2
Ir jad che thaer khuhq che
1 Kheh te cheaq te lehq, a nig gha kad lar peg che tawd khuhd teq pa awg khuhn maq gha vid veh tug, tawd khuhd u ve teq pa haq lex lehq kha nehax na yur-oq.
2 Muhd nuh maq cuh yad teq pa haq cud lehq Ghig sa koz vid che tawd khuhd teq pa cawd che haq te lehq, tawd khuhd u ve teq pa haq te yaq lehq maq na yug che awg ceng gha lia haq kenr daq che heh yawd cir yanr vid che yaog.
3 Kheh te lehq, ir jad che thaer khuhq che che ve haq a nig mad haq yug ver, a nig khawd-ehg kheh te pong gha tuawg le. Thaer khuhq che awg lawn che ve awg kawd maq thad liz Jawd mawd Yer suq koz lar lehq, gha kad che chaw teq pa awr lehr, “Awg lawn che ve awg cehg mag cawd che yaog,” lehz a nig haq kawq koz ax che yaog.
4 Ghig sa liz, awg hez he lehq and tug teq pa awg khuhn lehd ma koz, kand pax ir che kanx teq pa awg khuhn lehd ma koz, yawd ved a lor cawd che heh Daq che kehg che Awg ha phu ve laq sawnr teq pa pehg vid che awg khuhn lehd ma koz, i hehd geh teq geha sax khiz khanr che yaog.
Thaer khuhq vid lehq sir kae vid sehr phad
5 Awg lawn ghod ver, a meha a nig koz chehd che, awg khaz nuhr cawag tug mig gig che haq muhd nuh maq cuh yad teq pa awg huhx lo Ghig sa teh lar che ma hez.
6 Liq phu ted kag awg khuhn chaw te ghad kheh te sax khiz khanr lehq koz che,
“Nawg chaw yad haq duhd ngawx tug,
chaw yad awr lehr a thoq ted ceng phehq cheawg le.
Nawg chaw yad ve yad haq
ngawx haq sax tug, chaw yad ve yad awr lehr a thoq ted ceng phehq cheawg le.
7 Nawg yawd haq muhd nuh maq cuh yad
teq pa awg huhx lo a cehax lehax
nehg vid lehq, tar ir yawz yan che he lehq awg mig awg phond, si ux cuhr heh te
nawg yawd ved a kor haq khuhz vid lar peor.
8 Awg ceng gha lia yawd ved
khi ho awg huhx lo nawg teh lar che yaog,”
lehd koz lar che yaog. Yawd awg huhx lo awg ceng gha lia haq teh lar che lehd koz che te yand, yawd awg huhx lo maq teh lar che ted cear liz mad cawg. Kheh ma khuhd, yawd awg huhx lo awg ceng gha lia teh lar che haq a meha a nig maq gha mawg ser.
9 Kheh ma khuhd, a nig Yer suq haq gha mawg che yaog. Yawd haq muhd nuh maq cuh yad teq pa awg huhx lo a cehax lehax nehg vid lehq, suh che awg khuhn gha tuq gha khanr che haq te lehq, tar ir yawz yan che he lehq awg mig awg phond, si ux cuhr heh te yawd haq khuhz vid lar che yaog. Yer suq u kheh gha khanr che awr lehr, Ghig sa ve awg bon haq te lehq, chaw awg gha lia awg pun suh che haq yawd gha khanr che yaog.
10 Awg ceng gha lia Ghig sa haq te lehq phehq chehd lehq yawd awg pun te lar che yaog. Yawd ved yad teq pa haq awg mig awg phond cawg kig lo sir ve kae tug Yer suq gha tuq gha khanr cheaq te lehq, Ghig sa Yer suq haq peh lawq vid che yaog. Ghig sa u kheh te che awr lehr, cawd che yaog. Yer suq awr lehr, i hehd thaer khuhq gha tug awg pun yaq kaw ghu che yaog.
11 Awg lawn ghod ver, daq vid kehg vid sehr phad he lehq yawd daq vid kehg vid che chaw teq pa awr lehr, Awr pa te ghad khuhn lehax te tuhaz che yaog. Kheh te cheaq te lehq, i hehd haq a vix a nax lehd koz tug yawd mad yaq taw.
12 Yawd koz che,
“Nawg ved awg meh ngag ved a vix a nax teq pa haq
ngag koz mar vid tug yaog.
Phawng daq kig khuhn
ngag nawg haq ka mig chid muh tug yaog.”
13 Yawd te pawz kawq koz che,
“Yawd haq ngag ghad va tug yaog.”
Kheh te lehq te pawz kawq koz che, “Ngawx lor, ngag awr lehr Ghig sa
ngag haq pehar che awg yad awg dug teq pa geh chuhr huh chehd chehd che yaog,”
lehz yawd koz ax che yaog.
14 Kheh te lehq, awg yad awg dug u ve teq pa awg suhr awg sar puhd che haq te lehq, yawd liz u ve heh te lehq awg suhr awg sar puhd che yaog. A thoq haq te lehq le lehd koz ver, yawd suh che awg khuhn, suh che ted ceng awg khod-aq kand pax cawg che ned haeg haq te lug tug lehd ma koz,
15 suh che haq kuhz che haq te lehq, teq chehd che teq co awg khuhn awg ceg gha te chehd che chaw teq pa haq pong vid tug lehd ma koz, yawd awg suhr awg sar puhd che yaog.
16 Awg lawn ghod ver, muhd nuh maq cuh yad teq pa haq ga vid tug awg pun yawd lag che ma hez. Awg cehg mag koz ver, Ar brar hanr ve awg ceng awg khad haq ga vid tug awg pun lag che yaog.
17 Kheh te cheaq te lehq, yawd awr lehr Ghig sa awg pun kanx te che awg khuhn, har kax vix jad lehq kar tiq yeg che paw khod nux phehq lehq, chaw yad teq pa ve vend bax haq phehd kha tug awg pun yawd awg ton tand gha tug, awg ceng gha lia awg khuhn yawd ved a vix a nax teq pa heh te lehq yawd haq u ve heh gha te vid che yaog.
18 Awg lawn ghod ver, yawd awg ton tuq che khanr che he lehq ber che lawd che haq gha khanr jaw cheaq te lehq, ber che lawd che haq gha khanr che chaw teq pa haq yawd ga vid gha che yaog.