BÚKÙ TÀ TƗ́DHƗ́//RU YÌZO DHƗ ÀDHYA 2 KÒRÍTÒBHÁ Ɨ 6

1 Àma Gìká nɨ àzíàmu ró dhɨ ɨ, mà adré àmɨ kɨ kodzó, mɨ̀ kònòró Gìká nɨ togó tanɨ mɨ̀ dré kisúlé dhɨ tà tàko ró ko. 2 Tàko ko, Gìká adré tàá dhɨ:

«Lókyá áma togó tanɨ tadházó dhɨ sè dhɨ, má yi tá mɨ.

Kìtú móndɨ́ kɨ tɨdrɨ́zó dhɨ sè dhɨ, má ledé tá mɨ.»*

Dɨ mɨ̀ yi rè ká! Nyànomvá kònɨ̀dhɨ, lókyá Gìká dré adrézó áyɨ togó tanɨ tadhá dhɨ ꞌɨ. Ándrò kònɨ̀dhɨ, kìtú Gìká dré adrézó móndɨ́ kɨ tɨdrɨ́ dhɨ ꞌɨ.

Kɨzà Pólò dré nyàle, ɨ̀ndɨ̀ tà dré ꞌòle Gìká nɨ àzí sè dhɨ ɨ

3 Mà adré tà kɨtswábhá móndɨ́ kɨ ꞌo ledhélé tàkonzɨ̀ na dhɨ kɨ ꞌo ko, à kòkɨtswáró tà ta kònzɨ àzí Gìká dré bhàle àma drɨ́gá dhɨ rú ko. 4 Be ró dhɨ, mà adré àma kɨ tadhá Gìká nɨ màrábà ɨ ró tà títí ɨ sè: Mà adré àma kɨ togó tsɨ kɨzà títí mà dré adrélé nyàle dhɨ ɨ na, ɨ̀ndɨ̀ tà kòkóròko adrébhá atsálé àma rú dhɨ ɨ na. 5 Lókyá àruka ɨ sè dhɨ, à tswà àma, àma kɨ lebhézó bǎdzó na. À kodzó móndɨ́ ɨ lɨgɨ́lé àma rú. Mà ꞌo àzí kòkóròko landèzo. Mà ko ayí ko, kó ngalè mà ayí tàbirí sè. 6 Mà adré àmakya tà ꞌo togó lólo sè, tà nìnì sè, togó vwàvwà sè, togó dóro sè, Tɨrɨ́ Lólo nɨ rìnyí sè, ɨ̀ndɨ̀ lèle túrúpfú àko dhɨ sè. 7 Mà adré tà bàti ta, adrézó tà ꞌo Gìká nɨ rìnyí sè. Mà adré àdzú ngá kɨ ru àma kɨ drɨ́ágó lésè ɨ̀ndɨ̀ àma kɨ lìdzí lésè, adrézó tà gyǎgya ꞌo ásà.† 8 Mà adré Gìká nɨ tà ꞌo, gba à kàdré àma kɨ lɨndrɨ̀ bha yà, kó ngalè à kàdré kanyò fe àma dré yà dhɨ, gba à kàdré àma kɨ rú ta dóro yà, kó ngalè à kàdré àma kɨ rú ta kònzɨ yà dhɨ. À adré àma kɨ zi móndɨ́ kɨ lɨtɨ́bhá ɨ ró, tákò mà adré àmakya tà bàti ta. 9 À adré àma kɨ no ngóró móndɨ́ nìle ko dhɨ ɨ ró, tákò móndɨ́ bǐ dhɨ ɨ̀ nì àma be. À adré àma kɨ no ngóró móndɨ́ dràdrà mìle dhɨ ɨ ró, tákò àma rè dhu lɨ́drɨ̀ ɨ́be. À adré tà ŋo àma dri, dɨ, à pfu ɨ́na àma dràle ko. 10 À adré kɨzà fe àma dré, dɨ, mà adré àmakya lenzélé. À adré àma kɨ no lemerèbhá ro, dɨ, mà adré àmakya móndɨ́ bǐ dhɨ kɨ ꞌo atsálé ngábhá ro. À adré àma kɨ no ngá àko na tɨ́nɨ, dɨ, àma àmakya ngá títí dhɨ ɨ́be.

