BÚKÙ TÀ TƗ́DHƗ́//RU YÌZO DHƗ ÀDHYA 1 TÌMÒTÉYÒ 5

Tìmòtéyò nɨ drì tàma móndyá kaꞌìbhá dhɨ kɨ tà sè dhɨ

1 Mɨ́ kòtà tà màlɨ̀ga ɨ dri kúlí aswaaswa sè ko. Be ró dhɨ, mɨ́ kàdré mɨ́na àyɨ kɨ kodzó ngóró ámɨ atá ɨ tɨ́nɨ. Mɨ́ kàdré kàdhúrà kɨ ꞌo ngóró ámɨ adrúpi ɨ tɨ́nɨ. 2 Mɨ́ kàdré kpà tòkó màlɨ̀ga kɨ ꞌo ngóró ámɨ andre ɨ tɨ́nɨ, adrézó kyánzɨ kɨ ꞌo togó be lólo ngóró ámɨ amvúpi ɨ tɨ́nɨ.

Tàyɨ́tòkó kɨ tà

3 Lè mɨ́ kàdré tàyɨ́tòkó adrébhá móndɨ́ àko dhɨ kɨ lɨndrɨ̀ bha, adrézó àyɨ kɨ lɨkɨ́. 4 Dɨ, tàyɨ́tòkó àlo dhɨ kàdré ɨ́na ànzɨ ɨ́be yà, kó ngalè toyó ɨ́be yà dhɨ, lè àyɨ nda ɨ̀ kònì rè zyà adrélé tà ꞌo àyɨ kɨ tà kaꞌìkaꞌì sè, adrézó àyɨ kɨ tàndɨ kɨ súrú kɨ lɨkɨ́, adrézó tà logó àyɨ kɨ tibhá ɨ dré àyɨ kɨ tábhí ɨ́be, ngóró àyɨ nda ɨ̀ dré tá ꞌòle àyɨ dré dhɨ tɨ́nɨ. Tàko ko, tà nda tà dóro kɨtswálépi Gìká mìlésè dhɨ ꞌɨ. 5 Tàyɨ́tòkó adrélépi kalóma bàti dhɨ adré áyɨ mì bha Gìká véna, adrézó tà zi akódhɨ tí, adrézó tongólé rúá kìtú be ɨ̀ndɨ̀ ngátsi be landè àko ró. 6 Dɨ, tàyɨ́tòkó adrélépi tatsílé áyɨ tàndɨ nɨ lovó ꞌobe dhɨ drà ɨ́na dre, tágba dré adrézó lɨ́drɨ̀ ɨ́be dhɨ. 7 Mɨ́ kòlazí tà nda kòdhɨ ɨ móndyá kaꞌìbhá ɨ dri, à kòkɨtswáró tà kònzɨ ta àmɨ kɨ àlo rú ko. 8 Dhya àlo kàdré sùle áyɨ súrú ɨ rú ko, lavúlé dhɨ, móndyá áyɨ tàndɨ nɨ dzó lé dhɨ ɨ rú ko dhɨ, akódhɨ nda gà áyɨ tà kaꞌìkaꞌì dre. Akódhɨ kònzɨ móndyá kaꞌìbhá ko dhɨ kɨ lavú.

9 Kɨtswázó tàyɨ́tòkó àlo dhɨ nɨ rú bha tàyɨ́tòkó àruka adrélé ledélé dhɨ kya ɨ kòfalé dhɨ bvó dhɨ, lè akódhɨ nda nɨ kóná kòlavú nyadhɨ-na, ɨ̀ndɨ̀ kàdré tòkó adrélépi tá agó àlo kwákwá dhɨ àdhya ꞌɨ.* 10 Adré kpà lèá dhɨ, tà akódhɨ dré ꞌòle dhɨ ɨ̀ kàdré dóro móndɨ́ ɨ mìlésè. Kòdhɨ adré tàá dhɨ, akódhɨ tòkó adrélépi tá áyɨ ànzɨmvá kɨ lɨkɨ́ dóro, adrélépi móndɨ́ kɨ kaꞌì dòle ɨ́ véna togó dóro sè, adrélépi tà ꞌo móndyá kaꞌìbhá ɨ dré àyɨ kɨ màrábà tɨ́nɨ, adrélépi móndɨ́ kɨzà ro dhɨ kɨ ledé, adrélépi kpà áyɨ fe tà dóro kɨ kárá títí dhɨ kɨ ꞌo dhɨ ꞌɨ.

11 Dɨ, kàdré ɨ́na tàyɨ́tòkó kyánzɨ ró dhɨ kɨ tà sè dhɨ, mɨ́ kòbhà àyɨ nda kɨ rú tàyɨ́tòkó àruka kya ɨ kòfalé ko. Tàko ko, àyɨ kɨ lovó rúbhá àdhya kòlavú àyɨ kɨ lovó adrézó tròle Krísto rú dhɨ dre dhɨ, ɨ̀ nɨ lèá gòle làmó na. 12 Dɨ ɨ̀ nɨ àyɨ kɨ tàndɨ kɨ ꞌo tàbvó tàle, ɨ̀ dré mòndrà ɨ̀ dré tá sɨ̀le drìdrì dhɨ nɨ ŋòle dhɨ sè. 13 Kòdhɨ ɨ́be dhɨ, ɨ̀ nɨ ru su adrélé tòbvo ró, adrélé tatsílé móndɨ́ kɨ dzó ɨ ꞌásè. Ngbà ꞌí kòdhɨ ko, ɨ̀ nɨ kpà atsá tòkó adrébhá tà tàko kɨ ta, adrézó tɨfɨ́lé móndɨ́ kɨ tà ɨ ꞌásè, adrézó kúlí kɨtswábhá tàle ko dhɨ kɨ ta dhɨ ɨ ró. 14 Dɨ ásà dhɨ, má adré tàyɨ́tòkó kyánzɨ ró dhɨ kɨ drì ta, ɨ̀ kògòró mòle, adrélé ànzɨ ti, adrézó àyɨ kɨ dzó kɨ tà lɨkɨ́, ɨ̀ kòfèró láti àyɨ kɨ kàrɨbhá dré àyɨ kɨ rú tàzo kònzɨ dhɨ ko. 15 Tàko ko, àyɨ kɨ àruka ɨ̀ ku láti dóro ꞌásè gò, ɨ̀ dré dhèzo Sàtánà bvó.

