2 Kawd ren thuq liq
Awg meh he lehq phehq peg che awg lawn
Liq che te koz awr, Kaw ren thuq liq awg kawd te koz tuhez peg khaz nuhr maq muh muha huh buhq tuhaz lar che liq te koz yaog. 1 Kaw ren thuq khuhn koz lar che, phaz daq gid daq che he lehq phehq har che awg ceng teq pa liz Kawd ren thuq med khuhn ve Khreq yad awg mor khuhn cawg chehd ser che yaog. Ma hez hez che sar lar teq pa Pawd loq yawd awg ton haq lehd ma koz, yawd ved cuh yad ve kand pax yehd che phawd awr haq lehd ma koz tang vid chehd che yaog. I hehd koz che, Pawd loq awr lehr cuh yad cehg mag phehq che ma hez lehq, Yer ruq sar lehr med khuhn har che ghuhd che Khreq yad teq pa haq ga saw tand vid lar che phu haq liz yawd khad yawad yehd vehr che yaog lehz koz che yaog.
Buhq var he lehq buhq che awg yand
Liq che te koz awr lehr, Pawd loq yawd buhq lar che yaog. Liq buhq khad teq pa khuhn liz u kheh te gha mawg che yaog. Buhq lar che awg lawn liz, yawd ved a saq teq khad te pa awg lawn awg kag awg nuz awr ve liq haq keh mawg mad che yaog. 1 Kawd ren thuq liq haq buhq che awg yand awr lehr, A.D. 55 khuhq suhz car car che awg yand huh buhq lehq 2 Kawd ren thuq haq muhd god yand suhz phaq pig-ag huh ted khuhq khuhn lehax buhq lar che yaog.
A yed ir che awg lawn he lehq awg lawn kha peg
Pawd loq awr lehr, kha buhq lar che liq ted mag gha lia khuhn haq keh liq che te koz khuhn yawd ni ma khuhn cawg che awg ceng haq buhq mad che yaog. Teq chaweh duhd law kig mad cawg lehq phehq bawg jad che haq tanr lehq ha lehg duhd sa che haq gaeg che haq buhq lar che yaog. Liq che khuhn sehz tawn te lehq kha sehax pehg lar che yaog: (1) Pawd loq yawd kae tug ghu lar che awg khad haq kawq per kawq pa che awg lawn koz mar ax che (ka nad nux 1-7); (2) Kawd ren thuq Khreq yad teq pa haq i hehd tand ker tand cawd che heh saw phoq lehq Pawd loq yawd lag gag ver, tand ax tug awg ghad pid che (ka nad nux 8-9); (3) Pawd loq yawd lag cehg mag tug he lehq yawd cuh yad awg cehg mag phehq che haq liz kha sehax koz ax che yaog. Kheh te lehq te ker te cawd ver, yawd ved cuh yad ve a khawag he lehq kand pax haq liz yehd lehq cir yanr vid tug yawd kand pax cawg che haq koz lar che yaog (ka nad nux 10-13).
Awg lawn nux
1. Awg kawd ve tawd: Ghig sa haq chid muh lehq laq kuhr cax ax che tawd (1:1-11)
2. Pawd loq yawd cuh yad ir te ghad ve awg veg khuhn kanx te che awg lawn sir ax che (1:12-7:16)
3. Phu tand saw phoz lehq Yer ruq sar lehr med khuhn chehd che Khreq yad teq pa haq ga vid che (8:1-9:15)
4. Pawd loq yawd khad yawad, yawd cuh yad phehq che kand pax haq sax khiz khanr che (10:1-13:10)
5. Awg leh med ve tawd (13:11-14)
1
Awg chawd teq pa haq duhd nuhd che tawd
1 Ghig sa ve a lor cawd cheaq te lehq Yer suq Khreq ve cuh yad phehq che ngag Pawd loq awr lehr, Kawd ren thuq med khuhn chehd che Ghig sa ve Khreq yad awg mor he lehq A kha ya muhd mig awg gha lia awg khuhn chehd che Khreq yad awg gha lia haq, a vix a nax Tiq mod ser ngag nid-ag teq geha liq che te koz buhq fea che yaog.