11 Àmɨ Kòrítòbhá nɨ ɨ, mà tà tà àmɨ dré ngádra ꞌá. Mà tadhá àma kɨ togó dóro àmɨ dré dre. 12 Mà gà àma kɨ lèle tadhama àmɨ dré ko. Dɨ, mɨ̀ gà àmɨkya àmɨ kɨ lèle tadhama àma dré dre. 13 Má adré tà kònɨ̀dhɨ nɨ ta àmɨ dré ngóró áma ànzɨ ɨ dré dhɨ tɨ́nɨ: Mɨ̀ kàdré àmɨ kɨ togó dóro tadhá àma dré wà, ngóró mà dré adrélé àmakya nɨ tadhá àmɨ dré dhɨ tɨ́nɨ!

Ru amuma móndyá kaꞌìbhá ko dhɨ ɨ́be ko dhɨ

14 Lè mɨ̀ kàdré ru amú móndyá kaꞌìbhá ko dhɨ ɨ́be ko. Tàko ko, tà gyǎgya nɨ kɨtswá tsì ru su tà kònzɨ be bwà? Ngádra nɨ kɨtswá tsì ru amú tínímvá be bwà? 15 Krísto nɨ kɨtswá tsì ru yi Dzáborò be bwà? Dɨ móndɨ́ Yésu nɨ kaꞌìlepi dhɨ nɨ kɨtswá ru su móndɨ́ kaꞌìlepi ko dhɨ be ngɨ́nɨngɨ́nɨ ró? 16 Gìká nɨ tépelò nɨ kɨtswá tsì ru yi gìká tàko ɨ́be bwà? Tàko ko, àma Gìká lɨ́drɨ̀ ro dhɨ nɨ tépelò ꞌɨ. Ngóró Gìká nɨ tàndɨ dré tàle dhɨ tɨ́nɨ:

«Má nɨ adré àyɨ kòfalé,

adrélé atsílé túmä́ní àyɨ ɨ́be.

Má nɨ adré àyɨ kɨ Gìká ro,

ɨ̀ nɨ àyɨkya adré áma móndyá ɨ ró.‡

17 Dɨ Mírì adré tàá dhɨ:

Mɨ̀ kàpfò àyɨ kòfalésè,

àmɨ kɨ bha adrélé twá àyɨ rúsè.

Mɨ̀ kòtabè ngá àlo ndǐ ró dhɨ ko gò,

má kòkaꞌìró àmɨ.§

18 Mírì rìnyí líyí ro dhɨ adré tàá dhɨ:

Má nɨ adré àmɨ kɨ Atá ro,

mɨ̀ nɨ àmɨkya adré áma ànzɨàgo ɨ ró, ɨ̀ndɨ̀ áma ànzɨtòkó ɨ ró.»*

* 6:2 6:2 À kònò Èsáyà 49:8. † 6:7 6:7 «Àdzú ngá rùle drɨ́ágó lésè» kònɨ ɨ, àdzú ngá adrézó kàrɨbhá kɨ lavú ásà dhɨ ꞌɨ. «Àdzú ngá rùle lìdzí lésè» kònɨ ɨ, àdzú ngá adrézó sùle dhyá rú dhɨ ꞌɨ. ‡ 6:16 6:16 À kònò Lèvìtíkè 26:12; Yèrèmɨ́yà 32:38; Èzèkyélè 37:27. § 6:17 6:17 À kònò Èsáyà 52:11; Èzèkyélè 20:34, 41. * 6:18 6:18 À kònò 2 Sàmùwélè 7:14; Èsáyà 43:6.