4
Leheya ta wasai
1 Malawin Ndrabun tiye aleu i buku doh: Na len hamon eme, lau rayah kameh ruwani budon handru tiri; ya iri kameh an hamon ta malawin ndra-in ta wasai, ma an hamon ta leheya ndra-in tiri balik.
2 Leheya doh aseker na lau ta wasai; budon tiri badeh, mwasin handru bwe. Budon tiri badeh, ndramak, ma bar tiri balomondra bala mwasin bwe.
3 Iri tiye iri lau satasou, ma saimon nyamon rayah ndri-iy. Arile, Kindrei mesekei iri nyamon doh badeh, ta aimon le, i buku none to lau ta budon handru amekes salom, ma adeu wurah ta aliy. Tasah, to badeh, ndratanan sahou handru.
4 Ya, i buku none lakou mari kede-eh, to kamekes salom ki ta aliy, badeh, ndra mwasin le ta aimon; ari lakou badeh, ndra-in ta kakeh ki-iu, bwe.
5 Tasah, sahou ta Kindrei mene, ma hawe salom badeh, mesekei udu mwasin ta mada Kindrei.
Ndramak lohowan mwasin ta Krais Jises
6 I buku none ou leheya batanau dah i ta nadu tinem oro, ou lohowan mwasin labai ta Krais Jises. Ma ou ale amekes ou abadok na aliy. Ma idah kameh, ou abadok na sahou ta budon handru mene ou anuhun ma ou a-en hamon ta aliy.
7 Ou sa-en hamon ta kundruh tiri lau ta wasai ma hawe ou sa-en hamon ta sahou laleyah. Arile, ou abadok ou ta bolo manyah mwasin ta Kindrei.
8 I buku none ou amekes ndrayem kaseselek, mwasin; arile san ta Malawin Ndrabun badeh, mwasin labai ja ta ou sakaliye niliy. Tasah, idoh kameh sebenei manyah tam udu mwasin na len dah, ma hawe na len hamon kameh eme.
9 Idoh sahou handru, ya lau mari katehei budon handru ki ta aliy:
10 To asa-ar dah badeh, tasah to abudon boto-on in ta Kindrei. Ma iy ale ta aseben lau mari. Arile, ma hutuwen labai ki toro are atehei budon handru in tan. Tasah, iy badeh, ta ano bwe.
11 Ou batanau iri mwan ma badih ta sahou dah, ma leheya iri ka-en hamon ta aliy.
12 Lau badeh, satehei budon sandra-i anya ou ma loweu le, bwe. Arile, ou badeh, asahan i buku torowe mwasin ta mada lau, ta bolo sehek sahou tam, ma ta bolo tekedek tam. Ma ou ale asahan ta aseben lau mari hawe budon tam ki lewen. Ma hawe ou badeh, ki buku torowe handru ta mada lau ta san ta budon handru.
13 Ou atehei boto-on tam mari ki ta asehek sahou ta bolo tarou mari ki ndranye lau mari, ma ou leheya ma asehek sahou ta Kindrei, winiya jo le barasahan.
14 Ou saruwani nyosowan mwasin ta Malawin Ndrabun udu tam badeh. Idoh mene udu tam, ya iri propet asehek ma hawe iri lau ta bwena ta lahou ta Kindrei mene adeu boto-on na mine iri ewek la-um.
15 Ou atehei ou a bolo sahou doh, ma ou none lahou, eme iri lau kanyolom lahou doh udu ndra badam.
16 Balem ki tam kamwenen ma balem ki ta sahou ou leheya. Ou saruwaniy labai; tasah lakou ou amekes badeh, winiyan sebenei koha iri are anuhun sahou, ma winiyan sebenei ou ale.