14
อาซา กซัต เมือง ยูด่า
1 เญือม เอีจ ยุม กซัต อาบี่ยา เซ, โฮลฮ โฮว อาวต ไม่ จัตเจือ ไพรม แตะ. ปุย โฮว รมอยจ อื นึง เมือง ด่าวิต เซ. ป โฮลฮ แปน กซัต ฆรอ อื เซ มัฮ อาซา กวน โกะ อื ไอฮ. เจน เซ เมือง ยูด่า อาวต เฮน ฮลอง เอิน กาว เนอึม.
2 กซัต อาซา เซ ยุฮ เนอึม ป ปุก รพาวม เยโฮวา พะจาว ทื แตะ เซ.
3 คัน โฮวน ป โกว ปุย ละ ไว แตะ พะ ยุฮ ปุย ตัง เมือง, ไม่ คัน ทไว ปุย นึง นาตี ฮลาวง เงอ, ซาวป ยุฮ ไลจ ไม่ อื. ตุฮ ด่อง ซโมะ ซัมคัน นึง อื, ฆู โรฮ ซกัง พะอาเชรา เซ โรฮ.
4 กซัต อาซา เซ เอีจ ซตอก โรฮ โม ยูด่า เกือฮ ซาวป ยุฮ ตอก ซ ปุก แตะ รพาวม เยโฮวา ป มัฮ พะจาว ยุฮ จัตเจือ ไพรม แตะ, ไม่ ยุฮ โรฮ อื ตัม โกตไม ยุฮ พะจาว เซ โรฮ.
5 เมาะ ไก คัน ทไว ป อาวต นึง นาตี ฮลาวง นึง เมือง ยูด่า โครยญ ย่วง, ไม่ คัน ทไว ปุย ป ซออย ฮงาื โฮวน โดฮ, ยุฮ เนอึม ไลจ ไม่ อื แกล เอิน. บั่นเมือง โฮลฮ อื ตัตเตียง เซ อาวต เฮน ฮลอง เนอึม ฆาื อื.
6 ไน ติ เจน เซ, กซัต อาซา ซาวป โฮว ยุฮ ปอม อาวต ตฮัน นึง เวียง ป อาวต ไน เคต เมือง ยูด่า เซ โฮวน โดฮ. มัฮ เบือ เรอึม พะจาว อื เกือฮ โฮลฮ อาวต เฮน อาวต ฮลอง ฮา กัน รุป แตะ เซ.
7 กซัต อาซา เซ อัฮ เฮี ละ โม ยูด่า เซ, “ไมจ โม เอะ โก ดิ ฆรุง เวียง โม เฮี เกือฮ ตอน ฮมัน. ไมจ โรฮ ยุฮ นา ก มอง แตะ แก ป ซ เกิต ละ เมือง อาวต แตะ เซ ราว อื. ไมจ โรฮ ยุฮ ไม่ รเวือะ เวียง เซ, ไม่ ควน ซแก อื เกือฮ ตอน โฮ. ปลัฮเตะ โม เฮี เยอ เอีจ มัฮ คอง เอะ, มัฮ เบือ เอีจ ซาวป เอะ ยุฮ ป ปุก รพาวม เยโฮวา พะจาว ยุฮ ฮุ. เคียง ยุฮ เอะ อื ตอก เซ พะจาว เอีจ เฆีญ เอะ ฮา ป ฆวต รุป ไม่ เยอะ โครยญ ลวง เอิน. เอะ โฮลฮ เนอึม อาวต เฮน อาวต ฮลอง ฆาื,” อัฮ เซ ละ ปุย. โม เซ ยุฮ เนอึม อื. กัน ยุฮ อื เซ จเลิน เนอึม ฆาื อื ปุ ปุ.
