8
Oro badih rayah an hamon ta Jises
1 Eme idoh ano badeh, Jises edek ili eme bolo iri kon tinan mari, hawe ili bolo iri kon bwisik mari, atiye sahou mwasin ta Kindrei aso-ok iri lau mwan ma badih, ma iy aso-ok iri kame baha tondrok mwasin ta Kindrei. Ma hawe oro lau tan ma ronoh la-uh badeh, ado hawen,
2 ma hawe oro badih rayah ale mene Jises amekes sik hawe malawin ndra-in udu bwele-e oro iu badeh, ado hawen ale: Oro badeh, Mariya badu Makdala, iy mene ale malawin ndra-in ma ndro taloh ado la-un ame len;
3 ya Jo-ana, udu ndramak ta atondrok asiu ta Herot nyaran Kusa; ya Susana hawe badih rayah ja. Oro badih doh badeh, adek hawe oro adeu lakou toro amwenen i ta sisih, akohok luk ta aseben oro.
Sahou sokek ta ndramak ta atah buwa kei
(Metiu 13:1-9; Mak 4:1-9)
4 Ano udu, iri lau solo-an badu kon tinan ari ari atukum ame hawe Jises, eme iy tiye sahou sokek ari i tiri i buku doh:
5 “Na len ari badeh, ndramak ari ili sabara badu wit ili bolo bilin. Iy akeh ili, badu wit ra-on taku in san; eme ya iri lau adek la-un ma hawe iri sirih atah ame aniy.
6 Ya rayah badeh, taku in bwele-e bek, ano eme apwak, ano awa-is, tasah munyak sese le in bwele-en.
7 Ya rayah ja badeh, taku udu bolo malou bobodon nane ateh eme loken, ma tubuluhi wit nane ma iy bato-ou buwan bwai.
8 Ano rayah ja badeh, taku ili bolo ndren mwasin. Eme ateh eme loken, ato-ou buwan solo-an; ya ra-on ja badeh, ato-ou rinek (100).” Eme iy tiye doh ano badeh, iy aloh anya, “Ou are lau ndranyem udu aliy, ou anuhun.”
Moso sahou sokek
(Metiu 13:10-23; Mak 4:10-20)
9 Ano oro lau tan ndremenya Jises, ta moso sahou sokek nane doh.
10 Eme iy anya, “Kindrei aseken ado lau tek katanan iri sahou mene aton ta nyala tondrok ta Kindrei. Arile, i tiri lau buku liliy badeh, jo asehek i san ta sahou sokek. Eme ya,
‘Iri kameh anyolom anyolom ja, arile iri winiyan baseleyani bwe; ya iri anuhun amwenen, arile batu iri winiyan baleu ta aliy bwe.’ ” Aisaya 6:9
Sali sahou sokek ta buwa kei
11 Ano Jises tiye, “Sali sahou sokek asah i buku doh: Buwa wit badeh, moson i buku sahou ta Kindrei.
12 Ya oro buwa wit taku udu san badeh, i buku none lau rayah ai. Oro doh badeh, anuhun sahou ta Kindrei, arile balik eme kuhi iu sahou mwasin Kindrei tahiy ereu budon toro, eme ya oro satehei budon toro handru sa-en ta sahou. Koro-an sahou doh, kasebenei koha oro kudu mwasin.
13 Ya buwa wit taku udu bwele-e bek badeh, i buku none lau rayah ai. Oro doh badeh, sekesek ta anuhun sahou ta Kindrei, arile kandro oro badeh, barih bala andri handru bwe. Ya oro badeh, atehei budon handru, arile bado luwen bwe, eme ya buku none ndrine sen asahan deh, ndra-i asahan toro badeh, oro taku.
14 Ya buwa wit taku udu bolo malou bobodon badeh, i buku none oro lau doh, anuhun sahou ta Kindrei, arile oro ado badeh, abudon boto-on ta lakou solo-an badu kon munyak. Ya oro abudon boto-on labai ta atukum iri luk, ma hawe bale oro asin ta kandriyen badu bada oro tinan labai. Eme ma, oro badeh, buni ta budon bwe.
15 Arile, buwa wit taku udu munyak mwasin badeh, i buku oro lau anuhun sahou ta Kindrei, eme oro tawi sahou doh, udu ndrine oro ihis labai, ma udu le udu, oro ato-ou sali oro mwasin.
Sun udu leheleh
(Mak 4:21-25)
16 “Ki buku ari ndramak katelem sun, iy winiyan batone bado bolo sabok bwe, ma iy ale winiyan batehei bala baha sau bwe. Iy kameh suriniy udu loken. Ya, i buku none are lau eme anyolom kameh iy eme asiu.
