3
Pawd loq awg ghud med awr cex kae che
1 A vix a nax teq paog, awg leh med ve te khuhd awr lehr che kheh yaog. Jawd mawd Yer suq awg khuhn ha lehg chehd-oq. Nig hehd haq awg lawn che ve teq pa te pawz peg te pawz ngag buhq ax che awr lehr, ngag awg pun nar che ted ceng ma hez. Kheh te lehq, nig hehd yeg vid tug awg pun awg bon cawg che yaog.
2 Phid heh te che chaw teq pa haq lehd ma koz, haeg che kanx te che chaw teq pa haq lehd ma koz, awg gig med soer kha ghehg kha che chaw teq pa haq lehd ma koz, nig hehd sa tiq teo.
3 Awg cehg mag ve awg gig med soer che chaw teq pa awr lehr a nig yaog. Awg lawn ghod ver, a nig awr lehr Awg ha phu awg khuhn Ghig sa haq a kor pi lehq, Yer suq Khreq awg khuhn ni ma ir kig cawg lehq, awg suhr awg sar phawd awr haq ma ghad va che chaw teq pa phehq che yaog.
4 Awg cehg mag koz ver, ngag awr lehr awg suhr awg sar phawd awr haq ghad va gad ver, gha che yaog. Awg kag awr ve chaw te ghad awr lehr, awg suhr awg sar phawd awr haq ghad va tug cawg ver, ngag yawd haq keh lex lehq cawg che yaog.
5 Ngag pawag peg khaz nuhr hex ni gaeg che te yand, awg gig med soer che haq khanr yug che yaog. Ngag awr lehr, Id sar rer laq chaw ceng awg khuhn Ber yar minr ve awg ceng awg khad phehq lehq, Her brehd chaw teq pa awg khuhn pawag che Her brehd chaw phehq cehg mag che yaog. Awg lid tawd khuhd haq caz daq che awg khuhn ngag Phar rir sehd phehq che yaog.
6 Ngag hax ceh nux te jaw che awg lawn haq koz ver, Khreq yad awg mor haq ngag du deh che phad phehq che yaog. Awg lid tawd khuhd haq caz daq che thed che cawd che ted ceng haq koz ver, ngag awr lehr vend bax mad cawg che chaw phehq che yaog.
7 Kheh ma khuhd, pong lag thad ngag kha cawg lar che awg mehaq teq pa, Khreq haq ngag haq cheaq te lehq, sond che awg ceng phehq che yaog, lehz ngag sawnr lar che yaog.
8 Awg cehg mag koz ver, ngag ved Jawd mawd Yer suq Khreq haq ngag sir che awr lehr, ir jad daq jad che haq te lehq, awg kag awr ve awg gha lia awg bon mad cawd vehr che yaog, lehz ngag sawnr lar che yaog. Ngag yawd haq haq cheaq te lehq, awg ceng awg gha lia haq ngag sond vehr che yaog. Awg ceng gha lia haq ngag sond vehr che awr lehr, chid bag vehr che chaq chiz che awg ceng phehq che yaog, lehz ngag sawnr lar che yaog. Ngag awr lehr, Khreq haq he lehq
9 yawd awg khuhn chehd che haq lehax he gad che yaog. Ngag awr lehr, awg lid tawd khuhd haq caz daq che thed che cawd che ted ceng mad cawg. Khreq haq yonr che haq caz daq che thed che cawd che ted ceng ngag cawg lar che yaog. Thed che cawd che u ve awr lehr, Ghig sa lo lag lehq, yonr che haq lehax te lehq gha che yaog.
10-11 Ngag liz suh kig lo kawq teq tuag che ted ceng haq gha tug yawd haq he lehq yawd kawq teq tuag che kand pax haq liz sir che lehd ma koz, yawd ved tuq che khanr che teq pa haq yawd geh teq geha khanr che lehd ma koz, yawd suh che ted ceng awg khuhn yawd haq sur daq vid che lehd ma koz, che ve teq pa haq lehax ngag he gad che yaog.
12 Ngag che kheh koz che awr lehr, a meha liz ngag gha vehor, ma hez ver a meha liz ngag peh lawq vehor lehd koz gad che ma hez. Kheh ma khuhd, Yer suq Khreq ngag haq gha vehr che heh, ngag liz u ve haq gha tug, ngag te don chehd che yaog.
13 A vix a nax teq paog, u ve haq ngag yug cid lar peor lehd ngag duhd che ma hez. Kheh ma khuhd, ngag ted ceng haq te chehd che yaog. Pong lag peg che awg ceng teq pa haq ngag lend lar haz lehq, awg ghud med awr cawg chehd che awg ceng teq pa haq hax ceh nux ghaq yug chehd che yaog.
14 Ngag muhd nuh maq lo taez tug, Ghig sa awr lehr Yer suq Khreq haq cud lehq ngag haq kug yug che laq sawnr haq gha thad kha gag ngag gha ghaq yug don chehd che yaog.
15 Kheh te cheaq te lehq, yonr che awg khuhn ir vehr che a nig teq pa awr lehr, ni ma u kheh te cawg vid-oq. Nig hehd ni ma u kheh maq te che chaw teq pa haq awg lawn u ve Ghig sa pheq mar ax tug yaog.
16 Kheh ma khuhd, a nig kha ghaq mi lar che teq pa haq kheh tawa haq yug cid lar lehq a saq teq lehq thed ghad te kae veg.
17 A vix a nax teq paog, ngag hehd te che heh nig hehd liz teo. Ngag hehd haq hend yug lehq te kae chehd che chaw teq pa haq kuhr chid ngawx-oq.
18 Awg lawn ghod ver, pong lag thad ngag nig hehd haq laex pawz koz ax peg lehq, a meha liz mehz ghig yaq che awg khuhn kawq koz ax che heh, Khreq ve laq kan haq cand par te chehd che chaw kha peh cawg che yaog.
19 Chaw u ve teq pa awr lehr, awg leh med gaeg ver, lug vehr sez vehr tug yaog. I hehd ve ux peg awr lehr, i hehd ve ghig sa phehq che yaog. I hehd yaq taw cawd che awg ceng awg khuhn ni ma ir che yaog. Mig gig phawd awr ve awg ceng teq pa haq lehax i hehd duhd ngawx che yaog.
20 A nig awr lehr, muhd nuh maq haq caz daq che chaw phehq lehq, Thaer khuhq par Jawd mawd Yer suq Khreq u huh tuhaz tug haq a nig law chehd che yaog.
21 Yawd awr lehr, awg ceng gha lia haq yawd awg huhx lo chehd cuh tug kand pax haq yehd lehq, awg mig awg phond ir jad che yawd ved awg ton haq sur daq vid tug, awg ghad mad cawg che a nig ved awg ton haq yawd awg suhx kawq pa ax tug yaog.