19
पवित्रता अऊर आचरन को नियम
फिर परमेश्वर न मूसा सी कह्यो, इस्राएलियों की पूरी मण्डली सी कहो कि तुम पवित्र बन्यो रहो; कहालीकि मय तुम्हरो परमेश्वर यहोवा पवित्र हय। तुम अपनी माय अऊर अपनो बाप को आदर करनो, अऊर मोरो आराम दिनों ख माननो : मय तुम्हरो परमेश्वर यहोवा आय।
तुम मूर्तियों को तरफ मत फिरो, अऊर धातु को देवतावों की मूर्तियां ढाल क मत बनावो; मय तुम्हरो परमेश्वर यहोवा आय।
जब तुम परमेश्वर लायी मेल-मिलाप बलि करो, तब असो बलिदान करो जेकोसी मय तुम सी खुश होय जाऊं। जो दिन ओको मांस बलिदान करो उच दिन यां ओको दूसरो दिन ओख खायो जाये, पर तीसरो दिन तक बच जाये ओख आगी म जलाय दियो जाये। यदि ओको म सी कुछ भी तीसरो दिन खायो जाये, त यो अशुद्ध ठहरेंन, अऊर स्वीकार नहीं करयो जायेंन, अऊर ओख खानवालो परमेश्वर को पवित्र चिज ख अपवित्र ठहरावय हय, येकोलायी ओख अपनो बुरो काम को बोझ खुद ख उठानो पड़ेंन; अऊर ऊ व्यक्ति अपनो लोगों म सी नाश करयो जायेंन।
फिर जब तुम अपनी जमीन की फसल काटो तब अपनो खेत को कोना कोना तक मत काटो, अऊर काट्यो हुयो फसल की गिरी पड़ी लोम्बा ख मत चुनो। 10 अऊर अपनी अंगूर की बाड़ी को पूरो अंगूर मत तोड़जो, अऊर अपनी अंगूर की बाड़ी को झड़्यो हुयो अंगूरों ख जमा मत करजो; उन्ख गरीब अऊर परदेशी लोगों लायी छोड़ देजो; मय तुम्हरो परमेश्वर यहोवा आय।
11 “तुम चोरी नहीं करनो, अऊर नहीं एक दूसरो सी कपट करनो, अऊर नहीं झूठ बोलनो। 12 तुम मोरो नाम की झूठी कसम खाय क अपनो परमेश्वर को नाम कलंकित मत करो; मय परमेश्वर यहोवा आय।
13 “एक दूसरो पर अन्धेर नहीं करनो, अऊर नहीं एक दूसरो ख लूटनो। मजूर की मजूरी तोरो जवर पूरी रात सबेरे तक नहीं रहनो चाहिये। 14 बहिरा ख श्राप नहीं देनो, अऊर अन्धा को आगु ठेस की चिज नहीं रखनो; अऊर अपनो परमेश्वर की भय रखो; मय परमेश्वर यहोवा आय।
15 “न्याय करतो समय अन्याय नहीं करनो; अऊर नहीं गरीब को पक्ष लेनो अऊर नहीं बड़ो आदमी को मुंह देख क बिचार करनो; एक दूसरो को न्यायीपन सी न्याय करनो। 16 तुम अपनो लोगों को बीच म निन्दा करतो नहीं फिरनो, अऊर एक दूसरो को खून बहावन की युक्ति नहीं बनावो; मय परमेश्वर आय।
17 “अपनो मन म एक दूसरो को खिलाफ घृणा नहीं रखो; अपनो पड़ोसी ख जरूर डाटनो, नहीं त ओको पाप को बोझ तोख उठानो पड़ेंन। 18 बदला नहीं लेनो, अऊर अपनो लोगों सी दुस्मनी नहीं रखनो, पर एक दूसरो सी अपनो जसो प्रेम रखो; मय परमेश्वर आय।
19 “तुम मोरी विधियों ख हमेशा मानो। अपनो जनावरों ख दूसरो जाति को जनावरों सी गर्भधारन मत होन देवो; अपनो खेत म दोय तरह को बीज मत बोवो; अऊर दोय तरह सी बन्यो हुयो कपड़ा मत पहिनो।