16 Dɨ tòkó àlo Yésu nɨ kaꞌìlepi dhɨ kàdré tàyɨ́tòkó ɨ́be áyɨ súrú lé dhɨ, kàdré àyɨ kɨ ledé. Kòtayɨ́ àyɨ kɨ tà lanzìle Èkèlézyà dri ko, Èkèlézyà kòkɨtswáró tàyɨ́tòkó adrébhá kalóma bàti dhɨ kɨ ledé kòdhya be dhɨ bvó.

Bhàgo kɨ tà

17 Kàdré bhàgo adrébhá Èkèlézyà nɨ drì ko dóro dhɨ kɨ tà sè dhɨ, à kàdré àyɨ nda kɨ lɨndrɨ̀ bha vésè be rì. Lavúlé dhɨ, à kàdré ꞌòá kònɨ̀nɨ àyɨ adrébhá àyɨ kɨ fe adrélé Gìká nɨ kúlí longó, adrézó kpà akódhɨ nɨ tà tadhá dhɨ ɨ dré. 18 Tàko ko, Gìká nɨ Kúlí adré tàá dhɨ: «Tí dré adréràꞌa lòꞌwa ató zɨ̀le dhɨ ꞌá dhɨ, à kòdrò ti nɨ ngá nyàle dhɨ nɨ logázó drá ko,» ɨ̀ndɨ̀ «Lè dhya àzí ꞌòlepi dhɨ kònya áyɨ landè.»† 19 Mɨ́ kòyi tà adrélé tàle bhàgo àlo rú dhɨ ko, móndɨ́ rì yà kó ngalè na yà tà nda nɨ nobhá mì sè dhɨ ɨ̀ kàdré tàá àyɨ ko dhɨ.‡ 20 Dhya àlo kàdré tàkonzɨ̀ ꞌo dhɨ, mɨ́ kòtadhá tàkonzɨ̀ nda drá móndyá kaꞌìbhá títí dhɨ ɨ kandrá, móndyá àruka títí dhɨ ɨ̀ kàdréró ngá ro tàkonzɨ̀ ꞌòma sè.

21 Má adré ámɨ kodzó Gìká ɨ kandrá, Yésu Krísto be, ɨ̀ndɨ̀ ángéló Gìká dré kɨpèle dhɨ ɨ́be: Mɨ́ kàdré tà nda kòdhɨ kɨ ꞌo, adrézó móndɨ́ kɨ no twátwa ko. Mɨ́ kàdré kpà móndɨ́ kɨpèkɨpè ko. 22 Mɨ́ kòbhà drɨ́gá móndɨ́ dri, akódhɨ nɨ bhàzo twá Mírì nɨ àzí ꞌo dhɨ mbèlè ko. Mɨ́ kòfɨ kpà móndɨ́ kɨ tàkonzɨ̀ na ko. Dɨ, mɨ́ kàdré mɨ́na ámɨ tàndɨ nɨ lɨkɨ́ adrélé lólo.

23 Ámɨ ꞌa nɨ tà sè, ɨ̀ndɨ̀ ámɨ rúbhá dré adrélé drà ro rä dhɨ sè dhɨ, mɨ́ kàdré ngbà ꞌí yǐ mvu kòdhya ko. Mɨ́ kàdré kpà vínò mvu tsà be.

24 À kɨtswá móndɨ́ àruka kɨ tàkonzɨ̀ no ngádra ꞌá, àkò à tà rè àyɨ kɨ tàkonzɨ̀ nda kɨ tàbvó ko dhɨ ꞌá. Dɨ, à nɨ kó móndɨ́ àruka kɨ tàkonzɨ̀ no àmvolásà. 25 Kókpà kòdhɨ tɨ́nɨ, à kɨtswá tà dóro móndɨ́ ɨ̀ dré adrélé ꞌòle dhɨ kɨ no ngádra ꞌá. Ndɨ̀ndɨ̀ tà dóro adrélé nòle ngádra ꞌá ko dhɨ ɨ̀ kɨtswá àyɨ kɨ zu bwà ko.

* 5:9 5:9 À kɨtswá kpà kúlí tɨsɨ̀le Gìríkì ti sè kònɨ kɨ ladzá kònɨ̀nɨ: «…kòlɨkɨ́ ɨ ngbà ꞌí agó dré tá mòle dhɨ dré.» † 5:18 5:18 À kònò kpà Dùtèrònómè 25:4; 1 Kòrítòbhá ɨ 9:9; Màtáyò 10:10; Lúkà 10:7. ‡ 5:19 5:19 À kònò Dùtèrònómè 19:15.