3
Mateya ma Yoane Moɓatise
1 O mbula ya iko mbuka itano ya ɓokonzi pha Tiɓɛlɛ Sezalɛ, Pɔsɔ Pilata aɓaka moangyesi ŋwa Yuda. Elode aɓaka mokonzi ŋwa Galileya, ŋwana nyango Philipe aɓaka mokonzi ŋwa Itule na Talakonite, Lizania aɓaka mokonzi ŋwa Abilɛnɛ.
2 Ana na Kaifa ɓaɓaka ɓanganga ɓanɛnɛ ɓa Ŋwaphongo. Imbɛlɛ mɛ Yoane ŋwana wa Zakaliya, aesi ya imola Simo ya Ŋwaphongo o ɓokye.
3 Yoane abuto ikyɛmitambula nkyisi isɔ iili o mokukulu ŋwa ebale ya Yaladɛnɛ. Aɓaka kakyɛmiwɔ na ɓato yokye: «Ɓɔngya mandondo ma ɓɛ̀ɛ, oɓatisame. Emba Ŋwaphongo amoelimbisa masumu ma ɓɛ̀ɛ.»
4 Ndengye mɛna, Yoane akokyaka maphɔɔ maakoma moimosi Isaya o buku pha Ŋwaphongo oɓokye:
«Moto mɔnɔmɔ kaŋwane o bokye:
Ɓɔngya nzela ya Nkolo!
Omotɛyisa nsonga!
5 Mangɔngɔ masɔ ɓamakyinza,
mangomba na makosi masɔ ɓamawalole.
Mangbɔngbɔ masɔ ɓamaelole;
maɓela mali o nzela ɓamakyinza.
6 Emba ɓato ɓasɔ ɓaamba wɛnɛ ɓokobikya Ŋwaphongo ɓato.»
7 Ɓato ɓaikye ɓaɓaka ɓaye oka Yoane phɔ aɓaɓatisa. Yoane aɓaka kawɔ na ɓɛ́ɛ oɓokye: «Ɓɛɛ ɓosoo imɛlɛ; oephɛ malondo ma ilota yɔɔ ya Ŋwaphongo ekyeye nza?
8 Kyela maphɔɔ ma wɛninya oɓokye oɓɔngyɛ moɓesi. Lɛ imiwɔlɛ oɓokye: “Ekpele yɔnɔyɔ etelokyele phɔ Abalayama ali nkɔkɔ wa ɓanga.” Nawɔ na ɓɛ̀ɛ ngakye Ŋwaphongo akokyi ibuya maɓanga mama ɓana ɓa Abalayama.
9 Ɓambo ɓɔngya ikoko phɔ ya itena nkanga ya nzete. Ŋwete munsɔ mootemooɓote mbuma indaa, ɓaamokpɛtɛ, ɓaamovaka o ŋwenya.»
10 Ɓato ɓamba motuna ɓɛkye: «Emba tokyele ɓo?»
11 Yoane amba ya ɓabuyisa yokye: «Oli na bitobu ɓiɓale ɓa ikolo, aphɛ yɔnɔyɔ na ooli pha. Oli na ntoma ya izaa, akaɓele ootoli na ntoma.»
12 Ɓaphutise ɓa mputi ɓakaka na ɓɛ́ɛ oka Yoane phɔ aɓaɓatisa. Ɓamba ya motuna ɓɛkye: «Moteye, tokyele ɓo?»
13 Yoane amba ya ɓabuyisa yokye: «Phutisa mputi nde ɓo owaetoma ɓɛ.»
14 Ɓatuluku ɓamba ya motuna na ɓɛ́ɛ ɓɛkye: «Ka ɓanga tokyele ɓo?» Yoane amba ya wɔ na ɓɛ́ɛ yokye: «Ɓɛɛ sanyɔkɔlɔ moto, saɓɔlɔlɔ moto ɓaphalanga, sakatela moto lowɔ, bika nde na iphuta sa ɓɛ̀ɛ.»
15 Ɓato ɓasɔ ɓaɓaka ɓakyele maumunya na ilemela oɓokye emba Yoane teli nde yo Masiya.
16 Yoane amba ya ɓabuyisela ɓɛ́ɛ ɓasɔ yokye: «Nga naeɓatisa nde na maa, kasi ookoye andekyi na mwiya; sikokyi na iingola nsimbi ya bikoto ɓɛ. Yo amoeɓatisa na Ɓolɔɓɔ Ɓosantu na ná ŋwenya.
17 Aphisi enyɛngyɛlɛ o maɓɔkɔ phɔ ya inyɛngyɛlɛ nkata ya angana na mbuma. Amoɓomba mbuma o ɓompɛndɛ kasi amotumba nkata o ŋwenya motemozime.»
