5
1 Awg lawn ghod ver, chaw yad teq pa awg khuhn lez yug lar che paw khod nux awg gha lia awr lehr, Ghig sa haq caz daq che kanx teq pa te tug, chaw yad teq pa awg tan lez teh lar che yaog. I hehd awr lehr, vend bax teq pa awg pun laq sawnr he lehq tand tug teq pa tand vid che yaog.
2 I hehd awg ton liz ghad nud vix che chaw phehq cheaq te lehq, maq sir che chaw he lehq yaq vehr che chaw teq pa haq i hehd har kax vix che yaog.
3 I hehd ghad nud vix cheaq te lehq, chaw yad teq pa ve vend bax awg pun gha tand vid che heh, a sug yawd ved vend bax awg pun haq liz i hehd gha tand vid ser che yaog.
4 Kheh te lehq, chaw te ghad-eg liz a sug yawd khad yawad a yad che haq lez gha che ma hez. Ar ronr haq Ghig sa kug yug che heh, i hehd haq liz Ghig sa gha kug yug che yaog.
5 Che ve haq kha sur suar, Khreq awr lehr yawd awg ton haq tar ir lehq paw khod nux phehaq tug a yad gha tug, yawd khad yawad ca te yug che ma hez.
“Nawg awr lehr, ngag ved Yad phu phehq che yaog.
Yaq ni ngag nawg ved Awr pa phehq vehr che yaog,”
lehz yawd haq koz vid che phad awr lehr, yawd haq a yad pid che yaog.
6 Che haq kha sur suar, awg kag awr ve ted kag huh yawd koz lar che,
“Mar lar khiq sar dehq paw khod te che awg khad heh te lehq,
nawg awr lehr co co taer taer paw khod phehq che yaog.”
7 Yer suq awr lehr, mig gig khod-aq lo chehd che te yand, suh kig lo yawd haq thaer khuhq vix che phad haq hax ceh nux kug lehq mehz ghig yaq che awg khuhn bon lawg lehq lawg khawx che yaog. Yawd Ghig sa haq yawz yan vix, na yug vix cheaq te lehq, Ghig sa yawd ved tawd khuhd haq na yug che yaog.
8 Yawd awr lehr, Yad phu phehq che liz tuq che khanr che haq khanr che awg khuhn, yawd na yug vix che ted ceng haq sir vehr che yaog.
9 Yawd awg ceng gha lia saw peh lawq vehr khaz nuhr, yawd ved tawd khuhd haq kha na yug che chaw teq pa awg pun yawd awr lehr, co co taer taer Thaer khuhq sehr phad phehq vehr che yaog.
10 Mar lar khiq sar dehq paw khod nux te che awg khad heh te lehq, Ghig sa yawd haq paw khod nux teh lar che yaog.
Maq gha lug veh tug sa tiq pid che
11 Awg lawn che ve ngag koz tug kha peh cawg che yaog. Kheh ma khuhd, nig hehd har naq na maq gha vix cheaq te lehq, cuhx kig koz mar ax tug har che yaog.
12 Awg yand kheh muh muh gag vehr che haq duhd ngawx ver, nig hehd awr lehr su haq mar vid sehr phad te cawd che liz, Ghig sa ve tawd khuhd awg lawn nux maq teq pa, su nig hehd haq mar ax tug lor ser che yaog. Heh che cad tug haq nig hehd cad maq gha cheaq te lehq, cux pehz ghig haq nig hehd dawg ser che yaog.
13 Awg lawn ghod ver, cux pehz ghig haq dawg che chaw awg gha lia awr lehr, chaw yad nehax phehq chehd ser cheaq te lehq, thed che cawd che tawd khuhd haq maq sir vix.
14 Kheh ma khuhd, heh che cad tug awr lehr, chaw mawd teq pa awg pun yaog. I hehd awr lehr, daq che he lehq mad daq che haq fir daq pehg daq tug laex pawz te sawnx cheaq te lehq i hehd daq che kanx te gha che yaog.