7
Taha ka-en hamon ta san ha-un ta Malawin Ndrabun aseben taha
1 Aha nadu tine, jo asehek sahou dah i tiri lau ala tanan iri batanau malen. Sebwe aha ndratanan nadeh? Batanau malen badeh, winiyan atondrok ndramak ma mulin na le len iy udu bwele-e munyak dah. I buku iy ndramak, batanau malen winiyan batondrok iy ja bwai.
2 Jo kasehek ki buku doh: Badih tasou asahan ari buruwen hawe udun na len iy bamak bwe. Arile, i buku none udun mwan imek badeh, kandriyen ta asahan ari buruwen badeh, batanau malen tiye ndrano.
3 Ya, i buku none iy badih udun bamak bwe, ya iy ki ta mwan ari ja badeh, iy amekes karei, tasah udun ma mwena bamak bwe; arile ki buku none udun kimek badeh, sahou ta aliy bwai, iy winiyan i tasou ta ndramak ari ja. Idoh badeh, iy bamekes karei bwe, iy udu laleyah.
4 Eme ya, aha nadu tine, aha badeh, i buku aliy. Aha ndrahas hawe bada Krais, eme ma aha ndramak hawen. Ma batanau malen ta Moses winiyan basehek taha ja bwai. Idoh i buku aha ndramak, ma batanau malen winiyan batondrok aha ja bwe, ma aha are laleyah. Nadah, aha atasou a ta mwan ari ja, iy imek ma iy amak eme loken ta imek tan, ta taha winiyan amekes iri kandriyen mwasin Kindrei aso-ok.
5 Tasah, bwena mene, kandriyen ta karei ma lomondra ndra-in badu bolo taha badeh, ndratondrokei taha. Ma batanau malen mesekei kandriyen ta karei ma lomondra ndra-in doh towodau udu bolo oda taha eme loke; eme ya ta katin doh taha mene adek san ta tiyani taha ala bolo imek.
6 Arile, na dah, taha ndramak, ma taha ruwani iri lakou mene tawi taha, ma taha ndrame len. Taha winiyan bare bahandra tondrok ta kandriyen bwena ndratorowenei udu bolo batanau malen ja bwai. Arile taha ka-en hamon ta san ha-un ta Malawin Ndrabun aseben taha.
Kandriyen ta Karei ma lomondra ndra-in bokoro-ei taha
7 Ya, i buku batanau malen mesekei kandriyen ndra-in towodau udu bolo oda taha eme loke badeh, taha kasehek ki buku sah bah? Batanau malen badeh, kandriyen ndra-in nadeh? Bwe! Arile, na batanau malen le badeh, mesekei jo i tanan karei ma lomondra ndra-in i buku sah. Batanau malen mene tiye anya,
“Madam salikis lakou doh, lakou doh!” Eksodus 20:17; Dutoronomi 5:21
Ya, buku batanau malen batiye lakou doh bwe, jo badeh, winiyan bala tanan kandriyen ta madalakis i buku sah bwe
8 Arile, kandriyen ta karei ma lomondra ndra-in silahei san ta bokoro-ei jo. Ya iri kandriyen doh i madasan ta batanau malen ma mesekei budon tek towodau ta amekes madak alikis lakou ari, ya lakou ari doh. Tasah, buku none batanau malen mene basehek tek bwe, idah nane karei ma lomondra ndra-in winiyan batowodau boto-on bwe.
9 Kabatana batanau malen bame bwe le badeh, jo anya jo mwasin ta mada Kindrei, ya jo bato-ou ta karei ma lomondra ndra-in bwe; arile na len batanau malen asahan badeh, karei ma lomondra ndra-in towodau udu ndrinek eme loken ma amekes jo imek.
10 Bwena mene jo abudon anya batanau malen eme ta aseben kohak udu le udu, arile bwe, eme ta idi jo imek.
11 Tasah, kandriyen ta karei ma lomondra ndra-in badeh, silahei san tan eme mesekei jo amekes kandriyen ndra-in; eme ya i san le ta batanau malen badeh, karei ma lomondra ndra-in wasai jo ma idi jo imek.
