4
ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤠᤃᤡ ᤜᤡᤱᤔᤠ
1 ᤂᤧᤸᤗᤧ ᤆᤥᤃᤢᤸᤗᤧ ᤂᤪᤡᤛ᤻ᤋᤧᤴ ᤏᤠᤛᤡᤱᤃᤧᤴ ᤌᤰᤁᤥ ᤋᤢᤰᤂᤣ ᤆᤩᤧ. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ᤀᤠᤱ ᤒᤠ ᤜᤧᤰᤋᤱᤒᤠ ᤏᤡᤱᤘᤠ᤹ᤀᤡᤴ ᤁᤳᤋᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤏᤠᤛᤡᤱᤃᤧᤴ ᤌᤰᤁᤥ ᤋᤢᤰᤂᤣ ᤁᤧᤈᤠᤒᤠᤸᤗᤧ ᤗᤠᤕᤥ ᤆᤥ᤺ᤰᤔᤠ ᤗᤧᤖᤢᤀᤠᤱ ᤘᤠ᤹ᤖᤥ॥
2 ᤜᤧᤰᤁᤣ᤺ᤸᤗᤧ ᤂᤧᤴ ᤜᤡᤱᤗ ᤌᤠᤖᤡᤰ ᤔᤏᤠᤜᤠ᤹ᤖᤧ ᤔᤧᤀᤡ᤺ᤳᤋᤢᤒᤠ ᤑᤧᤴ ᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤔᤧ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤜᤡᤱᤗᤥ॥
3 ᤌᤣᤀᤠᤱᤓᤧᤸᤗᤧ ᤁᤧᤒᤣ᤺ᤰᤐᤠ ᤕᤧᤶᤔᤥ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ ᤜᤧᤰᤁᤣ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠ. ᤑᤧᤴ ᤏᤡᤱᤘᤠ᤹ ᤆᤥ᤺ᤰᤔᤠ. ᤌᤡ᤺ᤸᤗᤧ ᤔ᤺ᤛᤡᤱᤔᤠ. ᤕᤖᤡᤰ ᤆᤠᤔᤠ ᤌᤢᤱᤔᤠᤀᤠᤱ ᤕᤠᤶᤒᤥ᤺ᤳᤇᤧ ᤆᤢᤶᤔᤠ. ᤕᤠᤶᤍᤠᤍᤠᤒᤠ ᤆᤠᤔᤢᤰ ᤌᤡᤔᤢᤰ ᤆᤥ᤺ᤰᤔᤠ ᤏᤢ ᤛᤡᤰᤁᤧᤗᤧ᤺ᤱᤒᤠ ᤏᤠᤘᤠᤀᤡᤳᤗᤠᤜᤠ᤹ ᤛᤣᤘᤠ ᤆᤥ᤺ᤰᤔᤠᤀᤥ ᤕᤖᤡᤰ ᤕᤧᤶ ᤁᤧᤍᤣ᤺ᤛᤢᤶᤗᤥ॥
4 ᤂᤧᤱᤜᤠ᤹ᤖᤧ ᤀᤠᤸᤗᤥ ᤜᤧᤰᤋᤱᤒᤠ ᤑᤧᤴ ᤐᤠ᤺ᤴᤜᤠ᤹ ᤂᤢᤏᤡ᤹ᤏᤢ ᤛᤥᤖᤡᤰ ᤁᤧᤶᤒᤳᤇᤡᤴᤒᤠ ᤔᤧᤏᤡ᤺ᤛᤢᤀᤠᤱ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤀᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤏᤠᤃᤧᤶᤎᤠᤛᤡ ᤁᤧᤶᤒᤡᤖᤡ᤹ᤖᤥ
