13
ᤕᤠ᤹ᤖᤡ᤺ᤶᤒᤠ ᤁᤧᤜᤣ᤹ᤒᤠᤸᤗᤧᤴ ᤂᤧᤍᤠ᤹
ᤔᤷᤁᤢᤛ ᥊.᥇-᥏. ᤗᤢᤁᤠ ᥎.᥊-᥎
1 ᤒᤠ ᤂᤧᤴ ᤕᤧᤴᤏᤥ ᤕᤧᤛᤢ᤺ᤴ ᤜᤡᤶᤔᤥᤗᤠᤶ ᤐᤣᤀᤠᤱ ᤃᤠᤗᤡᤗ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤕᤢᤱᤛᤡᤱᤗᤥ॥
2 ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ ᤔᤧᤈᤢᤵᤛᤧ. ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤂ᤺ᤱᤒᤣᤀᤥ ᤗᤠ᤺ᤛᤧᤀᤠᤱ ᤕᤢᤱᤛᤡᤱ. ᤁᤖ ᤔᤏᤠᤜᤠ᤹ ᤗᤠ᤺ᤰᤁᤠᤳ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤔᤧᤕᤧᤒᤧ॥
3 ᤜᤧᤰᤁᤩᤠᤱ ᤕᤧᤛᤢᤖᤧ ᤀᤰᤂᤣᤗ᤹ᤖᤡᤰ ᤕᤖᤡᤰ ᤐᤠ᤺ᤴᤜᤠ᤹ ᤂᤧᤍᤠ᤹ᤀᤥ ᤔᤧᤳᤋᤢᤛᤡ.
“ᤗᤳᤇᤠ ᤕᤠ᤺ᤴᤁᤧᤔ᤺ᤒᤠᤎᤡᤰ ᤕᤠ᤹ᤖᤡ᤺ᤶᤒᤠ ᤗᤧᤵᤛᤧ ᤐᤣᤖᤥ॥
4 ᤂᤧᤸᤗᤧ ᤕᤠ᤹ᤖᤡ᤺ᤶᤒᤧᤴ ᤗᤧᤵᤋᤢᤸᤗᤧ ᤁᤢᤓᤠ ᤕᤠ᤹ᤖᤡ᤺ᤶᤒᤧᤴ ᤗᤠᤶᤔᤥ ᤔᤰᤌᤩᤧ. ᤜᤧᤰᤁᤩᤠᤱ ᤐᤢᤜᤠ᤹ ᤔᤧᤍᤩᤧᤀᤠᤱ ᤔᤧᤈ ᤔᤧᤍᤣ᤺ᤛᤢᤖᤥ॥
5-6 ᤜᤧᤰᤁᤩᤠᤱ ᤁᤢᤓᤠ ᤕᤠ᤹ᤖᤡ᤺ᤶᤒᤧᤴ ᤗᤢᤱᤄᤧᤖᤧᤰᤁᤥ ᤆᤢᤰᤋᤧᤖᤥ॥ ᤂᤧᤱᤜᤠ᤹ ᤗᤡᤱᤔᤠᤃ ᤗᤡᤅᤧ. ᤁᤖ ᤕᤖᤡᤰ ᤂᤠᤶ ᤔᤧᤏᤧᤛ᤻ᤛᤧᤴᤏᤠᤱ ᤁᤢᤛ᤻ᤛᤠ᤺ᤵᤐᤡᤴ ᤂᤠᤶ ᤛᤡᤃᤠᤱᤎᤠᤖᤡᤰ ᤔᤧᤗᤠ᤺ᤛᤧᤴᤒᤠᤸᤗᤧ ᤆᤥᤃᤢᤸᤗᤧ ᤁᤢᤍᤠ᤺ᤴᤍᤡᤰᤔᤠ ᤏᤠᤶ ᤛᤧ᤺ᤖᤧᤸᤗᤧ ᤏᤠᤶᤔᤡᤸᤗᤧ ᤛᤧ᤺ᤰᤋᤢᤀᤠᤱ ᤁᤧᤖᤧᤰ ᤜᤣᤖᤧᤒᤣᤖᤥ॥
7 ᤁᤢᤓᤠ ᤕᤠ᤹ᤖᤡ᤺ᤶᤒᤠᤱᤃ ᤋᤡᤱᤃᤪᤣ᤺ᤰᤐᤠᤸᤗᤧ ᤁᤢᤛᤣ᤹ ᤁᤧᤏᤧᤒᤠ ᤋᤧᤴᤏᤥ ᤆᤢᤰᤋᤧᤀᤠᤱ ᤛᤥᤛᤥᤖᤡᤰ ᤗᤡᤅᤧᤸᤗᤧ ᤋᤡᤱᤃᤪᤣ᤺ᤰᤐᤠᤸᤗᤧ ᤂᤧᤴ ᤛᤢ᤺ᤵᤋᤢ ᤛᤧᤖᤢᤖᤥ॥
8 ᤁᤢᤓᤠ ᤕᤠ᤹ᤖᤡ᤺ᤶᤒᤧᤱᤃ ᤏᤢ᤺ᤒᤠ ᤂᤠᤶᤔᤥ ᤆᤢᤰᤋᤧᤖᤥ॥ ᤂᤧᤱᤜᤠ᤹ᤀᤥ ᤁᤡᤵᤌᤡᤰ ᤗᤧᤱ (᥇᥆᥆). ᤋᤢᤰᤐᤥ᤺ᤱ ᤗᤧᤱ (᥌᥆) ᤏᤢ ᤛᤢᤶᤒᤥ᤺ᤱ ᤗᤧᤱ (᥉᥆) ᤌᤠᤖᤡᤰ ᤁᤢᤈᤠ᤹ ᤐᤳᤇᤧᤖᤥ॥
9 ᤂᤧᤶᤔᤠ ᤏᤧᤰᤂᤥ᤹ ᤁᤧᤃᤵᤐᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤏᤢ᤺ᤖᤡᤰ ᤂᤧᤵᤛᤧᤶᤔᤧ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ᥄”
ᤕᤧᤛᤢᤖᤧ ᤂᤧᤍᤠ᤹ᤀᤥ ᤜᤢ᤹ᤔᤠ ᤁᤢᤏᤡᤱᤘᤠ᤹ᤛᤥ᤺ᤰ
ᤔᤷᤁᤢᤛ ᥊.᥇᥆-᥇᥈. ᤗᤢᤁᤠ ᥎.᥏-᥇᥆
10 ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤍᤩᤧᤀᤠᤱ ᤕᤧᤛᤢ᤺ᤴ ᤛᤣ᤺ᤴᤔᤧᤍᤥᤛᤢ. “ᤀᤠᤍᤠᤱᤒᤣ. ᤌᤣᤀᤠᤱ ᤁᤴᤜᤠ᤹ᤏᤢ ᤂᤧᤍᤠ᤹ᤀᤥᤖᤰ ᤁᤧᤒᤠ᤺ᤵᤐᤠᤒᤣ᥅”
11 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤌᤣᤀᤠᤱᤓᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤸᤗᤧᤴ ᤛᤡᤃᤠᤱᤒᤠ ᤐᤠ᤺ᤴᤜᤠ᤹ ᤂᤡᤏᤡ᤹ᤖᤰ ᤁᤢᤛᤡᤱ ᤏᤡ᤺ᤵᤔᤠ ᤁᤧᤄᤥ᤺ᤛᤢᤶᤔᤠᤱ ᤁᤧᤘᤕᤡ᤹ᤖᤥ. ᤁᤖ ᤂᤧᤱᤜᤠ᤹ᤖᤧᤃ ᤔᤧᤱᤄᤥᤀᤣ ᤔᤧᤘᤠ᤹ᤖᤥ॥
