13
I buku ou batubuni ndrinem bwe, ou kameh amak
1 Ya eme lau rayah are hawe oro na len doh mene tiye i ta Jises ta nyala ndraye iri lau rayah badu Galili badeh, Pailat ndrasolowei ndrala hawe katin haka ta asun ta salom tiri.
2 Eme Jises anya, “Ado abudon i buku sah handru? Ado anya oro lau badu Galili adai oro doh badeh, lomondra ndra-in ma karei toro sakalawi karei ma lomondra ndra-in tiri Galili mari deh bwe? Tasah, oro amak i buku doh?
3 Jo katiye tado kamwenen: Bwe! Arile, i buku none ado batubuni ndrine ado bwe, idah kameh, ado amak i le buku aliy.
4 Ya ado kanone kabudon oro lau ma ronoh ndru la-uh (18) mene asiu boko bek lawe tihisi oro ado Silowam se? Ado badeh, abudon anya oro doh badeh, ndra-in labai ja, sakalawi oro lau are Jerusalem dan ai?
5 Bwe! Jo katiye tado kamwenen. Arile, i buku none ado batubuni ndrine ado bwe le, badeh kameh ado amak i le buku aliy.”
6 Ano Jises asehek sahou sokek nyala ndramak ari anya: “Ndramak ari mene badeh, tahi kei pik udu bolo bilin tan. Ano iy anya kili katou kei doh, ndrato-ou salin deh bwe. Eme iy ili tandrana tandrana, arile iy banyolom ari bwe.
7 Eme iy tiye i ta ndramak ta atondrok anya, ‘Jaha taloh ai, jo eme anya katou kei pik dah, ta salin ya eme, jo se batou ari salin bwe. Kei pik kede-eh a-un gwa ta munyak laleyah, ya eme kamwetehei ki-iu!’
8 “Arile, ndramak ta atondrok bilin anya, ‘Ndri-iy, kudu gwek jaha ari dan op, ya jo kanone kawudi na lek ya jo kakeh sisoh ki mwe-en.
9 Ki buku none ato-ou salin na jaha eme eh, mwasin ai, ya i buku none bwe eh, badeh, baramwetehei bara-au ai.’ ”
Badih ari ndrokonan ihun Jises bwidi iy amwenen ja na len ta amunyau
10 Na len ta amunyau ari, Jises leheya iri lau udu asiu ta atukum tiri Juwis.
11 Eme badih ari udu aliy badeh, malawin ndra-in ndramesekei konan ndrahun, andrei jaha ronoh ndru la-uh (18) ai. Eme iy winiyan bales bwe, iy akor le.
12-13 Eme Jises anyolom iy ma iy luhi iy eme mwena. Ano iy atehei minen i badan, ma tiye i tan anya, “Badih den, ndrokonam ndramwenen!” Eme konan ales ja ma iy atudun Kindrei.
14 Eme ndramak ari batun ta atondrok ndrahu asiu ta atukum badeh, ibolosen ta Jises nane mesekei badih doh badeh, udu bolo len ta amunyau. Eme ndramak dah, asehek eme lewan i tiri lau i buku doh, “Taha badeh, atehei len onoh le, ta taha kamekes lahou; ya buku none ou anya amekes lahou badeh, ou amekes kudu bolo oro len doh. Ya na len ta amunyau badeh, ou samekes lakou!”
15 Eme Laban tiye i tan anya, “Ado ta wasai! Sebwe ado kede-eh batalou iri oks hawe donki na len ta amunyau, ma basariye iri bala ba-un gwa bwe nadeh?
16 Ya ado abudon i buku sah handru ta i badih, badu boho kamen ta Abraham dah, Satan mesekei ndrokonan badeh, samwenen na len ta amunyau?”
17 Ya eme sahou iy tiye dah badeh, mesekei iri lau heh budon tiri ndra-in udu tan badeh, bwili iri ama. Arile, iri lau buku liliy badeh, sekesek labai ta lakou mwasin iy amekes.
Sahou sokek ta buwa kei aloh mastet hawe yis
(Metiu 13:31-33; Mak 4:30-32)
18 Ano Jises ndremenya, “Bolo tondrok ta Kindrei badeh, i buku sah handru? Jo kasehek ki buku sah bah?
19 Bolo tondrok ta Kindrei badeh, i buku none buwa kei ari aloh mastet, ndramak tahi in bolo bilin tan. Iy ateh eme loken ma i tinan, ya iri sirih atah ame amekes awi iri udu bada andran.”
