24
Tinan tiri Juwis atehei Pol i ta sahou
1 Udu len ma limeh ano iu, eme tinan tiri pris ari badu Juwis, nyaran Ananayas, iy eme ili asahan kon tinan Sesariya. Iy ma hawe iri tinan rayah, ma ndramak ari iy tanan labai ta kandriyen ta batanau ta sahou, nyaran Tertulus. Eme iri ala asahan bada kabin ta kon doh, ma iri asehek sahou marakon ta amekes Pol kili ta sahou.
2 Kabin tinan eme aloh Tertulus ta ili bwena ta asehek sahou. Iy ili ales ere bwena, ma iy asehek iri sahou ta amekes Pol kili ta sahou, i buku doh, “Peliks, ou tinan tahi, ma mwena, jo anya kedeu wurah kewek tam, tasah tanan tam mwasin labai. Eme ma, ahi badu loboho kon doh akohok manyah mwasin, ma ari bahun bwe, tasah ou amekes iri batanau mwasin ta amekes lakou rayah amwenen, ma amekes kon tahi edek amwenen.
3 Na bolo len mara-ei badeh, sekesek tahi tinan labai ere tam, ta idoh ma ahi anya kadeu wurah kewek tam.
4 Jo bwalek aliu sahou lawe-en labai, tasah ou tam gok solo-an ta amekes. Arile, na dah jo anya kandremenya ou ta tikisi aso, ma ou anuhun sahou taso ja, na dah aso anya kasehek kewek tam.
5 “Ya, iy Pol badeh, iy ndramak ari ndra-in labai, ta amekes ramwes solo-an. Ahi tanan, buku iy ta amekes losen ere bolo iri Juwis ere bolo kon mara-ei, ma iy ndramak tinan ari ale, tiri lau nane a-en hamon ta Jises badu kon tinan Nasaret.
6-8 Ou anuhun, iy ale none ta akohok iri kandriyen ndra-in solo-an eme bolo asiu tinan ta Kindrei. Arile, na bolo len doh badeh, ahi tawi iy. Buku ou ndremenya iy ndramak kede-eh, ou amwenen kameh winiyan silahei iri lakou marakon nane ahi anya kadeu iy kili ta mada sahou ta aliy.”
9 Eme ma iri Juwis nane are bolo tukum doh aloh i le rasan anya, “Iri sahou marakon doh ndra handru le ai.”
Pol tiye sahou ili ta Peliks
10 Eme ma kabin ta kon dah anyoleh, ta iy anya kanuhun boho Pol. Pol eme suri iy, ma iy asehek sahou i buku doh, “Jo tanan ou asahan kabin are loboho tiri Juwis dah, na jaha solo-an labai, eme ma jo sekesek tinan labai ta ou aseben ta anuhun sahou tek nadah.
11 Len ma ronoh la-uh mene le kada-ah badeh, jo ili bolo asiu tinan ta Kindrei udu Jerusalem ta amekes salom. Buku ou lelen iri, idah kameh ou winiyan atanan, buku sahou mari doh, handru.
12 Iri Juwis badeh, anyolom jo, batebelese hawe ari ndramak bwe. Ma jo batukumwi rayah lau ame ta amekes bahun bwe. Iri lau nane ta adeu jo i ta mada sahou dah badeh, banyolom jo andra-i, ma tebelese hawe iri bado bolo asiu tinan ta Kindrei, o ndrahu tukum udu loboho bolo Jerusalem, bo-oh.
13 Ma sahou marakon nane iri asehek ta adeu jo ili ta mada sahou doh badeh, wasai. Ma iri lau kede-eh winiyan baleheya ari lakou nane jo amekes andra-i bwai.
14 Arile, jo anya kasehek lakou ari, iri nane atehei jo i ta mada sahou ta aliy, badeh, kaleu kewek taha: Jo badeh, atudun Kindrei ta tubu ahi ari le, ma jo atehei budon tek mara-ei in hamon ta San ta Jises, iri Juwis kede-eh aloh san randrah ja. Ma jo atehei budon tek mara-ei i tiri lakou ndratorowenei ere bolo kandriyen malen ta Moses, ma ere bolo buk tiri propet.