12 ᤕᤖᤡᤰ ᤁᤧᤃᤵᤐᤠᤸᤗᤧ ᤀᤠᤸᤗᤛᤠᤱ ᤕᤖᤡᤰ ᤂᤥ᤺ᤛᤢ᤹. ᤜᤧᤰᤁᤩᤠᤱ ᤂᤧᤸᤗᤧᤴ ᤕᤖᤡᤰ ᤐᤥ᤺ᤱᤗᤥ॥ ᤁᤖ ᤜᤠ᤺ᤳᤗᤧ ᤔᤧᤃᤳᤋᤢᤴ. ᤂᤧᤸᤗᤧ ᤁᤳᤋᤢᤒᤠᤴᤏᤠᤱ ᤔᤧᤏᤠᤵᤋᤢ᤹ᤖᤥ॥
13 ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤂᤧᤱᤜᤠ᤹ᤏᤢ ᤂᤧᤍᤠ᤹ᤀᤥ ᤐᤠ᤺ᤳᤋᤠᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤀᤥᤔᤧᤔᤧᤳᤋᤢᤛᤠᤱ ᤔᤧᤴᤏᤡ᤺ᤛᤢᤴᤗᤥ. ᤔᤧᤄᤧᤵᤛᤢᤛᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥
14 ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤒᤠᤴ ᤁᤴ ᤔᤏᤠᤜᤠ᤹ᤀᤥ ᤁᤧᤖᤧᤒᤠᤖᤥ–
‘ᤂᤡᤏᤡ᤹ ᤁᤧᤄᤧᤵᤛᤢᤶᤛᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴ.
ᤀᤥᤃᤧᤔᤧᤳᤋᤢᤶᤛᤠᤱ ᤁᤧᤴᤏᤡ᤺ᤛᤢᤶᤔᤡᤴᤗᤥ॥
15 ᤌᤣᤀᤠᤱᤓᤧᤸᤗᤧ ᤁᤴ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤂᤠᤛᤡᤱᤅᤡᤴ ᤁᤧᤎᤢᤱᤒᤠ ᤐᤥ᤺ᤰᤂᤧᤀᤠᤱ ᤘᤠ᤹॥
ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤧᤰᤂᤥ᤹ᤒᤠᤴ ᤌᤠᤰᤋᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤢᤏᤡ᤹ ᤔᤡᤰᤁᤡᤴ ᤀᤡᤶ ᤔᤧᤔᤧᤳᤋᤢᤀᤠᤱ ᤘᤠ᤹॥ ᤔᤧ᤺ᤴᤏᤧ ᤑᤠ᤹ᤃᤪ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤧᤰᤂᤥ᤹ᤒᤠᤸᤗᤧ ᤔᤧᤄᤧᤵᤛᤢᤒᤠ ᤏᤢ ᤔᤡᤰᤁᤡᤸᤗᤧ ᤔᤧᤏᤡ᤺ᤛᤢᤒᤠᤔᤧᤴ. ᤜᤧᤰᤁᤩᤠᤱ ᤂᤢᤏᤡ᤹ ᤛᤡᤰᤗᤢᤱᤔᤠᤀᤥ ᤁᤢᤛᤡᤱ ᤔᤧᤏᤡ᤺ᤳᤋᤢᤀᤠᤱ ᤀᤡᤱᤃᤠ᤹ ᤗᤧᤵᤔᤠᤱ ᤔᤧᤏᤢ᤺ᤰᤂᤧᤒᤠᤔᤧᤴ. ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤧᤱᤜᤠ᤹ ᤘᤣ᤺ᤴᤍᤢᤱᤛᤡᤱᤔᤧᤴ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤖᤥ॥’
16 ᤁᤖ ᤂᤡᤏᤡ᤹ᤃ ᤔᤢ᤹ᤀᤡᤛᤠᤒᤠᤏᤡᤱᤗᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤔᤡᤰᤁᤡᤸᤗᤧ ᤏᤡ᤺ᤛᤢ᤹. ᤜᤧᤰᤁᤩᤠᤱ ᤏᤧᤰᤂᤥ᤹ᤒᤠᤸᤗᤧ ᤂᤧᤵᤛᤢ᤹ᤖᤥ॥