12 Eme ya, taha kasehek batanau malen ki buku sah bah? Kandriyen ta batanau malen le badeh, ndrabun ma mwasin, ma hawe batanau malen ari ari badeh, ndrabun hawe lewen ma mwasin.
13 Handru, batanau malen badeh, mwasin labai. Arile, buku sah ja? Lakou mwasin doh bwidi jo imek deh? Bwe, bala buku badeh, bwe! Arile, idoh badeh, asahan na seken ta kandriyen ndra-in badu bolo oda taha mesekei taha tebelese sahou badu bolo batanau malen ma bwidi taha amak. Kindrei le alelei kandriyen ndra-in amekes gok doh, tasah iy aseken kandriyen ndra-in doh keme lewan, ma iri lau katanan buku kandriyen ta karei ma lomondra ndra-in badeh, ndra-in labai.
Kandriyen ndra-in atondrok taha
14 Taha tanan, batanau malen badeh, Kindrei le edeu. Arile jo badeh, ndrala bonyo-ou ta karei ma lomondra ndra-in, tasah jo ba-en hamon ta seken ta Kindrei bwe.
15 Eme ya, jo bala tanan sasah jo amekes bwe. Tasah, kandriyen mwasin ta jo nane kamekes on, jo bamekes bwai. Arile, jo ja aseken kamekes kandriyen ndra-in nane jo samekes on, badeh, jo amekes ai.
16 Eme ya, i buku none jo amekes sasah nane jo bwalek ta amekes badeh, kandriyen tek doh leheya buku budon tek anya ki-in hamon ta sahou batanau malen asehek ta aliy ai.
17 Ya eme jo le amwenen badeh, batiyani kandriyen ndra-in bwe. Idoh badeh, karei ma lomondra ndra-in udu bolo odak le amekes lahou doh.
18 Eme jo tanan ta bolo odak badeh, kandriyen mwasin bado aliy bwe. Handru, bolo budon tek, jo aseken ta amekes kandriyen mwasin, arile winiyan bwe, kandriyen ndra-in udu le bolo odak kada-ah.
19 Eme kandriyen mwasin jo nane anya kamekes badeh, jo bamekes bwai; ya, kandriyen ndra-in anya nane jo samekes badeh, jo amekes ai.
20 Eme ya, i buku none jo amekes sasah nane jo bwalek amekes, jo le amwenen badeh, batiyani kandriyen ndra-in bwe. Idoh badeh, karei ma lomondra ndra-in udu bolo odak le amekes lahou doh.
21 Ya eme sendrehendreh ta aliy i buku doh: Jo anya kamekes kandriyen mwasin badeh, kandriyen ndra-in nane udu bolo odak kodo-on aliu jo amekes le kandriyen ndra-in ja.
22 Ya udu bolo budon tek jo abudon anya batanau malen ta Kindrei badeh, mwasin, ya eme taha kasekesek ma ka-en hamon le ta aliy;
23 arile jo ja anyolom kandriyen randrah ja amekes lahou udu bolo odak mari, ya kandriyen doh akek eme hawe bar tek ta lomondra mwasin. Eme ma kandriyen doh sawei jo udu baha boto-on ta karei ma lomondra ndra-in sokoro-ei bolo odak mari.
24 Eme ya, bolo odak ndrandra-i ai! Ya, are lau handru winiyan sebenei jo udu bolo imek ta karei ma lomondra ndra-in kada-ah?
25 Arile, wurah handru i ta Kindrei, i san ta Laban tataha Jises Krais le!
Ya eme ta sendrehendreh jo kasehek i buku doh: Taha mene asehek sahou i lundra; budon tataha asehek anya batanau malen ta Kindrei mwasin, ya eme taha a buku bonyo-ou ka-en hamon ta aliy, arile taha ame ja asehek anya, oda taha atehei taha a buku bonyo-ou ta a bolo kandriyen ndra-in ta bada taha ma mesekei taha andra-i labai.