16
प्रायश्चित को दिन
1 जब हारून को दोय टुरा परमेश्वर को सामने जान को वजह मर गयो, ओको बाद परमेश्वर न मूसा सी बाते करी।
2 अऊर परमेश्वर न मूसा सी कह्यो, “अपनो भाऊ हारून सी कहो कि ऊ परदा को अन्दर परमपवित्र जागा म वाचा को सन्दूक को ऊपर को प्रायश्चित वालो ढक्कन को सामने, बीचवालो परदा को अन्दर, पवित्र जागा म हर समय सिरे, नहीं त मर जायेंन; कहालीकि मय प्रायश्चित वालो ढक्कन को ऊपर बादर म दिखायी देऊं।”
3 जब हारून पवित्र जागा म सिरे तब यो रीति सी सिरे, ऊ पापबलि लायी एक गोरा अऊर होमबलि लायी एक मेंढा ले क आये।
4 तब हारून सन को पवित्र कपड़ा पहिने, अऊर अपनो शरीर पर सन की जांघिया पहिने, अऊर सन को पट्टा बान्धे, अऊर सन को फेटा बान्धे, यो पवित्र कपड़ा आय, ऊ पानी सी नहान को बादच पहिने।
5 फिर ऊ इस्राएलियों की मण्डली को जवर सी पापबलि लायी दोय बकरा अऊर होमबलि लायी एक मेंढा लाये।
6 अऊर हारून ऊ पापबलि को गोरा ख चढ़ाय क अपनो अऊर अपनो परिवार लायी प्रायश्चित करे।
7 येको बाद ऊ दोयी बकरा ख ले क मिलाप वालो तम्बू को फाटक पर परमेश्वर को सामने खड़ो करे;
8 अऊर हारून दोयी बकरा पर चिट्ठियां डाले, एक चिट्ठी परमेश्वर लायी अऊर दूसरी अजाजेल लायी होयेंन।
9 अऊर जो बकरा पर परमेश्वर को नाम की चिट्ठी निकलेंन ओख हारून पापबलि लायी चढ़ाये;
10 पर जो बकरा पर अजाजेल लायी चिट्ठी निकलेंन ओख परमेश्वर को सामने जीन्दो खड़ो करयो जाये कि ओको पर प्रायश्चित करयो जाये, अऊर ओख अजाजेल लायी जंगल म छोड़ दियो जाये।
11 “हारून ऊ पापबलि को गोरा ख जो ओको लायी हय लाये, अऊर ओख बलिदान कर क् अपनो अऊर अपनो परिवार को पाप ख झाके।”
12 ऊ परमेश्वर को सामने वेदी पर जलतो हुयो कोयला सी भरयो हुयो धूपदान अऊर अपनी दोय मुट्ठी भर बारीक कूटी हुयी सुगन्धित धूप बीच वालो परदा को अन्दर लाये।
13 ऊ धूप ख परमेश्वर को आगु आगी म डाले, जेकोसी धूप को धुवा वाचा को सन्दूक पर गवाह चिट्ठी को ऊपर को प्रायश्चित को ढक्कन को ऊपर छाय जायेंन, नहीं त ऊ मर जायेंन;
14 तब ऊ बछड़ा खून म सी कुछ ले क पूर्व दिशा को तरफ प्रायश्चित को ढक्कन को ऊपर अपनो बोट सी छिड़क दे, अऊर फिर ऊ खून म सी कुछ बोट को द्वारा ऊ ढक्कन को सामने भी सात बार छिड़क दे।
15 फिर हारून ऊ पापबलि को बकरा ख जो साधारन लोगों लायी होयेंन बलिदान कर क् अऊर ओको खून ख बीच वालो परदा को अन्दर ले आये, अऊर जो तरह गोरा को खून सी ओन करयो होतो ठीक वसोच ऊ बकरा खून सी भी करे, मतलब ओख प्रायश्चित को ढक्कन को ऊपर अऊर ओको सामने छिड़क दे।
16 फिर ऊ पवित्र जागा लायी इस्राएली लोगों की अशुद्धता यां उन्को सब पापों को सम्बन्ध म करयो गयो अपराध को लायी प्रायश्चित पूरो करे अऊर यो तरह ऊ मिलाप वालो तम्बू को लायी भी करे, जो उन्की अशुद्धतावों को बीच उन्को संग रह्य हय।
17 जब हारून प्रायश्चित करन लायी पवित्र जागा म जाये, तब सी अपनो लायी अऊर घराना लायी अऊर इस्राएल की पूरी मण्डली लायी प्रायश्चित कर क् बाहेर निकलय तब तक कोयी भी मिलाप वालो तम्बू म नहीं रहे।
