11
OPoluc ana ul wothothïlettat ngkarra
1 Mpongothe itti onon thaccokot cïkït ilon papotte ithommaik thin, onon thoccokothe ntit.
2 Mpoꞌrianet non nthoꞌria ithoporot thoKapik. Mponeminthet non pul pulukku ana ook oMiccie ere ukul ioiꞌre ionemittanthet olle itti witta.
3 Anaruk mponu nꞌre akka annopaꞌre ma cik nolon ilaik ïcat loMiccie karkko Aua ipa pinyil pammikkothe mono apopaꞌrekathok ca cik ngkarra.
4 Akka amma opilin paat mono akwongkene lon loIeccuo nolon loIeccuo ilanïn thongkenet non lon len, ana manna amma onon thoccot kanang kꞌrek nokanang ikanon thoccot ana manna lon iloporot loIeccuo nolon loIeccuo ilanon thangkothe, onon thangkot accokkot.
5 Mpakatha itti mpakorronno oka potteik llon noul wothothïlettat ittïttïk ngkarra.
6 Mpantoka pakorronno ongkenetta itti mpere tat, anaruk mponu thina cik. Ana elli lanon thina akka onïn thokenet non maꞌri moppot nathar kurekkure.
7 Lokat lon ilokithak itti mparpet ka kin cik othakka itti anokuꞌret non kapik nthongkenenon lon iloporot loIeccuo ella manna akucci?
8 Mpokwiethe ul ioccokothe lon loIeccuo naꞌran wꞌrek nthonekot kin akucci othakka itti anathorekinenon ngngin.
9 Anakka oron thokat aththut mponat thiak thaꞌrupu anaruk mpakannomie pul pꞌrek, akka opang ponnongon ithaat noththok poMakthonia thittarathin naꞌrupu ia mponat thiak then. Mpoꞌrumot nan itti mpakorronno ommie pul pꞌrek ana mpaꞌrungkot nan okorronno ommie pul pꞌrek.
10 Ana ammakka lon loIeccuo ilaik ïcat ilaik iaun, pul pella noththok poKrik paceꞌren nothipot ka thoura nolon elli.
11 Akaintha? Akka mpongothe non? Ana Kapik kina itti mpongothenon.
12 Ana mpaꞌrungkot nan okkot lon ila mpaik pakkot anoceꞌre okkwion ithaik thipot ka thoura itti okin thaik thakkot ngre ammakka oron thaik thakkot.
13 Ul iammakka enni waul wothothïlettat ngkarra ana okin ul innikot itti okin ul wothothïlettat woMiccie.
14 Elli lakorronno oprttakiettot tit akka pul pothopulut cakuruk pinnikot itti paꞌrupa wothothïlettat wokꞌran ikaccieik.
15 Lakorronno oprttakiettot tit amma ul iarekinok winnikot itti woporot tokït koKapik. Caꞌri canthan icakin ocothakot ngkathar ikakin thonu itti okin thacothakot ngngin.
OPoluc pipot ka thoura nothoccokot thiak thung
16 Mpappopakkenthet non tit itti, nokorronno ome itti mpommaik nti ica. Anaruk amma onon thakathan ere mpommaik nongathin ammakka pul ipommaik othakka itti aniot lon lotte ilanipot ka thoura ngngin.
17 Nthipot ka thoura, mpaik pakerrnnere ammakka Ili ere anaruk mpaik pere ere pul ipommaik.
18 Inakka ul woppot waik wipot ka thoura ngkathar ika capu ncik appik okkot, mpipot ka thoura cakuruk.
19 Onon thakatha ka kon itti onon thinaik anaruk onon thaik thaccïkot lon loul iommaik.
20 Ilaik ïcat itti onon thaik thaccïkot lon loul iakkiet non thiak ana iammikkot non ana iarekienon llon appik ana iakkwenon thounu nattal.
21 Mpothiat cik iꞌre itti onïn thokat thommangka llon elli.
Mpaik pere ere pul ipommaik, lon ila apilingon thongothe itti okin thipot ka thoura ngngin, mpongothe itti mpipot ka thoura ngngin cakuruk.
22 Okin thaul woIpranini? mpapul poIpranin cakuruk. Okin thaul woIccereili? mpapul poIccereil cakuruk. Okin thathiki thApreini? mpapiki pAprein cakuruk.
23 Okin thaul iarekine oMicciei? (mpaik pere ere pul iponu purrut) Anaruk mpapul iparekine oMiccie cannan nakin. Mpokat ikorrkkor maꞌri moppot ana mpopokot cannan ana mpokat ere mpakkuttat attang ana attang.
24 Ul woIouth wokkwerin maꞌri ukuluk kurekkurek ua arrial ana attul ana ikken ukulacoꞌrin.
25 Ul woRumanin wokkwerin maꞌri mꞌrapuruk nurrong ittïttïk ana uꞌruncakot cik caꞌri culukku mmothok ana kuppuꞌrung konoiꞌri kocottathin ngngin irok maꞌri mꞌrapuruk ana mpikkatheik irok irapngka nokkonokki ana nokkꞌrokkꞌra
26 mponyarot nokurtti koppot ana kukkwit kukkwit. Nok inapangka nokkothin lon lokithak ana ul woluꞌran ialikine ul cik ikathar wokkothin lon lokithak ana ul win wonoththok pin wokkothin lon lokithak ana ul iakonnoka woIouth wokkothin lon lokithak ana mpokkattathe lon lokithak nan nokaꞌran kin ana mpokkattathe lon lokithak nan noththok pin ana mpiothe lon lokithak nonue ana mpokkattathe lon lokithak nan opangkingon ngngin ithonu karra.
27 Mporttekot ana okinya anganna ana mpakannoincicce inthe ana tï tokkuttethin ana pica ana kanang cannan ana mpokkat cunthut.
28 Ana nolon elli appik, lon lꞌrek iloꞌrothin cik lokat loul ioccokothe lon loIeccuo naꞌran appik.
29 Oththa akkapot ka ntit ampakannapo ka ntit? Oththa akkopaꞌrettat cik nti ilon iloporot ampakanua ka ci noucce?
30 Amma mponu itti mpipot ka thoura ana mpipot ka thoura llon ila mpommangka ngngin.
31 Kapik oththan poIli oIeccuo, ipapirakine noka thuput thuput pina itti mpaik pakannammikkot.
32 Nokaꞌran koThimacakka ili iotte iokat ikkun woili irïk Arththac ponekkethe ul iangwot cik itti wangwot othakka itti accokothin
33 Anaruk opangkinngon ilon loKapik thonekkethin ialnthung, akin orrepekathin okkien norttu anokkat cik nti inyaun nyen.