuru ngwumjo ngwuma ele, ngwanni ngwümätï je yaamu ngwuma uꞌri nono na ngwanni ngwürïmü ngwänï ngwuma ꞌdingini, ngwanni ngwayu ngwuma ꞌdïꞌrä ngwumidu. A ngwujaꞌri ngwanni ngwujaw ngwudi Ngwaalu ngwo ngwuma aar je ondaci ngwüjü ngwanni ngwuru ngwuwayi.
23 Gwonjacaar gwanni gwaꞌti gwa obalu ndi ari äny gwuru ꞌdidanu.”
24 Anni ma ngwooꞌra ngwanni ngwükäjä je Yuwana oꞌre, a Yicu ꞌdïꞌrï ngwondaci ngwüjü ngwonyadu ngwujalu Yuwana gwe ngwuci, “Anni ꞌtüdängää ngaa elaca Yuwanang poor gïtäny, ngaa liju ndi ari nga ladi engga ange ꞌdünggüngün? Gipuru gilagaja dirunalo?
25 Ngaa lïꞌtüdädï ndi engga ange? Dïjü digenna ngwureda ngwuꞌre? Bärï ngwüjï ngwanni ngwati gu genne no, aar elelle yelenya, ngwati ji ngwuꞌdun ngwudi ngweleny!
26 Ondaciiny, ngaa lïꞌtüdädï ndi engga ange? Dïjïra? Yäy, a be yänggädä je yanni yipana gïdïjïr.
27 Ndi ari Yuwana gwuru gwanni gwaru gwe Ngwaalu kitabanu ndi ari,
‘Geꞌtar ngwäyälü, nggwükäjä dïnädä düny ngwumadinana gwerre gwerre ꞌdunggunga
aar ang gïꞌtïjï gay.’”
28 A je Yicu ci nu, “Nggwa je ci ndi ari Yuwana gwupana guꞌru ngwüjälü ꞌdar ngwanni ngwülïngïtï je ngwaw gïdïdlä. A be gweꞌte gwanni gwuru guꞌru gooko giyelenyanu yidi Ngwaalu, gwuru gwanni gwupana guꞌru ndi Yuwana.”
29 A ngwüjï ꞌdinginalu ꞌdar, ngindenga na ngwudulba ngwuru ngwüjï ngwanni ngwämnä ndi ꞌdengenaci buping gwudi Ngwaalu ndi ari gwuru gwanni gwüdünälü a je Yuwana nyïnyï.
30 A be Ngwübärrïjï ngwoortanga le ngwudi yobo ꞌdonya buping gwudi Ngwaalu giyigoꞌro yegen a je ꞌti Yuwana nyïnyü yaw ye.
31 A be Yicu ari, “Gwenene ngwüjï ngwudi gimaad nggee ngwadi nje ci ngwuru nono ange?
32 Ngwuru nono yïjï yanni yooko yijalu ngwaalu ngwudi ngwiliny. Ati aar urnididi dula aar ari,
‘Lïmïꞌrïcä je dümbärä
ngaa be ꞌdonya ndi riti!
ara je elngaci delnga yiwaya
ngaa ꞌti runu!’
33 Yuwana Almamadan gwïndï ngwuꞌti ïyü diꞌrica ngwuꞌti ïtï yona ngaa ari, ‘Nginde gwätïnä dijegoꞌro nono.’
34 A Gïjï gidi Dïjï dümnä gïndï, ngwïyï ngweny ngaa ari, ‘Änggädär nggwee gwupa ngwamanu, gwati rlälï gwuru dimaad didi ngwudulba na ngwüjï ngwanni ngwuki.’
35 A be yujimid yidi bebere gwudi Ngwaalu ya be gwällïnï yïjï ye yüngün ꞌdar ndi ari yiru yanni yïdünälü.”
A Yicu ji yïrnü Gïdïbärrïjï
36 A Dïbärrïjï deꞌte urnidi Yicung ꞌdunu ꞌdünggün ndi aar gwe eny. A Yicu ele ꞌdunu ꞌdünggün ngwujalu ndi eny.
37 Kündär nggoo, daw deꞌte diju gu elelle gwüngün gwuki. Ngwuꞌdingina ndi ari Yicu nggwo yïrnü ꞌdunu ndi Dïbärrïjï, no a nginde ila ngwapana yila yiru giꞌreꞌreny gïbüng ge giru goꞌrr
38 ngwila ngwüdünï giluꞌranu lidi Yicu giyoralu yüngün ngwari ngwujabaji yora nono yidi Yicu yal ye yüngün ating je be ꞌdämïꞌrï nono ngwäꞌrü ngwe ngwüngün ngwuje aganni ngwuje bruti nono giꞌreꞌreny ge ngwuci yäy ꞌtu.
39 Anni ma Dïbärrïjï engga yiꞌral giyee ngwari giligoranu lüngün, “Adinari gur nggee ru dïjïr ꞌdidanu, gadi lenge ndi ari daw dani yärü ndee ndi akani nono, nginde gwadi lenge elelleng gwüngün gwanni gwätïng gwuki gwulleny!”
40 A Yicu ondaci guru ngwuci, “Jamaan, äny gwätï yiꞌral yeꞌte yada je ondaci.”
A Jamaan ci, “Ondaci nje gwani doorta.”
41 A Yicu ci, “Ngwüjï ngweꞌte rom ngwümïnädä je gur gidi dämjü dämjä nono. Gur geꞌte gïmïnädïng dinar nono küüꞌrï tudini tudini (500) a nggoo giꞌter, ngwümïnä dinar nono küüꞌrï rom na ꞌdï (50).
42 ꞌDün aar ꞌti ätï yiima ndi aar gwäꞌräcï, no ngwuje äbräcï dämäjälü mbüny ꞌdün. Yärü gwanni gwa ämnänï?”
43 A Jamaan ci, “Äny gwaru gur ga ru nggoo ganni giming äbräcälü gwonyadana.”
A Yicu ci, “Nga gwätïyä yiꞌral ngwäyänü.”
44 Ngwube gwurlada gidaw ngwube ci Jamaan nu, “Nga gwänggädï dayu ndee? Äny gwïndï ꞌdunu ꞌdunggunga, nyi ꞌti ätädï yaw nyi uni yora nono a be nginde diminy uyi yora nono yal ye yüngün ngwuje ꞌdämïꞌrï nono ngwäꞌrü ngwe ngwüngün.
45 A gwaꞌtiny aganna giyinenanu nyi ci jalu, a be nginde daꞌti dünü ndi aganni yora nono yüny ngwünyü ngwe ꞌtuꞌtu gaji ganni giminy ge ändä gïdrü.
46 Nga gwaꞌtiny ätädï yila nyi ye brütïnï kiꞌranu a be nginde diminy be bruti giꞌreꞌreny ge yora nono.
47 Nggwadi ang ci ndi ari, ämnï gwanni gwupa gwuming geꞌte ndi inggidi ndi ari ke gwüngün gwanni gwupa gwuma äbränälü a be gwanni gwuma aar düdänïjänü gwooko, ämnï gwüngün gwinggidung gwooko.”
48 A be Yicu ci dayu nu, “Lima aang düdänïjï keng gwunga.”
49 A ngwüjï ngwuꞌter ngwanni ngwujalu gïdïmbürälü didi eny, aar ari giyigoranu yegen, “Yärü gwuru nggwee gwaru gwa düdänïjï ngwüjänü giyiꞌral yegen yanni yiki?”
50 A be Yicu ci dayu ndoo nu, “Ïndï gwadatalu, ämnï Ngwaalu gwunga gwuma ang gïlängïdïyï.”