15
Bekloma Lesa Nǝ Bófo Bɔ́nɔ.
1 Mɔ bayimi, mɔmɔɔ, nla miǝ bekloma ditiki sɛɛ nǝ mímboko mi béfo. Ditiki nǝ béfo bɛnɔ nya bińyǝ lǝ ni ǝsuǝ kekleke lǝ bofokanɔ ǝsuǝ.
2 Nya nyamfó ni ditiki sɛɛ nǝmǝ ku ni letsya nǝ mímbe míntǝ mi nɛ. Ditiki nǝ mǝ ebutǝ mi nkpǝ lǝ bɛlɛ ni kekleke, le inni nko mi bofokanɔ eyifo ebimba.
3 Lesa nǝ mímfo mintsyiko Boanto Onanto ɔflɔɔ, ni ke mímfi míntǝ mi nɛ. Nya nyamfo ni lesa nǝ mímfo ku koya kpǝ enso kenke bǝ Kristo ǝkpǝ lǝ bo abua eto disi fe kase báwɔni bákpe lǝ Awɔnisa Kɛnkɛ eto Kukue kemiǝ.
4 Nya bébikǝ wǝ, nya Onanto létakasǝ wǝ utsyiko ɔkɔmǝ óboko nkpǝ lǝ eyi ǝtsyǝ eto kama, nya ubǝ unsi lǝ nkpǝ fe kase bawɔni bákpe lǝ Awɔnisa Kɛnkɛ eto Kukue ǝsuǝ.
5 Nya ulǝkǝ ǝsuǝ óte Petro ku batɔnkpe lefosi inuǝ bamǝ.
6 Nyamfo eto kamaa, wǝǝlǝkǝ ǝsuǝ óte mba ditǝkǝko wǝ ba eso betidi lofa anɔ lǝ lefe ditsyuǝ ǝsuǝ. Nya mǝ nti eto bǝtsyuǝ kpǝ si besi nkpǝ mmi, ite bǝ mǝ bǝtsyuǝ ébukpǝ koko.
7 Nya nyamfo eto kamaa, úlǝkǝ ǝsuǝ óte Yakobo ku batɔnkpe bamǝ kenke.
8 Nya lǝ kalosǝkɔɔ, úlǝkǝ ǝsuǝ óte mintsya, mɔ nte fe utidi wǝ bále lǝ lefe nǝ dímanyo ǝsuǝ.
9 Itsyise mɔ ni batɔnkpe kenke nti eto nwǝ nso bɔfɛ. Nya mǝńyǝ ntǝ bǝ bakpo mɛ bǝ ɔtɔnkpe kulaa tsya, etsyise ntǝkǝko Onanto eto bafokanɔfɔ eto ditsyukpa kama nte mǝ ohiã.
10 Fɛɛ ɛyɛ lǝ Onanto eto lefonǝ esoo, nyifo utidi wǝ mini mmi. Nya wǝ lefonǝ eto asa nnya útǝ mɛ, ǝbǝ kutǝkǝ. Nya mínyifo keyifo kekleke enso batɔnkpe bamba ba ǝsuǝ kulaa betidi dífi ǝnǝmi bǝtǝkǝ nya inni lǝ mɔ ǝsuǝale ǝsuǝ. Bomu lǝ Onanto eto ǝsuǝale nya lɛwunsǝko mɛ mímfo nyamfo buyifo.
11 Nyaso lǝ mɔ ni lɛtɛyi mi lesaatsyuǝ o-o, nye mǝ lɛtɛyi mi o-o, lesa lɔni nǝmǝ ete bɔnlɛ bɔtɛyi nɛ. Nya nyamfo ni nnya béfo bɛnɔ nɛ.
Onanto Átakasǝ Kristo Úńyǝnsǝ Utsyiko Bǝkpǝnkpǝ Nti.
12 Mɔmɔ se bɔnlɛ bɔtɛyi boǝ Onanto átakasǝ Kristo úńyǝnsǝ utsyiko ɔkɔmǝ úbǝ nkpǝǝ, beso ini bǝ mi bǝtsyuǝ lɛ bɔtɛyi nkǝ, Onanto ensiembotakasǝ bǝkpǝnkpǝ utsyiko ɔkɔmǝ oboko nkpǝ bio?
