2
Kindrei andrei taha ame hamon badeh, lakou laba tinan labai
1 Taha badeh, kanuhun kamwenen labai kili ta sahou handru, taha nane ndranuhun, ma taha samani sahou batanau doh labai.
2 Bwena mene Kindrei edeu sahou i ta tubu taha iri, eme boho iri angelo. Sahou batanau eme asahan handru ta lau ka-en hamon ta aliy. Are lau iy ba-en hamon ta aliy, o, banuhun bwe, iy kameh akohok maha-an ta kandriyen nane iy amekes.
3 Buku taha teleya lakou laba tinan ta akohok taha, taha katobwak barala buku sah handru? Laban ndrasehek nyala seben doh ma bwena ndrame tataha, eme iri lau nane anuhun sahou tan, ame asehek tataha ja, “Sahou doh ndra handru le.”
4 Kindrei ale eme leheya sahou tan badeh, boto-on na san ta amekes iri kalem ma iri lahou tinan. Ma iy ale andromwei ndramas ta Malawin Ndrabun ili tiri lau na le budon tan.
Jises asahan i buku le nadu tinen oro
5 Taha kasehek ma katehei budon tataha kili ta munyak ha-un, Kindrei kameh amekes hamon. Iy batehei bala bahandra iri angelo tan bwe.
6 Arile taha ndratanan, iy kameh atehei taha mwan ma badih ta atondrok lakou marakon doh. In bolo buk ndrabun ndramak ari ndratiye:
“Ahi saba lakou tam handru, ou atehei budon tam tinan labai eme tahi?
Ya, nadu ahi saba lakou, eme ou atondrok iri ja?
7 Kindrei, ou bwidi ahi, ma ou atehei nyara ahi udu bahandra nyara iri angelo tam ta luluwen bwe.
Arile na dah, ou ndramasiye ahi, ma tutuni ahi ala are bahandra lomada nyaram.
8 Ou atehei ahi are bwele-e iri lakou marakon ou ndrabwidiy. Ano ja ou atehei iri lakou marakon eme bahandra tondrok tahi.” Wari 8:4-6
Udu bolo iri sahou doh, Kindrei tiye, taha mwan ma badih katondrok iri lakou marakon doh. Taha ndratanan, iy asehek nyala iri lakou marakon nane doh ndrame bahandra tondrok tataha, eme ma ari lakou winiyan bare laleyah bwe. Arile, na len dah, taha banyolom ari tataha amwenen batondrok iri lakou marakon doh bwe.
9 Arile taha ndranyolom Jises, iy akohok boto-on tan. Bwena mene iy udu bahandra tondrok tiri angelo luluwen bwe, iy imek ta akohok kon ta lau marakon, ma tikisiy ta Kindrei kameh winiyan sebenei iri lau marakon. Jises bwese maha-an tataha tinan labai ma iy imek. Arile na dah, Kindrei ndrasuruni iy, ma ndratehei lomadan nyaran ndra tinan labai udu bwele-e iri lakou marakon.
10 Kindrei badeh, iy kati iri lakou marakon, tasah iy bwidi iri lakou marakon. Ma iy aso-ok ta akohok nadun iri kala hawen kakohok lomadan mwasin. Eme iy atehei budon in ta nadun ta kamekes iri gok ta akohok iri lau mwan ma badih kame hamon ja, iy eme atehei Jises eme akohok sisi-in tinan labai. Ta sisi-in doh le, ma iy atehei Jises udu bwena ta aseben iri lau mwan ma badih. Kindrei amekes iri kandriyen marakon doh amwenen le ai.
11 Taha tanan, Jises amekes iri lau mwan ma badih asahan lau ta Kindrei, ma iri lau nane iy ndrabwidi, iri a ndrabun. Iri marakon doh badeh, tama oro ari le, ma Jises eme aloh oro, nadu tinen, ma bwilin bama ta aloh oro bwe.
12 Taha ndratanan, iri sahou doh handru, tasah buk ndrabun mene ndrasehek:
“Jo kameh tiye ta nadu tine oro ta lakou ou ndrabwidiy, jo kameh iyah wari ta atudun nyaram udu bolo tukum toro.” Wari 22:22
13 Eme iy tiye ja:
“Jo kameh atehei budon tek in ta kindrei.” Aisaya 8:17
Iy asehek i buku doh ale:
“Idah jo hawe oro nah nane Kindrei atehei oro ndrame tek.” Aisaya 8:18
14 Oro nah nane Jises asehek doh, oro lau mwan ma badih. Eme Jises asahan ndramak awas ma konen i buku le oro, iy kameh winiyan imek, ma iri kandriyen doh kameh winiyan sulumwi boto-on ta balik nane, amekes iri lau amak.
15 Iri mwan ma badih, iri nane anoh ta amak. Na len marakon iri ado kon munyak, nohonoh tiri doh ta amekes iri, buku iri ado bolo kowah lulik ta balik. Arile Jises imek ta talou iri ado bolo kowah lulik ame len.
16 Handru labai, Jises mene bamekes gok doh ta aseben iri angelo bwe, iy amekes gok doh ta aseben lundriye Abraham iri.
17 Kindrei ndrabwidi iy ndrasahan i buku le nadu tinen oro amwenen, ta iy kameh asahan tinan tiri pris toro. Iy asahan tinan tiri pris ta tikisi oro, ma iy in hamon tiri sahou marakon ta Kindrei ma iy amekes gok tan. Gok doh, ta akunoh ma ta mani kandriyen ndra-in ta lau marakon ano.
18 Iri lakou marakon doh ndrasahan tan, iy le ari eme badeh, akohok sisi-in ta aliy. Eme badeh, ma iy winiyan sebenei iri lau marakon, i buku lakou ndra-in anya kawendreya iri.
Nyara Jises badeh, tinan labai, ma udu bwele-en mara-ei ja ta nyara Moses
(Kalan 3:1–4:13)