21
Luk ta badih nyau i ta Kindrei
(Mak 12:41-44)
1 Jises badeh, udu ndra bolo asiu tinan ta Kindrei kahis, iy eme suri madan eme loken badeh, iy atou iri lau tiri lakou solo-an, adeu luk tiri i bolo lakou ta ndrahu luk udu asiu tinan ta Kindrei dah.
2 Ano ja, iy atou badih nyau ari tan se lakou bwe badeh, akahei luk tan bororoh saraman ma la-uh le.
3 Eme Jises anya, “Jo katiye tado handru en! Iy badih nyau tan lakou bwe kede-eh, akeh luk solo-an labai ja ta lau mari.
4 Tasah, iri lau mari kede-eh akahei rayah le badu bolo luk tiri solo-an, arile iy badih nyau tan lakou bwe badeh, atehei luk mari ta sukunyan ndrala.”
Kalem ta kon munyak ano
(Metiu 24:1-21; Mak 13:1-23)
5 Eme oro lau tan rayah atou asiu tinan ta Kindrei amekes na bek badeh, konen konen labai; ma lakou moroyan adeu i ta Kindrei, eme oro asehek nyala aliy. Arile, Jises eme tiye i toro,
6 “Ado ndratou lakou mari kede-eh, na len eme kameh ado winiyan batou ari ndruwi asiu bek winiyan bales, bareu loken bwe. Iri marakon kameh ato-oh iu i andri.”
7 Eme oro ndremenya iy anya, “Ndramak ta leheya, na saba len handru kameh lakou doh kasahan? Ya saba kalem kameh kasahan bwena ta leheya lakou doh eme bakep ai?”
8 Eme Jises tiye i buku doh, “Ado kanyolom kamwenen, ya ari ndramak sawendreyani ado, ndri-iy. Iri lau solo-an kameh ame anya iri asehek sahou tek ma anya, ‘Jo dah Krais,’ ma, ‘Len ndra bakep ai, ta Kindrei eme akohok taha ame hamon.’ Arile, ado sa-en hamon toro.
9 Ya, i buku none ado anuhun kurutuwe bahun, hawe lakou maha-an asahan, budon tado sandra-i, ndri-iy. Iri lakou doh kameh asahan bwena op, arile lakou mari ta ano kameh kahis le.”
10 Ano iy tiye i toro ja anya: “Kon munyak tinan ari kameh amekes bahun i ta kon tinan ari; ya kabin badu kon rakon kameh amekes bahun i ta kabin badu kon rakon ja.
11 Ma idah kameh kon ari ari kameh ndroi asahan aliy, ya son kameh asahan bolo kon, hawe sik asahan aliy. Ma idah kameh kalem ta nohowa lau kameh asahan bada kandrah.
12 “Arile, lakou mari doh kahis le kameh iri ateu ado. Ma iri kameh adai ado, ano seheyani ado ala asiu ta atukum tiri Juwis ales are mada sahou. Ano ja kameh iri seheyani ado ala hawe iri kabin hawe iri lau ta atondrok. Iri amekes doh tasah, idoh len ta ado katiye sahou tek mwasin ki tiri.
13 Ma idoh kameh atehe san mwasin i tado kasehek nyala sahou tek ki toro.
14 Arile, ado badeh, kalomondra bohon ki bwena ta ado sabwerei ta sasah kameh ado kasehek.
15 Jo le kameh edeu sahou hawe budon mwasin ewek tado, ya iri lau kameh winiyan bandres ma tebelese budon nane jo edeu ewek tado ta atiye bwe. Ma winiyan babisini sahou tado bwe.
16 Ya tama ado oro, hawe tine ado oro, hawe nadu tine ado oro, hawe lowa ado oro, ma hawe kawas tado oro kameh adeu sa-oh tado, ma eme iri kameh adai ado rayah kameh amak.
