27
มอยฮ โม ฮัวนา ตฮัน
1 คัก เฮี อื มัฮ มอยฮ โม ป ระ ป คาว ไน โม อิซราเอน ตัม เจอ ตัม ซฆลาวม อื เตือง ไน ลอยะ ไน พัน ไม่ จาวไน ไฮญ นึง อื โรฮ. โม ตฮัน ไน โม อิซราเอน ป โฮลฮ เลียก นึง เวน ยุฮ กซัต โครยญ เวน ไน เคิ ติ ติ อี ไก เอิน ไม่ ปุ แตะ 24,000 ปุย เอิน. ยุฮ ลอป อื ตอก เซ โครยญ เคิ โครยญ เนอึม. ไก แม โรฮ ฮัวนา ระ ยุฮ โครยญ เคิ ติ เคิ ติ ปุย โรฮ.
2-15 ป โฮลฮ แปน ฮัวนา ตฮัน ละ ปุย ไน เคิ ติ นึง อื มัฮ ยาโชเบ่อัม กวน ซัปดี่เอน, มัฮ เจอ โม ยูด่า, ซฆลาวม โม เปเรต นึง อื.
เคิ ลอา นึง อื มัฮ โด่ได่, มัฮ ปุย ไน ซฆลาวม โม อาโฮอา. มิกโลต แปน รอง ฮัวนา ตฮัน นึง อื.
เคิ ลอวย นึง อื มัฮ เบ่ไนยา กวน เยโฮยาด่า ป มัฮ ซตุ เซ. เบ่ไนยา เซ มัฮ ฮัวนา โม ตฮัน เกง เลือ ง่วย ปุย เซ. อัมมีซาบั่ต กวน เบ่ไนยา เซ โฮลฮ โรฮ แปน ฮัวนา ตฮัน ฟวยจ แปน เบ่ไนยา อื เซ.
เคิ ปาวน นึง อื, มัฮ อาซาเฮน ปุ โยอัป ป โฮลฮ แปน ฮัวนา ตฮัน. ฟวยจ แปน อาซาเฮน อื เซ มัฮ เซบ่าดิ่ยา ป มัฮ กวน รเมะ โกะ อื ไอฮ.
เคิ พอน นึง อื มัฮ ชัมฮุต, มัฮ ปุย ไน ซฆลาวม อิตรา.
เคิ แลฮ นึง อื มัฮ อิรา กวน อิกเคต, มัฮ ปุย ย่วง เทโคอา.
เคิ อาแลฮ นึง อื มัฮ เฮเลต, มัฮ โม เอฟราอิม, ปุย ย่วง เปโลน.
เคิ ซเตะ นึง อื มัฮ ซิปเบ่ไค, มัฮ ปุย ย่วง ฮุชา (มัฮ โรฮ ซฆลาวม เซรา นึง เจอ ยูด่า.)
เคิ ซไตม นึง อื มัฮ อาบี่เยเซอ, มัฮ ปุย ย่วง อานาโทต, มัฮ เจอ เบ่นยามิน.
เคิ กาว นึง อื มัฮ มาฮะไร ปุย ย่วง เนโทฟา, มัฮ ปุย ไน ซฆลาวม โม เซรา.
เคิ กาว โรฮ ติ นึง อื มัฮ เบ่ไนยา ปุย ย่วง ปิราโทน, ไน เจอ เอฟราอิม.
เคิ กาว ลอา นึง อื มัฮ เฮนได่ ปุย ย่วง เนโทฟา, มัฮ ปุย ไน ซฆลาวม โอตนีเอน.
กัน ยุฮ ฮัวนา เจอ โม อิซราเอน
16-22 ป มัฮ ฮัวนา เจอ โม อิซราเอน เนอ มอยฮ อื มัฮ ตอก เฮี,
เจอ รูเบ่น มัฮ เอลีเอเซอ กวน ซิครี.
เจอ ซิเมโอน มัฮ เชฟาทิยา กวน มาอาคา.
เจอ เลวี มัฮ ฮาชาบิ่ยา กวน เคมูเอน.
จัตเจือ อาโรน มัฮ ซาโด่ก.
เจอ ยูด่า มัฮ เอลีฮู, มัฮ โรฮ เอียกตุ กซัต ด่าวิต.
เจอ อิตซาคา มัฮ โอมรี กวน มีคาเอน.
เจอ เซบู่ลุน มัฮ อิชไมอา กวน โอบ่าดี่.
เจอ นัปทาลี มัฮ เยรีโมต กวน อัตรีเอน.
เจอ เอฟราอิม มัฮ โฮเชยา กวน อาซาซิยา.
เจอ มะนาเซ ป อาวต ลวง เลียก ซเงะ มัฮ โยเอน กวน เปด่ายา.
เจอ มะนาเซ ป อาวต ลวง โอก ซเงะ มัฮ อิตโด่ กวน เซคาริยา.