13 Lǝ nko ini sitintii, nyalɛ Onanto mántakasǝ Kristo utsyiko ɔkɔmǝ óboko nkpǝ.
14 Nya lǝ Onanto mántakasǝ Kristo utsyiko ɔkɔmǝ úbǝ nkpǝ sitintii, nyalɛ nnya letsyabebe ǝmbɔkɛ kutǝkǝ itǝ mi. Nya mi bofokanɔ tsya eyifo bimba.
15 Nya nte lesa nǝ nsi lookpe bo nkɛale lǝ lefe nǝ eto lefe inni sidia bɔnlɛ bɔtɛyi lǝ Onanto ǝsuǝ boǝ ótakasǝ Yesu utsyiko ɔkɔmǝ úbǝ nkpǝ. Fɛɛ lǝ sitinti ini bǝ bǝkpǝnkpǝ aantaka ketsyi ɔkɔmǝ kǝbǝ nkpǝǝ, nyalɛ wátakasǝ Yesu utsyiko ɔkɔmǝ.
16 Nyaso lǝ sitinti ini bǝ baatakasǝ bǝkpǝnkpǝ ketsyiko ɔkɔmǝ, nyalɛɛ, bete biǝ wantakasǝ Yesu utsyiko ɔkɔmǝ óboko nkpǝ.
17 Nya lǝ Onanto mántakasǝ Yesu utsyiko ɔkɔmǝ sitintii, nyalɛ mi bofokanɔ ǝmbǝ kutǝkǝ saa, nya bisi benkpe lǝ mi abua ǝsuǝ.
18 Nya kasɔ ni bǝnkǝ mba léfo Kristo bánɔ ba díkpǝ tsya ánya.
19 Nya lǝ kawunsiǝ kamfo eto nkpǝ eso ete bufi bo kusubebe butǝkǝ lǝ Kristo ǝsuǝǝ, nyalɛ bo nkpǝ kpe kaminsǝ enso lǝ kawunsiǝ kenke eto betidi nti.
20 Fɛɛ ɔnukualɛ ini bǝnkǝ Onanto átakasǝ Kristo utsyiko ɔkɔmǝ. Nya wǝ ni utidi tutɛ wǝ létaka utsyi ɔkɔmǝ lǝ bǝkpǝnkpǝ nti nnya nlɛ bo uyi bose nkǝ mba kenke díkekpǝ si bootaka.
21 Itsyise fe kase ukpǝ lɛyɛ lǝ utidi ɔni ǝsuǝ úbǝ kawunsiǝ, nko ke ini bǝ bekpǝnkpǝ ebotaka betsyi ɔkɔmǝ ɛyɛ lǝ utidi ɔni hã ǝsuǝ nɛ.
22 Fe kase betidi kenke ɛyɛ lǝ Adam ǝsuǝ lǝǝkpǝ se beyifo lɔni ku wǝ esoo, nko ke ini tsya bǝ Onanto ebotakasǝ betidi ba díkekpǝ kenke bǝ lǝ bǝbǝ bǝsiǝ nkpǝ ɛyɛ lǝ mǝ lɔniyifoyifo ku Kristo eso.
23 Fɛɛ Onanto ebotakasǝ utsyuǝ saa wǝ nsi nkpǝ lǝ kusu ko Onanto kosate ditsyue utsyǝ ǝsuǝ. Nya Kristo ni ututɛ. Nya lǝ lefe nǝ luubǝ bio ǝsuǝǝ, mba dífi mǝ ǝsuǝ bǝtǝ Kristoo, mǝ usi wootakasǝ uńyǝnsǝ nɛ.