17 Ya iri lau mari kameh baseken ado bwe, tasah ado an hamon tek.
18 Arile, ari lami batu ado winiyan ba-au bwe, ma koha ado kameh udu le buku doh.
19 Arile, i buku none ado le kabadok ado, idah kameh, ado le winiyan sebenei koha ado handru.
20 “Ya, i buku none ado katou iri lau ta bahun kawudi Jerusalem, badeh, ado tanan ai, mirihik kameh Jerusalem atokos ai.
21 Eme ya, are lau oro are kon Judiya badeh, katobwak kala bolo mandrei. Ya are lau oro are bolo kon tinan badeh, katobwak kame len. Ma hawe are lau oro are len badeh, sala bolo kon tinan, ndri-iy.
22 Tasah, idoh badeh, len ta adeu maha-an i hamon, amwenen le ta sahou ta Kindrei mene ndratorowenei.
23 Len doh kameh len ndra-in labai tiri badih ale nah ereu tiri, ma badih nah ma nyandren! Tasah, Kindrei kameh ibolosen i tiri lau badu munyak dah, ma iri kameh bwese maha-an laba tinan labai.
24 Ya idah kameh, iri amundroh lau rayah na samen, ya iri rayah kameh kuhi iri a bonyo-ou a kon munyak tinan mari. Ma iri lau badu leheleh kameh atondrok lakou mari badu Jerusalem, winiya le tondrok tiri barano.
Nadu Ndramak Awas kameh eme
(Metiu 24:29-31; Mak 13:24-27)
25 “Idah kameh kalem asahan ta an, kalem asahan ta bun hawe iri ndrau. Ya iri kon munyak tinan kameh bwese maha-an laba tinan labai, hawe iri anoh ma anyon ala ame ta kurutuwe bayau badu ndras.
26 Lau mari kameh anoh ma mada iri abuluw ta lakou kameh asahan la-u kon munyak, ma boto-on mari badu kandrah kameh nyukunyok.
27 Ano amwenen ta lakou doh, asahan kameh, iri lau kameh anyolom Nadu Ndramak Awas asahan ereu bwele-e asi kandrah, ma boto-on tan ma lomadan tinan labai.
28 Eme ya, i buku none ado atou lakou mari doh kasahan badeh, mada ado katele ai, tasah len ta ndramak ta seben badeh, ndrame bakep ai.”
Sahou sokek ta kei pik
(Metiu 24:32-35; Mak 13:28-31)
29 Ano ja iy asehek sahou sokek doh i toro, “Ado kanyolom kei pik hawe iri kei mari kede-eh se.
30 I buku none ado katou la-un ha-un kasahan badeh, ado tana ado, idah kameh kon i le an ai.
31 Ya, buku ado anyolom iri lakou nane jo ndrasehek, ado tana ado tondrok ta Kindrei ndrame bakep ai.
32 Jo tiye tado handru en! Iri lau rebesem areu kede-eh kahis na len dah kameh bamak bwe le, iri lakou doh kameh asahan.
33 Kandrah ma kon munyak dah kameh ano iu, arile sahou tek le kameh winiyan bano bwe.
34 “Bale ado ki tado doh! Ado satehei budon hawe ndrine ado sahis ta lakou badu kon munyak, hawe ado sabulum ndrine ado na nyamon hawe a-un gwa boto-on ta amekes manyah tado kudu mwasin. Bwe kameh, len doh asahan kameh i le mani tur.
35 Tasah, lakou doh kameh asahan eme ta lau mari badu munyak.
36 Arile, na len mari, mada ado kaleu hawe ado kasolom, eme ya ado winiyan ales boto-on ma ado winiyan teleyani lakou doh kameh asahan. Ma hawe ado winiyan ales are mada Nadu Ndramak Awas.”
37 Na len ari ari badeh, Jises leheya udu asiu tinan ta Kindrei. Ano kon eben, iy iu ili mandrei Olip amadin.
38 Eme iri lau mari na mandraben badeh, ala anuhun iy asehek sahou udu asiu tinan ta Kindrei.
Jises akohok sisi-in ma iy imek ano iy amak ja
(Kalan 22–24)