17 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤕᤖᤡᤰ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤏᤢ ᤛᤠᤶᤕᤥᤏᤡᤒᤠ ᤔᤏᤠᤜᤠ᤹ᤖᤧ ᤂᤡᤏᤡ᤹ ᤁᤧᤏᤡ᤺ᤛᤢᤶᤒᤠ ᤁᤧᤄᤧᤵᤛᤢᤶᤒᤠ ᤐᤠ᤺ᤴᤜᤠ᤹ ᤏᤡ᤺ᤔᤠ ᤏᤢ ᤂᤧᤶᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤔᤧᤈᤥᤃᤢᤀᤠᤱ ᤘᤕᤧ. ᤁᤖ ᤏᤡ᤺ᤔᤠ ᤏᤢ ᤂᤧᤶᤔᤠ ᤔᤧᤱᤄᤥ᤺ᤛᤢᤴᤗᤥ॥”
ᤕᤧᤛᤢᤖᤧ ᤕᤠ᤹ᤖᤡ᤺ᤶᤒᤠ ᤁᤧᤗᤧᤵᤐᤠᤸᤗᤧᤴ ᤂᤧᤍᤠ᤹ᤀᤡᤴ ᤐᤥᤎᤰᤋᤢᤛᤡ᤹
ᤔᤷᤁᤢᤛ ᥊.᥇᥉-᥈᥆. ᤗᤢᤁᤠ ᥎.᥇᥇-᥇᥋
18 “ᤀᤠᤸᤗ ᤕᤠ᤹ᤖᤡ᤺ᤶᤒᤠ ᤁᤧᤗᤧᤵᤐᤠᤸᤗᤧᤴ ᤂᤧᤍᤠ᤹ᤀᤡᤸᤗᤧ ᤁᤢᤒᤣ᤺ᤴ ᤂᤧᤵᤛᤧᤶᤔᤧ᤹ᤀᤥ
19 ᤀᤠᤳᤋᤡᤸᤗᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤒᤠ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤴ. ᤂᤧᤴ ᤔᤏᤠ᤺ᤱᤃ ᤗᤠᤶᤔᤥ ᤁᤧᤈᤢᤰᤐᤠ ᤕᤠ᤹ᤖᤡ᤺ᤶᤒᤠ ᤁᤢᤀᤡᤛᤡ᤺ᤰ ᤆᤥ᤺ᤰ॥ ᤔᤠᤑᤧᤴᤛᤠᤶᤔᤡᤴ ᤋᤠᤀᤠᤱ ᤂᤧᤸᤗᤧ ᤁᤢᤏᤡᤱᤘᤠ᤹ᤀᤥ ᤁᤧᤕᤠᤰᤐᤠ ᤐᤠ᤺ᤴᤈᤠᤰᤁᤡᤴ ᤗ᤺ᤳᤋᤢ ᤋᤣ᤹ᤖᤢᤖᤥ॥
20 ᤗᤢᤱᤄᤧᤖᤧᤰᤁᤥ ᤁᤧᤈᤢᤰᤐᤠ ᤕᤠ᤹ᤖᤡ᤺ᤶᤒᤧᤱᤃ ᤐᤠ᤺ᤴᤈᤠᤰᤁᤡᤴ ᤁᤧᤛ᤺ᤵᤐᤠᤖ ᤁᤧᤍᤠ᤺ᤰᤐᤠ ᤔᤏᤠ ᤁᤢᤀᤡᤛᤡ᤺ᤰ ᤆᤥ᤺ᤰ.
21 ᤁᤖ ᤋᤠᤱᤒᤠ ᤁᤢᤛ᤻ᤛᤠ᤺ᤵ ᤁᤧᤒᤵᤐᤠ ᤁᤢᤒᤢᤱᤔᤠᤴ ᤜᤧᤰᤁᤣ ᤂᤧᤸᤗᤧ ᤛᤵᤑᤠᤖᤰ ᤌᤖᤢᤖᤥ॥ ᤜᤧᤰᤁᤩᤠᤱ ᤐᤠ᤺ᤴᤈᤠᤰᤁᤡᤴ ᤏᤛᤠ᤺ᤴ ᤆᤥᤃᤢᤒᤠᤸᤗᤧ ᤁᤧᤛᤠᤰᤐᤠ ᤐᤠ᤺ᤴ ᤏᤢ ᤋᤢᤰᤂᤣ᤺ᤴ ᤋᤠᤏᤢᤔᤧ᤺ᤴᤏᤣ ᤜᤠᤖᤠᤀᤣ ᤏᤛᤠ᤺ᤴᤏᤡᤴ ᤗᤧᤖᤢᤍᤣ᤺ᤛᤢ᤹ᤖᤥ॥
22 ᤋᤡᤱᤃᤪᤣ᤺ᤰᤐᤠᤸᤗᤧ ᤁᤢᤛᤣ᤹ ᤁᤧᤏᤧᤒᤠᤍᤧᤴᤏᤥ ᤁᤧᤈᤢᤰᤐᤠ ᤕᤠ᤹ᤖᤡ᤺ᤶᤒᤧᤱᤃ ᤐᤠ᤺ᤴᤈᤠᤰ ᤁᤧᤄᤧᤶᤒᤠ ᤔᤏᤠ ᤁᤢᤀᤡᤛᤡ᤺ᤰ ᤆᤥ᤺ᤰ. ᤁᤖ ᤂᤧᤸᤗᤧ ᤁᤴ ᤜᤡᤱᤔᤴᤏᤥᤒᤠ ᤌᤣ᤺ᤴ ᤆᤠᤔᤠ ᤌᤢᤱᤔᤠ ᤏᤢ ᤕᤠᤱᤛᤠᤁᤢᤴᤎᤣᤛᤠᤒᤠ ᤀᤠᤰᤂᤣᤀᤠᤱ ᤐᤥ᤺ᤱᤔᤠ ᤁᤧᤗ᤹ᤒᤠ ᤏᤡᤱᤘᤠ᤹ᤀᤡᤸᤗᤧ ᤐᤠ᤺ᤴᤈᤠᤰᤁᤡᤴ ᤛᤢ᤺ᤵᤋᤢᤍᤣ᤺ᤛᤢ᤹. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤈᤠ᤹ ᤔᤧᤓᤳᤇᤢᤴᤗᤥ॥
23 ᤜᤧᤰᤁᤩᤠᤱ ᤏᤢ᤺ᤒᤠ ᤂᤠᤶᤔᤥ ᤁᤧᤈᤢᤰᤐᤠ ᤕᤠ᤹ᤖᤡ᤺ᤶᤒᤧᤱᤃ ᤐᤠ᤺ᤴᤈᤠᤰᤁᤡᤴ ᤁᤧᤄᤧᤶᤒᤠᤀᤠᤱ ᤁᤢᤛᤡᤱ ᤁᤧᤏᤡ᤺ᤵᤐᤠ ᤔᤏᤠ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤡᤵᤌᤡᤰ. ᤋᤢᤰᤐᤥ᤺ᤱ ᤏᤢ ᤛᤢᤶᤒᤥ᤺ᤱ ᤗᤧᤱ ᤌᤠᤖᤡᤰ ᤁᤢᤈᤠ᤹ ᤑᤳᤇᤢᤖᤥ॥”
ᤔᤠᤛᤡ ᤏᤢ ᤔᤠᤗᤧ᤺ᤴᤍᤥᤖᤧᤴ ᤂᤧᤍᤠ᤹
24 ᤕᤧᤛᤢᤖᤧ ᤘᤣ᤹ᤛ᤻ᤔᤠ ᤂᤧᤍᤠ᤹ᤀᤡᤴ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤀᤰᤋᤱᤒᤠ ᤆᤥ᤺ᤰᤗᤥ–ᤗᤳᤇᤠ ᤔᤏᤠᤎᤡᤰᤗᤧ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤏᤢ᤺ᤒᤠ ᤕᤠ᤹ᤖᤡ᤺ᤶᤒᤠᤴ ᤗᤧᤵᤋᤢ.
