18
Ikaa sa Babilɔnɛ
1 Sima mɛ, naesi ya wɛnɛ anzelu mosuu kaute o ikolo. Aɓaka na ɓokonzi ɓonɛnɛ, emba nkyɛmɔ yɛ yawɛninyaka munse munsɔ.
2 Ɓoɓɛlɛ, amba yaaŋwana na ŋwɛsi mokusi yokye:
«Ekaa, Ekaa, Babilɔnɛ eenɛnɛ!
Ebuto eziye ya ɓazabulu, na iɓombo sa malɔɓɔ masɔ maa sɔkɔtɔ, na [iɓombo sa mambulu na manyama] masɔ maasɔkɔtɔ na ma inganga.
3 Phɔ yaɓaka kyenyweya ɓato ɓa nkyisi isɔ malɛku ma yɔ ya ɓondumba pha yango.
Ɓakonzi ɓa mokyisi ɓakyela nɛ ɓondumba,
na ɓaungye ɓa mbolo ɓa mokyisi ɓamikumee na ɓombɔti phɛ.»
4 Ɓoɓɛlɛ namba ya oka ŋwɛsi mosuu o ikolo mowɔ oɓokye:
«Mana oka yɛ, ɓɛ̀ɛ ɓato ɓa nga!
Phɔ ɓɛ̀ɛ saangana nɛ o masumu mɛ, naa sanyɔlɔ o bisenzo biili nde phɔ yɛ.
5 Phɔ masumu mɛ manukaa nɔnɔ o ikolo,
Emba Ŋwaphongo amba na umunya bitoma bɛ biiɓe.
6 Omokyele nde ɓowakyelaka yo ɓɛbi,
lookyesi yo, omobuyisa lango mbala iɓale.
O kɔphɔ eyasɔbinyaka nɛ malɛku mɛ,
omosɔbinyisa omɔ mbala iɓale.
7 Nde ɓo wamikumolaka yo na ɓombɔti phɛ,
nde ɓomɔ mɛ omoɓenza minyɔkɔ na mangɔndɛ.
Phɔ o ndondo yɛ aɓaka kamiwɔlɛ oɓokye:
“Nazasi ya mokonzi,
sili ɓozengye,
esimbe nakyela ngɔndɛ nɔnɔ mokɔlɔ mɔnɔmɔ.”
8 Phɔ ya ɓomɔ, bisenzo bisɔ bamoyelela nde na mokɔlɔ mɔnɔmɔ:
Iwa, mangɔndɛ, zilo,
emba amba na zika na ŋwenya.
Phɔ Nkolo Ŋwaphongo owamosambisa ali Ekambambasi.»
9 Emba ɓakonzi ɓa mokyisi ɓaakyelaka nɛ ɓondumba na ɓaakumaká nɛ ɓaamolela, ɓamba na miima phɔ yɛ, wamowɛnɛ ɓɛ̀ɛ zunguu sa ɓozikakye phɛ.
10 Ɓamotɛmɛ itakye phɔ ya ilota minyɔkɔ mɛ, ɓamba wɔ ɓɛkye:
«Eye ngɔngɔ! Eye ngɔngɔ!
Mokyisi muunɛnɛ, Babilɔnɛ, mokyisi mookusi,
nde na imbɛlɛ sikuwe ɓoɓo moambo muumbo enyɛtɛ!»
11 Na ɓaungye ɓa mbolo ɓalele, ɓakyele ngɔndɛ phɔ yɛ; phɔ na moto taakule omba mbolo ya ɓɛ̀ɛ.
12 Mbolo ya ɓɛ̀ɛ mɛ eli: Itela, ebuni ya phalanga, maɓanga mamotiya, mayaka, bitobu ba ɓakyela ɓɛ́ɛ na kungyɛ nsanda na bitobu bamangola, nzete ya solo mpimbo, mbolo ya membe ma mbongo, nzete ya motiya, bibuni, na maɓanga ma marbre,
13 na mbolo ikyi ɓɔngya ntoma, na malasi, na yɔmbɔ, na mpaka ekye tumbe ɓɛ́ɛ phɔ ya iyambya zungu sa solo, na malɛku na mauta, na falini na ble, mangɔmbɛ na mampate, mampunda na mitomba mbila, na baombo na ɓaakyemi.
