6
Bǝlǝkǝ Bawunsǝkotsyuǝ Ekuanse.
1 Lefe nǝmfo se bakasebi bamǝ dítsyiko bufuii, kǝnǝ ǝbǝ kédufǝ lǝ Yudafɔ ba laatɛyi Sigriki ku mba laatɛyi Sihebri eto nti. Nnya ni bǝ lǝ bésie diyi eto lesaa, díankayo mba laatɛyi Sigriki eto bakɔ besiǝ.
2 Lǝ nyamfo esoo, lefosi inuǝ bamǝ ákpadi bafokanɔfɔ bamǝ kenke, nya bátɛyi mǝ bǝnkǝ, “Yanlɛkɛ bǝ bobiasǝ lefe lǝ didisa siesie eto etiki ǝsuǝ lǝ lefe nǝ ele bǝ bufi bo lefe kenke butǝ Ditiki Sɛɛ nǝmǝ eto budi.
3-4 Nyaso mɔmɔɔ, bayimi, betsyilamasǝ ǝnǝmi lǝ bilǝkǝ basani ekuanse ba nyi kobe nya Lɛwɔnɔ Kɛnkɛ nsi ko mǝ. Buufi mǝ butsyǝ lǝ keyifo kamfo eto kɛnyɛ itǝ bǝ bofo lefe bɔkɛ itǝ olatoto ku Ditiki Sɛɛ nǝmǝ letsya bobe.”
5 Ditiki nǝmǝ álɛkɛ itǝ mǝmblɛ kenke, nyaso bǝlǝkǝ Stefano wǝ ni utidi wǝ nkpe bofokanɔ nya Lɛwɔnɔ Kɛnkɛ nsi ko wǝ lefe saa. Nya bǝlǝkǝ Filipo ku Prokoro ku Nikanɔ ku Timona ku Parmena ku nwǝ díkafiani Yudanyǝ wǝ baakpo Nikolas wǝ ditsyi Antiokia.
6 Bǝlǝkǝ betidi ekuanse bamfo báte batɔnkpe bamǝ. Nya báto ola bǝtǝkǝ mǝ ani lǝ disi itǝ keyifo kamǝ eto buyifo.
7 Lǝ nyaso Onanto eto Ditiki Sɛɛ nǝmǝ dísukosǝ busǝnsǝ kakpe. Nya bafokanɔfɔ lǝ Yerusalem dífui bakpe. Yudafɔ eto besumunyǝ kpǝ tsya átsyi báwuninsǝ báfo Ditiki Sɛɛ nǝmǝ.
Yudafɔ Eto Beninǝ Ǝmuǝ Stefano.
8 Nyaso Stefano wǝ Onanto lékpo atsyɔ útǝ ǝsuǝalee, éyifo ayanisa kpǝ lǝ betidi bamǝ nti.
9 Fɛɛ Yudafɔ ba díkafo mǝ ǝsuǝ ǝsuǝ eto busiǝ ba dítsyi Kirene ku Aleksandria ku bǝtsyuǝ ba dítsyi Kilikia ku Asia eto ditsyukpa étsyiko etiki bunǝ ku Stefano.
10 Fɛɛ mǝ kutsyuǝ saa mámfo buńyǝ lǝ wǝ ǝnǝmi lǝ kobe ko Lɛwɔnɔ Kɛnkɛ dítǝ wǝ eso.
11 Nyaso bákpe disi ku betidi bamba bǝ lǝ batɛyi bidia lǝ wǝ ǝsuǝ bǝ, “Bɔ́nɔ se úkedi etiki uńyǝ lǝ Moses ku Onanto tsya ǝsuǝ!”
12 Kɛnyɛlala kamfo ǝnǝ lefonyi lékpe lǝ betidi bamfo ku beninǝ ku afi eto bateasa bamǝ kenke ǝsuǝ. Nya bǝmuǝ Stefano nya béfi wǝ bésuko bakponkpo eto ǝnǝmi.
13 Nya báboko betidi bǝtsyuǝ ba lékle kɛnyɛ bátɛyi sidia bǝnkǝ, “Osani ǝmfo ékedi etitiki lefe saa kǝńyǝ lǝ Disumuyo Kɛnkɛ kamfo ku lǝ Moses eto kɔfi ǝsuǝ.
14 Nya bɔ́nɔ bǝ ɔ́tɛyi tsya nkǝ utidi ǝmǝ ditsyi Nasaret baakpo Yesu mfóo, átɛyi nkǝ wooba Onanto eto Disumuyo Kɛnkɛ kamfo nya woofloma akpa nnya Moses dítǝ bo!”
15 Nya mba kenke lɛkɛ lǝ lekpokakpokɔ mfó létakasǝ ǝnǝmi bákpo lǝ Stefano ǝsuǝ, nya bǝnyǝ bǝ wǝ ǝnǝmi ǝkǝyǝnde fe kato eto ɔtɔnkpe eto ale.