25 ᤁᤖ ᤛᤧᤴᤍᤡᤰ ᤁᤧᤖᤧᤰ ᤔᤧᤀᤡᤵᤛᤧᤀᤠᤱ ᤔᤧᤏᤧᤛ᤻ᤛᤧᤸᤗᤧ ᤁᤢᤏᤡᤱᤔᤡ᤺ᤴ ᤋᤩᤧᤀᤠᤱ ᤂᤧᤴ ᤔᤠᤛᤡ ᤗᤧᤵᤔᤏᤠᤒᤠᤀᤥ ᤔᤠᤗᤧ᤺ᤴᤍᤥ ᤕᤠ᤹ᤖᤡ᤺ᤶᤒᤠᤴ ᤗᤧᤵᤋᤢᤎᤀᤠᤱ ᤐᤣᤖᤥ॥
26 ᤜᤧᤰᤁᤩᤠᤱ ᤔᤠᤛᤡ᤺ᤴ ᤁᤢᤈᤠ᤹ ᤌᤥ᤺ᤰᤔᤠ ᤜᤣ᤺ᤰᤋᤧᤸᤗᤧ ᤔᤠᤗᤧ᤺ᤴᤍᤥᤜᤠ᤹ᤀᤠᤱ ᤏᤡ᤺ᤎᤠᤒᤧᤖᤥ॥
27 ᤜᤧᤰᤁᤩᤠᤱ ᤛᤣᤘᤠᤖᤥᤒᤠᤜᤠ᤹ ᤗᤠᤈᤣ᤹ ᤍᤠᤱᤒᤠᤸᤗᤥ ᤔᤧᤍᤩᤧᤀᤠᤱ ᤛᤣ᤺ᤴᤔᤧᤍᤥᤛᤢ. ‘ᤀᤠᤍᤠᤱᤒᤣ. ᤂᤧᤏᤧ᤹ᤃ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤔᤠᤛᤡ ᤕᤠ᤹ᤖᤡ᤺ᤶᤒᤠᤖᤰ ᤁᤧᤗᤧᤵᤋᤢᤀᤠᤱ ᤏᤧᤛ᤻ᤛᤧ ᤔᤧ᤺ᤶᤒᤡ. ᤁᤖ ᤀᤠᤰᤂᤣᤀᤠᤱ ᤔᤠᤗᤧ᤺ᤴᤍᤥ᤺ᤴᤏᤠᤱ ᤗᤡᤅᤧᤒᤣ᥅’
28 ᤂᤢᤏᤧ᤹ ᤏᤥᤃᤵ ᤐᤡᤖᤢᤛᤡ. ‘ᤂᤧᤱᤃ ᤏᤡᤱᤔᤡ᤺ᤸᤗᤧ ᤜᤧᤰᤁᤣ ᤆᤥᤃᤢᤒᤠᤖᤥ॥’
ᤛᤣᤘᤠᤖᤥᤒᤠᤜᤠ᤹ᤖᤧ ᤂᤢᤏᤧ᤹ ᤕᤠᤶᤔᤥ ᤛᤣ᤺ᤴᤔᤧᤍᤥᤛᤢ. ‘ᤂᤧᤴ ᤔᤠᤗᤧ᤺ᤴᤍᤥᤜᤠ᤹ ᤀᤠ᤺ᤰᤂᤢᤶᤍᤣ᤺ᤛᤢᤶᤒᤧ ᤗ᤹ᤖᤡᤰ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤒᤡ᥅’
29 ᤗᤠᤈᤣ᤹ ᤍᤠᤱᤒᤠᤸᤗᤧ ᤔᤧᤳᤋᤢᤛᤡ. ‘ᤜᤧᤰᤁᤣ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ. ᤔᤠᤗᤧ᤺ᤴᤍᤥ᤺ᤴ ᤁᤧᤀᤠ᤺ᤰᤂᤢᤶᤔᤡᤸᤗᤧ ᤔᤠᤛᤡ᤺ᤴᤏᤠᤱ ᤁᤧᤀᤠ᤺ᤰᤂᤢᤶ ᤁᤧᤛᤧᤖᤢᤶᤗᤥ॥
30 ᤆᤠᤛᤢᤶᤔᤠ ᤕᤧᤶ ᤌᤠᤖᤡᤰ ᤏᤧᤵᤔᤠᤱ ᤛᤥᤛᤥᤖᤡᤰ ᤐᤥᤛᤡᤖ॥ ᤜᤧᤰᤁᤩᤠᤱ ᤂᤧᤴ ᤕᤧᤶᤔᤥ ᤆᤠᤃᤧᤛᤢᤶᤒᤠᤜᤠ᤹ ᤁᤧᤖᤧᤰᤏᤢ ᤋᤃᤡ ᤔᤠᤗᤧ᤺ᤴᤍᤥᤜᤠ᤹ ᤀᤠ᤺ᤰᤂᤧᤶᤔᤧ᤹ᤀᤠᤱ ᤀᤡᤓᤢᤳᤋᤧᤶᤔᤧ᤹ ᤜᤧᤰᤁᤩᤠᤱ ᤔᤡᤀᤥ ᤗᤠᤵᤑᤢ᤺ᤛᤧᤶᤔᤧ᤹ ᤜᤧᤰᤁᤩᤠᤱ ᤔᤠᤛᤡ᤺ᤴ ᤛᤢᤵᤛᤧᤶᤔᤧ᤹ᤀᤠᤱ ᤆᤠᤕᤠᤱᤔᤠᤀᤥ ᤕᤠ᤺ᤰᤋᤧᤶᤔᤧ᤹ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤢᤱᤛᤡᤱᤗᤥ॥’ ”
ᤕ᤺ᤱᤃᤣ᤹ ᤕᤠ᤹ᤖᤡ᤺ᤶᤒᤠᤖᤧᤴ ᤂᤧᤍᤠ᤹
ᤔᤷᤁᤢᤛ ᥊.᥉᥆-᥉᥊. ᤗᤢᤁᤠ ᥇᥉.᥇᥎-᥈᥇
