12
Arnganar ngwüjü ngwanni ngwuru yigoranu rom
(Mätä 10.26–27)
1 Gaji ge nggoo, a ngwüjï ji ngwonyadu ꞌdi aar roꞌtajidalu yora ye, ngwa ru ngwüüꞌrï ngwonyadu. Ngwümäätä ngwuci ngwoꞌra ngwüngün nu, “Arnganar ngwujaꞌri ngwudi Ngwübärrïjï ngwati ape ngwüjü nono ngwüꞌrïdü ngwülänü. Ngwati gäbïcï ngwüjü aar ru ngwumurꞌtuny.
2 Ngwujaꞌri ngwere ngwaꞌti ngwanni ngwaꞌti ngwa linginni ngwülübäjïnälü na yere yaꞌti yanni yaꞌti ya linginni yïgwüꞌrübänälü.
3 No yanni yada je ye ondaji nyïm ya aar je ꞌdinginalu gilingenalu na yanni yati ündäjïnï gïlänänü gïdrü ya aar ye ondaji ya ꞌtädïnälü poor ya je ngwüjï lenge.”
Ara je yedeny eny ndi yärü
(Mätä 10.28–31)
4 “Nggwa je ci lani ngwumaad ngwüny, aaꞌti yedeny ya je eny ngwüjï ngwanni ngwati ꞌrinye lingina ꞌdogo aar ꞌti ba be ätï yiꞌral yere yanni yadi aar je ärrï.
5 Nggwa je ondaci ndi ari ara je yedeny eny ndi yärü, ara je yedeny eny Ngwaalu ngwanni ngwätï yiima gïdïjï ndi ꞌrinye ngwätï yiima ꞌto ndi gatu gïlïgä lidi yiꞌrendeny. Yäy, nggwa je ci ara je yedeny eny ꞌdünggüngün!
6 Yïꞌrä tudini yilinginna ndi ari yati aar je ellang bartad ngwäy rom, gere gaꞌti gati Ngwaalu dodani.
7 A ngwäꞌrü ngwalu giyiꞌra ngwülïngïdï je Ngwaalu ndi ari ngwuru ümïn. No, aaꞌti yedeny ya je eny. Nga nga lipana guꞌru gïyïꞌrä yonyadu ngwäyänü Ngwaalu.
8 Gwanni gwunyi ꞌtäjälü ngwäyänü ngwüjï gwa Gïjï gidi Dïjï dümnä ꞌtäjälü ꞌto ngwäyänü ngwudi yïꞌrr yidi Ngwaalu.
9 Gwanni gwunyi ꞌdonya ngwäyänü ngwudi ngwüjï gwa Gïjï gidi Dïjï dümnä ꞌdonya ꞌto ngwäyänü ngwudi yïꞌrr na ngwudi Ngwaalu.
10 Gwanni gwa lo Gïjü gidi Dïjï dümnä gwa aar düdänïjänü. A be gwanni gwa lo Lïgïꞌrïmä lidi Ngwaalu lanni Lijuꞌru, gwaꞌti gwa aar düdänïjänü.
11 Manari ngwüjï ngwuma je apada ngwelenyanu ngwudi ngwämrä na ngwüjï ngwanni ngwuru yiꞌra na ngweleny, aaꞌti yigor ya je mïꞌränü ndi ari ngaa ladi be etadi giyigoꞌro yalu awa na ngaa ladi be ara.
12 Kaji nggoo, Lïgïꞌrïm lanni Lijuꞌru, la je enggaci ngwujaꞌri ngwanni ngwada je ondaji.”
Damal danni dïnänü
13 A gur geꞌte ngwüjänü ngwuci Yicung nu, “Gwani doorta, ondaca gwänggärï nyii genati yuꞌrinanu yanni yima aar nje mbumbu gwärï gätïjänï.”
