11
กัน ยุฮ ปุย ไมจ พันญา
1 ไมจ เปอะ ดุฮ ตึน แตะ ละ ซ กาไค เปอะ นึง ฮอยจ ตัง ปะเทต, ฟวยจ เซ กัง เคะ เอ ไก ติ ซเงะ ซ โฮลฮ เปอะ กัมไฮ อื.
2 โอเอีฮ ป โฮลฮ ป ปุน เปอะ ไมจ เปอะ รฆุ ละ ปุย โฮวน ปุย, นึง โอ เปอะ ยุง เญือม ซ ไลจ ซ โลง แตะ นึง ปลัฮเตะ เฮี.
3 โคะ ดัฮ ลเลอึม ลั่ก ออฮ, ตึน ซ ลอต เอิน อาวต ลั่ก เตฮ. เญือม เอีจ นาวก ชุต รวู นึง รอาวม ตึน ซ ลอต เอิน แปน เฮละ.
4 ดัฮ ปุย มอง แนฮ แก ฮอยจ เฮละ ฮอยจ กาื โฮ, ตึน โอ ซ โฮลฮ ซมา ไม่ โอ อื ซ โฮลฮ มัก โฮลฮ เปฮ โอเอีฮ ติ ชวง.
5 ไก โตว ป ยุง คระ โฮว กาื เยอ, ไก โตว ป ยุง ตอก มัฮ ตอก แปน เนะซอัง ปุย นึง โตะ เวียก มะ อื. ตอก โรฮ เซ ไก โตว โรฮ ป ยุง กัน ยุฮ พะจาว เยอ. พะจาว เซ มัฮ ป ยุฮ โอเอีฮ โครยญ เจือ.
6 ไมจ เปอะ ลอง แลน ซมา โอเอีฮ เวลา เมือ กซะ อื, เวลา เมือ กปู อื ไมจ โรฮ เปอะ ลอง แลน ซมา โรฮ, นึง โอ เปอะ ยุง ซ บริญ ไมจ อื ไม่ โอ อื บริญ.
7 กัน โฮลฮ ปุย ยุ ซเปีย มัฮ ป ไมจ ยุฮ รพาวม ปุย. กัน โฮลฮ ปุย ยุ ซเงะ มัฮ โรฮ ป มวน ยุฮ รพาวม ปุย.
8 ดัฮ ไก ป ลั่ง ไอม เมอ, ไมจ อื ยุง ญันดี่ ไม่ โฮลฮ แตะ จีวิต ลั่ง เลี่ญ แตะ เซ, ปังเมอ ไมจ อื เกือฮ ติ แตะ ยุง ไล เฮี, เวลา เญือม เอีจ ฟวยจ ยุม อื, ซ เลี่ญ ลัมเลือ ฮา เวลา เญือม ไอม ลั่ง อื. โอเอีฮ เมาะ ป ซ เกิต ลั่กกา ปุย เยอ มัฮ ตื ป โอ ไก ป มัฮ.
ลปุง ซตอก ละ โม ป นุม ลั่ง
9 โม เปะ โม ป นุม ลั่ง เงอ, เกือฮ ติ เปอะ ญันดี่ ไม่ มัฮ แตะ ป บุฮ โกะ ง่อน บุย, เกือฮ ติ เปอะ มวน รพาวม ไม่ เมิฮ. ยุฮ แนฮ โอเอีฮ ตัม รพาวม ฆวต ยุฮ เปอะ เมิฮ ไม่ ตัม ป ไมจ ละ ไง่ เปอะ โรฮ, ปังเมอ ไมจ เปอะ เกือฮ ติ แตะ โตก ละ มัฮ พะจาว ป ซ รเตีฮ กัน ยุฮ เปอะ เซ โครยญ เจือ.
10 ไมจ เปอะ ละ โปวฮ ควน ตุก เปละ นัม พาวม แตะ. ปุ ยุฮ โอเอีฮ ตอก ซ เกือฮ เปอะ แปน ป โซะ ละ เนะซอัง เปอะ. กัน มัฮ เปอะ ปุย บุฮ โกะ ง่อน บุย เซ มัฮ ป ไก จุบั่น โน่ง.