3
Nkɔlɔ ya suka
1 Oeɓaka na ɓolaa lowɔ lolo: Minyɔkɔ ma moya o nkɔlɔ ya suka.
2 Phɔ ɓato ɓamoɓa na elɛmɛ, ɓato ɓalooto la ɓaphalanga, ɓato ɓaamikumisa na ɓato ɓaa lolɛndɔ, ɓato ɓaatiyole Ŋwaphongo na mbolo isantu, ɓatɛmɛsi ɓa ɓaɓoti ɓa ɓɛ, ɓato ɓateɓaaphɛ mɛlɛsi na ɓato ɓaɓakyele ɓolaa.
3 Ɓamoɓa ɓato ɓaa bikyi, ɓato ɓaateɓaokye ɓato ngɔngɔ, ɓato ɓaakatele ɓɛbi maphɔɔ, eteɓaɓe na molɔngɔ, ɓatɔmbi, ɓanguna ɓa maphɔɔ malaa.
4 Ɓamungya ɓɛbi na ɓɛ, ɓatɛmbɛ izele, ɓamotonda na lolɛndɔ, ɓamoɓa nde bikamba ɓa bisengɔ ba mokyisi kasi ba Ŋwaphongo phe.
5 Ɓamiteya ndokolo ɓato ɓaanola, kasi teɓaanole muna mwiya. Sakula ɓa na ɓato ɓaɓana!
6 Phɔ ɓato ɓa ɓɛ́ɛ ɓayɔkɔ, ɓanyɔlɔ o mangambi, ɓakosa ɓasi ɓali na ntema nkɔɔ, ɓaanyanya masumu na ɓaaɓengye maphowa ndengye na ndengye.
7 Ɓasi mɛ, ɓalukye iyekola imbelɛ sisɔ, kasi teɓakokye ikoma o zebi sa phɛlɛ.
8 Nde ɓomɔ na Yanesi na Yambesi ɓatɛmɛlɛkyɛ Mose, nde ɓomɔ, ɓato ɓaɓana ɓatɛmɛlɛ maphɔɔ ma phɛlɛ. Ɓato ɓaɔtɔnɔ maumunya, teɓali na ianola sikusi.
9 Kasi eteɓakyɛndɛ itakye, phɔ ɓobubusi pha ɓɛ́ɛ pha mowɛnɛnɛ na ɓato ɓasɔ, ndokolo phaka ɓato ɓaɓale ɓaɓana.
Mateya ma suka
10 Kasi wɛ, waɓenga na ɓolaa mateya ma nga, moɓesi ŋwa nga, nyango ya nga, ianola sa nga, ikanga motema sa nga, lozingo la nga, ilendendala sa nga,
11 minyɔkɔ ma nga, mampasi maaoka nga o Antioshe, na o Ikoniumu, na Listrɛ. Minyɔkɔ ɓo mawɛnɛ nga! Emba i misɔ mamina Nkolo ambikya!
12 Kasi ɓato ɓasɔ ɓazingye ibika na ianola onte ya Klisto Yesu ɓamunyɔkɔmɔ.
13 Kasi phɔ ya ɓato ɓaaɓe na ɓaakate, ɓamokyɛndɛ nde o ɓoɓe, na ikatela ɓɛbi na imikatela ɓɛ́ɛ mampenza.
14 Kasi iwɛ, ikala nde o maphɔɔ maekola wɛ na maanola wɛ ya ɓayɔkɔ: Phɔ koeɓe nza owa eteya mango.
15 Tata ɓoŋwana pha wɛ, koeɓe ya koma ɓɛ́ɛ o Buku pha Ŋwaphongo, maphɔɔ mɛ mali na ɓokonzi pha eyeyimola zebi sikambe o lobiko o nzela ya ianola siili onte ya Klisto Yesu.
16 Maphɔɔ masɔ makomama o buku pha Ŋwaphongo, makomama na mwiya ŋwa Ŋwaphongo, mali na ntina phɔ ya iteya, ianolisa, phɔ ya itutola ɓato, na iɓateya nzela ya ɓosembo,
17 phɔ moto wa Ŋwaphongo aɓe moto oo ɓɔngyi, na ookokyi phɔ ya ikyela bitoma bisɔ bilaa.