เจอ เบ่นยามิน มัฮ ยาอาซีเอน กวน อัปเนอ.
เจอ ด่าน มัฮ อาซาเรน กวน เยโรฮัม.
23 เญือม เซ กซัต ด่าวิต เกือฮ โตว ปุย โจต เซน โม อิซราเอน ป ไก อาญุ อื เตียม ฮา ง่า เนอึม. มัฮ ฆาื ซันญา พะจาว ซ เกือฮ แตะ โม อิซราเอน โฮวน เอิน ตอก ซโมยญ นึง มะลอง โฮ.
24 ป แปน ป โจต เซน ปุย เญือม เซ เยอ มัฮ โยอัป กวน เซรุยา, ปังเมอ โอ ฟวยจ ยุฮ อื. เญือม เซ พะจาว เกือฮ โม อิซราเอน ลอก ตุต แตะ ฆาื ไลลวง เซ. มัฮ เซ ป โอ ปุย โฮลฮ ไซฮ อาึง ไลลวง เมาะ ไก เซน ปุย เญือม เซ ฆาื อื นึง นังซื ลักทัน ซัมคัน ยุฮ ด่าวิต เตอ.
โม ป แลน แก คาวคอง ยุฮ กซัต
25 คัก เฮี อื มัฮ มอยฮ โม ป แลน แก คาวคอง ยุฮ กซัต. ป โฮลฮ แลน คาวคอง ระ งวยฮ ยุฮ กซัต โตะ กไน เวียง เงอ มัฮ อัตมาเวต กวน อาดี่เอน. โยนาทัน กวน อุตซียา แปน โรฮ ป แลน แก คาวคอง ยุฮ กซัต ก พริ เวียง นึง ย่วง ระ ย่วง แตวะ ไม่ ปอม อาวต ตฮัน นึง อื โครยญ โดฮ.
26 ป แลน แก ชิจ ยุฮ อื ไม่ ควป คุม อื โม ป ยุฮ ชิจ เซ มัฮ เอซะรี กวน เคลูป.
27 ป แลน แก รปึม อะงุน ยุฮ อื มัฮ ชิเมอี ปุย ย่วง รามา. ป ควป คุม แลน แก นา ก อาวต รอาวม อะงุน ยุฮ อื มัฮ ซัปดี่ ปุย ย่วง เชฟัม.
28 ป แลน แก โคะ กาวก ยุฮ อื ไม่ โคะ เม ป อาวต นึง ตู เตียม เมอ, มัฮ บ่าอันฮานัน ย่วง เกเด่อ. ป โฮลฮ แลน แก นา ก ละ อื ลออยฮ กาวก ยุฮ แตะ มัฮ โยอัต.
29 ป โฮลฮ แลน โมวก ยุฮ อื นึง ลโลวง ชาโรน เนอ, มัฮ ชิตไร ปุย ย่วง ชาโรน. ป โฮลฮ แลน แก โมวก โฮวน ยุฮ อื ป อาึง อื นึง โตะ โลก เกอ, มัฮ ชาฟัต กวน อัตไล.
30 ป โฮลฮ แลน แก อุต ยุฮ อื มัฮ โอบิ่น, มัฮ โม อิซมาเอน. ป โฮลฮ แลน แก บรัง ยุฮ อื มัฮ เยด่ายา ปุย ย่วง เมโรโนต. ป โฮลฮ แลน แก ปิ, แกะ ยุฮ อื มัฮ ยาซิต, มัฮ โม ฮากา.
31 โม เซ เตือง โอยจ อื มัฮ ตื ป โฮลฮ แลน แก คาวคอง เญือะ กซัต ด่าวิต เซ.
มอยฮ ปุโฮมว ซิงซา ด่าวิต โอเอีฮ
32 โยนาทัน แอนระ ด่าวิต เตอ มัฮ ปุย เฮียง ปุย ยุง, ด่าวิต โฮลฮ ซิงซา โอเอีฮ ไม่ อื. โยนาทัน เซ ไม่ เยฮีเอน กวน ฮักโมนี แปน โรฮ ป แลน แก กัน เฮียน กวน กซัต ไม่ อื.
33 ปุ ซิงซา ลอา ปุย อื แม มัฮ อาฮิโทเฟน ไม่ ฮุไช. ฮุไช เซ มัฮ ปุย ซฆลาวม อาระคี, แปน โรฮ ปุโฮมว กซัต โรฮ.
34 ฟวยจ ยุม อาฮิโทเฟน เซ, ป โฮลฮ กซัต ซิงซา โอเอีฮ ไม่ อื มัฮ อาบี่ยาทา ไม่ เยโฮยาด่า กวน เบ่ไนยา. โยอัป โฮลฮ โรฮ แปน ฮัวนา ตฮัน ระ ยุฮ กซัต ด่าวิต เซ.