14 Emba isɔ yaamengyelaka wɛ ibuto itakye nawɛ. Isɔ ya ɓombɔti na iindaa iyeloti, otokule izwa nɔnɔ mokɔlɔ mɔnɔmɔ.
15 Ɓaungye ɓa mbolo ɓaakumaká nɛ, ɓamobutwa itakye nɛ phɔ ya ilota minyɔkɔ. Ɓamolela, ɓamokyela ngɔndɛ,
16 ɓamowɔ ɓɛkye:
«Eye ngɔngɔ, eye ngɔngɔ!
Mokyisi muunɛnɛ ŋwa lataka bitobu ba mangola na ba motiya,
na biingyɛngyɛ ndokolo itela,
na ndokolo maɓanga ma motiya na mayaka.
17 Phɔ nde na ŋwana imbɛlɛ sikuwe ezwele esɔ yɔɔtɔ!»
Emba ɓatambuse ɓasɔ ɓa avinyɔ na ɓa masuwa na ɓasɔ ɓakyele mambanga, ɓakyele bitoma na ɓalɔbi o mpiko eenɛnɛ, ɓamba butwa itakye nɛ.
18 Wa wɛnɛ ɓɛ́ɛ zungu sa ŋwenya mozikya mokyisi muunɛnɛ, ɓamba butwa ilika nyangye: «Mokyisi iye mokokanakyi na mokyisi muunɛnɛ mumu!»
19 Ɓamba ya phila maɓɔkɔ o nzoto, ɓaamba ya lika nyangye, ɓazase ngɔndɛ, ɓɛkye:
«Eye ngɔngɔ, eye ngɔngɔ!
Mokyisi muunɛnɛ ŋwaakumiá ɓato ɓasɔ ɓali na masuwa o mpiko eenɛnɛ,
mombi ɔtɔnɔ nde na ŋwana imbɛlɛ mokuwe ɓoɓo!»
20 Ikolo, kumba phɔ ya iɔtɔnɔ sa ŋwango!
Na ɓɛ̀ɛ ɓasantu, ɓa toma na ɓɛ̀ɛ ɓaimosi, kumba mɛ phɔ Ŋwaphongo omosambise phɔ ya ɓoɓe pha ekyelaka yo.
21 Ɓoɓɛlɛ anzelu mɔnɔmɔ oomokusi, amba tomba iɓanga sɔnɔsɔ saulana na munzɛlɔ muunɛnɛ, amba sikumbya o mpiko eenɛnɛ, amba wɔ yokye:
«Kyeka, nde ɓomɔɔ ɓoɓo, ɓowamovaka ɓɛ̀ɛ Babilɔnɛ, mokyisi muunɛnɛ.
Emba eteɓakule mowɛnɛ.
22 Eteɓakule oka tɔkɔ ya isangyi oka ya wɛ,
nyɛsi ya ɓatubi, ɓaulesi ɓa maphengo na mbɛnzɔ.
Etebakule zwa na motusi mɔnɔmɔ oka ya wɛ.
Na tɔkɔ ya munyilele etekule okana oka ya wɛ.
23 Saa ya tala etekule ngyɛngyɛ oka ya wɛ.
Ete ɓakule oka ŋwɛsi na munzenga molongyi na ekamba yɛ,
phɔ ɓaungye ɓa wɛ ɓa mbolo ɓaɓaka ɓato ɓanɛnɛ ɓa mokyisi,
phɔ ɓonganga pha wɛ ɓokose nkyisi isɔ.»
24 Emba oka ya wɛ ɓazwa malongo ma ɓaimosi, ma ɓasantu na ma ɓato ɓasɔ ɓaɓoma ɓɛ̀ɛ o mokyisi.