4
Mig gig ve awg lid haq awg chawd te che
1 Nig hehd awg khuhn yaq daq jiz daq lehq cand daq chehd che khar lo lag che haq nig hehd sir chehd-aq la. A sug yawd ved awg suhr awg sar a lor haq te gad che ni ma nig hehd ve awg ton awg khuhn hax ceh nux ghawg daq bawz daq chehd che haq te lehq ma hez hawg la.
2 Nig hehd he gad che heh mad cawg cheaq te lehq, su haq dawz vehr che yaog. Nig hehd su ved med nged jeg kor haq sex lae lar liz mad cawg gha cheaq te lehq, su haq yaq daq jiz daq che yaog. Nig hehd mad cawg che vawr, nig hehd mad lawg cheaq te che yaog.
3 Nig hehd lawg liz maq gha. Awg lawn ghod ver nig hehd teq pa a sug yawd ved awg suhr awg sar a lor cawd che haq lehax te gad cheaq te lehq, nig hehd lawg yaq vehr che yaog.
4 Hax chawd te che chaw teq paog, nig hehd maq sir cheawg la. Mig gig ve awg lid awg khad haq awg chawd te che chaw teq pa awr lehr, Ghig sa ve cand par phehq che yaog. Kheh te cheaq te lehq mig gig ve awg lid awg khad haq awg chawd te che haq lez yug che chaw awr lehr yawd awg ton Ghig sa ve cand par phehaq vehr che yaog.
5 Liq phu khuhn buhq lar che, a nig awg khuhn yawd kea lar che co ha haq yawd sex lae jad che yaog, lehd koz lar che tawd khuhd u ve kheh-a ca buhq gid lar cheawg lehd duhd lehq la.
6 Yawd awr lehr, awg bon lex lehq pehar mad jad che yaog. Kheh te cheaq te lehq Liq phu khuhn buhq lar che, “Ghig sa awr lehr, ni ma ir che muh che chaw teq pa haq tawr chuhd lar lehq, ni ma nud nehg che chaw teq pa haq har kax vid che awg bon kawq pid mad che yaog,” lehd koz buhq lar che yaog.
7 Kheh te cheaq te lehq nig hehd ve awg ton Ghig sa uq penr che awg huhx lo kha nehax chehd lehq ned haeg haq tawr daoq. U kheh te ver, yawd nig hehd awg khuhn phaw tuhz veh tug yaog.
8 Ghig sa pad huh kha duhq lar-og. U kheh te ver, Ghig sa liz nig hehd pad huh kha duhq lag tug yaog. Vend bax yad teq paog, nig hehd ve laq kuhr haq chuhd kha-og, ni ma duhd khad nid mag te che teq paog, ni ma haq daq kehg tug teog.
9 Ni ma khuhn tuq khanr duhd har lehq paz huhg kehd huhg chehd-oq. Nig hehd ve ghig che awg khuhd u ve awr lehr, khand che awg khuhd haq pa yur-og. Nig hehd ve ha lehg duhd sa che awr lehr, duhd har lehq ni ma lug che ted ceng phehq vid-oq.
10 Jawd mawd Ghig sa mehz khuhd suhr huh, ni ma nehr ghad tar-og, Yawd nig hehd haq chid taz ax tug yaog.
A vix a nax haq vend bax tar che
11 A vix a nax teq paog, te ghad he lehq te ghad haq taq khaex daq. Awg lawn ghod ver, a sug yawd ved a vix a nax haq suhx jehg suhx taz lehq khaex che chaw awr lehr, yawd awg lid tawd khuhd haq khaex lehq suhx jehg suhx taz che yaog. Awg lid tawd khuhd haq nawg suhx jehg suhx taz ver, nawg awr lehr awg lid tawd khuhd haq na yug che chaw ma hez, awg lid tawd khuhd haq suhx jehg suhx taz var phehq vehr che yaog.
12 Awg lid tawd khuhd teh lar che phad he lehq suhx jehg suhx taz var awr lehr te ghad lehax cawg che yaog. Yawd awr lehr, pong vid tug liz, te lug tug liz, kand pax cawg che yaog. Kheh te ver, nawg a suawg le, nawg pad huh chehd che chaw haq suhx jehg suhx taz che.
Awg ghud suhr phawd awr ve haq ni ma ir tug mad cawg
13 Nig hehd teq pa ted pehg pehar koz che, “Yaq ni sawx vawr ngag hehd med ted mag lo ted khuhq ca chehd-eg tug yaog. U huh tad kag te lehq awg mehaq gha tug yaog,” lehd koz che yaog. Che kheh koz chehd che chaw teq paog, kha nehax na lar ser.
14 Sawx vawr ver, khawd-ehg kheh phehq vehr tug haq nig hehd maq sir. Nawg ved a saq a thoq haq sur daq cheawg le lehd koz ver, teq per nehax lehax gha mawg lar haz lehq mehx vehr che a kaz sax haq sur daq che yaog.
15 Nig hehd koz cawd che awr lehr, “Jawd mawd Ghig sa ni ma cawd ver, ngag hehd a saq gha teq lehq che ve u ve te tug yaog,” lehd koz cawd che yaog.
16 Kheh ma khuhd, a meha nig hehd teq pa ni ma ir lehq a sug yawd khad haq kaod koz chid muh che yaog. A sug yawd khad haq che kheh te kaod koz chid muh che awg gha lia awr lehr, haeg jad che yaog.
17 Kheh te lehq daq che haq te tug sir chehd liz maq te che chaw awr lehr, yawd liz vend bax te var phehq vehr che yaog.