17
Yesu Eto Ditsyǝbi Áfloma.
1 Eyi akua kamaa, Yesu ákpa Petro ku Yakobo ku wǝ ɔyimi Yohanes mate úsuko kɔtini ko letaka eto disi kato.
2 Se bǝńyǝ mfóo, bǝnyǝ bǝ Yesu eto ǝsuǝ áfloma. Wǝ ǝnǝmi lɛ buyǝnde fe kofe, nya awu nnya onkpe diflubi futututu ɛnlɛ boto lǝ ǝnǝmi.
3 Mfó nya bakasebi itsyǝ bamǝ dínyǝ Moses ku Elia banlɛ etiki budi ku Yesu.
4 Nya Petro lébesǝ ɔkɔɛ kato ɔ́tɛyi Yesu nkǝ, “Bonamute, ɛlɛkɛ tinti bǝ búbǝ mfo! Lǝ aalaa, mooto ebu ǝtsyǝ. Fǝ lɔni, Moses lɔni nya Elia tsya lɔni.”
5 Se ɔnlɛ nyamfo bɔtɛyii, lɛsɔmiloku nǝ nlɛ buyǝnde ábɔ díti mǝ, nya bánɔ ɔkɔɛ lɛbɔ utsyi lɛsɔmiloku nǝmǝ kǝmiǝ nlɛ bɔtɛyi nkǝ, “Nyǝ mɔ Ubi lala, wǝ ǝsuǝ mǝǝnyǝ disuǝyuǝ. Bitsyue wǝ koto!”
6 Se bakasebi itsyǝ bamfo lɛnɔ ɔkɔɛ ǝmfoo, sikpi ǝmuǝ mǝ tinti nya béfi ǝnǝmi béfusǝ kasɔ.
7 Yesu ésu mǝ ɔflɔ nya útidi mǝ ɔ́tɛyi nkǝ, “Betaka bińyǝ! Biante sikpi!”
8 Se bátakasǝ ǝnǝmi bábe katoo, bǝnnyǝ kuutsyuǝ saa enso Yesu mate hã.
9 Se banlɛ bɔyifǝ lǝ kɔtini komǝ kǝbǝ kasɔɔ, Yesu ǝkǝ mǝ ato nkǝ, “Biantɛyi kutsyuǝ saa lesa nǝ bínyǝ mfo isu ese lefe nǝ batakasǝ mɔ, Utidi Eto Ubi, betsyiko ɔkɔmǝ mimbǝ.”
10 Mfó nya bakasebi bamǝ lɛtɔ Yesu bǝnkǝ, “Beso afi eto bateasa laatɛyi bǝnkǝ ele bǝ Elia ka bubǝ ɔtɔnsǝ?”
11 Yesu ǝtǝ mbuayɛ nkǝ, “Sitinti ele bǝ Elia ka bubǝ ɔtɔnsǝ bǝ lǝ ɔlɔ lesa saa utsyǝ.
12 Fɛɛ nlɛ mi bɔtɛyi minkǝ Elia ébubǝ koko, tsya bǝnyǝ wǝ bǝtsyǝ lekpo, nya béyifo wǝ disale nǝ kee bála. Nko ke booyifo mɔ, Utidi Eto Ubi tsya disiale nɛ.”
13 Mfó bakasebi bamǝ léte bǝ Ntuflǝsǝtidi Yohanes ɔnlɛ.
Yesu Ála Lɛwɔnɔ Bua Ditsyuǝ Utsyiko Lǝ Osaibi Utsyuǝ Ǝsuǝ.
14 Lefe nǝ Yesu ku wǝ bakasebi díbǝ báyo sitiditu siamǝ ɔflɔ, osani utsyuǝ ǝbǝ óse akonki lǝ Yesu ɔflɔ.
15 Nya ɔ́tɛyi wǝ nkǝ, “Bonamute, nyǝ mɔ ubisaibi ǝmfo kaminsǝ! Ɔlɛ budukanɔ eto bufi bufi nya ɔnlɛ kanyi bunyǝ tinti. Lefe kpǝ weedu kanɔ kedufǝ lǝ ute nye ntu ǝsuǝ tsya.