14 A be Yicu ci nu, “Guru, yärü gwuru gwätädïny yelenya ndi a je üpïyï yiꞌral na ndi a je gïgïnïjï yuꞌrinanu?”
15 Ngwuje ci nu, “Arnganar mama aang rime ngwangina ndi übïjï yiꞌralanu yidi dïdlä ndi ari midi gwudi lingeno lidi dïjï gwaꞌti ani yuꞌrin yüngün yanni yonyadu yätïng je ngene gïdïdlä.”
16 A je Yicu mïꞌrïcï ngwujaꞌri ngwee ndi ari, “Giruny gäpïjä guru geꞌte gïnänü yona yonyadu.
17 Ngwïrïyï ngwäyälü giligoranu lüngün ngwari, ‘Nyi gwa ärrï ange? Nyi gwaꞌti ätï ngwaalinga ngwadi nyi gu bäläjï yuula yüny.’
18 Ngwari, ‘Yinje ärrï giyee. Nggwa pädä gïlïngälü güny nyi gaꞌriji gipana nyi gu bäläjï yonanu yüny na ngwony ngwüny ngwanni ngwujaw ngwuꞌter.
19 Nyi be ci lingina lüny, Lingeno lüny, aaꞌti ligor la ang mïꞌränü, jalu nga gatu düwä a gwätï ngwony ngwujaw ngwïrälü, ngwügïꞌtïnälü ngwa jalu ngwüdläyü ngwonyadu, no ïtï, ïyü nga jayanu.’
20 A be Ngwaalu ci nu, ‘Wä deꞌrr ndee, ligoꞌro lunga la aar ang apada dilunga didi gweneng, a be yeleny giyee yïgïꞌtïjä je ligoꞌro lunga, yadi je yärü ape?’
21 Yadi gu ru no gïdïjï danni dati maci lingina lüngün yelenya ngwuꞌti be ätï yelenya Ngwaalu.”
Aaꞌti yigor ya je pänü
(Mätä 6.25–34)
22 Ngwube ci ngwoꞌra ngwüngün, “No nggwa je ci aaꞌti yigor ya je pänü ngwaalu ngwudi midi gwani lingeno ndi ari ngaa ladi eny ange na ngaa ladi genne ange.
23 Midi gwujayana ngwong ngwudi eny na lingeno lijayana ngwured.
24 Ombajar yidongra yati ꞌti kwüdï yati ꞌti unu na yati ꞌti ätï yïmïꞌrïnä gïdrü aar ꞌti ätï yïlüng poor ati je be Ngwaalu monaci. Ya be ruꞌtana ꞌdanggalu nga nga lanni lipana guꞌru gïyïꞌrä.
25 Yärü gwuru ꞌdanggalanu gwati ligor pänü gwa burni ndi gendaci lingina lüngün gaji geꞌte pu ngwujalu ngwumidi?
26 Manari nga nga lati ꞌti burna ngwujaꞌri ngwanni ngwoko ꞌdogo, a be garang ganni gati a je gäbïcï ara je be ligor mïꞌrïcï yiꞌralanu yiꞌter?
27 Ombajar yibobo yidi ngwüdäny yati ꞌtü awa. Yati ꞌti apu yiiru na yati ꞌti ïrïyü. A be nggwa je ci deleny dani Jiliman yeleny yanu yüngün ꞌdar, gwaꞌti genna ngwureda ngwujaw yiꞌrura nono yibobo giyee.
28 Ma be ari Ngwaalu ngwati giki yanya yidi dïdäny no yanni yati ꞌtü gwene aar be undi aar gätïnï gïlïgä bïgänü aar uꞌdi, a mine ya ruꞌtana ꞌdanggalu, giki gwüngün ꞌdanggalu gwaꞌti be gwa pani guꞌru, äjï bini nga nga gilee lamiꞌratu ämnïng Ngwaalu!