8 เญือม เซ กซัต อาซา ไก โม ตฮัน ยุฮ โฮวน. ตฮัน ไน เจอ ยูด่า ยุฮ อื ไก เอิน 300,000 ปุย. ไปญ ตื โล ไม่ เพลียฮ. โม ตฮัน ไน เจอ เบ่นยามิน ยุฮ อื ไก โรฮ 280,000 ปุย. ไปญ ตื โล แตวะ ไม่ ทนู. ตฮัน โม เซ เตือง โอยจ อื มัฮ ตื โม ตฮัน เกง ละ รุป แตะ.
9 ฟวยจ เซ ไก ปุย เมือง เอทิโอเปีย ติ ปุย, มอยฮ อื มัฮ เซรา. ปุย เซ เยอ โรวก โม ตฮัน ยุฮ แตะ ละ ฮาวก รุป แตะ ไม่ โม ยูด่า เซ. เซรา เซ ไก ตฮัน ยุฮ ติ ลัน ปุย เอิน. ไก แม เลาะ รุป เซิก ยุฮ 300 กัน. ฮาวก เนอึม ไม่ อื ฮอยจ นึง เวียง มาเรชา.
10 เญือม เซ กซัต อาซา โอก โฮว รุป เนอึม ปุ แตะ ไม่ อื. โม ตฮัน เตือง ลอา ก บลัฮ อื เซ เดี่จ เอิน ติ แตะ นึง โตะ โลก เซฟาทา ป ไก โบ เวียง มาเรชา เซ.
11 เญือม เซ กซัต อาซา ไววอน ละ พะจาว ยุฮ แตะ ตอก เฮี, “โอ พะจาว, มัฮ ปะ โน่ง ป เกียฮ เรอึม ป แตวะ เรียง เญือม ตอซู อื ไม่ ป ระ เรียง เงอ. เอะ ปัว ปะ เรอึม แตะ ปเลี่ย เฮี. โอ พะจาว ยุฮ เอะ, เอะ ฮอยจ ตอซู ไม่ โม ตฮัน โฮวน ลัมเลือ เฮี เบือ มอยฮ ระ ไล ยุฮ เปอะ. เอะ ปัว เปิง ปะ. ปะ มัฮ เปอะ พะจาว ยุฮ ฮุ. ปัว ปะ โอ เกือฮ ปุย ปลัฮเตะ เฮี ปุน เป เปอะ,” อัฮ เซ กซัต อาซา.
12 เญือม เซ พะจาว เกือฮ เนอึม โม เอทิโอเปีย เซ ไป นึง อาซา ไม่ โม ตฮัน ยูด่า เซ. โม เซ แตกฟุง เนอึม ฆาื อื.
13 อาซา ไม่ โม ตฮัน ยุฮ อื อาื แม โม เซ ฮอยจ นึง เวียง เกรา. ปุน ยุฮ เนอึม ยุม ไม่ ตฮัน โม เซ โฮวน. โม เอทิโอเปีย เซ ลอต เอิน ไป ลอป นึง โม อิซราเอน. มัฮ เนอึม พะจาว ป เกือฮ โม เซ ไป นึง ตฮัน ยุฮ ปุย ไน แตะ เซ. เญือม เซ โม ยูด่า ซาวป ซเพระ คาวคอง ยุฮ ตฮัน โม เอทิโอเปีย เซ, โฮลฮ อื โฮวน.
14 ฟวยจ เซ ตฮัน โม ยูด่า เยอ, โฮว ซะ เต แม ย่วง ป อาวต แควน เวียง เกรา เซ โครยญ ย่วง. โฮลฮ แม คาวคอง ป ไก นึง อื โฮวน, มัฮ ฆาื ฮลัต ลัมเลือ ปุย แควน เซ นึง พะจาว.
15 เญือม เซ โม เซ โฮว ซาวป แม โรฮ ซะ เต พากัง นา ก เลียง ปุย ซัตซิง ยุฮ แตะ. โฮลฮ แม ตุย โรวก แกะ ปิ ไม่ อุต โฮวน ตัว. ฟวยจ เซ ลอต เอีญ ไม่ อื ฮอยจ นึง เวียง เยรูซาเลม.