31 ᤜᤧᤰᤁᤩᤠᤱ ᤕᤧᤛᤢᤖᤧ ᤕᤠᤶᤔᤥ ᤘᤣ᤹ ᤂᤧᤍᤠ᤹ᤎᤡᤰ ᤔᤧᤳᤋᤢᤛᤡ. “ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤕ᤺ᤱᤃᤣ᤹ ᤕᤠ᤹ᤖᤡ᤺ᤶᤒᤠᤴ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ॥ ᤔᤏᤠᤎᤡᤰᤗᤧ ᤂᤧᤴ ᤕ᤺ᤱᤃᤣ᤹ ᤕᤠ᤹ᤖᤡ᤺ᤶᤒᤠᤴ ᤋᤣ᤹ᤖᤢᤀᤠᤱ ᤀᤡᤰᤋᤠᤵᤐᤥ ᤗᤧᤵᤋᤢ॥
32 ᤁᤧᤖᤧᤰ ᤕᤠ᤹ᤖᤡ᤺ᤶᤒᤠᤀᤥ ᤁᤧᤖᤧᤰᤏᤢ᤺ᤸᤗᤧ ᤆᤢᤰᤛᤠ ᤆᤥ᤺ᤰᤛᤠᤱ ᤂᤧᤴ ᤐᤥ᤺ᤀᤠᤱ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥᤒᤠ ᤘᤣ᤹ ᤏᤢᤎᤡ-ᤛᤠᤰᤆᤡ᤹ᤏᤢ᤺ᤸᤗᤧ ᤕᤶᤒᤠ ᤁᤢᤒᤢᤱ ᤐᤥ᤺ᤱᤗᤥ॥ ᤜᤧᤰᤁᤩᤠᤱ ᤐᤢᤛᤠᤜᤠ᤹ ᤔᤧᤍᤠᤀᤠᤱ ᤁᤢᤒᤥᤖᤠ᤺ᤰᤁᤥ ᤜᤠᤵ ᤔᤧᤈᤥᤃᤢᤖᤥ॥”
ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ᤀᤡᤸᤗᤧᤴ ᤂᤧᤍᤠ᤹
ᤗᤢᤁᤠ ᥇᥉.᥈᥆-᥈᥇
33 ᤕᤧᤛᤢᤖᤧ ᤀᤠᤸᤗᤛᤠᤱ ᤘᤣ᤹ᤛ᤻ᤔᤠ ᤂᤧᤍᤠ᤹ᤀᤡᤴ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤑᤧ᤹ᤖᤢᤶᤔᤥ ᤕᤠᤰᤔᤏᤠᤒᤠ ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ᤀᤡᤴ ᤜᤧᤰᤋᤱᤒᤠ ᤆᤥ᤺ᤰᤗᤥ॥ ᤌᤡᤰ ᤔᤧᤴᤇᤢᤔᤠ᤹ᤀᤡᤸᤗᤧ ᤂᤵᤐᤩᤠᤀᤥ ᤕᤖᤡᤰ ᤑᤧ᤹ᤖᤢᤶᤔᤥ ᤔᤡᤛᤠᤰ ᤛᤡᤍᤠ᤹ᤀᤡᤴ ᤕᤠᤰᤋᤢ. ᤜᤧᤰᤁᤩᤠᤱ ᤛ᤹ᤖᤢ ᤕᤢᤰᤂᤢᤀᤠᤱ ᤔᤧᤴᤕᤢᤵᤐᤣ ᤌᤠᤖᤡᤰ ᤛᤢ᤺ᤵᤋᤢ ᤕᤢᤰᤂᤢᤖᤥ॥”
34 ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤕᤧᤛᤢᤖᤧ ᤔᤏᤠᤜᤠ᤹ ᤂᤧᤍᤠ᤹ᤀᤥ ᤔᤧᤳᤋᤢᤛᤡᤖᤥ. ᤛᤧᤰᤂᤠ᤺ᤸᤗᤧ ᤂᤢᤏᤧ᤹ ᤐᤠᤖᤧᤸᤗᤧ ᤂᤧᤍᤠ᤹ᤀᤥᤖᤰ ᤐᤠᤖᤧ॥
35 ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤏᤡᤴ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤸᤗᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤒᤠᤴ ᤁᤧᤖᤧᤒᤠᤖᤥ–
“ᤀᤡᤱᤃᤠ᤹ ᤂᤧᤍᤠ᤹ᤀᤥᤖᤰ ᤐᤠ᤺ᤳᤋᤠᤖᤥ.
ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧᤴ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤧᤀᤠᤱᤎᤥᤒᤠ ᤛᤡᤒᤡ᤹ ᤐᤠ᤺ᤴᤜᤠ᤹ ᤐᤠ᤺ᤳᤋᤢᤱᤗᤥ॥”
ᤔᤠᤛᤡ ᤏᤢ ᤔᤠᤗᤧ᤺ᤴᤍᤥ ᤂᤧᤍᤠ᤹ᤀᤡᤸᤗᤧ ᤁᤢᤒᤣ
36 ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ ᤗᤧᤖᤢᤎᤛᤡᤀᤠᤱ ᤕᤧᤛᤢ᤺ᤴ ᤜᤡᤶᤔᤥ ᤐᤣ॥ ᤁᤢᤜᤢ᤹ᤛᤠᤶᤒᤠᤜᤠ᤹ ᤂᤢᤏᤧ᤹ᤀᤥ ᤔᤧᤍᤩᤧᤀᤠᤱ “ᤐᤩᤠᤱᤛᤡᤀᤥᤒᤠ ᤔᤠᤗᤧ᤺ᤴᤍᤥᤖᤧᤴ ᤂᤧᤍᤠ᤹ᤀᤡᤸᤗᤧ ᤁᤢᤒᤣ᤺ᤴ ᤐᤥᤀᤠᤎᤰᤋᤧ᤹” ᤑᤠ᤹ᤀᤠᤱ ᤔᤧᤔᤧᤳᤋᤢ॥
37 ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤏᤢ᤺ᤒᤠ ᤕᤠ᤹ᤖᤡ᤺ᤶᤒᤠ ᤁᤧᤗᤧᤵᤐᤠᤱᤃ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤀᤠᤖᤥ॥
38 ᤐᤩᤠᤱᤛᤡᤃᤧᤴ ᤀᤡ᤺ᤰᤋᤠᤵᤐᤡᤱᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴᤗᤥ. ᤜᤧᤰᤁᤩᤠᤱ ᤂᤧᤴ ᤏᤢ᤺ᤒᤠ ᤕᤠ᤹ᤖᤡ᤺ᤶᤒᤠᤜᤠ᤹ᤃ ᤏᤡᤱᤘᤠ᤹ᤑᤢ ᤜᤠᤱᤈᤢᤶᤒᤠ ᤔᤏᤠᤛᤡᤖᤥ॥ ᤔᤠᤗᤧ᤺ᤴᤍᤥᤜᤠ᤹ᤃ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤔᤏᤠᤛᤡᤖᤥ.
39 ᤜᤧᤰᤁᤩᤠᤱ ᤔᤠᤗᤧ᤺ᤴᤍᤥ ᤕᤠ᤹ᤖᤡ᤺ᤶᤒᤠ ᤁᤧᤗᤧᤵᤐᤠ ᤏᤡᤱᤔᤡ᤺ᤱᤃ ᤔᤠᤑᤧᤴᤛᤠᤶᤔᤡᤴᤗᤥ॥ ᤆᤠᤛᤢᤶᤔᤠ ᤕᤧᤶᤔᤡᤱᤃ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤢᤵᤔᤠᤴᤗᤥ. ᤜᤧᤰᤁᤩᤠᤱ ᤆᤠᤃᤧᤛᤢᤶᤒᤠᤜᤠ᤹ᤃ ᤔᤠᤱᤗᤠᤀᤡᤱᤒᤠᤛᤡᤖᤥ॥”
40 “ᤜᤧᤰᤁᤩᤠᤱ ᤂᤧᤴ ᤔᤠᤗᤧ᤺ᤴᤍᤥᤜᤠ᤹ ᤔᤧᤛᤢᤵᤛᤢᤀᤠᤱ ᤔᤡᤀᤥ ᤗᤠᤵᤔᤧᤓᤢᤛᤢᤒᤠ ᤁᤢᤀᤡᤛᤡ᤺ᤰᤁᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤢᤵᤔᤠᤴ ᤐᤥ᤺ᤱᤗᤥ॥
41 ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤸᤗᤧ ᤀᤠᤔᤠᤱᤗᤠᤀᤡᤱᤒᤠᤜᤠ᤹ ᤐᤠᤱᤄᤢᤱᤛᤡᤱ ᤜᤧᤰᤁᤩᤠᤱ ᤁᤧᤖᤧᤰ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤒᤠᤜᤠ᤹ ᤏᤢ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤀᤠᤜᤠᤱᤈᤢᤶᤔᤥᤗᤠᤶ ᤔᤧᤛᤢᤵᤛᤢᤛᤡ᤹ᤀᤠᤱ
42 ᤕᤶᤒᤠ ᤔᤡᤜᤠᤵᤐᤥ ᤗᤠᤵᤔᤧᤓᤢᤛᤢᤛᤡ᤹ᤖᤥ॥ ᤂᤧᤵᤔᤥ ᤀᤠᤳᤋᤠᤳᤋᤠᤴᤏᤣ ᤋᤢᤰᤂᤣ᤺ᤸᤗᤧ ᤜᤠ᤺ᤵᤔᤠᤴ ᤏᤢ ᤜᤠᤒᤥ᤹ ᤕᤧ᤺ᤱᤔᤠᤴ ᤐᤥ᤺ᤱᤗᤥ॥
