5
1 So ni tei na e manata mamana ana a Jesus nia naa wane aadafilia a God, nia naa na wela a God. Ma ni tei na e rakediana fuana ta maa, nia ka rakediana laugo fuana na wela nia.
2 Haia, gia haitamana gia ka rakediana fuana wela a God gi sulia gia rakediana ana a God ma gia ka roosulia na kwaieresia nia gi.
3 Ma lea gia ka rakediana fuana a God, gia ka roosulia na kwaieresia nia gi. Ma na kwaieresia nia gi kasi afetai go fuaga,
4 sulia na wela a God gi sui, haitamana gera ka saitasa faafia na taꞌalaa gi i laona na molaagali. Ma gia ka saitasa faafia na taꞌalaa sulia na manata mamanalaa gia ana a Jesus.
5 Ni tei na e haitamana ka saitasa faafia na taꞌalaa? Taifilia na iimola gi na da manata mamana ana Jesus naa na wela a God.
6 A Jesus Christ naa na wane na e lea mai fai nia na kafo ana siuabulaa ma na abu ana maelana. Nia lea mai langi lau fai nia na kafo go ana, ma nia ka lea mai fai nia roo si doo nae gi sui go, kafo ma na abu. Ma na Aanoedoo Aabu ka faarongo laugo sulia, sulia na Aanoedoo e bae mamanaa.
7 Na oolu si doo na e faarongo sulia a Jesus:
8 Na Aanoedoo Aabu ma na kafo ma na abu, ma na oolu si doo nae gi da faamamanaa sui go tee si doo.
9 Gia manata mamana ana na baelana na wane. Haia, na baelana a God na e rigita ka tasa, ma nia ka bae na sui naa sulia na Wela nia.
10 Nia nae so ni tei na e manata mamana ana na Wela nia a God, nia ka manata mamana ana taa naa a God e bae sulia na Wela nia. Ma so ni tei naa e langi kasi manata mamana ana a God, i nia e haea a God na wane susuge, sulia i nia kasi manata mamana ana si taa na a God e haea sulia na Wela nia.
11 Ma si baelaa a God na e faamamanaa sulia na Wela nia e urii: a God e falea sui naa na mouria firi fuaga, ma na mouria naa e ita mai faasia na Wela nia.
12 Ma so ni tei na e too oofu fai nia na Wela nia a God, nia ka too ana na mouria nae. Ma so ni tei na e langi kasi too oofu fai nia na Wela nia a God, nia kasi too laugo ana na mouria.
Na mouria firi.
13 I nau ku kedea si doo naa fuagamu hai muka haitamana, i gamu na mu manata mamana ana na Wela nia a God mu too na ana na mouria firi.
14 Ma gia si mou i maana a God, sulia gia haitamana nia e rongo gia si kada gia gania uria tesi doo na e lea sulia na kwaidooria nia.
15 Nia e rongo gia go ana si kada gi sui gia gani nia ana. Ma sulia gia haitamana si doo naa nia mamana, i gia ka haitamana laugo nia ka falea fuaga si taa naa gia gania faasi nia.
16 Ma lea o rikia ta haasi amu e iilia tesi doo taꞌa na e langi kasi mae ana, nia bobola oko fooa fuana a God hai tara ka falea mouria fuana. Nau ku bae sulia na garolaa gi na e langi kasi talaia na tooa gi ua uria na maea. Sui taa, teni garolaa laugo e talaia na wane uria na maea. Ma nau kusi haea hai muka fooa fuana a God sulia si doo nae gi.
17 Na doo gi sui na gia iili taꞌa ana e garo sui go. Sui, teni si taꞌalaa aai gi e langi kasi talaia na wane uria na maea.
18 Gia ka haitamana na wela a God gi e langi dasi tasa dongaa fai nia na aade taꞌalaa, sulia Jesus na Wela a God e aadasulida ma a Satan na Wane Taꞌa e afetai ka aadea tesi doo ani gera.
19 Haia, gia haitamana naa i gia na tooa a God gi, sui boroi ana a Satan e baita usia na molaagali sui.
20 Ma gia ka haitamana laugo na Wela nia a God e lea na mai, ma ka falea naa na haitamadooa fuaga, hai gia ka haitamana God mamana. Ma gia ka too oofu fai nia a God mamana ana oofuofua fai nia a Jesus Christ na Wela nia. I nia naa na God mamana, ma nia naa na mouria firi.
21 Wela nau gi ae, muka aadasuli gamu i talagamu faasia na doo gi na teni tooa da haea na a god gi, sui e langi lau na god mamana gi.