20 Ano iy ndremenya ja, “Ya eme jo kasehek bolo tondrok ta Kindrei ki bada sah handru bah?
21 Bolo tondrok ta Kindrei badeh, i buku none yis, badih andrei ya iy tubuni i hawe rahak ndrom tinan palawa. Iy tubuni ili ili winiya palawa mara-ei apus eme loken.”
Madasan bwisik
(Metiu 7:13-14; Metiu 7:21-23)
22 Ano Jises edek ma atiye sahou i tiri lau badu bolo kon tinan, ma i tiri lau badu kon bwisik, ma ili ales ili Jerusalem.
23 Eme ndramak ari ndremenya anya, “Laban, idah kameh, lau rayah le kameh koha iri bano bwe? I buku none iri ala baha tondrok ta Kindrei?”
Eme iy tiye i toro,
24 “Ado badeh, kabadok ado ta ala madasan bwisik. Tasah, jo katiye tado kamwenen, iri lau solo-an anya kanone ta ala bolon, arile iri winiyan bwe.
25 Eme ya ki buku none, ndramak ta ali asiu udu bolo asiu, ya iy kasulu-i kou kili, ya ado badeh, kare manan, kaloh anya, ‘Laban, ou sulu-i kou, aso anya kawek asiu.’ Arile ndramak ta ali asiu kameh anya, ‘Ado badu heh badeh? Jo tanan ado bwe oh!’
26 “Ano kameh ado tiye anya, ‘Aso mene aimon nyamon hawe a-un gwa hawem en, ma ou mene leheya aso an bolo kon taso en!’
27 “Arile, idah kameh, iy tiye i toro anya, ‘Jo tanan ado bwe oh! Ya ado are heh ame dah? Ado same madak. Ado ka-au! Ado badeh, lau ta amekes kandriyen ndra-in labai!’
28 “Idah kameh, akeh ado ame len ta baha tondrok ta Kindrei, ala bolo jih, ya ado kameh aden, ma andrebek lihi ado, tasah ado kameh anyolom Abraham, Aisik hawe Jekop ma hawe iri propet mari are baha tondrok tan. Arile, ado le, bwai!
29 Ma idah kameh, iri lau badu leheleh kameh ame, badu loboho an eme loken, ya iri lau badu loboho an i andri, hawe iri lau badu kum, hawe iri lau badu tolau, kameh akohok ndrahune iri ta manyah ta nyamon tinan ado baha tondrok ta Kindrei.
30 Handru labai, idah kameh, lau rayah badu ndrobek kameh ala mwena, ya lau rayah badu mwena kameh ame ndrobek.”
Jises tikisi Jerusalem
(Metiu 23:37-39)
31 Na len doh, iri Parasi rayah ame hawe Jises tiye i tan anya, “Ou au a kon ari ja. Kabin Herot anya kidi ou!”
32 Arile, Jises tiye i toro, “Ado kala katiye ta mwi badu lokei badeh, anya, ‘Jo kameh udu gwek atikah iri malawin ndra-in au, hawe amekes iri lau sik udu tiri iu na dah, ma hawe na bi-i, ano na atoha, lahou tek barano adeh.
33 Aliy ai, arile bwai, jo na dah hawe na bi-i ili isos atoha badeh, jo ndrado Jerusalem ai, tasah udu bolo oro len doh nane ari propet badeh, winiyan bamak bare ari kon buku liliy bwe. Iy imek udu Jerusalem amwenen.’
34 “Jerusalem, Jerusalem, jo tikisi ado labai, ado adai iri propet, ma ado ateu iri lau Kindrei suni iri ame atou ado, ma ado orowei iri na bek ma adai iri amak. San solo-an jo anya katukumwi nadum oro, buku none iri kakaro tukumwi nadu iri areu bahandra bani iri. Arile, ado bwale ado!
35 Nadah asiu ta salom tado kameh udu laleyah. Eme, jo katiye tado kamwenen, ado winiyan batou jo ja bwe, winiya le len hamon kameh ado anya,
‘Kasekesek ki ta ndramak doh iy eme ta nyara Laban.’ ” Wari 118:26