43 ᤜᤧᤰᤁᤩᤠᤱ ᤛᤠᤶᤕᤥᤏᤡᤒᤠᤜᤠ᤹ ᤂᤢᤏᤡ᤹ ᤏᤡᤱᤘᤠ᤹ᤑᤢᤐᤠ᤺ᤸᤗᤧ ᤁᤢᤜᤠᤱᤈᤢᤶᤔᤥ ᤏᤠᤶ ᤁᤢᤀᤡᤛᤡ᤺ᤰ ᤔᤧᤗᤧᤰᤗᤥ॥ ᤏᤢ᤺ᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥”
ᤕᤠᤱᤓᤢᤖᤧᤴ ᤂᤧᤍᤠ᤹
44 ᤕᤠᤶᤔᤥ “ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤆᤡᤱᤔᤏᤠᤒᤠ ᤕᤖᤡᤰ ᤕᤠᤱᤓᤢ᤺ᤴ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ॥ ᤔᤏᤠᤎᤡᤰᤗᤧ ᤂᤧᤴ ᤕᤠᤱᤓᤢ᤺ᤴ ᤂᤥ᤺ᤛᤢᤀᤠᤱ ᤕᤠᤶᤔᤥ ᤆᤡᤰᤂᤢᤖᤥ. ᤜᤧᤰᤁᤩᤠᤱ ᤂᤧᤴ ᤛ᤺ᤳᤗ ᤐᤣ᤺ᤰᤁᤠᤱ ᤂᤢᤏᤧ᤹ ᤁᤳᤋᤢᤒᤠ ᤁᤧᤖᤧᤰ ᤆᤡᤃ᤺ᤰᤘᤠᤜᤠ᤹ ᤛᤱᤄᤢᤀᤠᤱ ᤂᤧᤴ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤡᤴ ᤀᤡᤅᤢᤖᤥ॥”
ᤀᤡᤔᤧᤸᤗᤢᤱᤒᤠ ᤋᤧᤰᤛᤣ᤺ᤰᤁᤡᤸᤗᤧᤴ ᤂᤧᤍᤠ᤹
45 “ᤕᤠᤶᤔᤥ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤀᤰᤋᤱᤒᤠ ᤆᤥ᤺ᤰ–ᤗᤳᤇᤠ ᤏᤢ᤺ᤒ᤻ ᤏᤢ᤺ᤒᤠ ᤋᤧᤰᤛᤣ᤺ᤰ ᤁᤧᤃᤥ᤺ᤵᤐᤠ ᤗᤧᤱᤜᤱᤒᤠᤸᤗᤧ
46 ᤛᤠ᤹ᤖᤡᤰ ᤀᤡᤔᤧᤸᤗᤢᤱᤒᤠ ᤋᤧᤰᤛᤣ᤺ᤰᤁᤡᤴ ᤂᤥ᤺ᤛᤢ. ᤜᤧᤰᤁᤩᤠᤱ ᤐᤣᤀᤠᤱ ᤂᤧᤸᤗᤧ ᤁᤳᤋᤢᤒᤠ ᤁᤧᤖᤧᤰ ᤁᤢᤈᤡᤃ᤺ᤰᤘᤠᤜᤠ᤹ ᤛᤱᤄᤢᤀᤠᤱ ᤂᤧᤴ ᤋᤧᤰᤛᤣ᤺ᤰᤁᤡᤴ ᤀᤡᤅᤢᤖᤥ॥”
ᤕᤥ᤺ᤱᤅᤡᤸᤗᤧᤴ ᤂᤧᤍᤠ᤹
47 “ᤕᤠᤶᤔᤥ. ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤴ ᤕᤶᤒᤠ ᤕᤥ᤺ᤱ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ॥ ᤂᤧᤴ ᤕᤥ᤺ᤱᤅᤡᤴ ᤘᤖᤰᤁᤥ ᤔᤧᤗᤧᤵᤋᤢᤸᤗᤧ ᤂᤧᤵᤔᤥ ᤁᤧᤖᤧᤰ ᤐᤖᤡᤰᤗᤧᤴ ᤅᤠᤜᤠ᤹ ᤔᤧᤎᤠ᤺ᤖᤥ॥
48 ᤜᤧᤰᤁᤩᤠᤱ ᤂᤧᤴ ᤕᤥ᤺ᤱᤅᤥ ᤁᤢᤗᤧᤶ ᤅᤠᤜᤠ᤹ ᤔᤧᤎᤠᤀᤠᤱ ᤕᤥ᤺ᤱ ᤁᤧᤗᤧᤵᤐᤠᤜᤠ᤹ᤖᤧ ᤗᤠ᤺ᤰᤁᤠᤳ ᤔᤧᤀᤢ᤺ᤰᤂᤢ ᤔᤧᤗ᤺ᤳᤋᤢ. ᤜᤧᤰᤁᤩᤠᤱ ᤔᤧᤕᤢᤱᤛᤡᤱᤅᤠᤱ ᤏᤢ᤺ᤒᤠ ᤅᤠᤜᤠ᤹ ᤅᤠ ᤕᤠᤱᤔᤠᤀᤥ ᤔᤧᤕᤠᤰᤋᤢᤛᤡ. ᤁᤖ ᤋᤠᤵᤑᤧ᤺ᤶᤒᤠ ᤅᤠᤜᤠ᤹ ᤕᤠᤶᤔᤥ ᤆᤫᤠ᤺ᤳᤋᤥ ᤗᤠᤵᤔᤧᤓᤢᤛᤢᤛᤡᤖᤥ॥
49 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤢᤵᤔᤥᤀᤠᤱ ᤒᤠ ᤜᤧᤰᤁᤣᤀᤣ ᤐᤥ᤺ᤱᤗᤥ॥ ᤔᤠᤱᤗᤠᤀᤡᤱᤒᤠᤜᤠ᤹ ᤔᤧᤍᤠᤀᤠᤱ ᤛᤠᤶᤕᤥᤏᤡᤒᤠᤜᤠ᤹ᤀᤥᤗᤠᤶ ᤑᤥᤋᤩᤠᤒᤠ ᤔᤏᤠᤜᤠ᤹ ᤘᤣ᤹ ᤔᤧᤛᤧᤴᤍᤢᤛᤡ᤹ᤀᤠᤱ
50 ᤂᤧᤱᤜᤠ᤹ ᤕᤶᤒᤠ ᤔᤡᤜᤠᤵᤐᤥ ᤗᤠᤵᤔᤧᤓᤢᤛᤢᤛᤡ᤹ᤖᤥ॥ ᤂᤧᤵᤔᤥ ᤀᤠᤳᤋᤠᤳᤋᤠᤴᤏᤣ ᤋᤢᤰᤂᤣ᤺ᤸᤗᤧ ᤜᤠ᤺ᤵᤔᤠᤴ ᤏᤢ ᤜᤠᤒᤥ᤹ ᤕᤧ᤺ᤱᤔᤠᤴ ᤐᤥ᤺ᤱᤗᤥ॥”
51 ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤁᤴ ᤐᤠ᤺ᤴᤜᤠ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤒᤡ᥅”
ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤧ ᤁᤢᤛᤡᤱ ᤏᤡ᤺ᤳᤋᤢᤶᤒᤧᤖᤥ᥄”
52 ᤂᤢᤏᤧ᤹ ᤔᤧᤳᤋᤢᤛᤡ. “ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤥ ᤜᤢ᤹ᤛᤠᤶᤒᤠ ᤁᤧᤒᤥ᤺ᤱᤒᤠ ᤁᤧᤖᤧᤰ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤃ ᤜᤡᤶᤍᤠᤱᤒᤠ ᤁᤢᤀᤡᤛᤡ᤺ᤰ ᤔᤧᤈᤥ᤺ᤰᤗᤥ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤴᤍᤥ᤺ᤰᤗᤠᤶ ᤁᤢᤛᤱ ᤏᤢ ᤁᤧᤕ᤺ᤵᤐᤠ ᤁᤧᤕᤧᤰᤐᤠ ᤀᤡᤔᤧᤸᤗᤢᤱᤒᤠ ᤆᤡᤃ᤺ᤰᤘᤠᤜᤠ᤹ ᤔᤧᤗ᤺ᤳᤋᤢᤛᤡ᤹ᤖᤥ॥”
ᤏᤠᤛᤖᤋᤀᤥ ᤕᤧᤛᤢ᤺ᤴ ᤔᤧᤏᤠ᤹ᤖᤢ
ᤔᤷᤁᤢᤛ ᥌.᥇-᥌. ᤗᤢᤁᤠ ᥊.᥇᥌-᥉᥆
53 ᤕᤧᤛᤢᤖᤧ ᤁᤴ ᤂᤧᤍᤠ᤹ᤜᤠ᤹ ᤐᤠ᤺ᤳᤋᤢ ᤛᤢᤖᤢᤀᤠᤱ ᤂᤧᤵᤔᤥᤗᤠᤶ ᤐᤣᤀᤠᤱ
54 ᤀᤠᤒᤠᤅᤣ ᤁᤢᤒᤠᤱᤓᤣ᤹ᤀᤥ ᤋᤩᤧᤖᤥ॥ ᤂᤧᤵᤔᤥᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤔᤏᤠᤜᤠ᤹ ᤜᤢ᤹ᤔᤠ ᤜᤣ᤺ᤰᤋᤢᤛᤡᤸᤗᤧ ᤔᤏᤠᤜᤠ᤹ᤖᤧ ᤁᤢᤏᤡᤛᤠᤶᤔᤡᤴ ᤔᤧᤄᤧᤵᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤀᤰᤂᤣ ᤔᤧᤒᤠ᤺ᤳᤋᤢ. “ᤁᤴ ᤔᤏᤠ᤺ᤸᤗᤧ ᤀᤰᤋᤱᤒᤠ ᤛᤡᤰᤁᤢᤶ ᤏᤡᤱᤘᤠ᤹ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤢᤰᤛᤠᤶ ᤀᤠᤳᤋᤥᤗᤠᤶ ᤂᤥ᤺ᤛᤢᤒᤣ᥅
55 ᤔᤧ᤺ᤶᤒᤧ. ᤁᤱᤃ ᤛᤡᤱ ᤁᤧᤃᤠᤶᤒᤠᤸᤗᤧ ᤁᤢᤛ᤻ᤛᤠ᤺ᤴ ᤔᤧ᤺ᤶᤒᤡ᥅ ᤁᤸᤗᤧ ᤁᤢᤶᤔᤠᤖᤧ ᤁᤢᤔᤡᤱ ᤔᤖᤡᤕᤔ ᤜᤧᤰᤁᤩᤠᤱ ᤁᤢᤴᤛᤠ᤹ᤛᤡᤃ ᤕᤠᤁᤢᤒ. ᤕᤢᤛᤢᤑ. ᤛᤡᤔᤥᤏ ᤏᤢ ᤕᤜᤢᤍᤠᤛᤡ ᤔᤧ᤺ᤴᤇᤡᤒᤡ᥅
56 ᤂᤧᤸᤗᤧ ᤁᤢᤴᤛᤠ᤹ ᤔᤧᤴᤇᤢᤔᤠᤜᤠ᤹ ᤀᤠᤏᤡ᤹ᤏᤢᤀᤣᤛᤧ ᤔᤧᤘᤠ᤹ᤒᤠ॥ ᤜᤧᤰᤁᤣ᤺ᤸᤗᤧ ᤁᤴ ᤔᤏᤠ᤺ᤸᤗᤧ ᤀᤠᤳᤋᤥᤗᤠᤶ ᤁᤴ ᤐᤠ᤺ᤴᤜᤠ᤹ ᤂᤥ᤺ᤛᤢᤒᤣ᥅”
57 ᤜᤧᤰᤁᤣ ᤔᤧᤒᤠ᤺ᤳᤋᤢᤖ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤏᤠᤔᤧᤴᤇᤠ᤹ᤖᤢᤴᤗᤥ॥
ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤧᤱᤃ ᤁᤧᤖᤧᤰ ᤋᤧᤴᤏᤥ ᤔᤡᤱᤛᤥ ᤀᤡᤱᤎᤠ᤺ᤱ ᤔᤧᤒᤡᤖᤢ. ᤁᤖ ᤀᤠᤵᤑᤣ᤺ᤰ ᤁᤢᤜᤡᤶᤔᤥ ᤏᤢ ᤁᤢᤒᤠᤱᤓᤣ᤹ᤀᤥᤖᤰ ᤀᤡᤱᤎᤠ᤺ᤱ ᤔᤧᤶᤒᤡᤖᤢᤴᤗᤥ॥”
58 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤛᤠ᤺ᤴ ᤜᤥ᤺ᤵᤋᤧᤒᤠᤸᤗᤧ ᤆᤥᤃᤢᤸᤗᤧ ᤂᤧᤵᤔᤥ ᤕᤖᤡᤰ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤴᤗᤥ॥