24 Lǝ nnya kamaa, kalosǝkɔ ebubǝ. Nya Kristo ebɔtsylɔsǝ lɛwɔnɔ eto ǝsuǝale saa, betidi ba nsi lǝ ndikɔ ndikɔ kɛnyɛ ku mba nkpǝ lɛwɔnɔ eto ǝsuǝale saa eto okle. Nya Kristo luufi sekakedikɔ siamǝ okpe lǝ Onanto wǝ ni Anto eto ani.
25 Itsyise ele bǝ Kristo di seka isu ese lefe nǝ Onanto luufi wǝ balo kenke okpe lǝ Kristo eto akpa kalɔ.
26 Nya olo fɛfɛ wǝ eto ditsyǝbi wɔɔtsylɔsǝ ni ukpǝ.
27 Itsyise Awɔnisa Kɛnkɛ eto Kukue átɛyi nkǝ, “Onanto éfi asa kenke ókpe lǝ wǝ akpa kalɔ.” Nya ekpa wuee bǝ lǝ bátɛyi bǝ asa kenkee, nyamfo anlɛ bote bǝ Onanto wǝ dífi asa nyamfo ókpe lǝ Kristo eto akpa kalɔ tsya bébu wǝ bakpe lenti.
28 Nya lǝ lefe nǝ Onanto difi asa nnya kenke ókpe lǝ Kristo kalɔ ólesǝǝ, wǝ Kristo wǝ ni Onanto Eto Ubi ǝmǝ ebufi wǝ ǝsuǝ okpe lǝ Onanto ǝmǝ eto kalɔ bǝ lǝ Onanto lǝ udi seka lǝ asa nnya kenke ǝsuǝ.
29 Mɔmɔɔ, itsyi lǝ betidi ba laafo ntuflǝsǝflǝsǝ eto lekpa ǝsuǝ, lǝ betidi ba díkekpǝ koko eto disi, be ni diyifobi nǝmǝ eto kasɔ? Nya be nkpe lǝ nnya ǝsuǝ? Lǝ sitinti ini fe kase bǝtsyuǝ laatɛyi bǝnkǝ bensiembotakasǝ bǝkpǝnkpǝ bǝbǝ nkpǝǝ be ini eso ele bǝ bǝflǝsǝ betidi bamǝ ntu lǝ mba díkekpǝ bafe eto disi?
30 Nya bo mba ni batɔnkpe tsya nkpǝ? Beso bo tsya eto nkpǝ nkpe lǝ bulǝ ǝsuǝ lefe saa?
31 Mɔ bayimi, ukpǝ eto bulǝ tǝkǝko mɛ diyi saa nǝ kale disiǝ! Nya maabesǝ ǝsuǝ kato kǝtǝ ukpǝ lǝ mi disi itsyi lǝ kase buyifo bani ku Bonamute Kristo Yesu eso. Nyaso mǝǝlǝkǝ nyamfo kate wuee nɛ.
32 Fɛɛ lǝ kawunsiǝ kamfo eto nsusu ǝsuǝ eso ete mínkpɔ ku betidi ba nte fe bebutubuki lǝ Efesoo, be ni kutǝkǝ ko mínyǝ lǝ nnya ǝsuǝ? Nya lǝ betidi ensiembotaka betsyi ɔkɔmǝ bǝbǝ nkpǝ sitintii, nyalɛ biyi biǝ iyifo fenkǝ, buyifo fe kase lekpa ditsyuǝ nlɛ bɔtɛyi nkǝ,
“Bitǝ lǝ budi lǝ bunǝ,
itsyise kusɛ ete boǝ bǝkpǝ nɛ.”
33 Biǝntǝ lǝ bawɛ mi bakpe. Sɛyɛtsyuǝ bua eto betidi aabiasǝ ditsyǝbi sɛɛ eto ole.
34 Bisinkli bifi nsusu lǝ asa sɛɛ buyifo ǝsuǝ, lǝ bɛyɛ asa bua buyifo. Nlɛ mi etiki budi wuee bǝ lǝ kofani lǝ kɔlɛ mi, itsyise mi bǝtsyuǝ enyi Onanto.
Paulo Édi Etiki Itsyi Lǝ Bǝkpǝnkpǝ Eto Businkli Kataka Ǝsuǝ.
