16
Sahou sokek i bada lau ta wasai
1 Ano Jises asehek sahou sokek ari i toro lau tan anya: “Lohowan ari badeh, atondrok lakou ta ndramak ari, tan lakou solo-an. Ndramak tan lakou solo-an nane dah, anuhun lohowan tan atondrok lakou dah badeh, sabara luk tan laleyah.
2 Eme iy luhi lohowan ta atondrok dah eme, ya iy lelen iy, ‘Jo mene anuhun ou amekes lakou ari. Ou torowenei sasah le ndra-au, hawe sasah le udu kede-eh kudu, ya keme tek. Tasah, ou ndrano, ou winiyan batondrok lakou tek ja bwai.’
3 “Eme lohowan ta atondrok lomondra iy tan le, anya, ‘Jo ki buku sah bah? Ndramak tan lakou solo-an tek kede-eh, ndratikahei jo ndrano ta gok. Ya jo badeh, boto-on ta apou ndren bwe, hawe jo ta bwilima ta anyolou lakou.
4 Jo tanan, jo badeh, ndrano. Eme ya jo badeh, kamekes tanan doh; ya idah kameh iri lau winiyan aseken jo ili asiu tiri ai.’
5 “Eme lohowan ta atondrok dah luhi iri lau mari mene, andrei lakou ta ndramak tan lakou solo-an mene tan dah, ame. Eme iy ndremenya iy ari bwena anya, ‘Ou mene andrei lakou sabe ta ndramak mene tan lakou solo-an?’
6 “Eme iy anya, ‘Jo mene andrei sabok ndrelekei ta olip ma rinek (100).’
“Eme iy anya, ‘Ou manyah atorou, ou mene andrei sabok ma lomonoh (50) le.’
7 “Ano iy ndremenya ndramak ari ja, ‘Ya ou mene andrei sabe?’
“Eme iy anya, ‘Jo mene andrei ndrom sahin wit rinek (100).’
“Eme iy tiye i tan, ‘Ou torowenei ndru lunoh (80) le.’
8 “Eme ndramak tan lakou solo-an nane dah, masiye lohowan tan. Tasah, iy badeh, anyolom bohon ili bwena, ta bolo manyah tan. Idoh badeh, leheya iri lau badu munyak dah badeh, iri tanan mwasin labai ta atondrok lakou tiri. Iri badeh, sakalau iri lau badu lomadan ta Kindrei.
9 “Eme ya jo katiye tado kamwenen, ado badeh, katamar iri lau na lakou tado badu munyak. Ya, i buku none ano badeh, iri kameh aseken ado ala kon ta udu le buku doh.
10 “Are lau winiyan tondrokei lakou bwisik badeh, iy winiyan tondrokei lakou tinan ale; ya are lau winiyan batondrokei lakou bwisik bwe badeh, iy winiyan batondrokei lakou tinan bwe ale.
11 Ya, i buku none ou winiyan batondrokei lakou badu munyak bwe; idah kameh, ou winiyan baratondrokei lakou handru barala buku sah?
12 Ya, i buku none ou winiyan batondrokei lakou ta ari ndramak bwe, ya idah kameh, are lau le kanyohan ou lakou bah?
13 “Lohowan ari winiyan bateu lahou ta lau tinan la-uh bala le rasan bwe. Ya idah kameh iy bwalen iy ari, ya iy aseken iy ari; deh bwe, kameh iy anuhun sahou ta iy ari labai ja, ta iy ari. Ado winiyan balelei Kindrei ta atondrok ado, ma hawe aseken luk ta atondrok ado bala le rasan bwe.”
14 Eme oro Parasi badeh, oro lau ta aseken luk labai, eme oro anuhun sahou mari doh badeh, ma oro bobose iy.
15 Eme Jises tiye i toro anya, “Ado le baden adeh, anya, ado mwasin ta mada lau adeh, arile bwe, Kindrei badeh, tanan ndrine ado. Tasah, sasah lau atou ta mada iri, anya idoh aliy le ai; arile bwe! Ta mada Kindrei anyolom badeh, lakou ndra-in laleyah.”