18 फिर ऊ निकल क ऊ वेदी को जवर जो परमेश्वर को सामने हय जाये अऊर ओको लायी प्रायश्चित करे, मतलब बछड़ा को अऊर बकरा को कुछ खून दोयी म सी कुछ ले क वा वेदी को चारयी कोना को सींगो पर लगाये।
19 अऊर ऊ खून म सी कुछ अपनो बोट सी सात बार ओको पर छिड़के। अऊर इस्राएली लोगों की अशुद्धता सी पवित्र करे।
बलि को बकरा
20 “जब हारून पवित्र जागा, मिलाप वालो तम्बू अऊर वेदी लायी पाप झाकन को बाद, एक जीन्दो बकरा ख लाये।
21 अऊर हारून अपनो जीन्दो बकरा को मुंड पर अपनो दोयी हाथ रख क इस्राएली लोगों को पूरो बुरो कामों, अऊर उन्को सब अपराधों, मतलब ओको पूरो पापों ख स्वीकार करे, अऊर उन्ख बकरा को मुंड पर रख क ओख कोयी आदमी को हाथ जो यो काम लायी तैयार रहे निर्जन जमीन म भेज क छोड़ दे।
22 यो बकरा इन्को सब बुरो कामों को बोझ अपनो ऊपर उठाय क निर्जन जमीन म लिजायेंन; येकोलायी ऊ आदमी ऊ बकरा ख जंगल म छोड़ दे।
23 “तब हारून मिलाप वालो तम्बू म आयेंन, अऊर जो सन को कपड़ा ख पहिन्यो हुयो ओन पवित्र जागा म सिरतो समय पहिन्यो होतो ओख उतार क वहांच पर रख दे।
24 फिर ऊ कोयी पवित्र जागा म पानी सी नहाय क अपनो कपड़ा पहिन ले, अऊर बाहेर आय क अपनी अऊर अपनो लोगों की होमबलि ख चढ़ाय क अपनो लायी अऊर लोगों को पापों ख झाकेंन।
25 फिर ऊ पापबलि की चरबी ख वेदी पर आगी म जलाये।
26 अऊर जो आदमी अजाजेल लायी बकरा ख छोड़ क आयेंन, अऊर ऊ अपनो कपड़ा धोयेंन, अऊर पानी सी नहायेंन तब ऊ छावनी म सिरेंन।
27 अऊर पापबलि को गोरा अऊर बकरा भी जिन्को खून पवित्र जागा म पाप ख झाकन लायी लायो गयो होतो, उन्ख छावनी को बाहेर लायो जायेंन अऊर वहां उन्की खाल, मांस अऊर गोबर आगी म जलाय दियो जायेंन।
28 अऊर जो उन्ख जलायेंन ऊ अपनो कपड़ा धोये, अऊर पानी सी नहान को बाद ऊ छावनी म सिर सकेंन।
प्रायश्चित को दिन माननो
29 “तुम लोगों लायी या विधि हमेशा लायी होयेंन कि सातवों महिना को दसवों दिन तुम अपनो अपनो जीव ख दु:ख देवो, अऊर ऊ दिन कोयी, चाहे ऊ तुम्हरो निजी देश को होना यां विदेश को होना तुम्हरो बीच म रह्य हय, कोयी भी तरह को काम काज नहीं करेंन;
30 कहालीकि योच ऊ दिन आय जो दिन तुम्ख शुद्ध करन लायी पापों ख झाक्यो जायेंन; अऊर तुम परमेश्वर को सामने अपनो पूरो पापों सी शुद्ध ठहरो।
31 यो तुम्हरो लायी परम आराम को दिन ठहरे, अऊर तुम ऊ दिन उपवास करो अऊर कोयी तरह को काम-काज मत करो; याच हमेशा की विधि आय।
32 अऊर अपनो बाप की जागा पर याजक पद लायी जेको अभिषेक करयो जाये, ऊ याजक सन को पवित्र कपड़ा पहिन क पाप ख झाके,
33 उच याजक पवित्र जागा, मिलाप वालो तम्बू अऊर वेदी लायी प्रायश्चित करे; अऊर सब याजकों अऊर मण्डली को सब लोगों लायी भी प्रायश्चित करे।
34 अऊर तुम्हरो लायी हमेशा की या विधि होयेंन कि इस्राएली लोगों लायी ओको सब पापों को वजह हर साल एक बार प्रायश्चित करयो जाय।”
मूसा न ठीक वसोच करयो, जसो परमेश्वर न आज्ञा दी होती हारून न करयो।