35 Utsyuǝ ebɔtɔ nkǝ, “Ntsyǝ bunsi bootakasǝ bǝkpǝnkpǝ nya ntsyǝ boosinkli bǝbǝ bǝsiǝ nkpǝ? Nya nte ǝsuǝ nnya eto okle lɔɔkɛ mǝ?”
36 Mi betidi eto bamumu! Lǝ ato diyibibi lǝ kasɔɔ, dienkǝ kafiani lesa nǝ nkpe nkpǝ lǝ díembu lǝ sitǝ ǝsuǝ.
37 Nya lesa nǝ bétoo, edisa eto dibibi ete yeedi fe lentabi nye edisa ǝtsyuǝ eto dibibi ete dini. Nya inni lesa nǝmǝ eto uyibi ni nnya bífi békpe lǝ kasɔ fɛ diabe.
38 Onanto ǝtǝ diyibibi nǝmǝ ditsyǝbi nǝ ke woala. Wǝǝtǝ diyibibi saa ku ni uyi eto okle nǝ lɛlɛkɛ itǝ ni.
39 Nya asa nnya kenke nkpe nkpǝǝ, ǝtsyuǝ saa ku nnya ǝsuǝ eto sinǝ. Betidi eto ǝsuǝ eto sinǝ kpe lete. Nya nko ni bebuki tsya eto ǝsuǝ eto sinǝ nɛ. Baklɔbɛ tsya eto ǝsuǝ eto sinǝ kpe lete nya ketu eto sinǝ tsya ǝsuǝnkpe lete.
40 Kato eto asa kpe. Nya kasɔ mfo eto asa tsya nkpe. Asa nnya nkpe kato eto ǝsuǝ eto bɔnɔ bobe kpe lete lǝ nnya nkpe lǝ kasɔ mfo eto ǝsuǝ eto bɔnɔ bobe.
41 Kofe ku ko diyǝndebi ku kofande tsya eto diyǝndebi nkpe lete. Nya befandebi tsyaa, mǝ diyǝnde kpe lete. Nya lǝ befandebi nti kulaa tsyaa, letekɛkɛ kpe lǝ mǝ diyǝndebi ǝsuǝ.
42 Nko ke yuutsyǝ lǝ lefe nǝ Onanto lootakasǝ bǝkpǝnkpǝ utsyiko ɔkɔmǝ nya boosinkli bǝbǝ bǝsiǝ nkpǝ nɛ. Lǝ bebikǝ utidi eto sinǝǝ, siyifo lesa nǝ luubu ebia. Nya lǝ batakasǝ wǝ baboko nkpǝǝ, weensi embukpǝ.
43 Lǝ bebikǝ wǝǝ, weensiannɔ bobe nya wǝǝyuǝ. Nya lefe nǝ bátakasǝ wǝ betsyiko ɔkɔmǝǝ, woanɔ bobe nya woakɛ ǝsuǝale.
44 Lefe nǝ bebikǝ wǝǝ, uyifo kawunsiǝ eto ǝsuǝ eto sinǝ sia díkpǝ.
Nya lǝ batakasǝ wǝ baboko nkpǝ, uyifo lɛwɔnɔ eto ǝsuǝ. Lǝ kawunsiǝ eto ǝsuǝ kpee, nyalɛ bete biǝ lɛwɔnɔ kemiǝ eto ǝsuǝ tsya kpe.
45 Itsyise ekpe lǝ Awɔnisa Kɛnkɛ eto Kukue ǝsuǝ bǝ, “Utidi tutɛ wǝ ni Adam, Onanto uni diyifo wǝ nya útǝ wǝ nkpǝ fe kawunsiǝ eto utidi.” Nya Adam fɛfɛ ǝmfoo, wǝ ni Lɛwɔnɔ nǝ lǝǝtǝ nkpǝ nɛ.
46 Inni lɛwɔnɔ nǝ nkpe lǝ bo lǝǝtǝ boeyifo asaa, laatɔ. Bomu ǝsuǝ eto sinǝ laatɔ̃. Nya kama fɛ lɛwɔnɔ nǝ nkpǝ kemiǝ lǝǝlǝkǝ.