15 Jo in hamon ta Kindrei, iri lau nane atehei jo ili ta mada sahou badeh, a-en hamon tan ale, ma ahi atondrok, len hamon Kindrei kameh mete-ei iri lau mwasin, ma hawe iri lau ndra-in mene ndramak, kameh amak ame awas ja.
16 Eme ma, na len mari, jo aseken budon tek badeh, kaleu, ma jo ki-in hamon ta kandriyen mwasin ta ere mada Kindrei, ma hawe iri lau badu munyak.
17 “Winiya jaha sabe kolek, jo ruwani kon tinan Jerusalem, jo iu ili bolo iri kon leheleh, ano jo eme hamon ja atiye luk i toro lau tek amwenen, toro lakou bwe, ma hawe iri lakou rayah ta asun i nyara salom ili ta Kindrei.
18 Ya, iri atou jo ere bolo asiu tinan ta Kindrei, ma iri atou jo sikine badak ndrano, in hamon ta kandriyen tiri Juwis ta asahan ha-un ja ta mada Kindrei, ma ari ndramak, o, rayah lau batukum bame hawek, ma aso andra-i bwe. Ma ari ndramak barah laleyah bwe.
19 Arile, iri Juwis rayah badu loboho Esiya are ndra Jerusalem kodo-on. Buku oro lau doh toro sahou ta asehek eme badak, mwasin, oro amwenen kame kare madam dah, ma katehei jo kili ta sahou.
20 Ya, ou ndremenya iri lau are kede-eh se, oro kasehek ta saba kandriyen ndra-in udu tek handru, kala jo ales ere mada tinan ta kansol tiri mene.
21 Sebwe iri badeh, abolosen ta nadu lakou ari le, mene jo amekes. Jo ales ere bolo iri kansol tinan tiri marakon doh, ma jo asehek, ‘Jo atehei budon tek mara-ei in ta Kindrei, iy kameh mete-ei iri lau marakon are bolo lek tiri amak ame awas ja.’ Eme ta katin doh le, iri atehei jo ili ta mada sahou.” Ma Pol ano ta asehek sahou tan marakon.
22 Eme ma Peliks tanan mwasin labai ta iri kandriyen tiri lau ta Kindrei aloh San ta Jises. Ma iy tiye tiri i buku doh, “Ya, buku iy ndramak tinan ta atondrok iri lau ta bahun nyaran Lisiyas udu Jerusalem keme kasahan dah, badeh kameh, jo baranuhun sahou taha ja ai.” Iy asehek sahou i buku doh ma sahou tiri kabwai.
23 Eme ma kabin tinan doh tiye ta tinan ta atondrok iri lau ta bahun nane androkei ta Pol i buku doh, “Ou hawe oro lau tam katehei ndrokei
ta Pol kamwenen, arile ado sabawei iy mara-ei. Ado karuwani iy kedek, ma oro lau badu hawen kame kanyolom iy ma katiye nan nyamon.”
Peliks atehei Pol ili bolo asiu lulik winiya jaha la-uh
24 Len sabe ano iu, eme Peliks hawe udun Ndrusila, ame ta atou Pol. Ndrusila doh, iy badih butuhu Juwis. Peliks eme aloh Pol kili katou iy. Pol eme ili tiye turu ta iri kandriyen ta atehei budon handru in ta Jises Krais.
25 Arile, Pol asehek iri sahou nane ili le, ma iy asehek ta lau ka-en hamon tiri kandriyen mwasin, ma iri katondrok manyah tiri kamwenen, ma iri samekes kandriyen ndra-in. Ma iy asehek ta nyala len hamon, Kindrei kameh seleya manyah ta lau marakon. Peliks anuhun iri sahou doh, ma bwidi iy inoh mara-ei labai. Ma iy tiye Pol i buku doh, “Ou au ai. Buku len rasan ja, jo baraloh ou barame, ma ou barame baratou jo ja.”
26 Peliks anya, Pol badeh, kedeu tan rayah luk, ma iy karuwani iy ere bolo asiu lulik keme len laleyah. Budon tan boto-on udu ta lakou doh, ma iy aloh Pol ili hawen san solo-an labai.
27 Arile, Peliks anya kasahan kawas hawe iri Juwis, ma iy baruwani Pol udu bolo asiu lulik bame len bwe. Eme ma jaha ma la-uh ano iu, ma ndramak ari ja nyaran Porsiyus Pestus akohok kon ta Peliks, ma iy akohok gok tan.