29 Ati aang ꞌti gäbïcä yigor yalu ndi utalu eny gwe na ïyï gwe. Aaꞌti ligor la je mïꞌrïcï yiꞌralanu giyee.
30 Ngwüjï ngwudi dïdlä ngwuru ngwanni ngwati gwuji yiꞌral giyee ꞌdar. A be Papa gwalu gwülïngïdï gu ndi ari nga nga yata je bupi giyee ꞌdar.
31 A be bupar yelenya yidi Ngwaalu gwerre gwerre ya ara je be gendaci giyee ꞌdar.
32 Aaꞌti yedeny ya je eny gwani giꞌdoonga ganni gookoꞌriny, Papa gwalu gwudi gerala gwämnä ndi ari gwa je ätädä yelenya yüngün.
33 Ïllär yuꞌrina yalu ngaa ätädä ngwüjü ngwanni ngwaꞌti ätï. Ngaa geꞌtaji yuꞌrina ngwaalu ngwanni ngwati ꞌti ꞌdigiꞌru na yïlü yanni yaꞌti ya undanu kerala. Ngenone duꞌram dati gu ꞌti ꞌdünggädï na ngenone, yon yati gu ꞌti dibubu.
34 Ndi ari ngwaalu ngwanni ngwugeꞌtaja gu yuꞌrina yunga, ngenone ligor lunga la gu jada ꞌto.”
Ngwïnäd ngwanni ngwarngana
(Mätä 24.45–51)
35 “Rüjïnäränü aang jalu mama lïgä le lïmüjïnä.
36 Rüdär nono ngwüjü ngwanni ngwüdünïcä delenya degen danni dima ele gïyïꞌrïnyïnä yidi agidi aar be jicalu ngwäy ngwe nunnu manari dima ila mung pïdä dümbürä aar ïgïtäcälü puprang.
37 Ngwïnäd ngwa aar je onjaci gwulleny ngwanni ngwa aar je mbuji ngwujalu ngwäy ngwe mung ila. Nggwa je ci ꞌdidanu nginde gwa ꞌdïꞌrï gwa genne gwuꞌren ling je geꞌtalu gïdümbürälü ngwuje äpïjï yiiru aar eny.
38 Ya gu jayi ngwüjï ngwo ngwanni ngwa je deleny degen mbuji lijalu mama, da gu ne ila diligeny danu na gwele ma ngwaalu ru ngwadi uꞌri.
39 A be lïngïdär yiꞌral giyee ndi ari adinari dïjï dere didi ngwuꞌdun dima lenge ndi ari duꞌram dadi ila jadu, daꞌti dadi gäbïcï duꞌramu ndi pï ngwuꞌdunanu ngwüngün ngwänï.
40 Nga nga ꞌto nga la ji mama, ndi ari Gïjï gidi Dïjï dümnä ga ji gila kaji ganni gaꞌti ga ge gïꞌtïjï ngindeng ngwäy.”
Dartan danni diru ligor leꞌte pu
(Mätä 24.45–51)
41 A määtä a Butruj ci, “Deleny ngwujaꞌri ngwee ngwümïꞌrïcï nje ngwani änyängä jüco gwalla gwani ngwüjï ꞌdar?”
42 A Deleny ci nu, “Dartan dïndï ne danni diru ligor leꞌte pu dibebera dati deleny düngün gätïjänïjï ngwïnädä ngwüngün nding je ätädä ngwony ngwudi eny gilingen?
43 Ya gu jayi gidartan ndoo ma deleny düngün mbuji ndi ärrï yiꞌral giyee mung oꞌra.
44 ꞌDidanu nggwa je ci ding alliji giyeleny yidi ngwong ngwüngünälü ꞌdar.
45 Ma be ari dartan dima ci ligor lüngün nu, ‘Deleny düny dati jana ndi kwodalu no,’ ngwümäätä ngwïnädä ngwuru ngwur na ngwaw ngwuje pï ngweny ngwïyï ngwürlälï.