47 Adam tutɛ wǝ Onanto díyifoo, úlǝkǝ wǝ utsyiko sitǝ ǝsuǝ. Nya Adam nuǝfǝ alɛ, kato utsyi úbǝ.
48 Nya betidi ba nkpe lǝ kasɔ mfoo, mǝ eyifo fe utidi wǝ bulǝkǝ betsyiko lǝ kasɔ eto sitǝ hã ǝsuǝ. Nya mba beyifo itǝ katoo, mǝ tsya eyifo fe utidi wǝ ditsyi katoo, úbǝ.
49 Fe kase bunte fe utidi wǝ lɛbɔ utsyi lǝ kasɔ mfo eto ditsyǝbii, nko ke ini bǝ utidi wǝ ditsyi kato ubǝǝ, ebutǝ nkǝ bofo wǝ ditsyǝbi nɛ.
50 Mɔ bayimi, nyamfo eto kasɔ lǝkǝlǝkǝ ni bǝnkǝ lesa nǝ ni ǝsuǝ eto sinǝ ku kɔtɔɔ, ǝmbofo kedikɔ bunyǝ lǝ Onanto eto sekakedikɔ. Nya lesa nǝ laabiaa, embofo kedikɔ bunyǝ lǝ lesa nǝ laambia ǝsuǝ.
51-52 Bɛnɔ akulasa nyamfo. Inni bomblɛ kenke luukpǝ. Fɛɛ lǝ bǝfǝ kakpatsyaku fɛfɛɛ, bɔɔtsyi bomblɛ eto ditsyǝbi bawuninsǝ. Nya wuuyifo nnya nko lǝ dinǝmisɔsɔ lɔni kplo ǝsuǝ. Itsyise lǝ kakpatsyaku fɛfɛ ǝfǝǝ, Onanto ebotakasǝ bǝkpǝnkpǝ ɔboko nkpǝ itǝ bensiembukpǝ kulefe. Nya woofloma bo ditsyǝbi kenke.
53 Itsyise lesa nǝ labiaa, ele bǝ lefloma ku nǝ lambia lǝ dibǝ lefo lǝ nǝ labia eto kɛnyɛ. Nya lesa nǝ lǝǝkpǝ tayaa, woofloma ni lǝ nǝ lǝǝnkpǝ lǝ dibǝ lefo lǝ ni kɛnyɛ.
54 Nyaso lǝ asa nyamfo ǝbǝ itǝ nko nya baafloma asa nnya laabia isu nnya lensiambiaa, nyalɛ Awɔnisa Kɛnkɛ eto Kukue eto etiki nnya nlɛ bɔtɛyi nkǝ, “Bátsylɔ ukpǝ eto ditsyǝbi butǝkǝ wǝ kato!” ǝbǝ itǝ nko sitinti.
55 Nya báwɔni tsya balɛ bɔtɛyi bǝnkǝ,
“O Ukpǝ, sieti fǝ ǝsuǝale nyamǝ nte?
Nya se fǝ ǝsuǝale eto obé ǝmǝ faata bo nte?”
56 Ukpǝ ǝǝnyǝ ǝsuǝale nya woata bo obé ɛyɛ lǝ lebuayifoyifo eso. Nya ǝsuǝale nnya lebua lǝǝnyǝ etsyi lǝ kɔfi ǝsuǝ.
57 Fɛɛ boasɔ Onanto ani. Wǝ uni ditǝ nkǝ butǝkǝ lebua kato ɛyɛ lǝ Bonamute Yesu Kristo ǝsuǝ!
58 Nyaso, mɔ bayimi lala, bińyǝ kekleke, biǝntǝ disi. Nya bińyǝ kekleke lǝ Bonamute eto keyifo ǝsuǝ lefe saa. Itsyise biyi biǝ kulesa ǝmbǝ bǝ biuyifo ni lǝ Bonamute Yesu eto keyifo ǝsuǝ ka luuyifo kebimbale.