5 ᤁᤖ ᤁᤢᤜᤡᤱᤘᤧᤳ ᤏᤢ ᤁᤧᤛᤡ᤺ᤒᤠᤜᤠ᤹ᤖᤧ ᤂᤠᤛᤧᤴ ᤆᤥ᤺ᤰᤔᤠ ᤕᤠᤖᤡᤵ ᤁᤧᤘᤠ᤹ᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤂᤧᤱᤜᤠ᤹ᤃ ᤕᤧᤵᤔᤠᤀᤣ ᤐᤥ᤺ᤱᤗᤥ॥
6 ᤒᤠ ᤂᤧᤸᤗᤧ ᤆᤥᤃᤢᤸᤗᤧᤀᤣ ᤀᤠᤸᤗᤥ ᤁᤧᤛᤡ᤺ᤒᤠᤜᤠ᤹ᤀᤠᤱ ᤔᤧᤴᤇᤠᤶ ᤕᤠᤵᤔᤡ ᤜᤧᤰᤁᤣ ᤏᤠᤛᤡᤱᤃᤧᤴ ᤌᤰᤁᤥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤂᤠᤛᤧᤴ ᤐᤥ᤺ᤱᤗᤥ. ᤁᤖ ᤕᤠᤶᤛᤠᤶᤔᤥ ᤏᤡᤱᤘᤠ᤹ᤑᤢᤔᤠᤱ ᤁᤢᤀᤡᤛᤡ᤺ᤰ ᤔᤧᤜᤡᤱᤗ ᤑᤠ᤹ᤀᤠᤱ ᤛᤢᤏᤠᤀᤡᤱᤅᤡᤴ ᤀᤡᤱᤓᤥ᤺ᤛᤧᤀᤠᤱ ᤘᤠ᤹ᤖᤥ॥
7 ᤁᤠᤰ ᤐᤠ᤺ᤴᤜᤠ᤹ᤖᤧ ᤁᤢᤏᤢᤵᤔᤠᤴ ᤏᤡ᤺ᤳᤋᤠᤱᤅᤣ ᤋᤩᤧᤀᤠᤱ ᤘᤠ᤹ᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤋᤢᤘᤠ ᤆᤥ᤺ᤰᤔᤠ ᤁᤧᤛᤢᤰᤋᤡᤖ ᤑᤠ᤹ᤀᤠᤱ ᤛᤣᤛᤣ ᤏᤡᤱᤘᤠ᤹ ᤏᤢ ᤆᤠᤱᤈᤠᤱᤅᤠᤱ ᤘᤕᤧᤶᤔᤧ᤹ᤀᤥ॥
8 ᤁᤠᤰᤏᤢ᤺ᤸᤗᤧ ᤕᤶᤒᤠ ᤐᤠ᤺ᤴᤏᤡᤱᤃ ᤛᤡᤰᤗᤢᤱᤔᤥᤗᤠᤶ ᤗᤢᤱᤔᤠ᤹ ᤋᤢᤰᤁᤠᤛᤡᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤗᤢᤱᤔᤠ᤹ ᤋᤢᤰᤔᤠᤸᤗᤧᤃ ᤕᤖᤡᤰ ᤗᤠᤕᤥᤜᤠ᤹ ᤋᤧᤵᤋᤢ᤹ᤖᤥ॥
9 ᤜᤧᤰᤁᤩᤠᤱ ᤁᤠᤏᤠᤰᤏᤠᤰ ᤔᤧᤸᤗ᤹ᤀᤣ ᤋᤖᤣ ᤋᤥ᤺ᤀᤠᤛᤡᤶᤔᤧ᤹ᤀᤥ॥
10 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤗᤠᤶ ᤐᤖᤡᤰ ᤐᤖᤡᤰᤐᤠ ᤐᤷᤎᤠ᤺ᤶᤔᤡᤴ ᤁᤧᤄᤥ᤺ᤛᤢᤶᤔᤠᤱ ᤘᤠ᤹॥ ᤁᤠᤰᤗᤧ ᤂᤧᤴ ᤁᤧᤄᤥ᤺ᤛᤢᤶᤒᤠ ᤐᤷᤎᤠ᤺ᤶᤔᤡᤴ ᤁᤢᤓᤠ᤹ ᤐᤡᤛᤡᤱᤔᤠᤀᤥ ᤏᤢ᤺ᤖᤡᤰᤁᤠᤱ ᤕᤠᤅᤧᤶᤔᤧ᤹ᤀᤥ॥
11 ᤐᤠ᤺ᤴᤈᤠᤰ ᤁᤧᤒᤠ᤺ᤵᤐᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤈᤠᤰ ᤁᤢᤀᤡᤛᤡ᤺ᤰ ᤐᤠ᤺ᤳᤋᤢᤖ. ᤘᤣ᤹ᤜᤠ᤹ ᤛᤣᤘᤠ ᤁᤧᤈᤥ᤺ᤰᤐᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤢᤒᤠ ᤌᤢᤶᤔᤡᤸᤗᤧ ᤛᤣᤘᤠ ᤆᤥᤃᤢᤖᤖᤥ॥ ᤜᤧᤰᤁᤣᤗ᤹ᤖᤡᤰ ᤁᤠᤰ ᤐᤠ᤺ᤴᤏᤥ ᤕᤧᤛᤢ ᤂᤪᤡᤛ᤻ᤋᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱ ᤐᤥ᤺ᤱᤗᤖᤥ॥ ᤁᤠᤰ ᤔᤡᤔᤡᤍᤡᤱ ᤏᤢ ᤔᤢᤰᤛᤠᤶᤔᤡᤱᤃ ᤛᤍᤠᤍᤡᤱ ᤂᤢᤏᤧ᤹ᤀᤡᤴᤏᤧᤖᤥ॥ ᤀᤠᤔᤧᤴ॥
ᤂᤪᤡᤛ᤻ᤋᤖᤧ ᤗᤠᤃᤡ ᤋᤢᤰᤂᤣ ᤆᤠᤔᤠ ᤐᤥ᤺ᤱ
12 ᤀᤠᤔᤡ᤺ᤶ ᤀᤠᤴᤈᤢᤶᤛᤣ. ᤂᤡᤏᤡ᤹ ᤁᤧᤛᤠᤰᤐᤠ ᤀᤡᤏᤥᤃᤧᤴ ᤋᤢᤰᤂᤣ ᤁᤢᤎᤡᤶᤒᤠ ᤜᤱᤛᤠ᤹ᤔᤥ ᤁᤧᤎᤩᤧ᤹ᤀᤡᤸᤗᤧ ᤂᤡᤏᤡ᤹ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤐᤠ᤺ᤴ ᤐᤥ᤺ᤰᤂᤧ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤔᤧᤔᤕᤧᤶᤔᤡᤴᤏᤧ᤹ᤀᤥ.
13 ᤁᤖ ᤂᤪᤡᤛ᤻ᤋᤧᤴ ᤋᤢᤰᤂᤣ ᤆᤩᤧᤒᤠ ᤜᤧᤰᤁᤣ ᤂᤡᤏᤡ᤹ᤀᤠᤱ ᤀᤡᤏᤥᤃᤧᤴ ᤋᤢᤰᤂᤣᤀᤥ ᤁᤧᤎᤩᤧ᤹ᤀᤡᤸᤗᤧ ᤛ᤺ᤳᤋᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤁᤢᤕᤢ᤺ᤔᤠ ᤕᤧᤴᤏᤥ ᤁᤢᤔᤡᤔᤡᤍᤡᤱᤅᤡᤴ ᤀᤥᤛᤣ᤺ᤴᤍᤠᤱ ᤐᤥ᤺ᤱᤅᤡᤸᤗᤧ ᤐᤛ᤺ᤳ ᤁᤧᤛ᤺ᤳᤋᤡ᤹ᤖᤥ॥
14 ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤏᤠᤃᤧᤶᤎᤠᤛᤡ ᤁᤧᤶᤒᤡᤖᤡᤏᤧ ᤑᤠ᤹ᤃᤪ ᤔᤢ᤹ᤀᤡᤛᤠᤒᤠᤏᤡᤱᤗᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤃᤧᤴ ᤛᤣᤛᤣᤔᤠᤱᤅᤡᤴ ᤂᤡᤏᤡ᤹ᤏᤢ ᤘᤠ᤹ᤖᤥ॥
15 ᤂᤡᤏᤡ᤹ ᤀᤡᤏᤥᤃᤧᤴ ᤋᤢᤰᤂᤣ ᤁᤧᤈᤩᤧ᤹ᤀᤡᤸᤗᤧ ᤔᤏᤠ ᤁᤧᤛᤧᤵᤐᤠ. ᤁᤧᤄᤢ᤺ᤶᤒᤠ. ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤜᤧᤰᤁᤩᤠᤱ ᤘᤣ᤹ᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤏᤥ ᤜᤢᤰ ᤁᤧᤕᤠᤰᤐᤠ ᤔᤏᤠ᤺ᤴ ᤋᤢᤰᤂᤣ ᤆᤠ᤺ᤒᤠ ᤁᤢᤀᤡᤛᤡ᤺ᤰ ᤋᤢᤰᤂᤣ ᤔᤧᤈᤧᤶᤔᤡᤴᤏᤧ᤹ᤀᤥ॥