46 Deleny didi dartan ndoo da ila komon ganni gaꞌting ge gïꞌtïjä ngindeng ngwäy na kaji ganni gaꞌti nggee lïngïdï. Ding määtä ding pï ding dinga ngwaalu ngwudi ngwüjï ngwanni ngwaꞌti lïngïdï Ngwaalinga.
47 Dartan ndoo danni dati lenge buping gwudi deleny düngün ngwuꞌti be ju mama, ngwuꞌti ärrü buping gwudi deleny düngün, da mïꞌrïnänï gwulleny.
48 A be gwanni gwati ꞌti lïngïdï, ating be ärrï yiꞌral yanni yadi gäbïcï ngwümïꞌrïnï, gwa aar mïꞌrï gwooko. Gwanni gwati aar ätädä gwonyadu, gwa aar lanada nono gwonyadana. A gwanni gwuma aar ätädä gwanni gwonyadana, gwonyadana gwa aar gwe otacalu.”
Üꞌrïꞌtïdänü gwani Yicu
(Mätä 10.34–36)
49 “Äny gwïndädï ndi geꞌte lïgä gïdïyängälü, na nggwüjädï gu ndi ari ladi be mätïnï.
50 A be äny gwätï yiꞌrendenya yadi nje ape na awa ndi ari yedeny giyo yïtïny gu ꞌdi aar ila aar medadi!
51 Aaꞌti ngaa la ari nu äny gwïndädï ndi geꞌte adatingalu ngene gïdïdlä? Bärï, nggwa je ci äny gwïndädï ndi nyi geꞌte ngwujaꞌri ngwanni ngwa üꞌrïꞌtïyï ngwüjänü.
52 ꞌTuꞌtu gomon gidi gweneng ngwelada gweere, ngwüjï tudini ngwa ji gïdrü ngwüꞌrïdïnänü, täꞌrïl ngwa rucidi ngwïnïjï ngwüjü rom na ngwüjï rom ngwa rucidi ngwïnïjï ngwüjü täꞌrïl.
53 Ngindenga la üꞌränü, Papa gwa aar üꞌräjïdänü gïjï ge na gïjï ga aar üꞌräjïdänü papa gwe, nanni gwa aar üꞌräjïdänü gïjï giru gera na gïjï giru gera ga aar üꞌräjïdänü nanni gwe, nanni gwanni gwuru düünä gwa aar üꞌräjïdänü daw de düngün diru düünä na daw diru düünä da aar üꞌräjïdänü nanni gwe gwüngün gwuru düünä.”
Lïngïdär gaji
(Mätä 16.2–3)
54 Ngwuci ngwüjü nu, “Ma ji ma aang enggada gïbäꞌrü gätïnälä gïtäny gwe, puprang ngaa lati ari gadi ele ndi ni a be ngwujaꞌri ätï ngwäyänü.
55 Na gwele ma dirun anda kuy gidi gaama ngaa lati ari ngwaalu ngwadi ele ndi büdï, aar ätï ngwäyänü.
56 Ngwumurꞌtuny ngwee! Ngaa lati lenge awa ndi inggidi ngwujaꞌri ngwudi dïyäng a gere. Awa ngaa ꞌti be burna ndi lenge ngwujaꞌri ngwudi gaji nggee?
57 Ange gwuru ngaa ꞌti be lïngïdï ndi pï yeleny giyoꞌro yalu ndi ari yiru ange yanni yïdünälü?
58 Manari lima ang apada gideleny, kayalu güwän ge gunga, undu ngwäy ngaa oꞌrajidi güwän ge gunga kay. Manari ngaa lima obani gideleny da ang ape da ang ätädä gwommaning a gwommani gwa ang ape gwa ang giki korkon.
59 Nggwa ang ci nga gwa gennadalu ngenone ꞌdi nga geꞌtalu ꞌdar dani dämjü giligoꞌro danni dätängä.”