17 Eme ya lakou mari aton badeh kameh asahan eme lewan. Ma saba lakou tubuluhiy kameh asahan eme lewan ale.
18 Eme ya, ou lomondra kamwenen ta sahou ou anuhun ma an hamon ta aliy. Ndramak tanan tan mwasin udu aliy, iy kameh akohok tanan mwasin labai ja i la-un. Ya eme, are lau anya iy tan tanan sese udu aliy, idah kameh, tanan sese le doh kameh kuhiy mari iu.”
Tine Jises hawe nadu tinen oro ame anyolom iy
(Metiu 12:46-50; Mak 3:31-35)
19 Ano, tine Jises hawe nadu tinen oro ame anyolom iy, arile lau solo-an labai ya oro winiyan bala mirihik tan bwe.
20 Eme ndramak ari ili tiye tan anya, “Jises ei, tinem hawe nadu tinem oro ales ado manan, anya katou ou.”
21 Eme Jises tiye i tan anya, “Tine hawe oro nadu tine handru asah oro are hawek anuhun sahou ta Kindrei, ma oro amekes lahou ta aliy dah.”
Jises tiye jor amondrei
(Metiu 8:23-27; Mak 4:35-41)
22 Ano na len ari ja badeh, Jises tiye i toro lau tan anya, “To ka-au kala kapa gwa bilisiu kodo-oh.” Eme oro sandroh a ndron ra-ei badeh, ma oro alakak ala bilisiu.
23 Eme oro alakak ala badeh, Jises ndramadin. Eme laba jor atohou eme andri bwele-e gwa li, ya bayau i tinan ma eme ndron, eme ya oro akohok andra-i labai.
24 Eme oro lau tan ala badeh, mete-ei iy anya, “Laban, Laban, to dah kameh atuh ma amak ai!” Ano Jises suri iy eme loken, tiye sahou boto-on i ta jor hawe bayau, ma jor amondrei hawe bayau ameres.
25 Ano iy tiye i toro, “I deh, budon tado handru ndraheh?”
Eme oro anoh, hawe mani oro atur, ma oro tiye i toro ari ari anya, “Iy are lau handru kede-eh? Iy tiye sahou boto-on le badeh, jor hawe bayau anuhun bohon!”
Jises tikahei malawin ndra-in udu bwele-e ndramak ari iu
(Metiu 8:28-34; Mak 5:1-20)
26 Ano, oro alakak ala loboho Gerasa. Kon doh, udu bilisiu ta Galili.
27 Eme Jises sandroh i babi le badeh, ndramak ari badu kon tinan doh, iri malawin ndra-in udu la-un eme hawen. Ya ndramak doh badeh, ndra bwena ndra-au badeh, iy ndrakane le. Iy badeh, ari asumwen bwe, asumwen badeh, munu bek ta ndrahu lau amak ala aliy.
28 Eme iy atou Jises le badeh, iy anyar ma aluh i andri udu mada Jises ma iy aloh i tinan i tan anya, “Jises, Nadu Kindrei badu loken, ou anya amekes sasah keme tek? Ndri-iy, ou samekes sisi-in same badak!”
29 Iy aloh i buku doh, tasah Jises badeh, ndratiye sahou boto-on ndra ta malawin ndra-in ta anya keme len. Ya malawin ndra-in badeh, ndrahas ndrado la-un luluwen labai. Iri sawei minen hawe katin na sen, ma lau ta ndrokei atondrok iy, arile iy mindrindri sen, eme malawin ndra-in lolowa iy ili kon lomale an, ili bolo ndrokowa bek.
30 Eme Jises ndremenya iy, “Nyaram are lau?”
Eme iy anya, “Nyarak badeh, Solo-an.” Tasah, malawin ndra-in solo-an ndrado bwele-en badeh nyaran bwe.
31 Eme oro asehek sahou ta tikisiy i ta Jises i buku doh, “Ou satikahei aso sala bolo lek ta isi.”
32 Eme udu loboho doh badeh, bou rakou aimon nyamon are ka-u mandrei. Eme oro tiye sahou ta tikisiy i ta Jises anya, “Ou tikahei aso kala bwele-e iri bou nane doh.” Eme ya Jises tiye le badeh,
33 oro malawin ndra-in are la-un ame len, ma a bwele-e iri bou. Eme oro sakaliye are bwele-e mandrei ame andri ala bolo gwa li, ma oro amak.