18 Yoane akulaka na teya ɓato maphɔɔ masuu maiikye, aɓaka kaɓaimole na Simo Elaa.
Elode Atipasi aakye Yoane o bɔlɔkɔ
19 Yoane aoyaka Elode mokonzi ŋwa Galileya phɔ alongaka Elodiade, ŋwasi wa mwana nyango; na phɔ akulaka nakyela maphɔɔ maɓe maiike.
20 Emba Elode akulaka kyela lowɔ losuu looɓe; laa inyɔsa Yoane o bɔlɔkɔ.
Iɓatisama sa Yesu
21 Waaunva Yoane iɓatisa ɓato ɓasɔ, aesi ya ɓatisa na Yesu. Waaɓa Yesu kaɓɔndɛlɛ, ikolo siesi ya zibwa.
22 Ɓolɔɓɔ Ɓosantu ɓoesi ya moutela ndokolo inkoto ŋwenya, ŋwɛsi mɔnɔmɔ mouti o ikolo mooka oɓokye: «Oli Ŋwana wa nga owa sɔmi, nali na nkyisa ɓoikye phɔ yɛ.»
23-38 Yesu aɓaka na manbula phɛnɛphɛ na mako maato wa tata yo etoma yɛ. Ɓato ɓatataka iumunya oɓokye ali ŋwana wa Zozefu.
Zozefu aɓaka ŋwana wa Eliya,
Eliya ŋwana wa Matati,
Matati ŋwana wa Lewi,
Lewi ŋwana wa Melekyi,
Melekyi ŋwana wa Yanayi,
Yanayi ŋwana wa Zozefu,
Zozefu ŋwana wa Matatiasi,
Matatiasi ŋwana wa Amosi,
Amosi ŋwana wa Nauma,
Nauma ŋwana wa Esili,
Esili ŋwana wa Nagayi,
Nagayi ŋwana wa Maati,
Maati ŋwana wa Matatiasi,
Matatiasi ŋwana wa Semeyi,
Semeyi ŋwana wa Yozeki,
Yozeki ŋwana wa Yoda,
Yoda ŋwana wa Yoanane,
Yoanane ŋwana wa Leza,
Leza ŋwana wa Zolobabɛlɛ,
Zolobabɛlɛ ŋwana wa Salatiyɛlɛ,
Salatiyɛlɛ ŋwana wa Neli,
Neli ŋwana wa Melekyi,
Melekyi ŋwana wa Toli,
Toli ŋwana wa Kosama,
Kosama ŋwana wa Elemadama,
Elemadama ŋwana wa Ele,
Ele ŋwana wa Yesu,
Yesu ŋwana wa Elezele,
Elezele ŋwana wa Yolima,
Yolima ŋwana wa Matati,
Matati ŋwana wa Lewi,
Lewi ŋwana wa Simeyona,
Simeyona ŋwana wa Yuda,
Yuda ŋwana wa Zozefu,
Zozefu ŋwana wa Yowama,
Yowama ŋwana wa Eliyakimi,
Eliyakimi ŋwana wa Meleya,
Meleya ŋwana wa Mena,
Mena ŋwana wa Matata,
Matata ŋwana wa Nata,
Nata ŋwana wa Davidi,
Davidi ŋwana wa Yese,
Yese ŋwana wa Yeɓeni,
Yeɓeni ŋwana wa Ɓoaze,
Ɓoaze ŋwana wa Sala,
Sala ŋwana wa Nasoni,
Nasoni ŋwana wa Aminadaba,
Aminadaba ŋwana wa Alani,
Alani ŋwana wa Eselona,
Eselona ŋwana wa Pelesi,
Pelesi ŋwana wa Yuda,
Yuda ŋwana wa Yakoɓo,
Yakoɓo ŋwana wa Izaka,
Izaka ŋwana wa Abalayama,
Abalayama ŋwana wa Tela,
Tela ŋwana wa Nawolo,
Nawolo ŋwana wa Seluga,
Seluga ŋwana wa Leyu,
Leyu ŋwana wa Peloga,
Peloga ŋwana wa Ebele,
Ebele ŋwana wa Sela,
Sela ŋwana wa Kainama,
Kainama ŋwana wa Alapakasada,
Alapakasada ŋwana wa Sema,
Sema ŋwana wa Nowa,
Nowa ŋwana wa Lameke,
Lameke ŋwana wa Metusela,
Metusela ŋwana wa Enoka,
Enoka ŋwana wa Yalede,
Yalede ŋwana wa Malele,
Malele ŋwana wa Kename,
Kaname ŋwana wa Esini,
Esini ŋwana wa Seti,
Seti ŋwana wa Adamu,
Adamu ŋwana wa Ŋwaphongo.