Sahou rayah ja
16 “Sahou ta nyala batanau mene Moses torowenei hawe iri sahou tiri propet badeh, sendrehendreh ta aliy kabatana le Jon ta alomwa, kabwe. Ya, sahou mwasin ta nyala tondrok ta Kindrei badeh, ndratiye udu kabatana Jon ta alomwa, eme taku idah. Eme lau mari badeh, atuw iri alih bolon.
17 Kandrah hawe kon munyak dah kameh ano iu mara-ei. Arile, ari kono-o tarou badu bolo batanau malen winiyan ta bano bwe.
Jises asehek ta ndramak tikahei udun iu ma iy i tasou ja
(Metiu 5:31-32; Metiu 19:9; Mak 10:11-12)
18 “Ya, i buku none are lau katikahei udun ki-iu, ano ja iy kasudi badih ari ja, iy le mesekei karei i tan. Ya i buku none are ndramak kasudi ari badih udun ndratikahei iy, iy le mesekei karei i badan.
Lasarus hawe ndramak tan lakou solo-an
19 “Ndramak ari badeh, lakou tan solo-an labai. Iy badeh, anyasou na lakou saraman mwasin asih na luk solo-an, ma iy badeh, iwer nyamon ta aimon na len mari.
20 Udu boho mwendreu tan badeh, ndramak ari nyaran Lasarus. Ya iy badeh, manyah udu andri, ma badan mari ndrarahak le soso-ou.
21 Iy udu aliy badeh, atondrok kahu nyamon ta ndramak tan lakou solo-an kataku, ya iy kaimon. Ya iri mwi badeh, asom mada soso-ou tan.
22 “Ano, Lasarus imek ya iri angelo badu kandrah ame andrei iy ili manyah udu ka-u Abraham. Ano ndramak tan lakou solo-an ale imek, ya eme iri ahi iy.
23 Eme udu bolo jih kodo-oh badeh, odan isi, ma iy anyolom i len badeh, iy atou Lasarus manyah udu ka-u Abraham.
24 Eme iy aloh, ‘Tama Abraham, ou tikisi jo, ya ou suni Lasarus katehei andra limen ki ta gwa keme ta kalimek, ya kanyala. Tasah, jo akohok isi laba tinan labai, udu bolo jih dah!’
25 “Arile, Abraham anya, ‘Naduk, ou none lomondra ou mene ado awas se. Ou badeh, mene akohok lakou mwasin, ya Lasarus mene badeh, anyidiu lakou ndra-in. Arile, na dah, iy manyah udu mwasin ai, ya ou ado ta sisi-in ai.
26 Ya laba tinan labai ja badeh, lek laba tinan labai udu ndrokowa to kada-ah. Ma i buku none, are lau anya kudu dah kewek bilisiu hawem badeh, winiyan bwe. Ma ale, i buku none are lau kudu bilisiu tado badeh, anya keme hawe aso kameh winiyan bwe le.’
27-28 “Eme iy anya, ‘Tama, ou suni Lasarus kili asiu ta tama oro, katiye tanan ta nadu tine oro ma limeh same bolo sisi-in, jo udu aliy dah.’
29 “Eme Abraham anya, ‘Sahou ta Moses hawe sahou tiri propet badeh, ndrawek toro; Eme nadu tinem oro badeh, kanuhun sahou doh!’
30 “Eme iy anya, ‘Tama Abraham, ki buku none ari lau ndrasu-u, ya iy kamak ki loke, idoh mwasin ai. Winiyan tiye tanan i toro, ma idah kameh, oro ruwani kandriyen ndra-in toro ai.’
31 “Arile, Abraham tiye tan anya, ‘I buku none oro banuhun sahou ta Moses hawe sahou tiri propet bwe, idah kameh oro winiyan banuhun sahou ta su-u udu bolo lek tan amak eme loke, bwe ale.’ ”