Gar lar tiq liq
Awg meh he lehq phehq peg che awg lawn
Gar lar tiq med awg khuhn Pawd loq ha lehg che bon khuhd mar lehq gha vehr peg khaz nuhr huh, Yud daq ve awg lid haq yug cid chehd ser che Yud daq chaw Khreq yad teq pa cawg che yaog. Kar tiq sax caz awg suhx awg huhx lo chehd che Khreq yad awg mor awr lehr, Liq phu awg pir khuhn ve a kor pi che awg lid ted pehg pehar haq gha ghaq te chehd ser che yaog lehz i hehd yonr che yaog. Kheh te cheaq te lehq, i hehd awr lehr awg lid u ve teq pa haq yug lehq Khreq yad awg mor thag huh teh vid che yaog. Koz gad che awr lehr, Bid saz a naz chaw teq pa Khreq khuhn yonr lehq gehag vehr liz, Liq phu awg pir khuhn cawg che awg gig med soer che awg lid cawg che heh gha ghaq te chehd ser che yaog. I hehd awr lehr, Pawd loq haq cuh yad cehg mag ma hez law lehz ghod che yaog. I hehd koz che, Pawd loq awr lehr bid saz a naz chaw teq pa ha lehg che bon khuhd haq ni ma puhd lehq yonr vid tug, awg lid awg khad u ve ted pehg pehar haq yawd yug kha vehr che yaog. Kheh te cheaq te lehq, Pawd loq yawd liq che ve te koz kawq buhq khuhq vid lar che yaog.
Buhq var he lehq buhq che awg yand
Cuh yad Pawd loq liq che te koz haq buhq lar che yaog. Buhq che awg yand laex ghad laex ceng koz chehd liz, sawr ngawx che ver A.D. 50 khuhq kheh thad huh buhq lar che liq te koz yaog.
A yed ir che awg lawn he lehq awg lawn kha peg
Gar lar tiq liq che awr lehr, Kar tiq sax caz awg suhx khuhn ve a yed ir jad che awg cehg mag cawd che ted ceng awg pun kha sehax te buhq khuhq vid lar che yaog. U ve awr lehr, Yer suq Khreq haq yonr che haq lehax te lehq thed che cawd che chaw phehaq che yaog. Che ve nuz awr, awg kar awg nuz awr ve haq te lehq Ghig sa ve thed che cawd che haq gha che ted cear liz mad cawg, teq chaweh thehnr vid maq gha, i veh vid liz maq gha. Kheh te lehq, a nig Ghig sa yawd te lar che kanx haq yonr che khuhn na yug vix che haq te lehq, vend bax awg khuhn yawd a nig haq chuhd phu chuhd kehg ax lar che yaog. Ghig sa yawd te lar che kanx u ve awr lehr, yawd a nig awg pun lehd ma koz, a nig awg khuhn lehd ma koz, a nig haq cud lehq lehd ma koz, Yer suq Khreq he lehq Daq che kehg che Awg ha phu ve awg bon awg sinx he lehq kand pax haq yehd lehq te ax lar che yaog. Chaw ted pehg pehar vawr, liq che te koz haq Khreq yad pong vehr che ted ceng ve pong che haq, caz daq che awg lid tawd khuhd nux phehq che yaog lehd koz che yaog.
Awg lawn nux
1. Awg kawd ve tawd: Sa tiq pid che tawd he lehq laq kuhr cax ax che tawd (1:1-9)
2. Pawd loq yawd yonr che ted ceng he lehq pong che ted ceng ve cuh yad cehg ma phehq che awg lawn (1:10-2:21)
3. Yonr ver, thed che cawd che haq gha che mar khad awg lawn (3:1-4:31)
4. Ghig sa haq yonr lehq vend bax khuhn pong vehr che chaw teq pa ve a saq teq khad (5:1-6:10)
5. Awg leh med ve tawd (6:11-18)
1
Awg chawd teq pa haq duhd nuhd che tawd
1-2 Ngag cuh yad phehq che Pawd loq he lehq ngag geh chehd che a vix a nax teq pa awr lehr, Gar lar tiq muhd mig awg khuhn cawg che Khreq yad awg mor teq pa haq liq buhq fea che yaog. Ngag cuh yad te che awr lehr, chaw yad geh lo gha che ma hez. Chaw yad haq te lehq phehq lag che liz ma hez. Yer suq Khreq he lehq yawd haq suh kig lo kawq teq tuag vid sehr phad Awr pa Ghig sa haq te lehq te lag che yaog.
3 A nig ved Awr pa Ghig sa he lehq Jawd mawd Yer suq Khreq ve awg bon awg sinx he lehq duhd sa gad sa che nig hehd geh cawg vid-oq.
4 Jawd mawd Yer suq Khreq awr lehr, a nig ved Awr pa Ghig sa ve a lor cawd che heh, haeg che che teq co awg khuhn a nig haq pong ax tug, a nig ved vend bax awg pun yawd awg ton chid aq vid che yaog.