16 ᤁᤖ ᤂᤪᤡᤛ᤻ᤋᤠᤏᤡ ᤁᤧᤒᤥ᤺ᤰᤂᤡᤒᤠᤸᤗᤧ ᤋᤢᤰᤂᤣ ᤁᤧᤈᤩᤧ᤹ᤀᤡᤏᤧ ᤑᤠ᤹ᤃᤪ ᤛᤡᤖᤡᤱ ᤔᤧᤔᤕᤧᤶᤔᤡᤴᤏᤧ᤹ᤀᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤛᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤔᤡᤱᤅᤡᤴ ᤂᤡᤏᤡ᤹ ᤁᤧᤍᤰᤋᤢᤶᤔᤠᤱ ᤁᤧᤘᤕᤡ᤹ᤖᤥ॥
17 ᤀᤠᤸᤗ ᤂᤠᤛᤧᤴ ᤐᤥ᤺ᤱᤔᤠ ᤕᤧᤶ ᤋᤩᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ᤀᤥᤏᤢ ᤜᤣ᤺ᤰᤛᤡᤱᤗᤥ॥ ᤀᤠᤸᤗ ᤀᤠᤏᤡ᤹ᤗᤠᤶᤔᤣ ᤂᤠᤛᤧᤴ ᤐᤥ᤺ᤱᤔᤠ ᤜᤣ᤺ᤰᤛᤡᤱᤏᤧ ᤑᤠ᤹ᤃᤪ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤢᤏᤠᤀᤡᤱ ᤂᤧᤶᤔᤠ ᤔᤧᤴᤍᤧᤶᤔᤏᤠᤒᤠᤜᤠ᤹ ᤌᤣ ᤔᤧᤒᤥ᤺ᤱᤒᤣ᥅
18 ᤀᤠᤸᤗ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣ ᤛᤠᤵᤋᤧᤀᤠᤱ ᤐᤳ.
“ᤛᤠᤶᤕᤥᤏᤡᤒᤠᤜᤠ᤹ ᤋᤠᤱᤛᤧ᤺ᤵᤔᤠᤛᤡ ᤛᤠᤰᤏᤧ ᤑᤠ᤹ᤃᤪ. ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠ ᤏᤢ ᤗᤠᤕᤥᤒᤠᤴ ᤌᤣ ᤐᤥ᤺ᤱᤒᤠᤒᤣ᥅”
19 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤳᤋᤡᤴᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤀᤡᤏᤥᤃᤧᤴ ᤋᤢᤰᤂᤣᤀᤥ ᤔᤧᤎᤠ᤹᤺. ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤛᤠ᤺ᤴᤛᤠᤒᤠ ᤆᤀᤡ᤺ᤳᤍᤠᤱᤒᤠᤀᤥ ᤋᤠ᤺ᤰᤐᤥ ᤔᤧᤕᤢᤰᤂᤢᤖ ᤜᤧᤰᤁᤩᤠᤱ ᤆᤰᤔᤧᤸᤗ᤹ᤀᤣ ᤏᤢ᤺ᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤖᤖᤥ॥