20 “यदि कोयी आदमी असी बाई को संग जो दासी हय, जेकी मंगनी दूसरो आदमी सी भयी होना, अऊर जेक दाम दे क मुक्त नहीं करयो गयो होना; यदि ओको सी कोयी कुकर्म करे, त उन दोयी ख सजा त मिलेंन, पर हि दोयी मार डाल्यो नहीं जाये। 21 पर ऊ आदमी मिलापवालो तम्बू को फाटक पर एक मेंढा दोषबलि लायी लाये। 22 अऊर याजक ओको करयो हुयो पाप को वजह दोषबलि को मेंढा को द्वारा ओको लायी परमेश्वर को सामने प्रायश्चित करे; तब ओको करयो हुयो पाप माफ करयो जायेंन।
23 “फिर जब तुम कनान देश म पहुंच क कोयी तरह को खान लायी सब तरह को फर को झाड़ लगावो, त उन्को फर तुम्हरो लायी तीन साल तक खतनारहित रहेंन; येकोलायी उन म सी कुछ नहीं खायो जाये। 24 अऊर चौथो साल म उन्को सब फर परमेश्वर की स्तुति भेंट को रूप म पवित्र ठहरे। 25 तब पाचवों साल म तुम उन्को फर खाय सकय हय, येकोलायी कि हि तुम्ख बहुत फर दे सके; मय तुम्हरो परमेश्वर यहोवा आय।
26 “तुम खून लग्यो हुयो कुछ मांस मत खावो। अऊर जादू-टोना मत करो, अऊर शुभ यां अशुभ मुहुर्तों ख मत मानो। 27 तुम अपनो मुंड को बाल घेरा रख क मत काटो, अऊर नहीं अपनी दाढ़ी ख किनारा सी काटो। 28 कोयी की मृत्यु को वजह अपनो शरीर पर चिरा मत लगावो, अऊर नहीं गुदना गुदवानो; मय परमेश्वर आय।
29 “अपनी टुरी ख वेश्या बनाय क अपवित्र नहीं करनो, असो नहीं होय कि देश वेश्यागमन को वजह दुष्टता सी भर जाये। 30 मोरो आराम दिन ख मानो, अऊर मोरो पवित्र जागा को डर मानो; मय परमेश्वर आय।”
31 “सलाह देन वालो अऊर भूत-प्रेत साधन वालो को तरफ मत फिरो, असो की खोज कर क् उन्को वजह अशुद्ध मत होय जावो; मय तुम्हरो परमेश्वर यहोवा आय।
32 “बुजूर्ग आदमी को सामने उठ क खड़ो होनो, अऊर बुजूर्ग आदमी को आदर करो, अऊर अपनो परमेश्वर सी हमेशा डरो; मय परमेश्वर आय।
33 “यदि कोयी परदेशी तुम्हरो देश म तुम्हरो संग रहेंन, त ओको संग बुरो व्यवहार मत करो। 34 जो परदेशी तुम्हरो संग रह्य हय ऊ तुम्हरो लायी स्वदेशी को जसो हो, अऊर ओको सी अपनो जसो प्रेम रखो; कहालीकि तुम भी मिस्र देश म परदेशी होतो; मय तुम्हरो परमेश्वर यहोवा आय।
35 “तुम न्याय म, अऊर पाप म, अऊर तौल म, अऊर नाप म अन्याय मत करो। 36 अऊर सच्चो तराजू, न्याय को बट, सच्चो नाप, सच्चो लिटर तुम्हरो जवर ठीक ठीक रहे; मय तुम्हरो ऊ परमेश्वर यहोवा आय जो तुम ख मिस्र देश सी निकाल लायो हय। 37 येकोलायी तुम मोरी सब विधियों अऊर सब नियमों ख मानतो हुयो हमेशा पालन करो; मय परमेश्वर आय।”
19:12 मत्ती ५:३३ 19:13 मत्ती २०:८; १ तीमुथियुस ५:१८; याकूब ५:४ 19:17 मत्ती १८:१५ 19:18 मत्ती ५:४३; मत्ती १९:१९; मत्ती २२:३९; मरकुस १२:३१-३३; लूका १०:२७; रोमियों १२:१९; रोमियों १३:९; गलातियों ५:१४; याकूब २:८ 19:32 १ तीमुथियुस ५:१