2 A nig ved Awr pa Ghig sa he lehq Jawd mawd Yer suq Khreq ve awg bon awg sinx he lehq duhd sa gad sa tug nig hehd geh cawg vid-oq.
Pawd loq Ghig sa ve bon haq chid muh che
3 A nig ved Jawd mawd Yer suq Khreq ve Awr pa Ghig sa haq chid muh-o. Yawd awr lehr har kax vix che Awr pa phehq lehq, duhd sa gad sa tug awg gha lia pehar sehr phad Ghig sa phehq che yaog.
4 Ngag hehd gha tuq gha khanr che awg gha lia awg khuhn yawd ngag hehd haq duhd sa tug tea che yaog. Kheh te lehq, Ghig sa ngag hehd haq duhd sa tug tea che heh te lehq, tuq che khanr che awg ceng gha lia gha khanr che chaw teq pa haq ngag hehd liz duhd sa vid tug tea gha che yaog.
5 Awg lawn ghod ver, Khreq gha tuq gha khanr che teq pa ngag hehd awg khuhn mad-ag che heh, Khreq haq te lehq ngag hehd ve duhd sa gad sa che ted ceng liz ngag hehd awg khuhn mad-ag che yaog.
6 Kheh te lehq, ngag hehd tuq che khanr che haq gha khanr ver, nig hehd awg pun duhd sa gad sa che awg ceng he lehq thaer khuhq che awg ceng phehq che yaog. Ngag hehd duhd sa gad sa ver, nig hehd awg pun duhd sa gad sa che awg ceng phehq che yaog. Ngag hehd gha tuq gha khanr che heh te lehq gha tuq gha khanr che teq pa haq nig hehd liz gha khanr che te yand, nig hehd yeg khanr ver, duhd sa gad sa che haq nig hehd gha tug yaog.
7 Nig hehd awg pun ngag hehd duhd law che ted ceng awr lehr yeg chehd che yaog. Awg lawn ghod ver, ngag hehd ve tuq che khanr che teq pa haq nig hehd gha khanr che heh, ngag hehd ve duhd sa gad sa che haq liz nig hehd gha tug yaog lehz ngag hehd sir che yaog.
8 A vix a nax teq paog, Ar siq muhd mig awg khuhn ngag hehd gha khanr peg che tuq che khanr che teq pa awg lawn nig hehd haq sir vid gad che yaog. Ngag hehd a saq gha teaq lawg lehz ma duhd vehr thad kha gag, ngag hehd khanr ma ghad che tuq jad khanr jad che teq pa ngag hehd haq nex kix lar che yaog.
9 Ngag hehd gha suh tug yaog lehz, suhx taz che haq ngag hehd gha khanr che heh yaog. Kheh ma khuhd ngag hehd awr lehr, ngag hehd awg ton haq ghad maq va lehq, suh vehr che chaw teq pa haq kawq teq tuag vid sehr phad Ghig sa haq lehax ghad va tug, che kheh te lar che yaog.
10 Yawd awr lehr, kheh taw maq ir jad che suh che ted ceng awg khuhn ngag hehd haq pong ax peg lehq kawq pong ax tug ser che yaog. Yawd ngag hehd haq kawq pong ax tug ser che haq liz, ngag hehd yawd haq duhd law chehd che yaog.
11 Nig hehd liz, bon ga lawg ax laoq. U kheh te ver, chaw laex ghad bon lawg cheaq te lehq ngag hehd gha che awg bon teq pa awg pun, chaw laex ghad Ghig sa haq chid muh tug yaog.