16 Nkpa wǝ mboko fǝ bakasebi ɔflɔ, fɛɛ bámfo wǝ botsya.”
17 Yesu ǝtǝ mbuayɛ nkǝ, “Mii, mmi eto betidi, beso biamfo mɛ kanɔ nya bitidi ato mǝ? Nte lefe nǝ eto okle ele bǝ nkɛ mi lǝ ɔflɔ? Nte lefe nǝ eto lefe ele bǝ mfi nnǝ mi! Bekpa osaibi ǝmǝ beboko mɛ mfo!”
18 Mfó Yesu léto ɔkɔɛ ókpe lɛwɔnɔ bua nǝ nlɛ dikpefi nǝmǝ bulǝ nya lɛbɔ wǝ lǝ ǝsuǝ! Nya bufi bomǝ díyuǝ wǝ lamfolamfo.
19 Kamaa, bakasebi bamǝ mate ǝbǝ Yesu ɔflɔ nya bátɔ wǝ bǝnkǝ, “Beso bóamfo lɛwɔnɔ bua nǝmǝ bola kǝlǝkǝ?”
20 Yesu ǝtǝ mbuayɛ nkǝ, “Mi bofokanɔ mǝmmuǝ ale. Nlɛ mi bɔtɛyi sitinti minkǝ lǝ mi bofokanɔ te fenkǝ diyibibi nǝ nso bɔfɛ kenkee, ele bǝ ibǝ itǝ bǝ biofo kɔtini komfo bɔtɛyi biǝnkǝ, ‘Nyi mfo, esu mǝ!’ Nya yuubǝ itǝ. Kulesa ǝmbǝ biǝmbofo buyifo.
21 Fɛɛ ɛyɛ lǝ olatoto ku kɛnyɛklekle ǝsuǝ hã fɛ biofo lɛwɔnɔ bua nǝmfo eto okle bola kǝlǝkǝ.”
Yesu Esi Údi Etiki Itsyi Lǝ Wǝ Ukpǝ Ǝsuǝ.
22 Lefe nǝ bakasebi bamǝ kenke díbǝ bátsya lǝ Galilea, Yesu átɛyi mǝ nkǝ, “Boofi Utidi Eto Ubi bakpe betidi lǝ ani,
23 nya boolo wǝ. Fɛɛ lǝ diyi tsyǝfǝ ǝsuǝǝ, Onanto ebotakasǝ wǝ utsyiko ɔkɔmǝ oboko nkpǝ.” Nyamfo álo bakasebi bamǝ ani.
Báfo Oko Lǝ Onanto Eto Disumuyo.
24 Lefe nǝ Yesu ku wǝ bakasebi díbǝ bédufǝ Kapernaum, Yudafɔ eto mba laafo Disumuyo eto oko ǝbǝ bátɔ Petro bǝnkǝ, “Mi oteasa tsya aafó Disumuyo eto oko ǝmǝ?”
25 Petro ǝtǝ mbuayɛ nkǝ, “Ee, woafó.”
Nya se Petro dísu údufǝ diyo, Yesu áka wǝ bɔtɔ nkǝ, “Simon, be ni fǝ nsusu? Bawoe eto ani ele bǝ bafo oko bǝtǝ kawunsiǝ eto baka? Bǝmǝnyǝ eto ani lee bafɔ?”
26 Petro ǝtǝ mbuayɛ nkǝ, “Bafɔ.”
Yesu ǝtǝ mbuayɛ nkǝ, “Nyalɛ ete bǝ yanle bǝ bǝmǝnyǝ fo oko saa nɛ.
27 Fɛɛ se boanla boǝ boata kuutsyuǝ saa bubu esoo, su ditumbukplɛ eto kɛnyɛ lǝ ata osakɛ. Lɛkpɛ tutɛ nǝ fuulǝkǝǝ, ebunyǝ atabi lǝ ni kɛnyɛ nnya looyo afo boofǝ eto oko ǝmǝ. Lǝkǝ nya, lǝ esu afo bokufǝ eto oko.”