34 Eme oro lau ta atondrok iri bou anyolom lakou doh asahan ma oro atobwak au a kon tinan ma hawe a lokei asehek i tiri.
35 Ya eme iri lau ala anyolom. Iri ala asos hawe Jises le badeh, iri atou iy ndramak nane malawin ndra-in mene udu la-un ndramwenen ja. Iy ndratani kolau hawe budon tan ndramwenen ya iy manyah udu kati Jises. Eme ma iri anoh.
36 Ano iri lau nane anyolom dah, ala asehek tiri lau ta nyala ndramak mene malawin ndra-in udu la-un badeh, ndramwenen ja.
37 Ano iri lau badu loboho kon Gerasa tiye Jises ta ki-iu, tasah iri badeh, anoh boto-on tan. Eme ma Jises sandroh i ndron ma anya ki-iu ai.
38 Arile ndramak nane malawin ndra-in udu la-un eme tiye Jises ta iy anya ki hawen. Arile Jises eme tiye iy iu, ma asehek i tan i buku doh,
39 “Ou ala kon asehek tiri ta nyala lahou tinan Kindrei ndramesekei ndrawek tam.” Eme ndramak nane dah, iu ili bolo kon tinan mari doh asehek ta nyala lahou tinan mene Jises ndramesekei i tan.
Badih bihin imek hawe badih en ibo sik
(Metiu 9:18-26; Mak 5:21-43)
40 Ano Jises eme hamon le badeh, iri lau solo-an ame sekesek iy, tasah iri mene abe-en iy.
41 Ano, ndramak batun ari badu asiu ta ndrahu tukum tiri Juwis nyaran Jairus, iy eme aluh i andri udu kati Jises. Ano iy tiye sahou tikisiy i ta Jises i buku doh, “Ou ame asiu tek op.”
42 Tasah, nadun ari le badih, jaha tan badeh, ronoh la-uh, ya iy anya kimek.
Eme Jises edek ili badeh, kon ndraso tiri lau ma sese le iri kandribitini iy.
43 Ya udu bolo iri nane doh badeh, badih ari udu aliy ya sik ndra badeh, udu tan winiya jaha ronoh la-uh. Eme ari lau badeh, winiyan bamesekei iy bamwenen bwe.
44 Ya eme iy badih nane dah, sokohani iy i ndrokowa iri lau ili in hamon ta Jises, eme iy tawi awin tan, ma se nawin bwe, sik ndra tan iu ma ano mara-ei.
45 Eme Jises ndremenya, “Are lau tawi jo?” Ya eme iri bisiniy, ya eme Pita tiye i tan anya, “Laban, iri lau sola nane ahas badam badeh.”
46 Arile Jises tiye, “Boto-on badu badak ewek len badeh, jo atona ndramak ari tawi jo.”
47 Ano badih dah ndraseleyani iri lau badeh, ndratanan, eme iy eme morohani iy i andri kati Jises. Eme ma udu mada iri lau mari nane iy asehek ta saba katin handru iy ateu bada Jises hawe i buku sah iy amwenen ja.
48 Ano Jises tiye sahou i ta badih nane dah, “Nadu badih, ou atehei budon tam handru in tek, ma mesekei ou asahan amwenen. Ou au ma ndrinem kamunum.”
49 Eme iy asehek sahou kahis le, ndramak ari badu asiu ta ndramak ta batun eme tiye i ta Jairus; “Nadum badih ndramak. Ou sasehek sahou ja sala ta ndramak ta leheya badeh, ndri-iy.”
50 Eme Jises anuhun le badeh, iy tiye i ta Jairus, “Ou sanoh; budon tam handru ki-in tek, ma idah kameh, nadum amwenen ja.”
51 Ano iy eme asahan asiu ta Jairus badeh, iy batiye ari lau bala hawen bala asiu bwe. Pita le, Jon le, Jemis le hawe taman uru tinen le badeh, ala bolo asiu hawen ai.
52 Ya iri lau badeh, aden hawe iri taya ndranyen. Eme Jises anya, “Aha kandru-uk, iy bamak bwe, iy badeh, amadin le oh.”
53 Eme iri ehe-en iy, tasah iri tanan badih badeh, ndramak handru.
54 Arile, Jises tawi mine badih imek dah, ma iy tiye, “Naduk, ou amak!”
55 Eme kohan handru asahan ma iy suri iy. Ano ma Jises tiye oro adeu nyamon i nan.
56 Eme ya taman uru tinen badeh, boho uru asak, arile Jises tiye turu i buku doh: “Ah badeh, sasehek ta ari lau, ndri-iy, ta nyala lahou asahan dan, ndri-iy labai.”