5 Awr pa Ghig sa haq co co taer taer chid ir chid muh vid-oq. A meng.
Awg kag awr ve ha lehg che bon khuhd mad cawg
6 Khreq ve awg bon awg sinx haq cud lehq nig hehd haq kug yug lar che Ghig sa haq har naq chid bag lar haz lehq awg kag awr ve ha lehg che bon khuhd haq nig hehd haq yug che haq te lehq, ngag and jad che yaog.
7 Awg kag awr ve ha lehg che bon khuhd cawg cehg mag che ma hez. Kheh ma khuhd, nig hehd haq soq saq tug tea lehq Khreq ve ha lehg che bon khuhd haq yug phuhz gad che chaw ted pehg pehar cawg che yaog.
8 Kheh liz, ngag hehd nig hehd haq mar lar peg che ha lehg che bon khuhd haq ma caz daq che awg kag awr ve bon khuhd haq ngag hehd lehd ma koz, muhd nuh maq lo lag che muhd nuh maq cuh yad lehd ma koz, nig hehd haq mar ver, khen che haq gha khanr vid-oq.
9 Pong lag thad ngag hehd koz lar che heh, ngag te pawz kawq koz ax sar. Nig hehd haq yug peg che ha lehg che bon khuhd haq ma caz daq che awg kag awr ve bon khuhd haq chaw te ghad ghad nig hehd haq mar ver, muhd naz hoq khuhn khen che haq gha khanr vid-oq.
10 Ngag che kheh koz che awr lehr, chaw yad ni ma cawd tug ngag te che la. Ma hez ver, Ghig sa ni ma cawd tug ngag te che la. Chaw yad teq pa ni ma cawd tug ngag ca che la. Chaw yad teq pa ni ma cawd tug ngag ca chehd ser che ver, ngag awr lehr Khreq ve awg ceg te che ma hez hawg.
Pawd loq ha lehg che bon khuhd mar che awg lawn
11 A vix a nax teq paog, ngag mar vid lar che ha lehg che bon khuhd awr lehr, chaw yad geh tuhaz che ma hez lehz, ngag nig hehd haq kha nehax sir cuha gad che yaog.
12 Awg lawn ghod ver, chaw yad geh lo ngag gha che ma hez. Su ngag haq mar ax che liz ma hez. Yer suq Khreq ngag haq pheq mar ax che haq te lehq gha che yaog.
13 Yud daq chaw ve awg lid awg khuhn ngag chehd ser che te yand, ngag khawd-ehg kheh te che awg lawn haq nig hehd kad jaw che yaog. Awg yand u ve haq, Ghig sa ve Khreq yad awg mor haq ngag hax ceh nux du deh lehq lug vehr tug te che yaog.
14 Ngag ved a pux a pi teq pa teh lar haz ax che awg lid teq pa haq te tug ngag ni ma puhd jad che haq te lehq, ngag ved chaw ceng awg khuhn a saq ngag kheh tawa ve chaw mad-awr ve haq keh Yud daq ve awg lid haq ngag hax ceh te che yaog.
15 Kheh ma khuhd, ngag maq pawag ser liz ngag haq lez yug lehq, yawd ved awg bon haq te lehq ngag haq kug yug lar che Ghig sa awr lehr,
16 yawd ved Yad phu awg lawn ha lehg che bon khuhd bid saz a naz chaw teq pa haq mar vid tug, yawd a lor cawd che heh, yawd ved Yad phu ngag haq yawd pheq mar ax che yaog. Che kheh te pheq mar ax peg khaz nuhr, chaw yad geh ngag teq pear lehax ca jehg daq che ma hez.
17 Kheh te lehq, ngag cuh yad mad phehq lag ser huh cuh yad te chehd che Yer ruq sar lehnr med khuhn lo chehd che chaw teq pa geh ngag maq kae. Ar raq muhd mig lo teq pear lehax ngag kae lehq, awg khaz nuhr Dar mar sehq med lo kawq lag che yaog.
18 U ve khaz nuhr, seh khuhq gag che te yand, Ker phaq geh ngag ca gid-eg tug Yer ruq sar lehnr med lo kae lehq, yawd geh teq chi ngad ni kha gag chehd lar haz che yaog.
19 Jawd mawd Yer suq ve awg nax var Yar koq haq ma hez ver, awg kag awr ve cuh yad te ghad-eg haq liz ngag mad mawg.
20 (Ngag nig hehd haq liq che kheh te buhq ax che awr lehr, ngag her ka che ma hez lehz, Ghig sa mehz khuhd suhr ngag koz che yaog.)
21 U ve khaz nuhr, Sud riq he lehq Kid lid kiq muhd mig lo ngag kae che yaog.
22 Awg yand u ve haq, Khreq khuhn chehd che Yud daq muhd mig awg khuhn cawg che Khreq yad awg mor teq pa ngag haq mad mawg jaw ser.
23 Pong lag thad ngag hehd haq du deh jaw che te ghad awr lehr, yawd lug vehr tug te vid jaw che yonr che ted ceng haq a meha bon mar chehd che yaog lehd, koz che awg khuhd haq lehax i hehd gha kad che yaog.
24 Ngag haq te lehq i hehd Ghig sa haq chid ir chid muh che yaog.