Pawd loq a thoq te lehq Kawd ren thuq med lo mad lag che awg lawn
12 Ngag hehd ni ma ir kig awr lehr che kheh yaog. Mig gig yad mehz khuhd suhr lehd ma koz, lex lehq nig hehd mehz khuhd suhr lehd ma koz, Ghig sa pehar che daq che kehg che he lehq thed che cawd che awg khuhn ngag hehd te che yaog lehz, ngag hehd ve sir vix che ni ma sax khiz khanr che yaog. Ngag hehd che kheh te che awr lehr, mig gig ve cud yiq haq ghad va che ma hez. Ghig sa ve awg bon haq ghad va che yaog.
13-14 Nig hehd ghawn gha lehq sir gha che awg ceng lehax ngag hehd nig hehd haq buhq ax che yaog. Nig hehd kha cawd cawad sir lar peg che heh, kha lawq sir lar tug ngag duhd law chehd che yaog. Nig hehd u kheh te sir lar che ver, a nig ved Jawd mawd Yer suq ve awg ni awg khuhn nig hehd haq te lehq ngag hehd ni ma ir kig cawg che heh, nig hehd liz ngag hehd haq te lehq ni ma ir kig cawg tug yaog.
15 Ngag che ve haq kha nehax yonr cheaq te lehq, nig hehd ni pawz kha gag awg bon gha tug, ngag nig hehd geh awg kawd lag tug yaog lehz, duhd lar che yaog.
16 Ngag Mar ker dawd niq muhd mig lo kae che te yand nig hehd geh ca gid lar haz lehq, Mar ker dawd niq muhd mig lo kawaq che te yand liz nig hehd chehd lo ca kawq gid-ag lehq, nig hehd ngag haq Yud daq muhd mig phawd awr lo sir kog ax tug haq liz ngag duhd lar che yaog.
17 Ngag che kheh duhd lar che te yand, ngag awr lehr thuhd duhd nuhg duhd te che awg la. Ma hez ver, mig gig yad teq pa te che heh, yag liz ma hez liz te pawaz lehax ngag koz che awg la.
18 Ghig sa kar tiq yeg che heh, ngag hehd nig hehd haq koz ax che tawd khuhd awr lehr, yag liz ma hez liz te pawz lehax koz che ma hez.
19 Awg lawn ghod ver, Sir lar nuz, Tiq mod ser, ngag hehd teq pa nig hehd haq koz mar lar che Ghig sa ve Yad phu Yer suq Khreq awr lehr, yag liz ma hez liz te pawaz lehax phehq che ma hez. Yawd awg khuhn lehax yag che yaog.
20 Ghig sa ve kar tiq tawd khuhd awg gha lia awr lehr, yawd awg khuhn yag che lehax te che yaog. Kheh te lehq, a nig Ghig sa haq chid ir chid muh che te yand, Yer suq haq te lehq a nig A meng lehd koz che yaog.
21 Nig hehd geh teq geha ngag hehd haq Khreq awg khuhn chehd yeg vid sehr phad he lehq lez yug ax sehr phad awr lehr, Ghig sa yaog.
22 Yawd awr lehr, a nig awg gha lia haq maex lar lehq, awg khaz nuhr awg sinx gha tug haq sir tug, a meha liz a nig ved ni ma awg khuhn Awg ha phu pehar lar peor.
23 Ngag nig hehd haq ma duhd har vid gad cheaq te lehq, ngag Kawd ren thuq med lo mad lag che lehz, Ghig sa sax khiz khanr tug ngag ved ni ma awg khuhn ngag yawd haq lawg che yaog.
24 Ngag hehd che kheh koz che awr lehr, nig hehd yonr che ted ceng haq ngag hehd uq penr che ma hez. Nig hehd gha ha lehg tug, ngag hehd nig hehd geh teq geha te che yaog. Awg lawn ghod ver, nig hehd yonr che awr lehr yeg chehd che yaog.