4
Ghig sa ve awg bon haq haq sax lehq yehd che awg lawn
1 Kheh te cheaq te lehq, Khreq yawd ved awg ton gha tuq gha khanr che te yand, yawd ni ma tar che heh, nig hehd liz ni ma che kheh te tar che haq cud lehq ghu lar hehnd lar-oq. Awg lawn ghod ver, a sug yawd ved awg ton gha tuq gha khanr che chaw awr lehr, vend bax te che ted ceng haq chid bag lar haz vehor.
2 U kheh te che chaw teq pa awr lehr, awg ton teq chehd ser che awg yand awg khuhn awg suhr awg sar a lor awg khad haq mad kawq te. Ghig sa ve a lor awg khad haq lehax te che yaog.
3 Khreq yad ma hez che chaw teq pa te che heh, pong lag thad nig hehd liz te che yaog. Awg yand u ve khuhn nig hehd liz chaq chiz che khuhn te pong te lex che, haeg che awg suhr awg sar a lor haq te che, a pehx med ghig dawg buhz che, a pehx med ghig dawg lehq ha lehg tug awg pun hax chawd te pong te lex che haq te che, cad lex dawg lex pawehd te che he lehq sax ho haq a kor maq pi cawd liz, a kor pi che yaog. Che teq pa haq nig hehd tad kawq te lor.
4 A meha nig hehd awr lehr, i hehd geh teq geha chaq chiz che haq te pong te lex jad che awg khad u ve haq mad kawq ghaq che haq te lehq, i hehd and lehq nig hehd haq kha muhd kha na koz che yaog.
5 Kheh ma khuhd, suhx jehg sehr phad mehz khuhd suhr i hehd awr lehr a sug yawd awg ton awg lawn gha koz mar vid tug yaog. Suhx jehg sehr phad u ve awr lehr, teq chehd che chaw teq pa he lehq suh vehr che chaw teq pa haq suhx jehg tug, yawd ghu lar hehnd lar peor.
6 Kheh te cheaq te lehq, suh vehr che chaw teq pa haq liz yawd ha lehg che bon khuhd ca mar vid che yaog. Awg lawn ghod ver, awg suhr awg sar awg ton cawg che chaw teq pa heh te lehq, i hehd suhx jehg che haq gha khanr liz, Ghig sa teq chehd che heh te lehq co ha phawd awr i hehd teq gha tug yaog.
7 Awg ceng awg gha lia ve awg leh med gag vehr tez che yaog. Kheh te cheaq te lehq, bon kha nehax lawg gha tug, ni ma tar vix lehq, sa tiq tar vix che chaw phehq vid-oq.
8 Nig hehd te ghad he lehq te ghad kha sehax haq daoq. Tawd che awr lehr, ir jad ve tawd te khuhd phehq che yaog. Awg lawn ghod ver, haq pehnd che ted ceng awr lehr, mad jad che vend bax teq pa haq beh lar che yaog.
9 Khehx chaw teq pa haq kha nehax haq yur-oq. U kheh te che awg khuhn, te bawg lehq hax ceh ca kaod koz che tad cawg vid.
10 Nig hehd te ghad lehq te ghad laq sawnr gha lar che heh, te ghad lehq te ghad awg pun yehd-og. Nig hehd che kheh te ver, Ghig sa ve awg bon laex ceng haq nig hehd kha nehax haq sax lehq yehd che chaw phehq che yaog.
11 Chaw te ghad ghad tawd yaw ver, Ghig sa yaw cuha che heh lehax yaw-og. Chaw te ghad ghad su haq ga vid ver, Ghig sa pehar che awg ghad awg sax haq cud lehq ga vid-oq. Che kheh te ver, Yer suq Khreq haq te lehq awg ceng gha lia awg khuhn, su Ghig sa haq chid ir chid muh tug yaog. Yer suq Khreq haq, awg mig awg phond he lehq kand pax co co taer taer cawg vid-oq. A meng.
Khreq yad phehq che haq te lehq gha tuq gha khanr che awg lawn
12 Haq che chaw teq paog, tuq che khanr che ted ceng awr lehr a mir heh te lehq nig hehd haq lawnd ngawx che te yand, ta and. Che awr lehr and tug phehq che ma hez.
13 Kheh ma khuhd, Khreq ve awg mig awg phond tuhaz che te yand, nig hehd gha ha lehg jad tug awg pun, yawd tuq che khanr che heh te lehq nig hehd liz gha tuq gha khanr che haq te lehq ha lehg chehd-oq.
14 Khreq ve awg meh haq te lehq, su nig hehd haq maq sawnr ma caz koz ax che ver, nig hehd awg bon ir che yaog. Awg lawn ghod ver, Ghig sa ve awg mig awg phond ir che Awg ha phu awr lehr, nig hehd awg khod-aq chehd chehd che yaog.
15 Kheh ma khuhd, chaw haq dawz vehr che, su med nged khuhd che, awg haeg te che he lehq su haq soq saq tug te che awr lehr, nig hehd awg khuhn te ghad-e liz awg ceng che teq pa haq te lehq gha khanr che ted ceng tad cawg vid.
16 Nig hehd te ghad ghad Khreq yad phehq che haq te lehq gha tuq gha khanr ver, tad yaq taw. Awg meh che haq te lehq gha khanr che te yand Ghig sa haq chid ir chid muh-o.
17 Awg lawn ghod ver, Ghig sa suhx tanr jehg tug awg yand gag vehr che yaog. Yawd ved yehg yad ka yad teq pa haq awg kawd suhx jehg tug yaog. Yawd a nig haq awg kawd suhx jehg ver, Ghig sa ve ha lehg che bon khuhd haq maq na yug che chaw teq pa awg pun, awg leh med khawd-ehg kheh taw maq phehaq tuawg le.
18 Thed che cawd che chaw haq thaer khuhq gha tug har ver, Ghig sa haq ma yawz yan che chaw he lehq vend bax yad awr lehr, khawd-ehg kheh te pong gha tuawg le.
19 Kheh te cheaq te lehq, Ghig sa ve a lor haq te che haq te lehq gha tuq gha khanr che chaw teq pa awr lehr, awg ghud suhr phawd awr liz daq che haq te kae cawd che yaog. Kheh te lehq, kar tiq yeg che Te phanr sehr phad haq a sug yawd ved co ha aq vid-oq.